ᐃᓐᖏᕈᑎᑦ 58 - ᐊᒡᓔᑦ ᐃᑦᔪᕐᖕᓁᑦᑐᑦᐱᐅᖏᑦᑐᓕᔪᑦ ᐃᖅᑲᕐᑐᕐᑕᐅᓂᖓᑦ ᑍᕕᑎᐅᑉ ᐃᓐᖏᕈᑖ 1 ᓯᕗᓕᕐᑎᐅᔪᓯ ᓱᓕᑦᓯᐊᕐᑐᒥᒃ ᐅᖃᓪᓚᖃᑦᑕᕐᐱᓰ? ᐃᖅᑲᕐᑐᐃᓕᕌᖓᑦᓯ ᐃᓄᖕᓂᒃ ᓱᓕᔪᒥᒃ ᐃᖅᑲᕐᑐᐃᖃᑦᑕᕐᐱᓰ? 2 ᑍᒤᖏᒻᒪᑦ, ᐆᒻᒪᑎᑦᓯᒍᑦ ᐋᖅᑭᒃᓱᐃᕗᓯ ᓇᓛᒎᖏᑦᑐᒥᒃ ᐃᖅᑲᕐᑐᐃᓂᕐᒥᒃ, ᐊᒡᒐᑦᓯᓐᓄᑦ ᐱᓂᐊᕐᓂᖃᕐᐳᓯ ᑲᑉᐱᐊᓱᒃᑎᑦᓯᓂᕐᒥᒃ ᓄᓇᕐᔪᐊᒥ. 3 ᐱᐅᖏᑦᑐᓕᔪᑦ ᐃᒡᓕᐊᕐᒥᑦ ᐊᓂᓚᐅᕋᑎᒃ ᑕᒻᒪᓕᕇᕐᐸᒃᐳᑦ, ᐃᕐᓂᐊᖑᓂᕐᒥᖕᓂᑦ ᓱᓕᖏᑦᑐᓂᒃ ᐅᖃᓪᓚᓕᕐᐸᒃᐳᑦ. 4 ᑐᖁᓐᓇᕐᑐᖁᑎᖏᑦ ᖁᒡᓗᒋᐊᑉ ᑐᖁᓐᓇᕐᑐᖏᑕ ᐊᑦᔨᒋᕔᑦ; ᖁᒡᓗᒋᐊᑦ ᑰᑉᐸᕋᒥᒃ ᐊᑎᓖᑦ ᑐᓵᖏᑦᑐᑦ ᐊᑦᔨᒋᕔᑦ, 5 ᑐᓵᓐᖏᓚᑦ ᓱᐴᒐᕐᑑᑉ ᓂᓪᓕᐊᑎᑕᖓᓂᒃ ᒪᓕᒋᐊᖃᕐᑕᒥᓂᒃ, ᓱᐴᒐᕐᑐᖅ ᐊᔪᖏᑦᓯᐊᕋᓗᐊᕐᑎᓪᓗᒍ. 6 ᒎᑏ, ᑭᒍᑎᖏᑦ ᖃᓂᖏᓐᓃᑦᑐᑦ ᓯᖁᒥᒃᑭᑦ; ᐊᑕᓃᖅ, ᓛᔭᑦ ᐃᓐᓇᐅᖏᑦᑐᑦ ᑐᓗᕆᐊᖏᑦ ᓄᓱᒃᑭᑦ! 7 ᐊᓯᐅᑎᒃᑭᑦ ᑰᒃᑐᑦ ᐃᖏᕐᕋᔪᑐᑦ ᓴᕐᕙᐅᑎᓪᓗᒋᑦ; ᐃᕕᒃᑎᑐᑦ ᑐᓪᓕᕋᕐᑕᐅᓕᑦ ᐊᖅᑯᑎᒦᑦᑐᑎᑐᑦ. 8 ᓯᐅᓐᓇᕐᑎᑐᑦ ᐃᖏᕐᕋᓗᓂ ᐊᓯᐅᕙᓪᓕᐊᔪᑎᑐᑦ, ᓄᑕᕋᕐᑎᑐᑦ ᑐᖁᖓᓪᓗᓂ ᐃᕐᓂᐊᖑᔪᑎᑐᑦ, ᓯᕿᓂᕐᒥᒃ ᑕᑯᓂᐊᖏᑦᑐᑎᑐᑦ. 9 ᐅᒃᑯᓯᒃ ᐆᓇᕐᓯᖅᑳᕐᑎᓐᓇᒍ ᐅᕐᐱᒊᑦ ᑲᑭᓪᓚᕐᓇᕐᑐᑦ ᐃᑯᐊᓚᓂᖏᓐᓄᑦ, ᐆᒻᒪᐅᒐᓗᐊᕐᐸᑕ ᐸᓪᓕᐅᒃᐸᑕᓘᓐᓃᑦ, ᐱᐅᖏᑦᑐᓕᔪᑦ ᑎᒃᑕᐅᑎᑦᓱᒫᕐᐰᑦ. 10 ᐃᓱᐊᕐᑐᑦ ᖁᕕᐊᓱᒍᒫᕐᐳᑦ ᐃᑲᔪᕐᓯᕐᑕᐅᓂᕐᒥᖕᓂᒃ ᑕᑯᓕᕈᑎᒃ; ᐃᑎᒐᑎᒡᓗ ᐅᐊᓴᕈᒫᕐᐰᑦ ᐱᐅᖏᑦᑐᓕᔪᑦ ᐊᐅᖏᓐᓄᑦ. 11 ᐃᓄᐃᑦ ᑕᕝᕙ ᐅᖃᕈᒫᕐᐳᑦ, ᓱᓕᔪᒥᒃ ᐃᓱᐊᕐᑐᑦ ᐊᑭᓕᕐᑕᐅᕗᑦ; ᓱᓕᔪᒥᒃ ᐃᓛᒃ ᒎᑎ ᐃᖅᑲᕐᑐᐃᕗᖅ ᓄᓇᕐᔪᐊᕐᒥᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society