ᐃᓐᖏᕈᑎᑦ 88 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ ᐅᖁᒤᒃᓴᕐᓂᕐᒥᑦ ᑰᕋᐅᑉ ᐃᕐᓂᖏᑕ ᐃᓐᖏᕈᑎᖓ 1 ᐊᑕᓃᖅ ᒎᑎᒐ ᐱᐅᓕᔨᒐ, ᐅᓪᓗᒃᑯᑦ ᐃᑲᔪᕐᑕᐅᔪᒪᓪᓗᖓ ᓂᓪᓕᐊᕕᒋᕙᒋᑦ; ᐅᓐᓄᐊᒃᑯᓪᓕ ᐃᓗᖏᕐᑐᕐᓗᖓ ᓂᓪᓕᐊᕗᖓ ᐃᓕᖕᓄᑦ. 2 ᑐᒃᓯᐊᕐᓂᕋ ᐃᓕᖕᓄᑦ ᑎᑭᐅᑎᓚᐅᕐᓕ, ᓯᐅᑏᑦ ᒪᓂᓚᐅᕈᒃ ᓂᓪᓕᐊᓂᓐᓄᑦ! 3 ᑕᕐᓂᕋ ᑕᑕᒻᒪᑦ ᐊᑲᐅᓐᖏᓕᐅᕈᑎᓐᓂᒃ, ᐃᓅᓯᕋᓗ ᑐᖁᖓᔪᑦ ᐃᓂᖓᓄᑦ ᖃᒡᓕᓕᕐᓗᓂ. 4 ᐃᑎᕐᓴᒧᑦ ᑲᑕᒃᓯᒪᔪᑎᑐᑦ ᑍᒤᓐᓇᓱᒋᔭᐅᓕᕐᐳᖓ; ᐊᖑᑎᑐᑦ ᓄᑭᖃᕈᓐᓃᕐᓯᒪᔪᑎᑐᑦ ᑍᒤᓕᕐᐳᖓ. 5 ᑐᖁᖓᔪᑦ ᐊᑯᕐᖓᓐᓄᑦ ᕿᒪᒃᑕᐅᓯᒪᔪᑎᑑᓕᕐᐳᖓ, ᐅᓇᑕᕐᑐᓂ ᑐᖁᑕᐅᓯᒪᔪᑎᑐᑦ ᐃᓗᕕᖃᕐᕕᖕᒥ ᓇᓚᔪᑎᑐᑦ, ᐃᓕᖕᓄᑦ ᐃᖅᑲᐅᒪᔭᐅᔪᓐᓃᕐᑐᑎᑐᑦ ᑍᒤᓕᕐᐳᖓ, ᐊᒡᒐᖕᓄᑦ ᑲᒪᒋᔭᐅᔪᓐᓃᕐᑐᑎᑑᓕᕐᐳᖓ. 6 ᐃᑎᕐᓴᒧᑦ ᐊᑦᓯᖕᓂᕐᐹᒧᑦ ᐃᓕᓯᒪᕙᕐᒪ, ᑕᕝᕗᖓ ᑖᕐᑑᑉ ᐃᑎᔫᓪᓗ ᐃᓂᖓᓄᑦ. 7 ᓂᓐᖓᐅᒪᓂᕐᐱᑦ ᐊᖏᔪᒥᒃ ᐊᒃᑐᐊᕚᖓ, ᐋᓐᓂᐊᑎᑉᐸᕐᒪᓗ ᑕᒤᓐᓄᑦ ᓯᖁᒥᑦᓯᓂᕐᓄᑦ. ᓰᓚ 8 ᐃᓚᓐᓇᕆᔭᒃᑲ ᐅᕙᓐᓂᑦ ᐅᖓᓯᒃᓯᑎᓚᐅᕐᐸᑎᑦ; ᓇᕐᕈᓇᕐᑐᓐᖑᕐᑎᓚᐅᕐᐸᕐᒪ ᑖᒃᑯᓄᖓ; ᒪᑐᑦᔪᑎᔭᐅᓯᒪᕗᖓ ᐊᓂᔪᓐᓁᓪᓕᖁᓪᓗᖓ ᑕᕝᕙᓐᖓᑦ. 