ᔪᐊᓇᓯᐅᑉ ᑕᑯᑎᑕᐅᓂᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒋᐊᕈᑎᖏᑦ

¹ ᐅᑯᐊ ᓇᓗᓁᕐᓯᕗᑦ ᔩᓱᓯ ᙭ᔅᑑᓯᐅᑉ ᑕᑯᑎᑦᓯᓂᖓᓂᒃ, ᒎᑎᐅᑉ ᐱᔨᓂ ᑕᑯᑎᓚᐅᕐᐹ ᐱᔪᒫᕐᑐᒃᓴᓂᒃ ᖃᐅᔨᖁᓪᓗᒍ ᐊᑯᓂᐅᖏᑦᑐᖅ ᓇᓪᓕᐅᑎᔪᒫᓕᕐᑐᓂᒃ; ᑕᒪᒃᑯᐊ ᖃᐅᔨᒃᑲᐅᑎᒋᓚᐅᕐᐰᑦ ᐱᔨᒥᓄᑦ ᔪᐊᓇᓯᒧᑦ ᐂᖏᓕᒥᒃ ᑎᓕᓯᓪᓗᓂ.

² ᔪᐊᓇᓯ ᓇᓗᓁᕐᓯᓚᐅᕐᐳᖅ ᒎᑎᐅᑉ ᐅᖃᐅᓯᖓᓂᒃ ᐅᓐᓂᕐᓯᐅᕈᑎᖃᕐᓗᓂᓗ ᔩᓱᓯ ᙭ᔅᑑᓯᒥᒃ, ᑕᒤᓐᓂᒃ ᑕᑯᓚᐅᕐᑕᒥᓂᒃ.

³ ᓮᒪᓇᕐᑐᒦᑉᐳᖅ ᑖᒃᑯᓂᖓ ᐅᖃᓕᒫᕐᑐᖅ ᓇᓚᐅᑦᑍᔪᑕᐅᓯᒪᔪᓂᒃ, ᓮᒪᓇᕐᑐᒦᑭᕗᑦ ᑕᒪᒃᑯᓂᖓ ᐱᔪᒫᕐᑐᒃᓴᓂᒃ ᑐᓴᕐᑐᑦ, ᓈᓚᒃᑐᓪᓗ ᑕᕝᕙᓂ ᑎᑎᕋᕐᑕᐅᓯᒪᔪᓂᒃ, ᓇᓪᓕᐅᓐᓂᒃᓴᖏᑦ ᖃᓂᑦᑑᓕᕐᒪᑕ.

ᐅᒃᐱᕐᑑᖃᑎᒌᓄᑦ 7ᓄᑦ ᐅᖃᐅᓰᑦ

⁴ ᔪᐊᓇᓯᒥᑦ ᐅᒃᐱᕐᑑᖃᑎᒌᓄᑦ 7ᓄᑦ ᐂᓯᐊᒦᑦᑐᓄᑦ: ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᓮᒻᒪᕐᑎᑦᓯᓂᖓᑕᓗ ᐃᓚᒋᓕᓯ ᒫᓐᓇ ᑍᒤᓕᖓᔪᖅ, ᑍᒤᓚᐅᕐᑐᖅ, ᐱᔪᒫᕐᑐᒥᓗ ᑍᒤᓱᒫᕐᒥᔪᖅ, ᐊᓂᕐᓂᕐᓂᓪᓗ 7ᓂᑦ ᐃᒃᓯᕙᐅᑕᕐᔪᐊᖓᑕ ᓵᖓᓃᑦᑐᓂᑦ,

⁵ ᔩᓱᓯ ᙭ᔅᑑᓯᒥᓪᓗ ᓱᖁᓯᔪᐃᑦᑑᓪᓗᓂ ᖃᐅᔨᑎᑦᓯᔪᒥᑦ, ᐃᕐᓂᕐᑖᕆᔭᐅᖄᕐᓯᒪᔪᒥᑦ ᑐᖁᖓᔪᓂᑦ ᒪᑭᑎᑕᐅᓯᒪᔪᓂᑦ, ᐊᖓᔪᖅᑳᕐᔪᐊᖑᔪᒥᓪᓗ ᐊᖓᔪᖅᑳᕐᔪᐊᓕᒫᓄᑦ ᓄᓇᕐᔪᐊᕐᒥ. ᑖᑦᓱᒪ ᓇᒡᓕᒋᖕᒪᑎᒍᑦ ᕿᓚᕈᑦᔮᓚᐅᕐᐹᑎᒍᓪᓗ ᐊᔪᕐᓂᑦᑎᓐᓂᑦ ᐊᐅᖕᒥᓄᑦ.

⁶ ᑐᓂᕐᕈᓯᕐᑎᑦᓯᔨᓐᖑᕐᑎᑉᐹᑎᒍᓪᓗ ᐊᑕᓂᐅᕕᖕᒥᓂ ᐱᔨᑦᓯᖁᓪᓗᑕ ᒎᑎᖓᓂᒃ ᐊᑖᑕᖓᓂᒡᓗ, ᑖᑦᓱᒪ ᐱᓐᓇᕐᓇᕐᓂᕐᔪᐊᖅ ᐱᒋᓕᐅᒃ ᐊᖓᔪᖅᑲᐅᓂᕐᓗ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒦᓐ.

