ᔪᐊᓇᓯᐅᑉ ᑕᑯᑎᑕᐅᓂᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᕐᓇᕐᓗ ᑐᕌᒎᓂᓗ

¹ ᕿᓚᖕᒥᓗ ᑕᑯᓕᒪᓇᖏᓪᓚᕆᒃᑐᒥᒃ ᓴᖅᑭᑦᑐᖃᕐᐳᖅ, ᐊᕐᓇᒥᒃ ᐊᓐᓄᕌᕐᓯᒪᔪᒥᒃ ᓯᕿᓂᕐᒥᒃ, ᐃᑎᒐᖏᓪᓗ ᐊᑎᒥᐅᑕᖃᕐᐳᑦ ᑕᖅᑭᕐᒥᒃ, ᓂᐊᖂᑎᖃᕐᓗᓂᓗ ᐅᓪᓗᕆᐊᓂᒃ 12ᓂᒃ.

² ᑖᓐᓇᓗ ᓄᑕᕋᒃᓴᖃᕋᒥ ᐃᕐᓂᓱᓕᕐᐳᖅ, ᐃᕐᓂᓱᖕᓂᕐᒧᓪᓗ ᐋᓐᓂᐊᒧᑦ ᓂᐹᕗᖅ, ᐊᒃᓱᐊᓗᒡᓗ ᐋᓐᓂᐊᕗᖅ ᐃᕐᓂᓕᕋᒥ.

³ ᓱᓕ ᓴᖅᑭᑦᑐᖃᕆᕗᖅ ᑕᑯᓕᒪᓇᖏᑦᑐᒥᒃ ᕿᓚᖕᒥ; ᑕᑯᒋᓪᓗ ᐊᐅᐸᕐᑐᒥᒃ ᑐᕌᒎᓂᒥᒃ ᐊᖏᔪᕐᔪᐊᕐᒥᒃ ᓴᖅᑭᑦᑐᖃᕐᐳᖅ, ᓂᐊᖁᖃᕐᑐᒥᒃ 7ᓂᒃ ᖁᓕᓂᒡᓗ ᓇᒡᔪᖃᕐᑐᒥᒃ, ᐊᖓᔪᖅᑳᕐᓯᐅᑎᓂᒡᓗ ᓂᐊᖁᓕᒫᖏᑦ ᓂᐊᖂᓯᕐᓯᒪᓪᓗᑎᒃ.

⁴ ᐅᓪᓗᕆᐊᓪᓗ ᐱᖓᓱᐃᓕᓪᓗᒋᑦ ᐱᖓᔪᖏᑦ ᐸᒥᐅᕐᒥᓄᑦ ᑏᒐᕐᐰᑦ ᕿᓚᖕᒥ, ᓄᓇᕐᔪᐊᕐᒧᓪᓗ ᑲᑕᒃᑎᓪᓗᒋᑦ. ᑐᕌᒎᓂᓗ ᐊᕐᓇᐅᑉ ᐃᕐᓂᓱᒃᑑᑉ ᓵᖓᓃᓕᕐᐳᖅ, ᐃᕐᓂᐊᕆᔭᖓᓂᒃ ᓂᕆᔪᒪᓪᓗᓂ ᐊᓂᑐᐊᕐᐸᑦ;

⁵ ᐊᕐᓇᕐᓗ ᐃᕐᓂᕐᑖᕐᐳᖅ, ᐃᓄᖃᑎᒌᒡᔪᐊᓕᒫᓂᒃ ᐊᐅᓚᑦᓯᔪᒃᓴᒥᒃ ᐊᔭᐅᑉᐱᐊᖃᕐᓗᓂ ᓴᕕᕋᔭᖕᒥᒃ, ᓄᑕᕋᑯᓗᒡᓕ ᐊᕐᓇᐅᑉ ᕿᑐᖓᕐᑖᖓ ᐂᔭᐅᕗᖅ ᖁᒻᒧᐊᒃᑎᑕᐅᓪᓗᓂ ᒎᑎᒧᑦ ᐃᒃᓯᕙᐅᑕᕐᔪᐊᖓᓄᓪᓗ,

⁶ ᐊᕐᓇᕐᓗ ᕿᒫᕗᖅ ᐃᓄᖃᔪᐃᑦᑐᒧᑦ, ᐃᓂᖃᓕᕐᐳᕐᓗ ᒎᑎᐅᑉ ᐊᑐᐃᓐᓇᕈᕐᓯᒪᔭᖓᓂ, ᑕᕝᕙᓂ ᑲᒪᒋᔭᐅᓂᐊᓕᕐᓗᓂ ᐅᓪᓗᓂᑦ 1,260ᓂᒃ.

