ᐃᓐᖏᕈᑎᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᓴᐳᑎᔭᐅᓯᒪᔪᒪᓂᕐᒧᑦ ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ 1 ᐅᖃᐅᓯᒃᑲ ᑐᓴᓚᐅᑭᑦ ᐊᑕᓃᖅ, ᐃᓱᒪᒃᓴᕐᓯᐅᕐᓂᒃᑲᓗ ᐃᓱᒪᒋᓚᐅᒃᑭᑦ. 2 ᐃᓗᖏᕐᓱᕐᓗᖓ ᓂᓪᓕᐊᓂᕋ ᑐᓴᓚᐅᕈᒃ, ᐃᓕᖕᓄᑦ ᑐᒃᓯᐊᕐᓂᐊᕋᒪ, ᐊᖓᔪᖅᑳᕐᔪᐊᕆᒐᒃᑭᑦ, ᒎᑎᒋᓪᓗᑎᓪᓗ. 3 ᐅᓪᓛᒃᑯᑦ ᓂᐱᒐ ᑐᓴᕐᓂᐊᕐᐸᑦ ᐊᑕᓃᖅ, ᐅᓪᓛᒃᑯᑦ ᐃᓕᖕᓄᑦ ᑐᕌᕐᑐᒥᒃ ᓂᓪᓕᐊᔪᒪᕗᖓ, ᖁᒻᒧᓪᓗ ᑕᑯᓴᕐᓂᐊᕐᐳᖓ. 4 ᐱᐅᖏᑦᑐᓕᓂᕐᒥᒃ ᖁᕕᐊᒋᔭᖃᕐᓗᑎᑦ ᒎᑎᐅᖏᓐᓇᕕᑦ. ᐱᐅᖏᑦᑐᓕᔪᕐᓗ ᐃᓕᖕᓂ ᐃᓂᖃᕐᓂᐊᓐᖏᓚᖅ. 5 ᐱᐅᔪᕆᔪᑦ ᓵᖕᓂ ᓂᑯᕕᖓᓂᐊᓐᖏᓚᑦ, ᑕᒪᕐᒥᒃ ᐱᐅᖏᑦᑐᓕᓂᕐᒥᒃ ᐱᓇᓱᐊᕐᑐᑦ ᐆᒥᒋᕙᑎᑦ. 6 ᑐᖁᑦᓱᒫᕐᐸᑎᓪᓗ ᓱᓕᖏᑦᑐᓂᒃ ᐅᖃᐅᓯᖃᕐᑐᑦ; ᐊᑕᓂᐅᑉ ᑐᓄᑉᐰᑦ ᐃᓅᖃᑎᒥᖕᓂᒃ ᑐᖁᑦᓯᔪᑦ, ᐃᓄᐃᓪᓗ ᐅᐃᕕᕆᒃᓯᔪᑦ. 7 ᐅᕙᖓᓕ, ᐃᒡᓗᖕᓄᑦ ᐃᑎᕈᒪᕗᖓ, ᓇᒡᓕᒍᓱᖕᓂᕐᔪᐊᑦ ᐊᒥᒐᖏᑦᑐᑦ ᐱᔪᓐᓇᐅᑎᒋᓗᒍ; ᐃᓕᖕᓂᒃ ᓯᕘᕋᓂᕐᒧᑦ, ᑐᒃᓯᐊᕐᓂᕐᒧᑦ ᐱᔨᑦᓯᕈᒪᕙᒋᑦ, ᑐᒃᓯᐊᕐᕕᒡᔪᐊᖁᑎᕕᑦ ᐃᑦᔪᕐᓁᑦᑑᑉ ᓇᓛᓄᑦ ᓵᓐᖓᓗᖓ. 8 ᐊᑕᓃᖅ ᑕᓯᐅᓚᐅᓐᖓ, ᐃᓱᐊᕐᑐᓕᓂᕐᓄᑦ, ᐊᑭᕋᕐᑐᕐᑎᒃᑲ ᐱᑦᔪᑎᒋᓪᓗᒋᑦ; ᐊᖅᑯᓯᓃᑦ ᑐᑭᓕᐊᕐᑎᓚᐅᕈᒃ ᑮᓇᕐᒪ ᓵᖓᓂ. 9 ᖃᓂᖏᓐᓂ ᑲᔪᓯᓂᕐᑕᖃᓐᖏᓚᖅ; ᐃᓗᖏᓐᓂ ᓯᖁᒥᑦᓯᓂᕐᒥ ᐱᑕᖃᕐᐳᖅ, ᑐᖅᑯᔮᖏᑦ ᐃᓗᕕᕐᑎᑐᑦ ᐊᖕᒪᕐᓯᒪᔪᑎᑐᑦ ᑍᒤᑉᐳᑦ; ᐅᖃᕐᒥᖕᓄᓪᓗ ᐅᐃᕕᕆᒃᓯᓇᓱᐊᕐᐳᑦ. 10 ᐸᓯᔭᒃᓴᐅᓂᕋᕐᓗᒋᑦ ᐅᖃᐅᓯᕆᒃᑭᑦ ᒎᑏ! ᐃᓱᒪᒃᓴᕐᓯᐅᕈᑎᒋᔭᒥᖕᓂᒃ ᑲᑕᒍᑎᖃᓕᕐᓕᑦ; ᐃᒋᓕᒃᑭᑦ ᐱᐅᖏᑦᑐᓕᓂᖏᑦ ᐅᓄᕐᑐᑦ ᐱᑦᔪᑎᒋᓪᓗᒋᑦ, ᐃᓕᖕᓂᒃ ᓵᓚᖃᕋᓱᐊᕈᒫᕐᒪᑕ. 11 ᐃᓕᖕᓂᒡᓕ ᑕᑎᖃᕐᑐᓕᒫᑦ ᖁᕕᐊᓱᒡᓕᑦ; ᓂᐱᖃᓕᕐᓕᑦ ᖁᕕᐊᓱᖕᓂᕐᒥᒃ, ᐃᕝᕕᑦ ᓴᐳᑎᒐᕕᒋᑦ; ᐊᑎᕐᓂᒃ ᓇᒡᓕᒍᓱᒃᑐᑦ ᐃᓕᖕᓂᒃ ᖁᕕᐊᓲᑎᖃᓕᕐᓕᑦ. 12 ᐃᕝᕕᑦ ᐊᑕᓃᖅ, ᐃᓱᐊᕐᑐᑦ ᓮᒪᓂᕐᒥᒃ ᑐᓂᓯᕕᒋᔪᒫᕋᕕᒋᑦ; ᓇᒡᓕᒍᓱᖕᓂᕐᓂᒃ ᐊᕙᓗᓯᒪᔪᒫᕋᕕᒋᑦ ᓴᐴᓗᑕᕐᑎᑐᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society