ᐃᓐᖏᕈᑎᑦ 74 - ᐊᒡᓔᑦ ᐃᑦᔪᕐᖕᓁᑦᑐᑦᐃᑲᔪᕐᑕᐅᔪᒪᓂᖅ ᐊᑭᕋᕐᑐᕐᑎᓂᑦ ᐊᓴᐸᐅᑉ ᐃᓱᒪᒃᓴᑦᓯᐅᕈᑎᖓ 1 ᒎᑏ, ᓱᖕᒪᑦ ᖁᔭᓈᕐᓯᒪᕕᑎᒍᑦ ᐃᓱᖃᖏᑦᑐᒧᑦ? ᓱᖕᒪᑦ ᓂᓐᖓᐅᒪᓃᑦ ᐳᔫᕐᐸ ᓰᐱᖁᑎᖕᓄᑦ ᓇᑎᕐᓇᒦᑦᑐᓄᑦ? 2 ᑐᒃᓯᐊᕆᐊᕐᐸᒃᑐᖁᑎᑎᑦ ᐃᖅᑲᐅᒪᒃᑭᑦ, ᑍᑦᓱᒪᓂᑐᖃᖅ ᐱᑖᕆᓚᐅᕐᓯᒪᔭᑎᑦ, ᐃᓅᖃᑎᒌᑦ ᐱᒃᓴᕆᔪᒪᓪᓗᒋᑦ ᐱᐅᓕᓚᐅᕐᑕᑎᑦ! ᑕᕝᕙᓂ ᖃᖅᑲᒥ ᓮᐅᓂᒥ, ᐃᓂᖃᕐᑎᓪᓗᑎᑦ. 3 ᑕᓯᐅᓚᐅᒃᑭᑦ ᐊᓯᕈᕐᑕᐅᑦᔪᑎᒃᓴᖏᓐᓄᑦ; ᐊᑭᕋᕐᑐᕐᑎᕗᑦ ᐃᑦᔪᕐᓁᑦᑐᕕᖕᒦᑦᑐᓕᒫᓂᒃ ᐊᓯᕈᐃᓯᒪᖕᒪᑕ. 4 ᐊᑭᕋᕐᑐᕐᑎᑎᑦ ᐃᑦᔪᕐᓁᑦᑐᕕᖁᑎᕕᑦ ᕿᑎᖓᓂ ᐃᕐᓯᓵᕆᕗᑦ; ᓇᓗᓁᒃᑯᑕᕐᒥᖕᓂᒡᓗ ᓇᐸᔪᒦᑦᑐᓂᒃ ᐃᓕᐅᖅᑬᓪᓗᑎᒃ. 5 ᐊᖑᑎᑎᑐᑦ ᐅᓕᒪᐅᑦᓯᔭᕐᑐᑎᑐᑦ ᑍᒤᑉᐳᑦ, ᓇᐹᕐᑐᑦ ᐊᑯᓔᑦᑐᑦ ᐊᑯᕐᖓᓐᓂ ᓇᑲᑎᕆᔪᑎᑐᑦ. 6 ᕿᔪᐃᑦ ᓴᓇᓐᖑᐊᕐᓯᒪᔪᓕᒫᑦ ᓯᖁᑦᑎᓕᕐᐰᑦ ᐅᓕᒪᐅᑎᓄᑦ ᐅᔭᕋᑦᓯᐊᕐᔪᐊᓄᓪᓗ. 7 ᐃᑦᔪᕐᓁᑦᑐᕕᖁᑏᑦ ᐃᑯᐊᓪᓚᒃᑎᑉᐹᑦ; ᐊᑎᕐᓄᑦ ᑐᒃᓯᐊᕐᕕᐅᖃᑦᑕᕐᑐᖅ ᓄᓇᒧᑦ ᑎᑭᓪᓗᒍ ᓇᕐᕈᓇᕐᓯᑎᑉᐹᑦ. 