ᐃᓐᖏᕈᑎᑦ 51 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐃᓱᒪᒋᔪᓐᓁᕐᕕᐅᔪᒪᓂᕐᒧᑦ ᑍᕕᑎᐅᑉ ᐃᓐᖏᕈᑖ ᓁᑕᓂᒧᑦ ᐅᖃᐅᑦᔭᐅᖕᒪᑦ ᐹᓰᐸᒥᒃ ᐊᓯᓐᓂᐊᖃᑎᖃᓚᐅᕐᑎᓪᓗᒍ 1 ᒎᑏ, ᓂᑲᒋᓚᐅᓐᖓ, ᑍᒪᓐᖓᑦ ᓇᒡᓕᒍᓱᖕᓃᑦ ᓱᖁᓯᔪᐃᑦᑐᖅ ᒪᓕᒡᓗᒍ; ᓂᑲᒍᓱᖕᓃᓪᓗ ᐊᒥᒐᖏᑦᑐᖅ ᒪᓕᒡᓗᒍ ᐊᔪᕐᓂᒃᑲ ᑕᕐᕆᑎᓚᐅᒃᑭᑦ. 2 ᐅᐊᓴᓚᐅᓐᖓ ᓴᓗᒻᒪᕐᑎᓪᓗᖓ ᐊᔪᕐᑐᓕᓂᓐᓂᑦ ᑕᒤᓐᓂᑦ ᐊᔪᕐᓂᓐᓂᓪᓗ ᓴᓗᒻᒪᕐᓴᓚᐅᓐᖓ. 3 ᐊᔪᕐᑐᓕᓂᑲ ᒥᓯᐊᕈᑎᒋᓐᖏᓚᒃᑲ, ᐱᐅᖏᑦᑐᓕᓂᕋᓗ ᓯᕗᕋᓐᓃᓕᕐᐳᖅ. 4 ᐃᓕᖕᓄᓪᓕ, ᑭᓯᐊᓂ ᐊᔪᕐᑐᓕᓚᐅᕐᐳᖓ, ᐱᐅᖏᑦᑐᖅ ᑕᒪᓐᓇ ᐊᑐᓚᐅᕋᒃᑯ ᓵᖕᓂ, ᓱᓕᑦᓯᐊᕐᓗᑎᑦ ᐃᖅᑲᕐᑐᐃᓃᑦ ᖃᐅᔨᔭᐅᖁᓪᓗᒍ ᓂᓪᓕᐊᓕᕌᖓᕕᑦ, ᐃᖅᑲᕐᑐᐃᔭᕌᖓᕕᓪᓗ ᐸᓯᔭᒃᓴᐅᓂᖃᖏᓐᓇᕕᑦ. 5 ᓱᓕᔪᒥᒃ ᐊᔪᕐᑐᓕᓂᕐᒥ ᐃᕐᓂᐊᖑᓚᐅᕐᐳᖓ, ᐊᔪᕐᓂᕐᒥᓗ ᐊᓈᓇᒪ ᓇᑦᔨᐊᕆᓕᓚᐅᕐᐹᖓ. 6 ᓱᓕᑦᓯᐊᕐᑐᒥᒃ ᐱᔪᒪᕗᑎᑦ ᐃᓗᒥᑦ ᐱᔪᒥᒃ, ᐃᓗᒃᑯᓪᓗ ᐃᔨᕐᓯᒪᔪᒃᑯᑦ ᓯᓚᑐᓂᕐᒥᒃ ᖃᐅᔨᑎᓐᓂᐊᕐᐸᕐᒪ. 7 ᓴᓗᒻᒪᕐᓴᓚᐅᓐᖓ ᕼᐊᓯᑉᒧᑦ, ᑕᕝᕙ ᓴᓗᒻᒪᕐᓂᐊᕐᐳᖓ; ᐅᐊᓴᓚᐅᓐᖓ, ᑕᕝᕙ ᐊᐳᒻᒥᑦ ᖃᑯᕐᓂᕐᓴᐅᓕᕐᓂᐊᕐᐳᖓ. 8 ᑐᓵᑎᓚᐅᓐᖓ ᖁᕕᐊᓱᖕᓂᕐᒥᒃ ᐊᓕᐊᓁᒍᓱᖕᓂᕐᒥᒡᓗ, ᓴᐅᓃᑦ ᓯᖁᒥᓚᐅᕐᑕᑎᑦ ᖁᕕᐊᓱᓕᖁᓪᓗᒋᑦ. 9 ᑮᓁᑦ ᐃᔨᓚᐅᕈᒃ ᐊᔪᕐᓂᓐᓂᑦ, ᐊᓯᐅᑎᓚᐅᒃᑭᓪᓗ ᑕᒪᕐᒥᒃ ᐱᐅᖏᑦᑐᓕᓂᒃᑲ. 