ᐃᓐᖏᕈᑎᑦ 91 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᓇᔫᑎᓂᖓᑕ ᓇᖏᐊᕐᓇᖏᓐᓂᖓ

¹ ᑖᓐᓇ ᖁᑦᓯᖕᓂᕐᐹᑉ ᐃᓂᖓᓂ ᐃᑦᔪᕐᓁᑦᑐᒦᑦᑐᖅ, ᐊᔪᒐᖃᖏᑦᑑᑉ ᑕᕐᕋᓕᓂᖓᓄᑦ ᐅᓕᒃᑕᐅᓯᒪᓂᐊᕐᐳᖅ,

² ᐊᑕᓂᕐᒧᑦ ᐅᖃᕐᓂᐊᕐᐳᖅ, “ᕿᒫᕕᒋᕙᒋᑦ ᓴᐳᑦᔨᔨᒋᓪᓗᑎᓪᓗ; ᒎᑎᒐ, ᑕᑎᒋᕙᒋᑦ.”

³ ᑖᑦᓱᒪ ᐱᐅᓕᓂᐊᕐᐹᑎᑦ ᓂᒐᕐᑎᑦᓯᓇᓱᐊᕐᑎᐅᑉ ᓂᒐᖓᓂᑦ ᓱᒃᑯᑎᕆᓇᓱᐊᕐᑑᓪᓗ ᐱᓇᓱᐊᕐᓂᖓᓂᑦ ᓴᓗᒤᑦᑐᒥᑦ.

⁴ ᐃᓴᕈᕐᒥᓄᑦ ᐅᓕᒃᓯᒪᓂᐊᕐᐹᑎᑦ, ᐃᓴᕈᖏᒃᑕ ᐊᑖᓂ ᓴᐳᑦᔭᐅᕕᒃᓴᖃᕐᓂᐊᕐᐳᑎᑦ; ᑖᑦᓱᒪ ᓱᖁᓯᔪᐃᑦᑑᓂᖓ ᓴᐴᓗᑕᒃᓴᐅᖕᒪᑦ ᑭᓕᕐᑕᐅᑦᔧᒃᑯᑎᒃᓴᐅᓪᓗᓂᓗ.

⁵ ᐅᓐᓄᐊᑉ ᑲᑉᐱᐊᓇᕐᓂᖓᓂᒃ ᓯᕘᕋᒋᔭᖃᖁᓇᒃ, ᐅᕝᕙᓗ ᖃᕐᔪᓂᒃ ᖃᖓᑕᔪᓂᒃ ᐅᓪᓘᑎᓪᓗᒍ.

⁶ ᐅᕝᕙᓗ ᐅᓐᓄᒃᑯᑦ ᑖᕐᑎᓪᓗᒍ ᓱᒃᑯᑎᕆᓇᓱᐊᕐᑑᑉ ᐱᓇᓱᐊᕐᓂᖓᓂᒃ ᓴᓗᒤᑦᑐᒥᒃ, ᐅᕝᕙᓗ ᐅᓪᓗᓪᓗᐊᒃᑯᑦ ᐅᐃᕕᓴᕐᑐᑦ ᑐᖁᑦᓯᓇᓱᐊᕐᓂᖏᓐᓂᒃ.

⁷ 1,000 ᓴᓂᖕᓂ ᑐᖁᑕᐅᔪᓐᓇᕋᓗᐊᕐᐳᑦ, 10,000ᐃᓪᓗ ᑕᓕᕐᐱᖔᕐᓂ ᑐᖁᑕᐅᔪᓐᓇᕆᓪᓗᑎᒃ, ᐃᕝᕕᓪᓕ ᑕᒪᑐᒧᖓ ᑎᑭᑕᐅᓂᐊᓐᖏᓚᑎᑦ.

⁸ ᑕᑯᓴᑐᐊᕈᕕᑦ ᑕᑯᓐᓇᑐᐃᓐᓇᕐᓂᐊᕐᐳᑎᑦ, ᐱᐅᖏᑦᑐᑦ ᐊᑭᓂᐊᕐᑕᐅᓕᕐᑎᓪᓗᒋᑦ.

⁹ ᐊᑕᓂᖅ ᕿᒫᕕᒋᓯᒪᓕᕋᕕᐅᒃ ᓴᐳᑦᔨᔨᒋᔪᒪᓕᕐᓗᒍ, ᖁᑦᓯᖕᓂᕐᐹᖑᔪᖅ ᐃᓂᒃᓴᕐᑖᕆᓯᒪᓕᕋᕕᐅᒃ,

¹⁰ ᐱᐅᖏᑦᑐᒧᑦ ᓱᓇᒧᓪᓘᓐᓃᑦ ᑎᑭᑕᐅᓂᐊᓐᖏᓚᑎᑦ, ᖃᓂᒪᓇᕐᑐᒧᓪᓘᓐᓃᑦ ᐃᓂᒋᔧᑦ ᖃᒡᓕᔭᐅᓂᐊᓐᖏᓚᖅ.

¹¹ ᑖᑦᓱᒪ ᐂᖏᓕᖁᑎᓂ ᐃᓕᖕᓂᒃ ᑲᒪᑎᓐᓂᐊᕐᒪᒋᑦ, ᓴᐳᑦᔨᔨᐅᖁᓪᓗᒋᑦ ᐊᖅᑯᑎᒋᓂᐊᕐᑕᕐᓂ ᑕᒤᓐᓂ.

¹² ᑖᒃᑯᓄᖓ ᑎᒍᒥᐊᕐᑕᐅᓂᐊᕐᐳᑎᑦ, ᐃᑎᒐᑎᑦ ᐊᐳᖁᓇᒋᑦ ᐅᔭᖅᑲᓄᑦ.

¹³ ᓛᔭᓂᒃ ᖁᒡᓗᒋᐊᓂᒡᓗ ᐱᓱᒡᕕᖃᕐᓂᐊᕐᐳᑎᑦ, ᓛᔭᓪᓗ ᐃᓅᓱᒃᑐᑦ ᖁᒡᓗᒋᐊᓪᓗ ᑐᖁᓐᓇᕐᑐᓖᑦ ᑐᓪᓕᕋᕐᓂᐊᕐᐸᑎᑦ.

¹⁴ ᑖᑦᓱᒪ ᓇᒡᓕᖕᓂᕐᒧᑦ ᐅᖓᒋᔭᕐᑖᕆᖕᒪᖓ, ᑍᒤᒻᒪᑦ ᓴᐳᑎᓂᐊᕐᐸᕋ; ᓴᐳᑎᓯᒪᓂᐊᓕᕐᐸᕋ, ᐅᕙᓐᓂᒃ ᖃᐅᔨᓯᒪᓕᕐᒪᑦ.

¹⁵ ᓂᓪᓕᐊᕕᒋᒃᐸᖓ, ᑕᕝᕙ ᑭᐅᓂᐊᕐᐸᕋ; ᐊᑲᐅᖏᑦᑐᒦᓕᕐᐸᑦ ᓇᔪᕐᓂᐊᕐᐸᕋ, ᓴᐳᑎᓗᒍ ᐅᐱᓐᓇᕐᓯᑎᓐᓂᐊᕐᐸᕋ.

¹⁶ ᐃᓅᓯᕐᒥᒃ ᓯᕕᑐᔪᒥᒃ ᐊᑭᓕᕐᓗᒍ ᓈᒻᒪᒃᓯᑎᓐᓂᐊᕐᐸᕋ, ᑕᑯᑎᓐᓂᐊᕐᐸᕋᓗ ᐱᐅᓕᒃᓯᓂᓐᓂᒃ.