ᐃᓐᖏᕈᑎᑦ 39 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓚᑐᓂᕐᒥᒃ ᐱᑎᑕᐅᔪᒪᓂᖅ ᐃᓱᒪᒋᔪᓐᓁᕐᕕᐅᔪᒪᓂᕐᓗ ᔨᑐᑕᓐᑯᓐᓄᑦ

ᐃᓐᖏᕐᑏᑦ ᑲᒪᔨᖓᓐᓄᑦ ᔨᑐᑖᓐᒧᑦ   ᑍᕕᑎᐅᑉ ᐃᓐᖏᕈᑖ

¹ ᐅᖃᓚᐅᕐᐳᖓ, “ᐱᓂᐊᕐᓂᒃᑲ ᐅᑦᔨᕐᑐᕈᒪᕙᒃᑲ, ᐅᖃᕋ ᐱᐅᖏᑦᑐᓕᖁᓇᒍ; ᖃᓂᕋ ᓂᓪᓕᕐᑎᑦᑍᓕᔪᒪᕙᕋ; ᐱᐅᖏᑦᑐᓕᔪᑦ ᓵᓐᓃᑎᓪᓗᒋᑦ.”

² ᓂᓪᓕᐊᓚᐅᖏᓐᓇᒪ ᓂᐱᖃᕐᓇᖓᓗ, ᓂᐱᖃᓚᐅᖏᓐᓇᒪ ᐱᐅᔪᓂᒡᓘᓐᓃᑦ ᐅᖃᓚᐅᕐᓇᖓ; ᕿᒃᓵᖕᓂᕋᓕ ᐊᖏᓂᕐᓴᐅᓕᓚᐅᕐᐳᖅ.

³ ᐆᒻᒪᑎᒐ ᐆᓇᕐᓯᓚᐅᕐᐳᖅ ᐃᓗᓐᓂ; ᐃᓱᒪᒃᓴᕐᓯᐅᕐᑎᓪᓗᖓᓕ, ᐃᓗᒐ ᐆᓇᕐᓯᓚᐅᕐᐳᖅ. ᑕᕝᕙ ᐅᖃᓕᓚᐅᕐᐳᖓ:

⁴ “ᐊᑕᓃᖅ, ᐃᓅᓯᕐᒪ ᐃᓱᐊᓂᒃ ᖃᐅᔨᑎᓚᐅᓐᖓ ᐃᓅᓯᕐᒪᓗ ᐅᓪᓗᖏᑕ ᐅᓄᕐᓂᖏᓐᓂᒃ, ᖃᐅᔨᖁᓪᓗᖓ ᓱᓇᐅᖏᓐᓂᓐᓂᒃ.

⁵ ᐅᓪᓗᒃᑲ ᐊᒡᒐᐅᑉ ᐃᓵᒃᑕᖓᑐᑦ ᑕᑭᑎᒋᕗᑦ! ᐊᕐᕌᒍᐃᓪᓗ ᐃᓅᓂᐊᕐᑕᒃᑲ ᓱᓇᐅᓐᖏᓚᑦ ᓵᖕᓂ; ᐊᕐᕌᒍᒃᑲᓗ ᓱᓇᐅᓐᖏᓚᑦ ᐃᓕᖕᓄᑦ ᐃᓄᐃᓪᓗ ᐃᓅᓯᕐᒥ ᐊᔪᖏᓐᓂᖓᑦ ᐳᔪᑐᐃᓐᓇᐅᕗᖅ! ᓰᓚ

⁶ ᓱᓕᔪᒥᒡᓕ ᐃᓄᓕᒫᑦ ᐱᓱᑲᑕᒃᐳᑦ ᑕᕐᕋᑐᐃᓐᓇᕐᑎᑐᑦ; ᐱᔭᒃᓴᖃᕐᓂᕐᒧᓪᓗ ᓄᖅᑲᔪᐃᑦᑑᕗᑦ ᓱᕙᓕᑭᐊᒧᑦ ᐊᒡᓗᐃᑦᔪᑎᓂᒡᓗ ᑲᑎᕐᓱᐃᕗᑦ, ᖃᐅᔨᒪᓇᑎᒃ ᑭᐊ ᐱᓛᕐᒪᖔᒋᑦ.

⁷ ᒫᓐᓇᓕ ᐊᑕᓃᖅ ᓱᓇᒥᒃ ᐅᑕᖅᑭᕗᖔ? ᐃᓕᖕᓂᓪᓕ ᓂᕆᐅᒃᐳᖓ.

⁸ ᓴᐳᑎᓚᐅᓐᖓ ᑕᒻᒪᕐᓂᓐᓂᑦ ᑕᒤᓐᓂᑦ; ᓯᓔᑦᑐᓄᑦ ᒥᑕᐅᑎᒃᓴᐅᖁᓇᖓ.

⁹ ᓂᐰᑦᑑᓚᐅᕐᐳᖓ, ᖃᓂᕋᓘᓐᓃᑦ ᐂᑦᑕᓚᐅᓐᖏᓚᕋ ᐃᕝᕕᑦ ᑍᒤᑎᓚᐅᕋᕕᖓ.

¹⁰ ᓱᒋᐊᕐᓯᓃᑦ ᓄᖅᑲᕐᑎᓕᕈᒃ ᐅᕙᓐᓂᑦ; ᐅᕐᕈᖓᓕᕋᒪ ᐊᒡᒐᕕᑦ ᐱᒋᐊᖃᑦᑕᕐᓂᖏᓐᓄᑦ.

¹¹ ᓱᐊᒃᑲᕕᒋᑦ ᐋᖅᑭᒋᐊᕐᓗᒋᓪᓗ ᐃᓄᐃᑦ ᐊᔪᕐᓂᖏᑦ ᐱᓪᓗᒋᑦ, ᐱᐅᒋᔭᖏᓪᓗ ᐊᐅᒃᑎᑉᐸᑎᑦ ᐅᖁᒃᑎᑐᑦ; ᓱᓕᔪᒥᒃ ᐃᓄᐃᑦ ᐳᔪᑐᐃᓐᓇᐅᕗᑦ. ᓰᓚ

¹² ᐊᑕᓃᖅ ᑐᒃᓯᐊᕐᓂᕋ ᑐᓴᓚᐅᕈᒃ, ᓂᓪᓕᐊᓂᕋᓗ ᓯᐅᑎᖕᓄᑦ ᐱᓕ; ᓂᐰᑦᑑᓂᐊᕐᓇᒃ ᖁᕝᕕᐅᕐᓂᒃᑲ ᐱᓪᓗᒋᑦ. ᐃᓕᖕᓂ ᐃᓂᖃᕋᒪ ᓄᓇᖃᕐᑐᑐᖃᐅᓇᖓ, ᑕᒫᓂᕐᒥᐅᑕᑐᖃᐅᖏᓐᓇᒪ, ᓯᕗᓕᕕᓂᑦᑐᑦ.

¹³ ᐃᔨᒋᔪᓐᓃᓚᐅᓐᖓ, ᓄᑭᒃᑲ ᐅᑎᖁᓪᓗᒋᑦ ᐅᕙᓐᓄᑦ, ᕿᒪᕉᑎᖅᑳᕐᑎᓐᓇᖓ ᐱᑕᖃᕈᓐᓃᖅᑳᕐᑎᓐᓇᖓᓗ.”