ᐃᓐᖏᕈᑎᑦ 49 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓔᑦᑐᑦ ᑕᑎᒋᔭᖏᑦ

ᐃᓐᖏᕐᑏᑦ ᑲᒪᔨᖏᓐᓄᑦ   ᑰᕋᐅᑉ ᐃᕐᓂᖏᑕ ᐃᓐᖏᕈᑖ

¹ ᐃᓄᓕᒫᖑᔪᓯ, ᐅᓇ ᑐᓴᕐᓯᐅᒃ! ᓈᓚᒋᑦᓯ ᓄᓇᕐᔪᐊᕐᒥ ᓄᓇᖃᕐᑐᓕᒫᖑᔪᓯ,

² ᐊᔪᕐᑐᓪᓗ ᐊᔪᖏᑦᑐᓪᓗ, ᐊᒃᓗᐃᑦᑐᓪᓗ ᐊᒃᓗᔪᓪᓗ ᐊᑕᐅᑦᓯᒃᑯᑦ.

³ ᖃᓂᕋ ᓂᓪᓕᐊᓂᐊᕐᒪᑦ ᐅᖃᐅᓯᕐᓂᒃ ᓯᓚᑐᔪᓂᒃ. ᐆᒻᒪᑎᒐᓗ ᐃᓱᒪᒃᓴᕐᓯᐅᕈᑎᓂᒃ ᑐᓂᓯᓂᐊᕐᒪᑦ ᑐᑭᓯᑦᔪᑎᒃᓴᓂᒃ.

⁴ ᓯᐅᑎᒐ ᒪᓂᔪᒪᕙᕋ ᐅᖃᐅᓯᐅᖃᑦᑕᕐᓯᒪᔪᒧᑦ; ᕼᐋᕐᐱᒧᑦ ᓄᖃᕐᓯᕋᓕᖕᒧᑦ ᓇᓗᓁᕈᒪᕙᕋ ᐅᖃᐅᓯᖅ ᐃᔨᕐᓯᒪᔪᖅ.

⁵ ᓱᖕᒪᑦ ᐅᓪᓗᓂᒃ ᐱᐅᖏᑦᑐᓂᒃ ᓯᕘᕋᔭᕆᐊᖃᕐᐳᖓ, ᐱᐅᖏᑦᑐᓕᓂᕐᒧᑦ ᐅᐃᕕᕆᒃᓯᔪᓂᑦ ᑬᕙᓪᓚᒃᑕᐅᓯᑎᓪᓗᖓ?

⁶ ᐊᔪᕐᓴᖏᓐᓂᕐᒥᖕᓂᒃ ᑕᑎᖃᕐᑐᑦ ᐃᓄᒋᐊᒃᑐᓂᓗ ᐊᒃᓗᐃᓐᓂᕐᒥᖕᓂᒃ ᐱᐅᔪᕆᑦᔪᑎᖃᕐᑐᑦ.

⁷ ᓇᓪᓕᐊᑦ ᐃᓅᓯᕐᒥᓂᒃ ᐱᐅᓕᒃᓯᔪᓐᓇᓐᖏᓚᖅ, ᐃᓅᓯᖓᑕᓗ ᐅᑎᕐᑎᑕᐅᑦᔪᑎᒃᓴᖓᓂᒃ ᒎᑎᒧᑦ ᑐᓂᓯᔪᓐᓇᕋᓂ,

⁸ ᐊᑭᑐᓗᐊᕐᒪᑦ ᑕᕐᓂᖏᑕ ᐱᐅᓕᔭᐅᑦᔪᑎᒃᓴᖏᑦ, ᐊᑭᓕᐅᑎᔪᒃᓮᓪᓗ ᑍᒪᓐᖓᑦ ᓈᒻᒪᖏᒻᒪᑕ.

⁹ ᑍᒫᒃ ᑕᕝᕙ ᐃᓅᔭᕆᐊᖃᕐᐳᖅ ᐃᓱᖃᖏᑦᑐᒧᑦ, ᐃᑎᕐᓵᓗᖕᒥᒡᓗ ᖃᐅᔨᓐᖏᓮᓐᓇᕐᓗᓂ.

¹⁰ ᑕᑯᓐᓇᕐᒪᑕ ᓯᓚᑐᔪᑦᑕᐅᖅ ᑐᖁᓂᖏᓐᓂᒃ; ᑍᒫᒃᑕᐅᖅ ᓯᓔᑦᑐᑦ ᐃᓕᓯᒤᑦᑐᓪᓗ ᑐᖁᒋᕗᑦ, ᐊᒃᓗᐃᑦᔪᑎᑎᒃ ᕿᒪᒡᓗᒋᑦ ᐊᓯᒥᖕᓄᑦ.