9 ᐃᔩᒃᑲᒃ ᑕᐅᑐᑦᓯᐊᕈᓐᓃᓕᕐᐴᒃ ᕿᒃᓵᖕᓂᕐᒧᑦ. ᐊᑕᓃᖅ, ᖃᐅᑕᒫᑦ ᓂᓪᓕᐊᕕᒋᕙᒋᑦ; ᐊᒡᒐᒃᑲ ᐃᓵᖓᕙᒃᑲ ᐃᓕᖕᓄᑦ. 10 ᑐᖁᖓᔪᓂᒃ ᐱᓇᓱᐊᕐᓂᐊᕐᐲᑦ ᑲᒪᓇᕐᑐᓕᓂᒃᑯᑦ? ᐃᓅᔪᓐᓃᕐᓯᒪᔪᑦ ᒪᑭᓪᓗᑎᒃ ᐃᓕᖕᓂᒃ ᓂᕐᑐᐃᓂᐊᕐᐹᑦ? ᓰᓚ 11 ᓇᒡᓕᖕᓃᑦ ᓱᕐᕋᔪᐃᑦᑐᖅ ᐅᓂᒃᑲᐅᓯᕆᔭᐅᓂᐊᕐᐹ ᐃᓗᕕᕐᓂ? ᐅᕝᕙᓗ ᓱᖁᓯᔪᐃᑦᑑᓃᑦ ᐅᖃᐅᓯᐅᓂᐊᕐᐹ ᐊᓯᕈᕐᑕᐅᕕᖕᒥ? 12 ᑲᒪᓇᕐᑐᓕᓂᑎᑦ ᖃᐅᔨᔭᐅᓂᐊᕐᐹᑦ ᑖᕐᑐᒥ? ᐅᕝᕙᓗ ᐱᐅᓕᒃᓯᓃᑦ ᖃᐅᔨᔭᐅᓂᐊᕐᐹ ᐳᐃᒍᕐᑕᐅᓯᒪᔪᑦ ᓄᓇᖏᓐᓂ? 13 ᐃᓕᖕᓄᓪᓕ ᓂᓪᓕᐊᕗᖓ ᐊᑕᓃᖅ; ᐅᓪᓛᒃᑯᑦ ᑐᒃᓯᐊᕐᓂᕋ ᐃᓕᖕᓄᑦ ᐱᑎᑉᐸᕋ. 14 ᐊᑕᓃᖅ ᓱᖕᒪᑦ ᑕᕐᓂᕋ ᐃᒋᑉᐱᐅᒃ? ᓱᖕᒪᓪᓗ ᑮᓁᑦ ᐃᔨᕐᓯᒪᕕᐅᒃ ᐅᕙᓐᓄᑦ? 15 ᐋᓐᓂᐊᑖᕐᓯᒪᕗᖓ ᑐᖁᑐᐃᓐᓇᕆᐊᖃᓕᕐᓗᖓ ᐃᓅᓱᒃᑑᓪᓗᖓ ᓱᓕ, ᑲᑉᐱᐊᓇᕐᑐᒦᑎᑦᓯᓃᑦ ᐃᓗᖏᕐᑐᕈᑎᒋᕙᕋ; ᐃᑲᔪᕐᑎᒃᓴᖃᕐᓇᖓᓗ. 16 ᓂᓐᖓᐅᒪᓂᕐᐱᑦ ᓵᓚᒋᓯᒪᖕᒪᖓ; ᖁᐊᕐᓵᕐᑎᑦᓯᓂᕕᓪᓗ ᓱᕈᕐᑎᑉᐹᖓ. 17 ᐅᓗᑦᔭᐅᓯᒪᔪᑎᑐᑦ ᑕᒪᒃᑯᓄᖓ ᐊᕙᓗᔭᐅᓯᒪᕗᖓ ᐅᓪᓗᓕᒫᖅ; ᑲᑎᓐᖓᓪᓗᑎᒃ ᐊᕙᑎᓕᒫᓐᓂᑦ ᐅᐸᒃᑕᐅᕗᖓ. 18 ᐃᓚᒋᔭᒃᑲ ᐃᓚᓐᓇᕆᔭᒃᑲᓗ ᐅᖓᓯᒃᓯᑎᑉᐸᑎᑦ ᐅᕙᓐᓂᑦ; ᐃᓚᓐᓇᕆᓂᕐᐹᒃᑲᓗ ᑖᕐᑐᒧᐊᕐᑎᑉᐸᑎᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society