8 ᐃᒻᒥᖕᓄᑦ ᐅᖃᕐᐳᑦ, “ᑕᒪᒃᑯᐊ ᓄᖑᑦᓯᐊᕐᓗᒋᑦ ᐊᓯᕈᕐᓚᕗᑦ”; ᒎᑎᐅᑉ ᑐᒃᓯᐊᕐᓂᕐᒧᑦ ᑲᑎᒪᕕᖁᑎᓕᒫᖏᑦ ᓄᓇᒥ ᐃᑯᐊᓪᓚᒃᑎᑉᐰᑦ. 9 ᐅᕙᒍᓪᓕ ᓇᓗᓁᒃᑯᑕᑦᑎᓐᓂᒃ ᑕᑯᓐᖏᓚᒍᑦ; ᒎᑎᒧᓪᓘᓐᓃᑦ ᐅᖃᕐᑎᑕᖃᕈᓐᓃᕐᐳᖅ; ᖃᐅᔨᒪᔪᖃᓐᖏᓚᒍᓪᓘᓐᓃᑦ ᖃᓄᖅ ᓯᕕᑐᑎᒋᔪᒥᒃ ᑍᒤᓐᓂᐊᕐᒪᖔᑦ. 10 ᒎᑏ, ᖃᓄᖅ ᐊᑯᓂᐅᑎᒋᔪᖅ ᐊᑭᕋᕐᑐᕐᑐᑦ ᒥᑕᐅᑎᖃᕐᓂᐊᕐᐹᑦ? ᐊᑭᕋᕐᑐᕐᑏᑦ ᐊᑎᕐᓂᒃ ᐅᖃᕐᓂᕐᓘᑎᖃᕐᓂᐊᕐᐸᑦ ᐃᓱᖃᖏᑦᑐᒧᑦ? 11 ᓱᖕᒪᑦ ᐊᒡᒐᑎᑦ ᐅᕙᑦᑎᓐᓂᒃ ᐃᑲᔪᕐᑍᓕᒪᑎᑉᐱᒋᑦ? ᓱᖕᒪᑦ ᐊᒡᒐᑎᑦ ᑕᓕᕐᐲᑦ ᑐᓄᖕᓃᑎᑉᐱᒋᑦ? 12 ᒎᑎ, ᐊᖓᔪᖅᑳᕐᔪᐊᕆᕙᕋ ᑍᑦᓱᒪᓂᑐᖄᓗᖕᓂᑦ, ᐱᓇᓱᐊᕐᑐᖅ ᐱᐅᓕᔭᐅᓂᕐᒥᒃ ᓄᓇᕐᔪᐊᑉ ᐊᑯᕐᖓᓂ. 13 ᐱᔪᓐᓇᕐᓂᕐᓄᑦ ᐃᒪᕐᔪᐊᖅ ᐊᕕᓚᐅᕐᐸᑦ; ᐃᒪᕐᕕᖕᒥ ᐆᒪᔪᕐᔪᐊᑦ ᓂᐊᖁᖏᑦ ᓯᖁᒥᑉᐸᑎᑦ. 14 ᐃᒪᕐᒥᐅᑕᕐᔪᐊᑦ ᓂᐊᖁᖏᑦ ᓯᖁᒥᑉᐸᑎᑦ ᐊᕕᒃᑐᕐᓗᒋᑦ, ᑐᓂᓪᓗᒍᓗ ᐆᒪᔪᓄᑦ ᓂᕿᒋᔭᐅᖁᓪᓗᒍ ᓱᓇᖃᖏᑦᑐᒥ ᐃᓂᖃᕐᑐᓄᑦ. 15 ᐃᒥᖅ ᓄᓇᒥᑦ ᑰᒃᑐᖅ ᑰᓕᕐᑎᑉᐸᑦ ᖄᒥᓕᕐᓗᓂ; ᑰᒑᓗᐃᑦ ᓴᓐᖏᔪᑦ ᓴᓗᐊᕐᑎᑉᐸᑎᑦ. 16 ᐅᓪᓗᖅ ᐱᒋᕙᑦ, ᐅᓐᓄᐊᕐᓗᑦᑕᐅᖅ ᐱᒋᒋᕙᑦ; ᑕᖅᑭᖅ ᓯᕿᓂᕐᓗ ᐸᕐᓇᒃᓯᒪᕙᑎᑦ ᐃᓂᑖᕐᑎᓪᓗᒋᒃ. 