ᔪᐊᓇᓯᐅᑉ ᑕᑯᑎᑕᐅᓂᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᕐᕋᐅᔭᖅ ᐃᓄᖁᑎᖏᓪᓗ

¹ ᑕᑯᓴᕋᒪᓗ, ᑕᑯᕗᖓ, ᓄᕐᕋᐅᔭᕐᒥᒃ ᖃᖅᑲᒥ ᓮᐅᓂᒥ ᓇᖏᕐᑐᒥᒃ, ᓇᖏᖃᑎᖃᕐᓗᓂ 144,000ᓂᒃ ᐊᑎᖓᓂᒃ ᐊᑖᑕᖓᑕᓗ ᐊᑎᖓᓂᒃ ᑎᑎᕋᕐᕕᐅᓯᒪᔪᓂᒃ ᖃᐅᖏᑎᒍᑦ.

² ᓂᐱᒥᒡᓗ ᕿᓚᖕᒥᑦ ᑐᓴᕐᐳᖓ ᐃᒪᕐᔪᐃᑦ ᐃᒃᑑᓕᔮᕐᓂᖏᑎᑐᑦ ᑍᒤᑦᑐᒥᒃ ᑲᓪᓕᕐᑐᑎᑐᓪᓗ ᓂᐱᕐᔪᐊᖃᕐᐳᖅ; ᓂᐱᓗ ᑐᓴᕐᑕᕋ ᕼᐊᕐᐱᑦ ᑯᑭᑦᑕᐸᐅᑎᐅᔧᑦ ᓂᓪᓕᐊᑎᑕᐅᓂᖏᑎᑐᑦ ᑐᓴᕐᓴᐅᕗᖅ.

³ ᐃᓐᖏᕐᐳᓪᓗ ᐃᓐᖏᕈᒻᒥᒃ ᓄᑖᒥᒃ ᐃᒃᓯᕙᐅᑕᕐᔪᐊᑉ ᓵᖓᓂ ᐆᒪᔪᓪᓗ ᓯᑕᒪᑦ ᐊᖓᔪᖅᑳᖑᔪᓪᓗ ᓵᖏᓐᓂ. 144,000 ᐊᓯᖏᓐᓄᑦ ᐃᓕᑕᐅᔪᓐᓇᖏᑦᑐᒥᒃ ᐃᓐᖏᕐᐳᑦ ᑖᒃᑯᐊ ᐊᑭᓕᕐᑕᐅᓪᓗᑎᒃ ᐅᑎᕐᑎᑕᐅᓯᒪᔪᑦ ᓄᓇᕐᔪᐊᕐᒥᑦ.

⁴ ᑖᒃᑯᐊᓗ ᐃᒻᒥᖕᓂᒃ ᓴᓗᒤᓕᑎᓚᐅᓐᖏᓚᑦ ᐊᕐᓇᓂᒃ ᓄᓕᐊᕐᓂᕐᒧᑦ, ᐃᒻᒥᖕᓂᒃ ᐊᕐᓇᒥᒃ ᐃᓐᓇᖓᖃᑎᖃᓚᐅᕐᓯᒪᓐᖏᓐᓇᒥᒃ; ᓄᕐᕋᐅᔭᖅ ᒪᓕᖃᑦᑕᕐᐹᑦ ᓇᒧᑐᐃᓐᓇᖅ ᐂᓕᕌᖓᑦ; ᑖᒃᑯᐊ ᐊᑭᓕᕐᑕᐅᓪᓗᑎᒃ ᐅᑎᕐᑎᑕᐅᓯᒪᕗᑦ ᐃᓅᖃᑎᓕᒫᒥᖕᓂᑦ ᓯᕗᓪᓕᕐᐹᖑᕗᑦ ᒎᑎᒧᑦ ᓄᕐᕋᐅᔭᕐᒧᓪᓗ ᑐᓂᕐᕈᑕᐅᓯᒪᔪᓂᑦ,

⁵ ᓱᓕᖏᑦᑐᒥᒃ ᐅᖃᕐᑎᓪᓗᒋᑦ ᖃᐅᔨᔭᐅᓯᒪᓐᖏᓚᑦ, ᐸᓯᔭᒃᓴᐅᓂᖃᖏᓐᓇᒥᒃ.