⁷ ᑕᕝᕙ ᕿᓚᖕᒥ ᐅᓇᑕᕐᑐᖃᓕᕐᐳᖅ, ᒤᑯᓪ ᐂᖏᓕᖁᑎᖏᓪᓗ ᐅᓇᑕᓕᕐᐳᑦ ᑐᕌᒎᓂᒧᑦ; ᑐᕌᒎᓂᓗ ᐂᖏᓕᖁᑎᖏᓪᓗ ᐅᓇᑕᓕᕐᐳᑦ;

⁸ ᑐᕌᒎᓂᓕ ᓵᓚᒋᔭᐅᕗᖅ ᕿᓚᖕᒥᓗ ᐃᓂᒃᓴᖃᕈᓐᓃᕐᑎᑕᐅᓪᓗᑎᒃ.

⁹ ᑐᕌᒎᓂ ᐊᖏᔪᕐᔪᐊᖅ ᐊᒻᒧᑦ ᐃᒋᑕᐅᕗᖅ, ᑖᓐᓇ ᖁᒡᓗᒋᐊᑐᖃᖅ, ᐱᐅᖏᑦᑐᒥᒃ ᓵᑖᓇᓯᒥᒡᓗ ᑍᔭᐅᔪᖅ, ᓯᓚᕐᔪᐊᕐᒥᐅᓕᒫᓂᒃ ᐅᐃᕕᕆᒃᓯᔨ; ᓄᓇᕐᔪᐊᕐᒧᑦ ᐃᒋᑕᐅᕗᖅ, ᐂᖏᓕᖁᑎᖏᓪᓗ ᐃᓚᒋᓪᓗᒋᑦ ᐃᒋᑕᐅᖃᑕᐅᕗᑦ.

¹⁰ ᕿᓚᖕᒥ ᓂᐱᕐᔪᐊᕐᒥᒃ ᑐᓴᕐᐳᖓ, ᐅᖃᕐᑐᒥᒃ, “ᒫᓐᓇ ᒎᑎᐅᑉ ᐱᐅᓕᒃᓯᓂᖓ ᐱᔪᓐᓇᕐᓂᖓᓗ ᒎᑎᑦᑕᓗ ᐊᑕᓂᐅᕕᖓ ᙭ᔅᑑᓯᖓᑕᓗ ᐱᔪᓐᓇᕐᑎᑕᐅᓂᖓ ᑎᑭᑉᐳᑦ, ᐅᒃᐱᑑᖃᑎᑦᑎᓐᓂᒃ ᐸᓯᒡᓕᕐᑎ ᐃᒋᑕᐅᓯᒪᖕᒪᑦ, ᑍᒪᓐᖓᑦ ᐸᓯᒃᓯᐸᓚᐅᕐᑐᖅ ᐅᓪᓗᒃᑯᑦ ᐅᓐᓄᐊᒃᑯᓪᓗ ᒎᑎᑦᑕ ᓵᖓᓂ.

¹¹ ᐃᓅᖃᑎᑦᑕ ᓵᓚᒋᓚᐅᕐᐹᑦ ᓄᕐᕋᐅᔭᐅᑉ ᐊᐅᖓᒍᑦ ᓱᓕᑦᓯᐊᕐᓂᕐᒥᒡᓗ ᐅᖃᐅᓯᖃᕐᓂᕐᒥᒍᑦ; ᐃᓅᓯᕐᑎᒃ ᐊᓐᓂᕆᓇᒍ ᑐᖁᓚᐅᕐᒪᑕ.

