ᔪᐊᓇᓯᐅᑉ ᑕᑯᑎᑕᐅᓂᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᖏᓕ ᐊᒡᓚᖕᓂᒃ ᐃᒧᓯᒪᔪᓂᒃ ᒥᑭᔪᓂᒃ ᑎᒍᒥᐊᕐᑐᖅ

¹ ᑕᕝᕙ ᐂᖏᓕᒥᒃ ᐱᔪᓐᓇᕐᑐᕐᔪᐊᒥᒃ ᑕᑯᒋᕗᖓ ᕿᓚᖕᒥᑦ ᐊᖅᑲᕐᑐᒥᒃ, ᓄᕗᔭᐅᑉ ᐃᓗᐊᓃᑦᑐᒥᒃ, ᓂᐊᖁᖓᑕᓗ ᖁᓛᒍᑦ ᐊᔭᒍᑕᖃᕐᐳᖅ, ᑮᓇᖓᓗ ᓯᕿᓂᕐᑐᑦ ᑍᒤᑉᐳᖅ, ᓂᐅᖏᒡᓗ ᐃᑯᒪᔪᑎᑐᑦ ᓱᑲᕐᑎᑐᑦ ᑍᒤᑉᐴᒃ.

² ᐊᒡᓚᖕᓂᒡᓗ ᐃᒧᓲᓂᒃ ᒥᑭᔪᓂᒃ ᑎᒍᒥᐊᕐᐳᖅ ᐃᓯᕕᓯᒪᔪᓂᒃ. ᑕᓕᕐᐱᖕᒥᓄᓪᓗ ᑐᑎᒻᒥᕗᖅ ᐃᒪᕕᖕᒧᑦ, ᓴᐅᒥᖕᒥᓄᓪᓗ ᑐᑎᒻᒥᓪᓗᓂ ᓄᓇᒧᑦ,

³ ᓂᐱᖅᑯᕐᑐᓪᓗᓂᓗ ᓂᓪᓕᕐᐳᖅ, ᓔᔭᐅᑉ ᓂᓪᓕᐊᓂᖓᑐᑦ; ᓂᓪᓕᕇᕐᒪᑦ, ᑲᓪᓗᐃᑦ 7 ᑐᓴᕐᓴᕉᑎᕗᑦ ᐃᒃᑑᓕᔮᕐᓗᑎᒃ.

⁴ ᑲᓪᓗᐃᓪᓗ 7 ᓂᓪᓕᕐᒪᑕ ᑎᑎᕋᕈᒪᓕᓚᐅᕐᐳᖓ, ᓂᐱᒥᒡᓕ ᕿᓚᖕᒥᑦ ᑐᓴᕐᐳᖓ ᐅᖃᕐᑐᒥᒃ, “ᑲᓪᓗᐃᑦ 7 ᐅᖃᐅᓯᖏᑦ ᓇᕿᑦᔪᓯᒃᑭᑦ, ᑎᑎᕋᕐᑍᓕᓗᒋᑦ.”

⁵ ᐂᖏᓕᓗ ᑕᑯᖅᑲᐅᔭᕋ ᓇᖏᕐᑐᖅ ᐃᒡᓗᐊᓂᒃ ᑐᑎᒻᒥᔪᖅ ᐃᒪᕐᕕᖕᒧᑦ ᐃᒡᓗᐊᓂᒡᓗ ᓄᓇᒧᑦ ᑕᓕᓂ ᑕᓕᕐᐱᒃ ᐃᓵᒃᐹ ᕿᓚᖕᒧᑦ

⁶ ᐅᖃᕕᒃᐳᕐᓗ ᑖᑦᓱᒪ ᐃᓅᑦᓮᓐᓇᕐᑑᑉ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ ᐊᑎᖓᓂ, ᐱᓐᖑᕐᑎᑦᓯᓚᐅᕐᑑᓪᓗ ᕿᓚᖕᒥᒃ ᓄᓇᒥᒡᓗ ᐃᓗᓕᓕᒫᖏᓐᓂᒡᓗ, ᐃᒪᕐᕕᖕᓂᒡᓗ ᐃᓗᓕᓕᒫᖏᓐᓂᒡᓗ, ᓇᓪᓕᐅᑦᑐᒃᓴᐅᑉ ᑭᖑᕙᕆᐊᕐᓂᐊᕈᓐᓃᕐᓂᖓᓂᒃ.

