ᐃᓐᖏᕈᑎᑦ 94 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎ ᓴᐳᑦᔭᐅᕕᒃᓴᐅᕗᖅ ᓇᓛᒎᕐᑐᓄᑦ 1 ᐊᑕᓃᖅ ᒎᑏ ᓱᒋᐊᕐᓯᓂᕐᒥᒃ ᐱᖃᕐᐳᑎᑦ, ᒎᑏ ᓱᒋᐊᕐᓯᓂᕐᒥᒃ ᐱᑕᖃᕋᕕᑦ, ᓴᖅᑭᓕᕆᑦ! 2 ᒪᑭᓪᓗᑎᑦ, ᓄᓇᕐᔪᐊᖅ ᐋᖅᑭᒃᓱᓕᕈᒃ; ᐱᐅᔪᕆᔪᑦ ᓱᒋᐊᓚᐅᒃᑭᑦ ᐱᔪᒃᓴᐅᓂᖏᑦ ᒪᓕᒡᓗᒋᑦ. 3 ᐊᑕᓃᖅ ᐱᐅᖏᑦᑐᑦ ᖃᓄᖅ ᐊᑯᓂᐅᑎᒋᓂᐊᕐᐸᑦ, ᖃᓄᖅ ᐊᑯᓂᐅᑎᒋᔪᖅ ᐱᐅᖏᑦᑐᑦ ᖁᕕᐊᓲᑎᖃᕐᓂᐊᕐᐸᑦ? 4 ᐅᖃᓪᓚᖃᑦᑕᕐᐳᑦ ᐱᐅᔪᕆᓪᓗᑎᒃ, ᓱᓇᓕᒫᓂᒃ ᒥᑕᐅᑎᖃᕐᓗᑎᒃ; ᐱᐅᖏᑦᑐᓕᔪᑦ ᐱᓂᐊᕐᑕᓕᒫᒥᖕᓂᒃ ᐱᐅᔪᕆᑦᔪᑎᖃᖃᑦᑕᕐᐳᑦ. 5 ᐊᑕᓃᖅ ᐃᓄᖁᑎᑎᑦ ᑖᒃᑯᓄᖓᑦ ᓯᖁᒥᑎᑕᐅᕗᑦ, ᑭᖑᕐᖑᑦᔨᔪᒃᓴᖁᑎᑎᑦ ᐋᓐᓂᕐᓯᕐᐰᑦ. 6 ᐅᐃᒡᒐᕐᓃᑦ ᓄᓇᖃᕐᑐᑐᖃᐅᖏᑦᑐᓪᓗ ᑐᖁᑉᐰᑦ, ᐃᓕᐊᕐᔪᐃᓪᓗ ᐃᓄᐊᕐᐰᑦ. 7 ᐅᖃᕐᓗᑎᒡᓗ, “ᐊᑕᓂᖅ ᑕᑯᓐᓇᓐᖏᓚᖅ; ᔧᑰᓪᓗ ᒎᑎᖓ ᐃᒃᐱᒍᓱᒐᓂ.” 8 ᑐᑭᓯᓕᕆᑦᓯ, ᓯᓔᓐᓂᕐᐸᐅᔪᓯ ᐃᓄᖕᓂᑦ! ᓯᓔᑦᑑᔪᓯ, ᖃᖓᓕ ᓯᓚᑦᑐᓛᕋᓗᐊᕐᐱᓰ? 9 ᓯᐅᑎᒥᒃ ᐃᓕᓯᓚᐅᕐᑐᖅ, ᑐᓵᖏᑦᑑᔪᓐᓇᕐᐹ? ᐃᔨᒥᒃ ᓴᓇᓚᐅᕐᑐᖅ, ᑕᑯᓐᓇᖏᑦᑑᔪᓐᓇᕐᐹ? 10 ᐃᓅᖃᑎᒌᒡᔪᐊᓂᒃ ᓱᒋᐊᕐᓯᓚᐅᕐᑐᖅ, ᐋᖅᑭᒋᐊᕐᓯᔪᓐᓇᓐᖏᓛᖅ? ᐃᓄᖕᓂᒃ ᖃᐅᔨᒪᓂᕐᒥᒃ ᐊᔪᕆᕐᑐᐃᓯᒪᔪᖅ ᖃᐅᔨᒪᓐᖏᓛᖅ? 11 ᐊᑕᓂᖅ ᐃᓄᐃᑦ ᐃᓱᒪᖏᓐᓂᒃ ᖃᐅᔨᒪᕗᖅ, ᖃᐅᔨᒪᕔᓪᓗ ᐱᑦᔪᑎᒋᓇᓱᐊᕐᑕᖏᑦ ᓱᒃᓴᐅᖏᒻᒪᑕ. 