ᐃᓐᖏᕈᑎᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᓂᖅ ᓂᕐᑐᐃᓂᕐᓗ ᐊᑭᕋᕐᑐᕐᑎᓂᑦ ᓴᐳᑎᔭᐅᓂᖅ ᐱᓪᓗᒍ

ᑍᕕᑎᐅᑉ ᐃᓐᖏᕈᑎᒋᓪᓗᒍ ᑐᒃᓯᐊᕐᓂᖓ

¹ ᐊᑕᓃᖅ ᒎᑎᒐ, ᐃᓕᖕᓂᒃ ᑕᑎᖃᕐᐳᖓ, ᐱᐅᓕᓚᐅᓐᖓ ᐅᕙᓐᓂᒃ ᓵᓚᖃᕋᓱᐊᕐᑐᓂᑦ ᑕᒤᓐᓂᑦ, ᓴᐳᑎᓗᖓᓗ.

² ᓛᔭᑎᑐᑦ ᐅᕙᓐᓂᒃ ᐊᓕᒃᑐᕐᓯᖁᓇᒋᑦ, ᑎᒥᒐ ᐊᒡᒍᕐᑕᐅᖁᓇᒍ, ᓴᐳᑦᔨᔨᒃᓴᖃᕐᑎᓐᓇᖓ.

³ ᐊᑕᓃᖅ ᒎᑎᒐ, ᐅᑯᓂᖓ ᐱᓚᐅᕐᓂᕈᒪ; ᐊᒡᒐᓐᓂ ᐱᐅᖏᑦᑐᓕᓂᕐᑕᖃᕐᐸᑦ,

⁴ ᐃᓅᖃᑎᓐᓂᒃ ᐊᑭᓂᐊᕐᓯᒪᒍᒪ ᐱᐅᖏᑦᑐᒥᒃ ᐅᕙᓐᓂᒃ ᖃᓄᐃᓕᐅᖏᑦᑐᒥᒃ; ᐊᑭᕋᕐᑐᕐᑎᓐᓂᒡᓘᓐᓃᑦ ᑎᒡᓕᒐᕐᕕᖃᕐᓯᒪᒍᒪ ᐱᑦᔪᑎᒃᓴᖃᖏᓪᓗᖓ,

⁵ ᑕᕝᕙ ᐊᑭᕋᕐᑐᕐᑎᓐᓂᑦ ᒪᓕᒃᑕᐅᓕᕐᓚᖓ ᓵᓚᒋᔭᐅᓗᖓᓗ; ᐃᓅᓯᕋ ᓄᓇᒧᑦ ᐅᕐᕈᑎᑕᐅᓕᕐᓕ, ᐊᔪᖏᓐᓂᕋ ᓄᓇᒥ ᒪᓂᖅᑲᒥ ᓇᓚᑐᐃᓐᓇᓕᕐᓕ. ᓰᓚ

⁶ ᐊᑕᓃᖅ, ᓂᓐᖓᐅᒪᓂᕐᒥᑦ ᒪᑭᓕᕆᑦ, ᐃᓕᖕᓂᒃ ᒪᑭᑎᓕᕆᑦ ᐊᑭᕋᕐᑐᕐᑎᒪ ᓂᓐᖓᐅᒪᓂᖏᑦ ᐱᑦᔪᑎᒋᓪᓗᒋᑦ. ᒪᑭᓕᕆᑦ, ᐅᕙᖓ ᐱᓪᓗᖓ ᐃᖅᑲᕐᑐᐃᖁᓪᓗᑎᑦ ᐱᖁᔨᓯᒪᒐᕕᑦ.

⁷ ᐃᓄᖁᑎᑎᑦ ᐊᕙᑎᖕᓂ ᑲᑎᓕᕐᓕᑦ; ᑖᒃᑯᐊᓗ ᐱᑦᔪᑎᒋᓪᓗᒋᑦ, ᐅᑎᓕᕆᑦ ᖁᑦᓯᒃᑐᒧᑦ.

⁸ ᐊᑕᓂᐅᑉ ᐃᓄᐃᑦ ᐃᖅᑲᕐᑐᕈᒫᕐᐰᑦ; ᐊᑕᓃᖅ ᐃᖅᑲᕐᑐᓚᐅᓐᖓ, ᐃᓱᐊᕐᑐᓕᓂᕋ ᐱᑦᔪᑎᒋᓪᓗᒍ.