¹¹ ᐃᓗᕕᕐᑎᒃ ᑍᒪᓐᖓᑦ ᐃᓂᒋᓂᐊᕐᐰᑦ ᐃᓱᖃᖏᑦᑐᒧᑦ, ᐃᓂᒋᓂᐊᕐᐰᓪᓗ ᑭᖑᕚᕇᑦ ᓈᓴᒐᒃᓴᐅᖏᑦᑐᑦ ᑎᑭᓪᓗᒋᑦ; ᓄᓇᑎᒡᓗ ᐊᑎᖃᕐᑎᑉᐰᑦ ᓇᖕᒥᓂᖅ ᐊᑎᕐᒥᖕᓂᒃ.

¹² ᑍᒤᒻᒪᑦ ᐃᓄᒃ ᐅᐱᓐᓇᕐᑑᒐᓗᐊᕐᓗᓂ ᑍᒤᑦᓮᓐᓇᕈᓐᓇᓐᖏᓚᖅ; ᐆᒪᔪᑦ ᐊᑦᔨᒋᕔᑦ ᑐᖁᕙᒃᑐᑦ.

¹³ ᑍᒫᒃ ᑕᕝᕙ ᓯᓔᑦᑐᑦ ᐱᐅᓯᖓᑦ, ᒪᓕᒃᑎᖏᑕᓗ, ᐅᖃᐅᓯᕆᕙᒃᑕᖏᓐᓂᒃ ᓈᒻᒪᒃᓴᕐᑐᑦ. ᓰᓚ

¹⁴ ᓰᐱᑎᑐᑦ ᑐᖁᖓᔪᑦ ᐃᓂᖓᓂ ᐃᓂᒃᓴᖃᕐᐳᑦ; ᑐᖂᑉ ᓂᕿᒋᔪᒫᕐᐰᑦ; ᓱᓕᑦᓯᐊᕐᑐᓪᓕ ᐊᖓᔪᖅᑳᖑᔪᒫᕐᐳᑦ ᑖᒃᑯᓄᖓ ᐅᓪᓛᒥ; ᐃᓂᖁᓇᕐᓂᖏᑦ ᓱᕈᕈᒫᕐᐳᑦ ᐃᓗᕕᕐᒥ, ᐊᔪᖏᓐᓂᕆᓚᐅᕐᑕᑎᒃ ᐅᖓᓯᒋᓕᕐᓗᒋᑦ.

¹⁵ ᒎᑎᐅᓪᓕ ᑕᕐᓂᕋ ᐅᑎᕐᑎᑦᓱᒫᕐᐹ ᐃᓗᕕᐅᑉ ᐱᔪᓐᓇᕐᓂᖓᓂᑦ, ᐃᓚᓕᐅᕈᒫᕐᓗᖓᓗ. ᓰᓚ

¹⁶ ᑲᑉᐱᐊᓱᖕᓂᐊᕐᓇᒃ ᑭᓇ ᐊᒃᓗᐃᑦᑑᓕᕋᓗᐊᕐᐸᑦ, ᐃᒡᓗᖃᓕᕋᓗᐊᕐᐸᓪᓘᓐᓃᑦ ᑕᑯᒥᓇᕐᑐᐊᓗᖕᒥᒃ;

¹⁷ ᑐᖁᒍᓂᓕ ᓱᓇᒥᒡᓘᓐᓃᑦ ᓇᒃᓴᕐᓂᐊᖏᒻᒪᑦ; ᐱᐅᔪᐊᓘᓂᖓᑕᓗ ᒪᓕᖕᓂᐊᓐᖏᓛ.

¹⁸ ᐃᓅᓂᕐᒥᓂ ᐃᒻᒥᓂᒃ ᓮᒻᒪᕐᑎᓯᒪᓂᕋᕐᐳᖅ ᐊᔪᕐᓴᓐᖏᓕᕈᕕᑦ ᐃᓄᖕᓂᑦ ᓂᕐᑐᕐᑕᐅᓂᐊᕋᕕᑦ,

¹⁹ ᐊᑖᑕᖓᑕ ᑭᖑᕚᖏᓐᓂ ᐃᓚᓕᐅᑎᔭᕐᑐᕐᓂᐊᐳᖅ; ᖃᐅᒪᔪᒥᒃ ᑕᑯᓂᐊᕈᓐᓃᕐᓗᑎᒃ.

²⁰ ᐃᓄᒃ ᐅᐱᒋᔭᐅᔪᖅ, ᓱᓕ ᖃᐅᔨᓐᖏᓚᖅ, ᓂᕐᔪᑎᑦ ᐊᑦᔨᒋᕔᑦ ᑐᖁᕙᒃᑐᑦ.