17 ᓄᓇᕐᔪᐊᑉ ᑭᒡᓕᓕᒫᖏᑦ ᐋᖅᑭᒃᓯᒪᕙᑎᑦ; ᐊᐅᔭᖅ ᐅᑭᐅᕐᓗ ᑕᒪᖏᒃ ᓴᓇᓯᒪᕙᑎᑦ. 18 ᐅᓇ ᐃᖅᑲᐅᒪᒍᒃ, ᐊᑕᓃᖅ, ᐊᑭᕋᕐᑐᕐᑏᑦ ᐃᓕᖕᓂᒃ ᒥᑕᐅᑎᖃᕐᒪᑕ, ᐃᓄᐃᓪᓗ ᓯᓔᑦᑐᑦ ᐊᑎᕐᓂᒃ ᐅᖃᕐᓂᕐᓘᑎᖃᕐᐳᑦ. 19 ᑑᕕᖁᑎᕕᑦ ᐃᓅᓯᖓ ᑐᓂᓂᐊᕐᓇᒍ ᓂᕐᔪᑎᓄᑦ ᐃᕐᓯᓇᕐᑐᓄᑦ; ᐃᓄᐃᑦ ᐊᑭᕋᕐᑐᕐᑕᐅᔪᑦ ᐃᓅᓯᖏᑦ ᐳᐃᒎᒪᑦᑍᓕᒃᑭᑦ ᐃᓱᖃᖏᑦᑐᒧᑦ. 20 ᐅᑦᔨᕆᑦᓯᐊᕈᒃ ᐅᕙᑦᑎᓐᓄᑦ ᐊᖏᖃᑎᒌᒍᑎᒋᓚᐅᕐᑍᑦ; ᓄᓇᐅᑉ ᑖᕐᑑᓂᖓ ᑕᑕᒻᒪᑦ ᐃᓂᒋᔭᐅᓪᓗᓂᓗ ᑲᑉᐱᐊᓱᒃᑎᑦᓯᔪᓄᑦ. 21 ᓵᓚᒋᔭᐅᔪᑦ ᐅᖁᒤᒃᓴᕐᑎᑕᐅᓪᓗᑎᒃ ᑲᓐᖑᓱᒃᑎᑕᐅᑦᑍᓕᓕᑦ; ᐊᒃᓗᔪᑦ ᐊᔪᕐᓴᕐᑐᓪᓗ ᐊᑎᕐᓂᒃ ᓂᕐᑐᐃᓕᕐᓕᑦ. 22 ᒎᑏ, ᒪᑭᓕᕆᑦ, ᐱᑦᔪᑎᒋᔧᑦ ᓴᐳᑎᓕᕈᒃ; ᐃᖅᑲᐅᒪᒋᑦ ᐊᖑᑎᑦ ᓯᓔᑦᑐᑦ ᖃᐅᑕᒫᑦ ᒥᑕᐅᑎᒋᖃᑦᑕᕐᒪᑎᑦ. 23 ᐊᑭᕋᕐᑐᕐᑎᕕᑦ ᓂᓪᓕᐊᓂᖏᑦ ᐳᐃᒍᕐᑍᓕᒃᑭᑦ; ᐊᑭᕋᕐᑐᕐᑎᑎᑦ ᐊᒃᓱᕈᓕᕐᐸᓪᓕᐊᖕᒪᑕ ᐃᓕᖕᓂᒃ ᓵᓚᖃᕈᒪᓪᓗᑎᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society