ᐃᓐᖏᕈᑎᑦ 41 - ᐊᒡᓔᑦ ᐃᑦᔪᕐᖕᓁᑦᑐᑦᐅᒃᐱᕐᑑᑉ ᓮᒻᒪᕐᑎᑕᐅᓂᖓ ᐃᓗᖏᕐᓱᕐᑎᑕᐅᓂᖓᓗ ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ 1 ᖁᕕᐊᓱᑦᓯᐊᕐᐳᖅ ᐊᔪᕐᓴᕐᑐᓂᒃ ᐃᓱᒪᒋᔭᖃᕐᑐᖅ; ᐊᑕᓂᐅᑉ ᓴᐳᑎᔪᒫᕐᒪᒍ ᐊᔪᕐᓇᕐᑐᖃᓕᕐᐸᑦ. 2 ᐊᑕᓂᐅᑉ ᓴᐳᑎᓯᒪᓂᐊᕐᒪᒍ ᐆᒪᑎᓐᓂᐊᕐᓗᒍᓗ; ᓮᒻᒪᕐᑎᓐᓂᐊᕐᐹᓗ ᓄᓇᒥ; ᐊᑭᕋᕐᑐᕐᑎᖏᑕᓗ ᐃᓱᒪᒋᔭᖏᓐᓄᑦ ᑐᓂᓂᐊᓐᖏᓛ. 3 ᐊᑕᓂᐅᓪᓗ ᓴᓐᖏᓂᕐᒥᒃ ᑐᓂᓯᕕᒋᓂᐊᕐᐹ ᖃᓂᒻᒪᓯᕐᒧᑦ ᐃᒡᓕᕐᒥ ᐃᓂᓪᓚᖓᕝᕕᖓᓂ; ᐋᖅᑭᖕᓂᐊᕐᐹᓗ ᖃᓂᒻᒪᓯᖓᓂᑦ. 4 ᐅᖃᓚᐅᕐᐳᖓ, “ᐊᑕᓃᖅ, ᓂᑲᒋᓚᐅᓐᖓ; ᑕᕐᓂᕋ ᐃᓅᓕᓚᐅᕈᒃ ᐃᓕᖕᓄᑦ ᐱᐅᖏᑦᑐᓕᓯᒪᒐᒪ.” 5 ᐊᑭᕋᕐᑐᕐᑎᒪ ᐱᐅᖏᑦᑐᓂᒃ ᐅᖃᐅᓯᕆᖕᒪᖓ: “ᖃᖓᓕᐅᓇ ᑐᖁᓛᕐᐸ, ᐊᑎᖓᓗ ᐳᐃᒍᕐᑕᐅᓗᓂ?” 6 ᑕᑯᔭᕐᑐᕐᑕᐅᒍᒪ, ᑕᕝᕙ ᓱᓕᖏᑦᑐᓂᒃ ᐅᖃᐅᓯᖃᕐᐳᖅ; ᐆᒻᒪᑎᒥᒍᓪᓗ ᐅᖃᕐᓂᕐᓘᑎᒃᓴᒥᓂᒃ ᑲᑎᕐᓱᐃᕗᖅ; ᐊᓂᒐᒥᓗ ᐅᖃᐅᓯᕆᓕᕐᐰᑦ. 7 ᐅᕙᓐᓂᒃ ᐱᐅᒃᓴᖏᑦᑐᑦ ᐅᖃᐱᓗᖃᑎᒌᒃᐳᑦ ᐱᑦᔪᑎᒋᓪᓗᖓ; ᐅᕙᓐᓄᓪᓗ ᐱᐅᖏᓐᓂᕐᐹᒥᒃ ᐱᓇᓱᐊᕈᒪᓪᓗᑎᒃ. 8 ᐅᖃᕐᓗᑎᒡᓗ, “ᖃᓂᒻᒪᓯᕐᒧᓄᓇ ᐱᐅᖏᑦᑐᐊᓗᖕᒧᑦ ᐱᔭᐅᓯᒪᔪᖅ, ᓇᓚᕕᒋᔭᒥᓂᓪᓗ ᒪᑭᓐᓂᐊᕈᓐᓃᕐᑐᖅ.” 9 ᐱᖃᓐᓇᕆᔭᒪᓘᓐᓃᑦ ᖃᐅᔨᒪᑦᓯᐊᕐᑕᒪ ᓱᓕᔪᕆᑦᓯᐊᕐᑕᒪᓗ, ᓂᕆᖃᑎᒋᕙᒃᑕᒪ ᑭᖕᒥᖕᒥᓄᑦ ᐅᓗᕆᐊᕐᓵᕐᐹᖓ. 10 ᐃᕝᕕᓪᓕ ᐊᑕᓃᖅ, ᓂᑲᒋᓚᐅᓐᖓ, ᒪᑭᑎᓪᓗᖓᓗ, ᑖᒃᑯᓂᖓ ᐊᑭᓂᐊᕈᓐᓇᖁᓪᓗᖓ. 11 ᖃᐅᔨᒪᕗᖓᓕ ᖁᕕᐊᒋᑦᓯᐊᕋᕕᖓ, ᐊᑭᕋᕐᑐᕐᑎᒃᑲ ᓵᓚᖃᕈᓐᓇᖏᒻᒪᑕ ᐅᕙᓐᓂᒃ. 12 ᐅᕙᖓᓕ ᓇᔪᒻᒥᕙᕐᒪ ᐱᓇᓱᐊᑦᓯᐊᕐᓂᕋ ᐱᓪᓗᒍ, ᓇᔪᒐᕐᓂᓗ ᐃᓂᖃᕐᑎᑉᐸᕐᒪ ᐃᓱᖃᖏᑦᑐᒧᑦ. 13 ᐊᑕᓂᖅ ᓂᕐᑐᕐᑕᐅᓕ, ᐃᓴᕆᐊᓕᑎᑦ ᒎᑎᖓᑦ, ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒦᓐ, ᐋᒦᓐ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society