12 ᖁᕕᐊᓱᒍᑎᒃᓴᖃᕐᐳᖅ ᐃᓄᒃ ᓱᒋᐊᕐᑕᐅᔪᖅ ᐃᓕᖕᓄᑦ ᐊᑕᓃᖅ, ᐊᔪᕆᕐᑐᕐᑍᓪᓗ ᐱᖁᔭᕐᓂᑦ ᐱᔪᒥᒃ. 13 ᑖᓐᓇ ᑕᕾᕐᓯᕐᕕᒃᓴᖃᕐᑎᓐᓇᕕᐅᒃ ᐅᓪᓗᓂᑦ ᐊᑲᐅᓐᖏᓕᐅᕐᓇᕐᑐᓂᑦ, ᐱᐅᖏᑦᑑᑉ ᑲᑕᒡᕕᒃᓴᖓᓂᒃ ᐃᑎᕐᓴᓕᐅᕐᑐᖃᖏᓐᓂᖓᓂ. 14 ᐊᑕᓂᐅᑉ ᐃᓄᖁᑎᓂ ᕿᒪᖕᓂᐊᖏᒻᒪᒋᑦ; ᑭᖑᕐᖑᑦᔨᔪᒃᓴᖁᑎᓂᓗ ᖁᔭᓈᕐᓂᐊᕐᓇᒋᑦ. 15 ᓈᒻᒪᓈᕐᑐᒥᒃ ᐱᓇᓱᐊᕐᕕᐅᓂᖅ ᐅᑎᕐᓂᐊᕐᐳᖅ ᐃᓱᐊᕐᑐᓕᔪᓄᑦ, ᐆᒻᒪᑎᒥᒍᓪᓗ ᐃᓱᐊᕐᑐᓕᔪᓕᒫᑦ ᑕᒪᑐᒥᖓ ᒪᓕᖕᓂᐊᕐᐳᑦ. 16 ᑭᓇ ᐅᕙᓐᓂᒃ ᑕᑉᐱᕐᓱᐃᓗᓂ ᐱᐅᖏᑦᑐᓂᒃ ᐊᑭᕋᕐᑐᕐᓂᐊᕐᐹ? ᑭᓇᓗ ᐅᕙᓐᓂᒃ ᐃᑲᔪᕐᓂᐊᕐᐸ ᐊᔪᕐᓂᕐᒥ ᐃᓅᔪᑦ ᐊᑭᕋᕐᑐᕐᓗᒋᑦ? 17 ᐊᑕᓂᖅ ᐅᕙᓐᓂᒃ ᐃᑲᔪᕐᓯᒪᖏᑉᐸᑦ, ᑕᕝᕙ ᑕᕐᓂᕋ ᐃᓂᖃᓕᕋᔭᕐᐳᖅ ᓂᐱᖃᖏᑦᑐᑦ ᓄᓇᖓᓐᓂ. 18 ᐃᑎᒐᖕᒪ ᖁᐂᔭᕿᓐᓂᐅᔭᕐᓂᖏᓐᓂᒃ ᐃᒃᐱᒍᓱᓕᕐᑎᓪᓗᖓ, ᑕᕝᕙ ᕾᕗᑎᑦ ᓇᒡᓕᒍᓱᖕᓂᖃᕐᓗᑎᑦ ᓇᔪᒻᒥᓕᕐᓗᖓᓗ. 19 ᐅᓄᕐᑐᓂᒃ ᐃᓱᒪᔮᕈᑎᒃᓴᖃᓕᕌᖓᒪ ᐆᒻᒪᑎᓐᓂ, ᑕᕝᕙ ᐃᓱᒻᒥᕐᑐᐃᓂᕐᓄᑦ ᑕᕐᓂᕋ ᖁᕕᐊᓱᓕᕐᑎᑕᐅᕙᒃᐳᖅ. 20 ᐱᐅᖏᑦᑐᓕᔪᑦ ᐊᐅᓚᑦᓯᔨᖏᑦ, ᐋᖅᑭᒃᓱᐃᖃᑦᑕᕐᑐᑦ ᐱᐅᖏᑦᑐᒥᒃ ᐱᖁᔭᑎᒍᑦ, ᐃᓕᖕᓂᒃ ᑲᑐᑦᔨᖃᑎᖃᕈᓐᓇᑦᐹᑦ? 21 ᑖᒃᑯᐊ ᑲᑎᒪᓕᕐᐳᑦ ᐃᓱᐊᕐᑐᓕᔪᑦ ᐊᑭᕋᕐᑐᕈᒪᓪᓗᒋᑦ, ᐸᓯᔭᒃᓴᐅᖏᑦᑐᓪᓗ ᑐᖁᑕᒃᓴᕈᕐᑎᑉᐰᑦ. 22 ᐊᑕᓂᕐᓕ ᓴᐴᓗᑕᕆᕙᕋ, ᒎᑎᒐᓗ ᕿᒫᕕᒃᓴᕆᓪᓗᒍ ᕾᕐᑐᕆᕙᕋ. 23 ᑖᑦᓱᒪ ᐅᑎᕐᕕᒋᔪᒫᕐᐰᑦ ᐱᐅᖏᑦᑐᓕᓂᖏᑦ ᐊᑭᓂᐊᕐᓗᒋᑦ ᐱᐅᖏᑦᑐᓕᓂᐅᔪᑦ ᓄᖑᑦᓯᐊᕈᒫᕐᐰᑦ; ᐊᑕᓂᐅᑉ ᒎᑎᑦᑕ ᓄᖑᑦᓱᒫᕐᐰᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society