ᐃᓐᖏᕈᑎᑦ 50 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎ ᐃᓱᐊᕐᑐᒥᒃ ᐃᖅᑲᕐᑐᐃᔨᐅᕗᖅ

ᐊᓴᐸᐅᑉ ᐃᓐᖏᕈᑖ

¹ ᐊᔪᒐᖃᖏᑦᑐᖅ, ᒎᑎ ᐊᑕᓂᖅ, ᐅᖃᓚᐅᕐᐳᖅ, ᓄᓇᓗ ᕾᖁᓪᓗᒍ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᖓᓄᑦ.

² ᓮᐅᓂᒥᑦ, ᐃᓂᖁᓇᕐᓂᒥᒃ ᓈᒻᒪᒃᓯᓯᒪᑦᓯᐊᕐᑐᒥᒃ, ᒎᑎ ᖃᐅᒪᓂᐊᕐᐳᖅ.

³ ᒎᑎᕗᑦ ᕾᔪᒫᕐᐳᖅ, ᓂᐰᑦᑑᓂᐊᕋᓂᓗ; ᐃᑯᒪ ᓄᖒᑦᓯᔪᕐᔪᐊᖅ ᓵᖓᓃᑦᓱᒫᕐᐳᖅ, ᐊᕙᑖᓂᓗ ᓯᓚᕐᓂᕐᓗᒡᔪᐊᖃᕈᒫᕐᐳᖅ.

⁴ ᕿᓔᑦ ᑯᑦᓯᒃᑐᑦ ᕾᖁᔪᒫᕐᐰᑦ, ᓄᓇᕐᔪᐊᕐᓗᑦᑕᐅᖅ, ᐃᓄᖁᑎᓂ ᐃᖅᑲᕐᑐᕈᒪᓪᓗᒋᑦ:

⁵ “ᑲᑎᒋᑦᓯ ᐅᕙᓐᓄᑦ ᐃᑦᔪᕐᓁᑦᑐᖁᑎᒃᑲ, ᐊᖏᖃᑎᒌᒍᑎᓕᐅᕐᓯᒪᔪᑦ ᐅᕙᓐᓄᑦ ᑐᓂᕐᕈᑎᒃᓴᒃᑯᑦ.”

⁶ ᕿᓔᑦ ᓇᓗᓁᕐᓯᓕᕐᓕᑦ ᐃᓱᐊᕐᑑᓂᖓᓂᒃ, ᒎᑎ ᓇᖕᒥᓂᖅ ᐃᖅᑲᕐᑐᐃᔨᐅᖕᒪᑦ. ᓰᓚ

⁷ “ᑐᓵᒋᑦᓯ, ᐃᓄᖁᑎᒃᑲ, ᐅᖃᕐᓂᐊᕋᒪ, ᐆ ᐃᓴᕆᐊᓪ, ᐃᖅᑲᕐᑐᐃᓂᐊᕋᒪ ᐃᓕᖕᓂᒃ; ᒎᑎᐅᒐᒪ, ᐃᕝᕕᑦ ᒎᑏᑦ!

⁸ ᓱᐊᖕᓂᐊᓐᖏᓚᒋᑦ ᐆᒪᔪᑦ ᑐᓂᕐᕈᑏᑦ ᐱᓪᓗᒋᑦ ᑐᓂᕐᕈᑎᓪᓘᓐᓃᑦ ᐆᑕᒃᓮᑦ ᐱᑦᔪᑎᒋᓗᒋᑦ, ᑕᒪᒃᑯᐊ ᐅᕙᓐᓅᕐᑕᐅᑦᓮᓐᓇᕐᒪᑕ.

⁹ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐃᒡᓗᑦᓯᓐᓂᑦ ᐱᔪᒪᓐᖏᓚᖓ, ᒎᑦᓯᒥᒡᓘᓐᓃᑦ ᐆᒪᔪᖁᑎᒃᑯᕕᑦᓯᓐᓂᑦ.

¹⁰ ᓂᕐᔪᑎᓕᒫᑦ ᓇᐹᕐᑐᐊᓗᖕᓃᑦᑐᑦ ᐱᒋᒐᒃᑭᑦ, ᐃᒻᒧᓯᐅᒊᓪᓗ ᐅᓄᕐᑐᑦ ᑲᑎᓐᖓᔪᑦ 1,000ᓂ ᖃᖅᑲᓂ ᐱᒋᕙᒃᑲ.

¹¹ ᑎᖕᒥᐊᓕᒫᓪᓗ ᖃᖅᑲᓃᑦᑐᑦ ᖃᐅᔨᒪᕙᒃᑲ, ᓂᕐᔪᑎᓪᓗ ᓄᔪᐊᕐᑐᑦ ᓇᑎᕐᓇᒥᐅᑕᓕᒫᑦ ᐱᒋᕙᒃᑲ.

¹² ᑳᒃᑯᒪ, ᐃᓕᑦᓯᓐᓄᑦ ᐅᖃᕋᔭᓐᖏᓚᖓ; ᓯᓚᕐᔪᐊᖅ ᐱᒋᒐᒃᑯ, ᑕᕝᕙᓃᑦᑐᓕᒫᓪᓗ.

