ᐃᓐᖏᕈᑎᑦ 61 - ᐊᒡᓔᑦ ᐃᑦᔪᕐᖕᓁᑦᑐᑦᖃᐅᔨᑎᑕᐅᓂᖅ ᒎᑎᐅᑉ ᐃᓱᖃᖏᑦᑐᒧᑦ ᓴᐳᑦᔨᓂᖓᓂᒃ ᑍᕕᑎᐅᑉ ᐃᓐᖏᕈᑖ 1 ᐃᓗᖏᕐᑐᕐᓗᖓ ᓂᓪᓕᐊᓂᕋ ᑐᓴᓚᐅᕈᒃ, ᒎᑏ; ᑐᒃᓯᐊᕐᓂᕋᓗ ᓈᓚᓚᐅᕈᒃ. 2 ᓄᓇᕐᔪᐊᑉ ᐃᓱᐊᓂᑦ ᓂᓪᓕᐊᕕᒋᕙᒋᑦ, ᐆᒻᒪᑎᒐ ᓵᓚᐅᓯᒪᑎᓪᓗᒍ; ᑕᓯᐅᓚᐅᓐᖓ ᕾᕐᑐᒧᑦ ᐅᕙᓐᓂᑦ ᐳᕐᑐᓂᕐᓴᒧᑦ. 3 ᕿᒫᕕᒃᓴᕆᒐᒃᑭᑦ, ᐃᒡᓗᕐᔪᐊᑐᑦ ᐳᕐᑐᔪᑐᑦ ᐊᑭᕋᓐᓂᒃ ᕿᒫᕕᒃᑐᑦ. 4 ᑐᒃᓯᐊᕐᕕᒡᔪᐊᖁᑎᖕᓂ ᐃᓂᖃᕐᑎᓚᐅᓐᖓ ᐃᓱᖃᖏᑦᑐᒧᑦ; ᐃᓴᕈᕐᐱᑦ ᕿᒫᕕᒃᓴᐅᓂᖓᓂᒃ ᑕᑎᖃᕐᓂᐊᕐᐳᖓ. ᓰᓚ 5 ᒎᑏ, ᐊᖏᒻᒪᕆᒍᑎᒋᓯᒪᔭᒃᑲ ᑐᓴᕋᕕᒋᑦ, ᑐᓂᓯᕕᒋᒐᕕᖓ ᐊᑎᕐᓂᒃ ᓯᕘᕋᔪᑦ ᐱᔭᒃᓴᖏᓐᓂᒃ. 6 ᐊᖓᔪᖅᑳᕐᔪᐊᑉ ᐃᓅᓯᖓ ᑕᑭᔫᑎᓚᐅᕈᒃ; ᐊᕐᕌᒍᖏᓪᓗ ᑭᖑᕚᕇᑦ ᐅᓄᕐᑐᑦ ᓯᕕᑐᓂᖓᑐᑦ ᑍᒤᓪᓗᑎᒃ. 7 ᐃᓂᖃᕐᑎᓚᐅᕈᒃ ᒎᑎᐅᑉ ᓵᖓᓂ ᐃᓱᖃᖏᑦᑐᒧᑦ; ᓇᒡᓕᖕᓂᕐᓄᑦ ᓱᖁᓯᔪᐃᑦᑑᓂᕐᓄᓪᓗ ᑲᒪᒋᓚᐅᕈᒃ ᓴᐳᑦᔭᐅᓯᒪᖁᓪᓗᒍ. 8 ᑍᒤᑉᐸᑦ ᑕᕝᕙ ᐊᑏᑦ ᓂᕐᑐᕐᓗᒍ ᐃᓐᖏᕈᑎᒋᔪᒪᕙᕋ ᐃᓱᖃᖏᑦᑐᒧᑦ, ᐊᖏᒻᒪᕆᒍᑎᒋᓯᒪᔭᒃᑲᓗ ᑐᓂᓗᒋᑦ ᑲᔪᓯᑎᓐᓂᐊᕐᐸᒃᑲ ᖃᐅᑕᒫᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society