⁷ ᑕᑯᒋᑦ, ᓄᕗᔭᑎᒍᑦ ᕾᓕᕐᐳᖅ, ᑕᒪᕐᒥᒡᓗ ᑕᑯᔪᒫᕐᐹᑦ, ᑖᑦᓱᒥᖓ ᑲᐱᓯᓚᐅᕐᑐᑦᑕᐅᖅ ᑕᑯᔪᒫᕆᕗᑦ; ᐃᓄᐃᓪᓗ ᓄᓇᕐᔪᐊᕐᒥᐅᓕᒫᑦ ᕿᐊᔪᒫᕐᐳᑦ ᑖᓐᓇ ᐱᓪᓗᒍ. ᐊᑏ ᑍᒤᓕᕐᓕ. ᐋᒦᓐ.

⁸ “ᐋᓪᐸᐅᕗᖓ ᐅᒥᒐᐅᓪᓗᖓᓗ,” ᐱᒋᐊᕐᓂᐅᕗᖓ ᑭᖑᓪᓕᕐᐸᐅᓪᓗᖓᓗ, ᐊᑕᓂᖅ ᒎᑎ ᐅᖃᕐᐳᖅ, ᒫᓐᓇ ᑍᒤᑦᑐᖅ ᑍᒤᓚᐅᕐᑐᕐᓗ ᑍᒤᖏᓐᓇᕐᓂᐊᕐᑐᕐᓗ ᐊᔪᒐᖃᖏᑦᑐᖅ.

᙭ᔅᑑᓯᐅᑉ ᑕᑯᑎᑦᓯᑦᔪᑎᒃᑯᑦ ᓴᖅᑭᓐᓂᖓ

⁹ ᔪᐊᓇᓯᐅᕗᖓ, ᐅᒃᐱᑑᖃᑎᓯ, ᔩᓱᓯᒥᒃ ᒪᓕᒃᑎᐅᓂᓐᓄᑦ ᐃᓕᑦᓯᓐᓄᑦ ᐋᓐᓂᐊᓇᕐᑐᑎᒎᖃᑕᐅᕗᖓ ᕿᓄᐃᓵᖃᑕᐅᓪᓗᖓᓗ ᑎᑭᐅᑎᕙᒃᑐᑎᒍᑦ ᑖᑦᓱᒪ ᐊᑕᓂᐅᕕᖓᓂ ᐃᓅᔪᓄᑦ, ᕿᑭᕐᑕᒧᑦ ᐹᑦᒨᓯᒥᒃ ᐊᑎᓕᖕᒧᐊᕐᑕᐅᓚᐅᕐᐳᖓ ᒎᑎᐅᑉ ᐅᖃᐅᓯᖓᓂᒃ ᐱᑦᔪᑎᖃᕐᓗᑎᒃ ᔩᓱᓯᒥᒡᓗ ᓇᓗᓁᕐᓯᖃᑦᑕᕐᓂᓐᓄᑦ.

¹⁰ ᐊᑕᓂᐅᓪᓕ ᐅᓪᓗᖓᓂ ᐊᓂᕐᓂᕐᒦᓕᓚᐅᕐᐳᖓ, ᑐᓴᕐᓗᖓᓗ ᑐᓄᓐᓂᑦ ᓂᐱᒥᒃ ᓂᐱᖅᑯᕐᑐᔪᒥᒃ ᑎᑦᑐᓚᐅᑎᑎᑐᑦ.

¹¹ ᐅᖃᕐᓗᓂ, “ᑕᑯᔭᕐᓂᒃ ᑎᑎᕋᕆᑦ ᑎᑎᕋᕐᑕᑎᓪᓗ ᐊᐅᓪᓚᕐᑎᓪᓗᒋᑦ ᐅᒃᐱᕐᑑᖃᑎᒌᒃᑐᓄᑦ 7ᓄᑦ, ᐃᐱᓲᓯᒧᑦ ᓯᒨᕐᓇᒧᓪᓗ ᐴᕐᒐᒪᒻᒧᓪᓗ ᑍᐊᑍᕋᒧᓪᓗ ᓵᕐᑏᓯᒧᓪᓗ ᐱᓚᑕᐅᓪᕕᐊᒧᓪᓗ ᓚᐅᑏᓯᐊᒧᓪᓗ.”

¹² ᑕᕝᕙ ᑐᓄᓐᓄᑦ ᑕᑯᓴᕐᐳᖓ ᐅᕙᓐᓄᑦ ᐅᖃᓪᓚᒃᑐᒥᒃ ᑕᑯᔪᒪᓪᓗᖓ, ᕿᕕᐊᕋᒪᓗ ᑕᑯᕗᖓ 7ᓂᒃ ᖃᐅᒻᒪᖅᑯᑎᐅᑉ ᐃᓂᖏᓐᓂᒃ ᒎᓗᓂᒃ.