ᐂᖏᓖᑦ ᐱᖓᓱᑦ

⁶ ᑭᖑᓂᖓᒍᑦ ᑕᑯᒋᕗᖓ ᐂᖏᓕᒥᒃ ᓯᓚᒃᑯᑦ ᖁᕝᕙᓯᓈᕐᓗᓂ ᖃᖓᑕᔪᒥᒃ, ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᓄᖑᓱᐃᑦᑐᓂᒃ ᐅᖃᐅᓯᒃᓴᓕᒃ ᓄᓇᕐᔪᐊᕐᒥᐅᓄᑦ, ᐃᓅᖃᑎᒌᒡᔪᐊᓕᒫᓄᑦ ᑭᖑᕚᕇᓄᑦ ᐅᖃᐅᓯᖃᑎᒌᖏᑦᑐᓄᑦ ᐃᓄᓕᒫᓄᑦ.

⁷ ᓂᐱᖅᑯᕐᑐᓪᓗᓂᓗ ᐅᖃᕐᐳᖅ, “ᒎᑎ ᐃᓕᕋᒋᓗᒍ ᓂᕐᑐᕐᑕᐅᓕ, ᒫᓐᓇ ᐃᓄᓕᒫᓂᒃ ᐃᖅᑲᕐᑐᐃᓂᒃᓴᖓ ᓇᓪᓕᐅᑎᖕᒪᑦ; ᑐᒃᓯᐊᕐᕕᒋᓯᐅᒃ ᐱᓐᖑᕐᑎᑦᓯᓚᐅᕐᑐᖅ ᕿᓚᖕᒥᒃ ᓄᓇᒥᒡᓗ, ᐃᒪᕐᕕᖕᒥᒡᓗ ᓄᓇᐅᓪᓗ ᐃᓗᐊᓂᑦ ᑰᒃᑐᓂᒃ.”

⁸ ᑕᕝᕙ ᐂᖏᓕᐅᑉ ᐂᑉᐸᖓ ᑭᖑᓂᖓᒍᑦ ᓴᖅᑭᒃᑭᕗᖅ, ᐅᖃᕐᓗᓂᓗ, “ᑲᑕᒃᓯᒪᓕᕐᐳᖅ, ᑲᑕᒃᓯᒪᓕᕐᐳᖅ ᐹᐱᓘᓂ ᐊᔪᖏᑦᑐᕐᔪᐊᖅ, ᐃᓅᖃᑎᒌᒡᔪᐊᓕᒫᓂᒃ ᐃᒥᕐᑎᑦᓯᓯᒪᔪᖅ ᐅᐂᓂᒥᒃ ᓴᓐᖏᔪᒥᒃ ᐃᒃᓯᒎᕐᑎᑦᓯᔪᒥᒃ.”

⁹ ᐂᖏᓕᐅᓪᓗ ᐱᖓᔪᐊᑦ ᑭᖑᓂᖓᒍᑦ ᓴᖅᑭᒃᑭᕗᖅ, ᓂᐱᖅᑯᕐᑐᓪᓗᓂᓗ ᐅᖃᕐᐳᖅ, “ᓇᓪᓕᐊᑦ ᑐᒃᓯᐊᕐᕕᖃᖃᑦᑕᕐᐸᑦ ᐆᒪᔪᐊᓗᖕᒥᒃ ᐊᑦᔨᖓᓂᒡᓘᓐᓃᑦ ᓴᓇᓯᒪᔪᒥᒃ, ᓇᓗᓁᒃᑯᑕᖓᓂᒡᓗ ᖃᐅᕐᒥᒍᑦ ᓇᓗᓁᒃᑯᓯᕐᑕᐅᓯᒪᒃᐸᑦ ᐊᒡᒐᖕᒥᒍᓪᓘᓐᓃᑦ,

¹⁰ ᑖᓐᓇᑦᑕᐅᖅ ᐃᒥᕐᑐᒃᓴᐅᕗᖅ ᐅᐂᓂᒥᒃ ᒎᑎᐅᑉ ᓂᓐᖓᐅᓯᖓᓂᒃ ᐃᒪᓕᖕᒥᒃ, ᑯᕕᔭᐅᓯᒪᔪᒥᒃ ᓴᓐᖐᓕᒋᐊᕐᓯᒪᖏᑦᑐᒥᒃ ᒎᑎᐅᑉ ᓂᓐᖓᐅᓯᖓᑕ ᖃᓪᓗᑎᖓᓄᑦ, ᐋᓐᓂᐊᑎᑕᐅᔪᒫᕐᐳᖅ ᐃᑯᒪᒧᑦ ᐳᔪᕐᒧᓪᓗ ᐃᑯᐊᓪᓚᕆᒃᑐᒧᑦ ᖃᒃᑭᓐᓇᕐᑐᒧᑦ ᐂᖏᓖᑦ ᐃᑦᔪᕐᓁᑦᑐᑦ ᓄᕐᕋᐅᔭᐅᓪᓗ ᓵᖓᓂ.