⁷ ᐂᖏᓖᓪᓕ 7ᖓᑦᑕ ᑎᑦᑐᓚᐅᑦ ᓂᓪᓕᕐᑎᑉᐸᒍ, ᑕᕝᕙ ᒎᑎᐅᑉ ᓇᓗᓇᕐᓂᖏᑦ ᐅᖃᐅᓯᕆᓯᒪᔭᓂ ᐱᔨᒥᓄᑦ ᓇᓚᐅᑦᑍᔪᓄᑦ ᓇᓪᓕᐅᑎᑎᑦᓱᒫᕐᐰᑦ.

⁸ ᓂᐱᓗ ᕿᓚᖕᒥᑦ ᑐᓴᓚᐅᕐᑕᕋ ᐅᕙᓐᓄᑦ ᐅᖃᕐᑐᖅ ᑐᓴᓕᕆᕙᕋ, ᐅᖃᕐᓗᓂ, “ᐂᖏᓕᐅᑉ ᑎᒍᒥᐊᕐᑕᖏᑦ ᐊᒡᓔᑦ ᐃᓯᕕᓯᒪᔪᑦ ᐂᓕᒃᑭᑦ ᓇᖏᕐᓗᓂ ᐃᒡᓗᐊᓂᒃ ᑐᑎᒻᒥᔪᒥᑦ ᐃᒪᕐᕕᖕᒧᑦ ᐃᒡᓗᐊᓂᒡᓗ ᓄᓇᒧᑦ.”

⁹ ᐂᖏᓕᓗ ᐅᐸᒃᓗᒍ ᐅᖃᐅᑎᕙᕋ ᐊᒡᓚᖕᓂᒃ ᐃᒧᓲᓂᒃ ᒥᑭᑦᑐᓂᒃ ᑎᒍᒥᐊᕐᑕᖏᓐᓂᒃ ᐱᔪᒪᓪᓗᖓ; ᐅᖃᐅᑎᕚᖓᓗ, “ᑎᒍᓗᒋᑦ ᓂᕆᒃᑭᑦ; ᐊᕿᐊᕈᕐᓃᓕᕈᑎᒃ ᒪᒪᕈᓐᓃᕐᓂᐊᕐᐳᑦ, ᖃᓂᕐᓂ ᕼᐊᓂᑎᑐᑦ ᒪᒪᕐᑎᒋᒐᓗᐊᕐᑎᓪᓗᒋᑦ.”

¹⁰ ᐊᒡᓔᓪᓗ ᐃᒧᓲᑦ ᒥᑭᑦᑐᑦ ᑖᑦᓱᒪᓐᖓᑦ ᑎᒍᒐᒃᑭᑦ ᓂᕆᕙᒃᑲ; ᖃᓂᓐᓂ ᒪᒪᕐᐳᑦ ᕼᐊᓂᑎᑐᑦ ᓰᕐᓇᕐᑎᒋᓪᓗᑎᒃ, ᐄᓯᒪᓕᕋᒃᑭᓪᓕ ᐊᕿᐊᕈᓐᓃᓕᕐᓗᑎᒃ ᒪᒪᕈᓐᓃᕐᐳᑦ.

¹¹ ᐅᖃᐅᑦᔭᐅᓕᕐᐳᖓᓗ, “ᐅᖃᐅᓯᐅᖁᔭᐅᔪᓂᒃ ᐅᖃᐅᓯᖃᕐᑐᒃᓴᐅᕗᑎᑦ ᐃᓅᒐᓴᒡᔪᐊᓄᑦ ᐃᓅᓯᖃᑎᒌᖏᑦᑐᓄᑦ ᐅᖃᐅᓯᖃᑎᒌᖏᑦᑐᓄᓪᓗ, ᐊᖓᔪᖅᑳᕐᔪᐊᓄᓪᓗ.”