¹³ ᐃᒻᒧᒃᓯᐅᒊᑦ ᐸᖕᓂᖏᑕ ᓂᕿᖏᓐᓂᒃ ᓂᕆᓂᐊᕐᐳᖔ? ᒎᑦᓯᓪᓗ ᐊᐅᖏᓐᓂᒃ ᐃᒥᕐᓂᐊᕐᐳᖔ?

¹⁴ ᒎᑎ ᑐᓂᕐᕈᓯᕐᕕᒋᓯᐅᒃ ᖁᔭᓕᓂᕐᒥᒃ, ᐊᖏᕈᑎᑦᓯᓐᓂᒡᓗ ᑐᓂᓯᒋᑦᓯ ᖁᑦᓯᖕᓂᕐᐹᖑᔪᒧᑦ.

¹⁵ ᓂᓪᓕᐊᕕᒋᓯᓐᖓ ᐅᓪᓗᒥᒃ ᐊᒃᓱᕈᕐᓇᕐᑐᖃᕐᑎᓪᓗᒍ; ᑕᕝᕙ ᓴᐳᑎᓂᐊᕐᐸᑦᓯ, ᓂᕐᑐᕐᓂᐊᕐᐸᑦᓯᓐᖓᓗ.”

¹⁶ ᐱᐅᖏᑦᑐᓕᔪᓄᓪᓕ ᒎᑎ ᐅᖃᕐᐳᖅ: “ᖃᓄᒃ ᐱᔪᓐᓇᐅᑎᖃᕐᐱᓰ ᐱᖁᔭᒃᑲ ᐅᖃᐅᓯᕆᓗᒋᑦ? ᐊᖏᕈᑎᒋᓯᒪᔭᒃᑲᓗ ᓂᓪᓕᐊᑦᔪᑎᒋᓗᒋᑦ?

¹⁷ ᓇᓗᓇᖏᒻᒪᑦ ᐃᓕᓐᓂᐊᕐᑎᑦᓯᑦᔪᑎᒃᑲ ᐆᒥᒋᒐᑦᓯᐅᒃ ᐅᖃᐅᓯᒃᑲᓗ ᑐᓄᑦᓯᓐᓄᑦ ᐱᑎᒃᑲᑦᓯᐅᒃ.

¹⁸ ᑎᒡᓕᑐᔪᒥᒃ ᑕᑯᒐᑦᓯ ᐊᖏᖃᑎᒋᓚᐅᕐᐸᓯ, ᓄᓕᐊᕇᖕᓂᕐᒥᒡᓗ ᐊᓯᕈᐃᔪᓂ ᑍᒤᓕᐅᖃᑕᐅᓯᒪᕗᓯ.

¹⁹ ᖃᓂᕐᓯ ᑐᓂᓯᒪᕙᓯ ᐱᐅᖏᑦᑐᒧᑦ, ᐅᖃᕐᓯᓗ ᐊᑐᕐᐸᓯ ᐅᐃᕕᕆᒃᓯᓂᕐᒧᑦ.

²⁰ ᖃᑕᓐᖑᑎᑦᓯᓐᓂᒃ ᐊᑭᕋᕐᑐᕐᓗᒍ ᓂᓪᓕᐊᕗᓯ ᐃᒃᓯᕚᕐᕕᖕᒥ; ᐊᓈᓇᑦᓯ ᐃᕐᓂᖓ ᐊᒡᓚᑦ ᐅᖃᕐᓂᕐᓘᑎᒋᕙᓯ.

²¹ ᑕᒪᒃᑯᓂᖓ ᑍᒤᓕᐅᕐᓯᒪᕗᓯ, ᐅᕙᖓᓗ ᓂᓪᓕᓚᐅᓐᖏᓚᖓ; ᐃᓱᒪᓚᐅᕐᐳᓯ ᐃᓕᑦᓯᓂᒃ ᑕᒤᑎᒍᑦ ᐊᑦᔨᖃᕋᓱᒋᓪᓗᖓ; ᓱᒋᐊᓕᕐᐸᑦᓯᓕ, ᓵᓐᖓᓕᕐᓗᓯᓗ ᓇᖕᒥᓂᑦᓯᓐᓄᑦ.

²² ᑕᒪᓐᓇ ᐃᓱᒪᒋᓚᐅᕐᓯᐅᒃ, ᐃᓕᑦᓯ ᒎᑎᒥᒃ ᐳᐃᒍᕐᓯᒪᔪᓯ, ᐊᓕᒃᑐᐃᓕᖁᓇᖓ ᐃᓕᑦᓯᓐᓂᒃ, ᑭᓇᒧᓪᓘᓐᓃᑦ ᓴᐳᑎᔭᐅᔪᓐᓇᕐᓂᐊᓐᖏᓚᓯ.

²³ ᑐᓂᕐᕈᓯᖃᑦᑕᕐᑑᑉ ᑐᓂᕐᕈᑎᓂᒃ ᖁᔭᓕᑦᔪᑎᓂᒃ ᓂᕐᑐᕐᓇᕐᑎᑉᐸᖓ; ᐱᐅᓯᕐᒥᓂᒡᓗ ᓱᓕᑦᓯᐊᕐᑎᑦᓯᔪᒧᑦ ᒎᑎᐅᑉ ᐱᐅᓕᒃᓯᓂᖓᓂᒃ ᖃᐅᔨᑎᑦᓱᒪᕙᕋ.”