¹¹ ᐳᔪᕐᓗ ᐋᓐᓂᐊᑎᑕᐅᑦᔪᑎᒋᔭᖓᑦ ᖁᒻᒧᐊᖕᓂᐊᕐᐳᖅ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ; ᑕᕾᕐᓯᕐᕕᒃᓴᖃᕐᓂᐊᓐᖏᓚᑦ, ᐅᓪᓗᒃᑯᑦ ᐅᓐᓄᐊᒃᑯᓪᓗ, ᐆᒪᔪᐊᓗᖕᒥᒃ ᐊᑦᔨᖓᓂᒡᓗ ᓴᓇᓯᒪᔪᒥᒃ ᑐᒃᓯᐊᕐᕕᖃᕐᐸᒃᑐᑦ, ᓇᓗᓁᒃᑯᓯᕐᑕᐅᓯᒪᔪᓕᒫᑦ ᐆᒪᔪᐊᓘᑉ ᐊᑎᖓᑕ ᓇᓗᓁᒃᑯᑕᖓᓂᒃ.”

¹² ᑕᕝᕙᓂ ᕿᓄᐃᓵᕐᓂᖃᖁᔭᐅᕗᑦ ᐃᑦᔪᕐᓁᑦᑐᑦ, ᒎᑎᐅᑉ ᐱᖁᔭᖏᓐᓂᒃ ᓈᓚᒃᑐᑦ ᔩᓱᓯᒧᓪᓗ ᐅᒃᐱᕐᓂᖃᕐᓗᑎᒃ.

¹³ ᓂᐱᒥᒡᓗ ᕿᓚᖕᒥᑦ ᑐᓴᕐᐳᖓ ᐅᖃᕐᑐᒥᒃ, “ᑎᑎᕋᕆᑦ ᐅᑯᓂᖓ: ᓮᒪᓇᑐᒦᑉᐳᑦ ᐊᑕᓂᖅ ᐱᓪᓗᒍ ᐱᔨᑦᓯᕐᓗᑎᒃ ᑐᖁᔪᑦ.” ᐊᓂᕐᓂᖅ ᐅᖃᕐᐳᖅ, “ᐃᓛᒃ ᑐᓱᓐᓇᒻᒪᕆᒃᐳᑦ, ᑕᕾᕐᓯᕐᓂᐊᓕᕐᒪᑕ ᐱᓇᓱᐊᕐᓂᕆᓯᒪᔭᒥᖕᓂᑦ, ᐱᓂᐊᕐᓂᕆᓯᒪᔭᖏᑕ ᐃᓚᒋᓂᐊᕐᒪᒋᑦ!”

ᓄᓇᕐᔪᐊᕐᒥᑦ ᑲᑎᕐᓱᐃᓂᖅ

¹⁴ ᑕᑯᓴᕋᒪ, ᑕᑯᒋᑦ ᓄᕗᔭᑕᖃᕐᐳᖅ ᖃᑯᕐᑕᒥᒃ, ᓄᕗᔭᒥᓗ ᐃᒃᓯᕚᕐᑐᖅ ᐃᓅᑉ ᐃᕐᓂᖓᑐᑦ ᑕᐅᑦᑐᖃᕐᐳᖅ, ᒎᓗᒥᒃ ᓂᐊᖂᓯᕐᓯᒪᕗᖅ, ᐃᐱᒃᑐᒥᒡᓗ ᐃᕕᖕᓂᒃ ᓇᑲᑎᕆᑦᔪᑎᒥᒃ ᑎᒍᒥᐊᕐᓗᓂ.

¹⁵ ᐂᖏᓕᒥᒡᓗ ᐊᓯᐊᓂᒃ ᓴᖅᑭᑦᑐᖃᕆᕗᖅ ᑐᒃᓯᐊᕐᕕᒡᔪᐊᕐᒥᑦ ᐊᓂᔪᒥᒃ, ᓂᐱᖅᑯᕐᑐᓪᓗᓂᓗ ᓄᕗᔭᒥ ᐃᒃᓯᕚᕐᑐᒧᑦ ᐅᖃᕐᐳᖅ, “ᐱᕈᕐᑐᑦ ᓇᑲᑎᓕᒃᑭᑦ ᓇᑲᑎᕆᑦᔪᑎᖕᓄᑦ, ᑲᑎᕐᓱᐃᕕᒃ ᓇᓪᓕᐅᑎᖕᒪᑦ, ᓄᓇᕐᔪᐊᑉ ᐱᕈᕐᑐᖏᑦ ᓈᒻᒪᒃᓯᖕᒪᑕ ᑲᑎᕐᓱᕐᑕᐅᔪᓐᓇᕐᓯᕗᑦ.”

