ᐃᓐᖏᕈᑎᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ ᐊᒃᓱᕈᕐᓇᕐᑐᒦᓪᓗᓂ ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ 1 ᐊᑕᓃᖅ ᓂᓐᖓᒡᓗᑎᑦ ᓱᐊᒃᑍᓕᓐᖓ, ᓈᒻᒪᒃᓴᖏᓐᓂᕐᔪᐊᒧᓪᓗ ᓱᒋᐊᕐᑍᓕᓐᖓ. 2 ᓂᑲᒋᓚᐅᓐᖓ ᐊᑕᓃᖅ ᓴᓐᖐᑦᑑᒐᒪ; ᐊᑕᓃᖅ ᐋᖅᑭᓚᐅᓐᖓ ᓴᐅᓂᒃᑲ ᐃᓱᐊᖏᒻᒪᑕ. 3 ᑕᕐᓂᕋᓗ ᐊᖏᔪᒥᒃ ᐃᓱᐊᖏᒻᒪᑦ, ᐃᕝᕕᓪᓕ ᐊᑕᓃᖅ, ᖃᓄᖅ ᐊᑯᓂᐅᑎᒋᓂᐊᕐᐹ? 4 ᐊᑕᓃᖅ ᐅᑎᓚᐅᕆᑦ, ᓴᐳᑎᓚᐅᓐᖓ! ᐱᐅᓕᓚᐅᓐᖓ ᓇᒡᓕᒍᓱᖕᓂᕐᓄᑦ ᓱᖁᓯᔪᐃᑦᑐᒧᑦ. 5 ᑐᖁᔪᓂᑦ ᐃᖅᑲᐅᒪᔭᐅᖏᓐᓇᕕᑦ; ᑐᖁᖓᔪᓪᓗ ᐃᓂᖏᓐᓂ ᑭᐊ ᖁᔭᒋᓂᐊᕐᐹᑏᑦ? 6 ᑕᖃᒐᒪ ᓂᐹᓂᕐᒥᒃ; ᐅᓐᓄᐊᖅ ᓈᓪᓗᒍ ᓯᓂᒡᕕᒐ ᖃᐅᓯᕐᑎᑉᐸᕋ ᕿᐊᓂᓐᓄᑦ, ᓇᓪᓚᖓᕕᒐᓗ ᒪᓴᒃᑎᑉᐸᕋ ᖁᕝᕕᓐᓄᑦ. 7 ᐃᔩᒃᑲᒃ ᓴᓐᖐᑦᑑᓕᕐᐴᒃ ᕿᒃᓵᖕᓂᓐᓄᑦ; ᑕᒃᐲᑦᑑᓕᕐᐳᖓ ᐊᑭᕋᕐᑐᕐᑎᒃᑲ ᐱᑦᔪᑎᒋᓪᓗᒋᑦ. 8 ᐱᐅᖏᑦᑐᓕᓂᕐᒥᒃ ᐱᓇᓱᐊᕐᑎᐅᔪᓯ ᕿᒪᓚᐅᕐᓯᓐᖓ; ᐊᑕᓂᐅᑉ ᖁᕝᕕᐅᕐᓂᕐᒪ ᓂᐱᖓ ᑐᓵᖕᒪᒍ. 9 ᐊᑕᓂᐅᑉ ᑐᒃᓯᐊᕐᓂᕋ ᑐᓴᕐᒪᒍ, ᓂᑲᒋᔭᐅᔪᒪᓂᕐᒧᑦ ᓂᓪᓕᐊᓂᕋ ᑐᓵᖕᒪᒍ, ᐊᑕᓂᐅᑉ ᑐᒃᓯᐊᕐᓂᕋ ᐱᕚ. 10 ᐊᑭᕋᕐᑐᕐᑎᒃᑲ ᑲᓐᖑᓱᒡᓕᑦ, ᑲᑉᐱᐊᓇᕐᑐᒦᓪᓗᑎᒡᓗ; ᐅᑎᒧᑦ ᓵᓕᕐᓕᑦ, ᑕᕝᕔᓐᓇᕐᓗ ᑲᓐᖑᓱᓕᕐᓗᑎᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society