⁹ ᐱᐅᖏᑦᑐᓕᔪᑦ ᐱᐅᖏᑦᑐᓕᓂᖏᑦ ᐃᓱᓕᑎᓚᐅᒃᑭᑦ, ᐃᓱᐊᕐᑐᓕᔪᓪᓗ ᑲᔪᓯᑎᓪᓗᒋᑦ; ᐃᓱᐊᕐᑐᓕᔫᑉ ᐆᒻᒪᑎᖏᑦ ᐃᓱᒪᖏᓪᓗ ᒎᑎᐅᑉ ᖃᐅᔨᓴᕐᐰᑦ.

¹⁰ ᓴᐳᑦᔭᐅᓂᕋ ᒎᑎᒥᑦ ᐱᕗᖅ; ᑖᑦᓱᒪ ᐆᒻᒪᑏᑦ ᓱᓕᔪᑦ ᓴᐳᑎᖕᒪᒋᑦ.

¹¹ ᒎᑎ ᐃᖅᑲᕐᑐᐃᔨᑦᓯᐊᖑᕗᖅ, ᒎᑎᐅᓪᓗ ᐱᐅᖏᑦᑐᓕᔪᑦ ᖃᐅᑕᒫᑦ ᓂᓐᖓᐅᑎᓯᒪᕔᑦ;

¹² ᓵᒋᐊᖏᑦᑐᖃᕐᐸᑦ, ᒎᑎᐅᑉ ᓴᕕᒡᔪᐊᓂ ᐃᐱᒃᓴᕐᓂᐊᕐᐹ; ᐱᑎᒃᓯᓂᓗ ᕿᓗᕚ ᐅᑕᖅᑭᓕᕐᓗᓂᓗ.

¹³ ᐸᕐᓁᕐᓯᒪᒋᕗᕐᓗ ᓱᒋᐅᑎᓂᒃ ᑐᖁᑦᓯᔪᓐᓇᕐᑐᓂᒃ, ᖃᕐᔪᓂᓗ ᐃᑯᒪᔪᓐᖑᕐᑎᑉᐰᑦ.

¹⁴ ᑕᑯᒋᑦ ᐱᐅᖏᑦᑐᓕᔪᖅ ᓴᖅᑭᑎᑦᓯᕗᖅ ᓈᓚᖏᓐᓂᕐᒥᒃ; ᐃᓛᒃ, ᓇᑦᔨᓕᕐᐳᖅ ᐃᓱᐊᖏᑦᑐᒥᒃ ᕿᑐᕐᖓᕐᑖᕐᓗᓂᓗ ᓴᒡᓗᓂᕐᒥᒃ.

¹⁵ ᐃᑎᕐᓴᓕᐅᕐᐳᖅ ᐊᒡᒐᒡᓗᒍᓗ, ᐃᑎᕐᓴᒧᓪᓗ ᑲᑕᓕᕐᐳᖅ ᓴᓇᓚᐅᕐᑕᒥᓄᑦ.

¹⁶ ᐃᓱᐊᖏᑦᑐᓕᐊᒥᓄᑦ ᓇᖕᒥᓂᕐᒥᓄᑦ ᐅᑎᕐᕕᐅᓂᐊᕆᕗᖅ; ᐃᓅᖃᑎᒥᓄᑦ ᐱᑦᓯᐊᖏᓐᓂᕐᒥᓄᑦ ᐱᓂᐊᕐᓂᕆᓯᒪᔭᖏᑕ, ᓂᐊᖁᕐᒥᒍᑦ ᓇᖕᒥᓂᕐᒥᒍᑦ ᑲᑕᒡᕕᐅᓂᐊᕆᕗᖅ.

¹⁷ ᐊᑕᓂᖅ ᓂᕐᑐᕈᒪᕙᕋ ᐃᓱᐊᕐᑐᓕᓂᖓ ᐱᑦᔪᑎᒋᓪᓗᒍ, ᐃᓐᖏᕈᒪᕗᖓᓗ ᓂᕐᑐᕈᑎᓂᒃ ᐊᑕᓂᐅᑉ ᖁᑦᓯᖕᓂᕐᐹᑉ ᐊᑎᖓᓄᑦ.