¹³ ᑖᒃᑯᐊᓗ ᐊᑯᓐᓂᖓᓃᑦᑐᖃᕐᐳᖅ ᐃᓅᑉ ᐃᕐᓂᖓᑐᑦ ᑕᐅᑦᑐᖃᕐᑐᒥᒃ, ᑕᑭᔪᒥᒃ ᐊᓐᓄᕌᕐᓯᒪᔪᒥᒃ ᒎᓗᒥᒡᓗ ᑕᑦᓯᐅᔭᖅᑲᕐᓗᓂ ᓴᒡᕕᖕᒥᒍᑦ.

¹⁴ ᓂᐊᖁᖓ ᓄᔭᖏᓪᓗ ᖃᑯᕐᑕᐅᕗᑦ ᓰᐱᐅᑉ ᒥᖅᑯᖏᑎᑐᑦ, ᐊᐳᑎᑐᓪᓗ ᖃᑯᕐᑎᒋᓪᓗᑎᒃ; ᐃᔨᖏᒡᓗ ᐃᑯᒪᔪᑎᑐᑦ ᑍᒤᑉᐴᒃ,

¹⁵ ᐃᑎᒐᖏᑦ ᑲᓐᓄᔭᑎᑐᑦ ᑍᒤᑉᐳᑦ, ᐃᑯᒪᒧᑦ ᕿᓚᕆᒃᓴᕐᑕᐅᓯᒪᔪᑎᑐᑦ, ᓂᐱᖓᓗ ᒪᓕᐊᓗᐃᑦ ᐃᒃᑐᑑᕐᓂᖓᑎᑐᑦ ᑍᒤᑉᐳᖅ;

¹⁶ ᑕᓕᕐᐱᖕᒥᓂᓗ ᐅᓪᓗᕆᐊᓂᒃ 7ᓂᒃ ᑎᒍᒥᐊᕐᐳᖅ, ᖃᓂᖓᓂᓪᓗ ᓄᐃᔪᖃᕐᐳᖅ ᓴᕕᒡᔪᐊᒥᒃ ᐃᒡᓗᒃᑐᑦ ᑮᓇᓕᖕᒥᒃ, ᑮᓇᖓᓗ ᓯᕿᓂᐅᑉ ᖃᐅᒻᒪᕆᖕᓂᕐᐹᖓᑎᑐᑦ ᖃᐅᒪᑎᒋᕗᖅ.

¹⁷ ᑕᑯᒐᒃᑯ, ᐃᑎᒐᖏᓐᓄᑦ ᐅᕐᕈᕗᖓ ᑐᖁᔪᑎᑐᑦ. ᑕᓕᕐᐱᖕᒥᓄᓪᓗ ᐊᒃᑐᕐᓗᓂᖓ ᐅᖃᐅᑎᕚᖓ, “ᑲᑉᐱᐊᓱᖕᓇᒃ, ᓯᕗᓪᓕᕐᐹᖑᕗᖓ ᑭᖑᓪᓕᕐᐹᖑᓪᓗᖓᓗ

¹⁸ ᐆᒻᒪᕗᖓ; ᑐᖁᓚᐅᕋᓗᐊᕐᑐᖓ, ᒫᓐᓇᓕ ᑕᑯᒋᑦ ᐆᒪᓂᐊᓕᕐᐳᖓ ᐃᓱᖃᖏᑦᑐᒧᑦ, ᑐᖂᑉ ᑲᑉᐱᐊᓇᕐᑐᕕᐅᓪᓗ ᐅᒃᑯᐃᕈᑎᖏᓐᓂᒃ ᐱᖃᓕᕐᐳᖓ.

¹⁹ ᑕᑯᔭᑎᑦ ᑎᑎᕋᓕᒃᑭᑦ, ᒫᓐᓇ ᖃᓄᐃᓕᖓᓂᖏᑦ ᑭᖑᓂᖓᒍᓪᓗ ᓇᓪᓕᐅᑎᔪᒫᕐᑐᑦ.

²⁰ ᑕᑯᖅᑲᐅᔭᑎᑦ ᐅᓪᓗᕆᐊᑦ 7 ᑕᓕᕐᐱᓐᓄᑦ ᑎᒍᒥᐊᕐᑕᒃᑲ ᓇᓗᓇᕐᑐᑦ, ᒎᓗᐃᓪᓗ ᖃᐅᒻᒪᖁᑎᐅᑉ ᐃᓂᖏᑦ 7; ᐅᓪᓗᕆᐊᓪᓗ 7 ᐂᖏᓕᒋᔭᐅᕗᑦ ᐅᒃᐱᕐᑑᖃᑎᒌᓄᑦ 7ᓄᑦ ᐊᒻᒪᓗ 7 ᖃᐅᒻᒪᖅᑯᑎᐅᑉ ᐃᓂᖏᑦ ᐅᒃᐱᕐᑑᖃᑎᒌᖑᕗᑦ 7.”