¹⁶ ᓄᕗᔭᒥᓗ ᐃᒃᓯᕙᔫᑉ ᓇᑲᑎᕆᑦᔪᑎᒥᓄᑦ ᓄᓇᕐᔪᐊᖅ ᐃᖏᕐᕋᑯᑖᒃᑎᒻᒪᒍ, ᓄᓇᕐᔪᐊᕐᒥ ᑲᑎᕐᓱᒐᒃᓴᑦ ᓇᑲᑎᕐᑕᐅᕗᑦ.

¹⁷ ᐂᖏᓕᒥᒡᓗ ᐊᓯᐊᓂᒃ ᑕᑯᒋᕗᖓ ᕿᓚᖕᒥᑦ ᑐᒃᓯᐊᕐᕕᒡᔪᐊᕐᒥᑦ ᐊᓂᔪᒥᒃ, ᑖᓐᓇᑦᑕᐅᖅ ᓇᑲᑎᕆᑦᔪᑎᒥᒃ ᐃᐱᒃᑐᒥᒃ ᑎᒍᒥᐊᕆᕗᖅ.

¹⁸ ᐂᖏᓕᐅᑦᑕᐅᖅ ᑖᑦᓱᒪ ᐊᓯᐊ ᓴᖅᑭᒃᑭᕗᖅ ᑐᓂᕐᕈᓯᕐᕕᖕᒥᑦ ᐊᓂᔪᖅ, ᑖᓐᓇ ᐃᑯᒪᒧᑦ ᐱᔪᓐᓇᕐᓂᖃᕐᑐᖅ, ᓂᐱᖅᑯᕐᑐᓪᓗᓂᓗ ᐂᖏᓕᒧᑦ ᐃᐱᒃᑐᒥᒃ ᓇᑲᑎᕆᑦᔪᑎᓕᔭᕐᑐᒧᑦ ᐅᖃᕐᐳᖅ, “ᓇᑲᑎᕆᑦᔪᑎᖕᓄᑦ ᐸᐅᕐᒊᑦ ᑲᑎᓐᖓᔪᑦ ᑲᑎᕐᓱᓕᒃᑭᑦ ᓄᓇᕐᔪᐊᑉ ᐱᕈᕐᓰᕕᖏᓐᓃᑦᑐᑦ, ᐸᐅᕐᒊᑦ ᐱᕈᕇᕐᓗᑎᒃ ᓇᑲᑎᕐᑕᐅᑐᐃᓐᓇᕆᐊᖃᓕᕐᒪᑕ.”

¹⁹ ᐂᖏᓕᐅᓪᓗ ᓇᑲᑎᕆᑦᔪᑎᒥᓄᑦ ᓄᓇᕐᔪᐊᖅ ᑎᓔᕐᒪᒍ ᐸᐅᕐᒊᑦ ᐱᕈᕐᕕᖏᓐᓂᑦ ᑲᑎᕐᓱᕐᐰᑦ, ᐃᒋᓪᓗᒋᓪᓗ ᐸᐅᕐᖓᓄᑦ ᐃᑦᑏᔭᕐᑕᐅᕕᖕᒧᑦ ᐊᖏᔪᒧᑦ ᑕᕝᕗᖓ ᒎᑎᐅᑉ ᓂᓐᖓᐅᓯᕐᔪᐊᖓᓄᑦ;

²⁰ ᐸᐅᕐᒊᓪᓗ ᖃᒐᕐᑎᑕᐅᕗᑦ ᐃᑦᑏᔭᕐᑕᐅᕕᖕᒥ ᐃᒡᓗᒐᓮᑦ ᓯᓚᑖᓂ, ᐊᐅᒡᓗ ᑰᓕᕐᐳᖅ ᐸᐅᕐᖎᑦ ᐃᑦᑏᔭᕐᑕᐅᕕᖓᓂᑦ, ᐃᒪᕈᕐᑎᑦᓯᓂᖓᓗ ᑕᑭᓂᖃᕐᐳᖅ 200ᒤᓕᓂᒃ, ᐃᑎᓂᖃᕐᓗᓂᓗ ᐃᑎᒊᑦ ᑕᓪᓕᒪᑦ ᖃᓂᒋᔮᓂ.