¹² ᑍᒤᒻᒪᑦ ᕿᓚᖕᒥᐅᑕᐅᔪᓯ ᖁᕕᐊᓱᓕᕆᑦᓯ, ᑕᕝᕙᓂ ᐃᓂᖃᕐᑐᓯ! ᑲᑉᐱᐊᓐᓇᒦᒡᓕ, ᓄᓇᕐᔪᐊᕐᒥᐅᑕᐅᔪᓯ ᐃᒪᕐᕕᖕᒥᐅᑕᐅᔪᓯᓗ, ᓵᑖᓇᓯᐅᑉ ᑎᑭᕝᕕᒋᖕᒪᓯ ᓂᓐᖓᐅᒪᔪᕐᔪᐊᖑᓪᓗᓂ, ᖃᐅᔨᒪᒐᒥ ᐱᕕᒃᓴᑭᑦᑑᓕᕐᓂᕐᒥᓂᒃ!”

¹³ ᑐᕌᒎᓂ ᖃᐅᔨᓕᕋᒥ ᐃᒋᑕᐅᓯᒪᓂᕐᒥᓂᒃ ᓄᓇᕐᔪᐊᕐᒧᑦ, ᐊᕐᓇᖅ ᕿᓂᓕᕐᐹ ᑖᓐᓇ ᐃᕐᓂᕐᑖᓚᐅᕐᑐᖅ.

¹⁴ ᐊᕐᓇᕐᓕ ᑐᓂᓯᕕᐅᕗᖅ ᓇᒃᑐᕋᓕᒡᔪᐊᑉ ᐃᓴᕈᖏᖕᓂᒃ ᑎᖏᓗᓂ ᕿᒫᔪᓐᓇᖁᓪᓗᒍ ᐃᓄᖃᔪᐃᑦᑐᒧᑦ, ᑕᕝᕙᓂ ᑲᒪᒋᔭᐅᖁᓪᓗᒍ ᐱᕕᒃᓴᖓ ᓈᓚᐅᖏᓐᓂᖓᓂ, ᐊᕐᕌᒍᓂᒃ ᐱᖓᓱᓂᒃ ᓇᑉᐸᕐᒥᒡᓗ.

¹⁵ ᑕᕝᕙ ᑐᕌᒎᓂ ᖃᓂᕐᒥᒍᑦ ᐃᒪᕐᒥᒃ ᐊᓂᑎᑦᓯᕗᖅ ᑰᒃᑐᑎᑐᑦ, ᐊᕐᓇᖅ ᐃᒪᕐᒧᑦ ᓴᕐᕙᐅᖁᓪᓗᒍ.

¹⁶ ᐊᕐᓇᕐᓕ ᓄᓇᕐᔪᐊᕐᒧᑦ ᐃᑲᔪᕐᑕᐅᕗᖅ, ᓄᓇᕐᔪᐊᑉ ᖃᓂᓂ ᐂᑦᑕᕐᓗᒍ ᐃᒫᕐᔪᐊᖅ ᑐᕌᒎᓂᐅᑉ ᖃᓂᖓᓂᓐᖔᕐᑐᖅ ᐃᒥᕐᐹ.

¹⁷ ᑐᕌᒎᓂᓗ ᓂᓐᖓᒃᐳᖅ ᐊᕐᓇᒧᑦ, ᐊᕐᓇᐅᓪᓗ ᑭᖑᕚᖏᑕ ᐊᒥᐊᒃᑯᖏᓐᓂᒃ ᐅᓇᑕᕆᐊᕐᐳᖅ, ᑕᒤᓐᓂᒃ ᒎᑎᐅᑉ ᐱᖁᔭᖏᓐᓂᒃ ᓈᓚᒃᑐᓂᒃ ᓱᓕᓂᕐᒥᒡᓗ ᔩᓱᓯᐅᑉ ᓴᖅᑭᑎᓚᐅᕐᑕᖓᓂᒃ ᒪᓕᒃᑐᓂᒃ.

¹⁸ ᑐᕌᒎᓂᓗ ᓇᖏᕐᐳᖅ ᓯᐅᕋᕐᒥ ᐃᒪᕐᕕᐅᑉ ᓯᓈᓂ.