10 ᐆᒻᒪᑎᒥᒃ ᓴᓗᒪᔪᒥᒃ ᓴᓇᓚᐅᕆᑦ ᐃᓗᓐᓂ, ᒎᑏ, ᓄᑖᓐᖑᕐᑎᓪᓗᒍᓗ ᐊᓂᕐᓂᕋ ᓈᓚᒎᕐᑐᖅ ᐃᓗᓐᓂ. 11 ᐊᓂᑎᓐᓂᐊᕐᓇᖓ ᓇᔪᒐᕐᓂᑦ, ᐊᕐᓵᕐᑍᓕᓐᖓᓗ ᐊᓂᕐᓂᕐᓂᒃ ᐃᑦᔪᕐᓁᑦᑐᒥᒃ. 12 ᐱᐅᓕᒃᓯᓂᕐᐱᑦ ᖁᕕᐊᓇᕐᓂᖓ ᐅᑎᕐᑎᓚᐅᕈᒃ ᐅᕙᓐᓄᑦ, ᑐᓂᓯᕕᒋᓗᖓᓗ ᐊᓂᕐᓂᕐᒥᒃ ᓈᓚᑦᓯᐊᕈᓐᓇᕐᑐᒥᒃ. 13 ᓈᒻᒪᖏᑦᑐᓕᔪᑦ ᐊᔪᕆᕐᑐᕐᓂᐊᕋᒃᑭᑦ ᐱᐅᓯᕐᓂᒃ, ᑕᕝᕙ ᐊᔪᕐᑐᓕᔪᑦ ᓵᓐᓂᐊᕐᐳᑦ ᐃᓕᖕᓄᑦ. 14 ᐱᐅᓕᓚᐅᓐᖓ ᐊᐅᖕᒥᒃ ᐊᑭᓕᒃᓴᖃᕐᓂᕐᒥᑦ, ᒎᑏ, ᐱᐅᓕᔭᐅᓂᕐᒪ ᒎᑎᖓ, ᐅᖃᕋ ᑕᕝᕙ ᓂᐱᖅᑯᕐᑐᓗᓂ ᐃᓐᖏᕐᓂᐊᕐᐳᖅ ᐃᓱᐊᕐᓂᕐᓂᒃ. 15 ᐊᑕᓃᖅ, ᖃᕐᖓᓯᓈᕋ ᐂᑦᑕᕐᑎᒍᒃ, ᖃᓂᕐᒪᓗ ᑕᕝᕙ ᓂᕐᑐᕐᓇᕐᓃᑦ ᓇᓗᓁᕐᓂᐊᕐᐹ. 16 ᑐᓂᕐᕈᑎᓂᒃ ᐆᒪᔪᕕᓂᕐᓂᒃ ᐱᔪᒪᓐᖏᓚᑎᑦ ᐱᔪᒪᒍᕕᑦ ᑐᓂᓯᕕᒋᒐᔭᕋᓗᐊᕐᐸᒋᑦ; ᐆᑕᒃᓮᑦ ᑐᓂᕐᕈᑎᑦ ᖁᕕᐊᒋᓐᖏᓚᑎᑦ. 17 ᒎᑎᐅᓪᓕ ᑐᓂᕐᕈᑏᑦ ᐃᓚᓕᐅᕈᓐᓇᕐᑕᖏᑦ ᐊᓂᕐᓂᐅᕗᑦ ᓯᖁᒥᓯᒪᔪᑦ, ᐆᒻᒪᑏᑦ ᓯᖁᒥᓯᒪᔪᑦ, ᖃᕿᐊᓕᕐᑐᓪᓗ ᒎᑏ, ᓇᕐᕈᒋᓐᖏᓚᑎᑦ. 18 ᐱᐅᔪᒥᒃ ᐱᓇᓱᐊᕐᕕᒋᒍᒃ ᓮᐅᓃ ᐃᕝᕕᑦ ᖁᕕᐊᒋᔭᒃᑯᑦ; ᔨᕉᓴᓕᐅᑉ ᐊᕙᓗᕐᔪᐊᖏᑦ ᐋᖅᑭᒃᓱᒃᑲᓐᓂᓚᐅᒃᑭᑦ. 19 ᑕᕝᕙ ᖁᕕᐊᒋᔭᖃᓕᕐᓂᐊᕐᐳᑎᑦ ᐃᓱᐊᕐᑐᓕᓂᕐᒧᑦ ᑐᓂᕐᕈᑎᓂᒃ, ᑐᓂᕐᕈᑎᓂᒃ ᐆᑕᒃᓴᓂᒃ ᐃᓗᐃᑦᑐᓂᒡᓗ ᐆᑕᒃᓴᓂᒃ ᐆᒪᔪᕕᓂᕐᓂᒃ ᑕᕝᕙ ᐆᒪᔪᑦ ᐸᖕᓂᖏᓐᓂᒃ ᑐᓂᕐᕈᓯᓕᕐᓂᐊᕐᐳᑦ ᑐᓂᕐᕈᓯᕐᕕᖁᑎᖕᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society