ᐃᓐᖏᕈᑎᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᖁᔭᓕᓂᖅ ᐊᑕᓂᐅᑉ ᐃᖅᑲᕐᑐᐃᓂᖏᑦ ᓈᒻᒪᓈᕐᑐᑦ ᐱᓪᓗᒋᑦ

ᐃᓐᖏᕐᑏᑦ ᑲᒪᔨᖓᓐᓄᑦ   ᑍᕕᑎᐅᑉ ᐃᓐᖏᕈᑖ

¹ ᐊᑕᓃᖅ ᓂᕐᑐᕈᒪᕙᒋᑦ ᐆᒻᒪᑎᓐᓄᑦ ᑕᒤᓐᓄᑦ; ᐱᓂᐊᕐᓂᑎᓪᓗ ᑲᒪᓇᕐᑐᑦ ᐅᖃᐅᓯᕆᔪᒪᕙᒃᑲ.

² ᖁᕕᐊᓱᖕᓂᐊᕐᐳᖓ ᐃᖀᕐᑐᕐᓗᖓᓗ ᐱᑦᔪᑎᒋᓗᑎᑦ; ᐃᓐᖏᕈᒪᕗᖓᓗ ᐊᑏᑦ ᐱᑦᔪᑎᒋᓗᒍ, ᖁᑦᓯᖕᓂᕐᐹᖑᔪᑎᑦ.

³ ᐊᑭᕋᕐᑐᕐᑎᒃᑲ ᐅᑎᓕᕈᑎᒃ, ᐅᕐᕈᔪᒫᕐᐳᑦ ᑐᖁᓗᑎᒡᓗ, ᐃᕝᕕᑦ ᓇᔪᕐᓂᕐᓄᑦ.

⁴ ᐊᔪᖏᓐᓂᕋ ᖃᓄᐃᓕᐅᕋᓱᐊᕐᑕᒃᑲᓗ ᑲᔪᓯᑎᑉᐸᑎᑦ; ᐃᒃᓯᕙᕗᑎᑦ, ᐃᓱᐊᕐᑐᒥᒡᓗ ᐃᖅᑲᕐᑐᐃᓪᓗᑎᑦ.

⁵ ᐃᓅᖃᑎᒌᒡᔪᐊᑦ ᐃᓂᕐᑎᕐᐸᑎᑦ, ᐱᐅᖏᑦᑐᓕᔪᓪᓗ ᑐᖁᓪᓗᒋᑦ; ᐊᑎᖏᓪᓗ ᓄᖑᑎᑉᐸᑎᑦ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.

⁶ ᐊᑭᕋᕐᑐᕐᑏᑦ ᓯᖁᒥᑕᐅᓂᕐᒧᑦ ᐃᓱᖃᖏᑦᑐᒧᑦ ᓵᓚᐅᕗᑦ; ᐃᒡᓗᒐᓴᔪᐊᑦ ᑐᓐᖓᕕᖏᑎᒍᑦ ᓄᓱᒃᐸᑎᑦ; ᐃᖅᑲᐅᒪᔭᐅᔪᓐᓃᕐᐳᑦ ᐊᒡᓛᑦ.

⁷ ᐊᑕᓂᖅ ᐊᐅᓚᑦᓯᕗᖅ ᐃᓱᖃᖏᑦᑐᒧᑦ; ᐃᒃᓯᕙᐅᑕᕐᔪᐊᓂ ᐋᖅᑭᒃᐹ ᐃᖅᑲᕐᑐᐃᓂᕐᒧᑦ.

⁸ ᓯᓚᕐᔪᐊᕐᒥᐅᑦ ᓱᓕᑦᓯᐊᕐᑐᒥᒃ ᐃᖅᑲᕐᑐᕈᒫᕐᐰᑦ. ᐃᖅᑲᕐᑐᐃᓂᕐᒥᒃ ᐊᐅᓚᑦᓯᔪᒫᕐᐳᖅ ᓱᓕᑦᓯᐊᕐᓂᕐᒥᒃ ᑐᓐᖓᕕᖃᕐᓗᓂ.

⁹ ᐊᑕᓂᖅ ᕿᒫᕕᒃᓴᐅᓂᐊᕆᕗᖅ ᐅᖁᒤᒃᓴᕐᑎᑕᐅᔪᓄᑦ; ᕿᒫᕕᒃᓴᐅᕗᖅ ᐅᖁᒤᑦᑐᖃᕐᑎᓪᓗᒍ.

¹⁰ ᐊᑎᕐᓂᒡᓗ ᖃᐅᔨᒪᔪᑦ ᐃᓕᖕᓂᒃ ᑕᑎᖃᕐᓂᐊᕐᐳᑦ: ᐃᕝᕕᑦ ᐊᑕᓃᖅ ᕿᒪᖏᓐᓇᕕᒋᑦ ᐃᓕᖕᓂᒃ ᕿᓂᕐᑐᑦ.

¹¹ ᐊᑕᓂᖅ ᓂᕐᑐᕈᑎᓂᒃ ᐃᓐᖏᕐᕕᒋᓯᐅᒃ, ᓮᐅᓂᒥ ᐃᓂᖃᕐᑐᖅ: ᐱᓂᐊᕐᓂᖏᓪᓗ ᐃᓄᖕᓄᑦ ᐅᖃᐅᑎᒋᓕᕐᓯᐅᒃ.

¹² ᑐᖁᑦᓯᔪᕕᓂᕐᓂᒃ ᐊᑭᓂᐊᕐᐸᒃᑑᑉ, ᑖᒃᑯᐊ ᐃᓱᒪᒋᕙᒃᐰᑦ; ᐅᖁᒤᒃᓴᕐᑎᑕᐅᓂᕐᒧᓪᓗ ᐃᑲᔪᕐᑕᐅᔪᒪᓪᓗᑎᒃ ᓂᓪᓕᐊᓂᖏᑦ ᐳᐃᒍᓐᖏᓔᑦ.

¹³ ᐊᑕᓃᖅ, ᓈᒃᑭᒋᓚᐅᓐᖓ! ᐅᕙᓐᓂᒃ ᐆᒥᓱᒃᑐᓂᑦ ᐅᖁᒤᒃᓴᕐᑎᑕᐅᓂᒃᑲ ᐃᓱᒪᒋᒃᑭᒃ, ᐃᕝᕕᑦ ᒪᑭᑎᒐᕕᖓ ᑐᖂᑉ ᐃᑎᕐᑕᕐᕕᖓᓂᑦ.

¹⁴ ᐅᖃᐅᓯᖃᕈᓐᓇᖁᓪᓗᖓ ᓂᕐᑐᕐᓇᕐᓂᕐᓂᒃ ᓱᓇᒥᒡᓗᒍ, ᓮᐅᓂᐅᑉ ᐸᓂᖏᑕ ᐃᑎᕐᑕᕐᕕᒡᔪᐊᖏᓐᓂ. ᐱᐅᓕᕐᓯᓂᕐᓂᒡᓗ ᐃᖀᕐᑐᕈᑎᖃᕈᒪᕗᖓ.

¹⁵ ᐃᓅᖃᑎᒌᒡᔪᐊᑦ ᑭᕕᓯᒪᕗᑦ ᐃᑎᕐᓴᕐᔪᐊᕐᒧᑦ ᓴᓇᓯᒪᔭᒥᖕᓄᑦ; ᓄᓗᐊᓄᑦ ᓇᖕᒥᓂᖅ ᐃᔨᕐᓯᒪᔭᒥᖕᓄᑦ ᐃᑎᒐᖏᑦ ᓂᒐᕕᑉᐳᑦ.

¹⁶ ᐊᑕᓂᖅ ᖃᐅᔨᒪᔭᐅᕗᖅ ᐃᖅᑲᕐᑐᐃᓂᖏᑕ ᐱᓂᐊᕐᓂᖏᑎᒍᑦ; ᐱᐅᖏᑦᑐᓕᔪᑦ ᓂᒐᕐᓯᒪᕗᑦ ᓇᖕᒥᓂᖅ ᐊᒡᒐᖕᒥᖕᓄᑦ ᓴᓇᓯᒪᔭᒥᖕᓄᑦ. ᐃᓱᒪᒃᓴᕐᓯᐅᕐᓂᖅ ᑐᒃᓯᐊᕐᓂᒃᑯᑦ. ᓰᓚ

¹⁷ ᐱᐅᖏᑦᑐᓕᔪᑦ ᓵᑎᑕᐅᔪᒫᕐᐳᑦ ᑲᑉᐱᐊᓇᕐᑐᕕᖕᒧᑦ, ᑕᒪᕐᒥᓕᒫᕐᓗ ᐃᓅᖃᑎᒌᒡᔪᐊᑦ ᒎᑎᒥᒃ ᐳᐃᒍᕐᑐᑦ.

¹⁸ ᐊᔪᕐᓴᕐᑐᑦ ᐳᐃᒍᕐᑕᐅᓯᒤᓇᕐᓂᐊᖏᒻᒪᑕ; ᐊᒃᓗᔪᑦ ᓂᕆᐅᒋᔭᖏᑦ ᐃᓱᖃᖏᑦᑐᒧᑦ ᐊᓯᐅᓯᒪᓂᐊᓐᖏᓚᑦ.

¹⁹ ᐆ, ᐊᑕᓃᖅ ᒪᑭᓕᕆᑦ, ᐃᓄᒃ ᓵᓚᖃᕐᑎᑦᑍᓕᒍᒃ; ᐃᓅᖃᑎᒌᒡᔪᐊᑦ ᐃᖅᑲᕐᑐᕐᑕᐅᓕᑦ ᐃᔨᕕᑦ ᑕᒃᑯᐊᓂ.

²⁰ ᐆ, ᐊᑕᓃᖅ, ᓯᕘᕋᓂᕐᒦᑎᓚᐅᒃᑭᑦ, ᐃᓅᖃᑎᒌᒡᔪᐊᑦ ᐃᓄᑐᐃᓐᓇᐅᓂᕐᒥᖕᓂᒃ ᖃᐅᔨᒪᖁᓪᓗᒋᑦ. ᓰᓚ