ᐃᓐᖏᕈᑎᑦ 33 - ᐊᒡᓔᑦ ᐃᑦᔪᕐᖕᓁᑦᑐᑦ

ᖁᕕᐊᓱᖕᓂᖅ ᐃᓱᒪᒋᔪᓐᓁᕐᕕᐅᓂᖅ ᐱᓪᓗᒍ

ᑍᕕᑎᐅᑉ ᐃᓐᖏᕈᑖ

¹ ᐊᑕᓂᕐᒥᒃ ᖁᕕᐊᓲᑎᖃᕆᑦᓯ, ᐃᓕᑦᓯ ᐃᓱᐊᕐᑐᓕᔪᓯ! ᓂᕐᑐᐃᓂᖅ ᓱᓕᑦᓯᐊᕐᑐᓂᑦ ᐱᔪᖅ ᐱᐅᔪᐊᓘᖕᒪᑦ.

² ᐊᑕᓂᖅ ᓂᕐᑐᕐᓯᐅᒃ ᓂᓪᓕᐊᑦᔪᑎᓄᑦ ᕼᐊᕐᐱᓄᑦ; ᑐᓴᕐᓂᕋᕕᒋᓯᐅᒃ ᓂᓪᓕᐊᑎᑦᓯᑦᔪᑎᓄᑦ ᖁᓕᓂᒃ ᓄᖃᕐᑎᓕᖕᓄᑦ.

³ ᐃᓐᖏᐅᑎᒥᒃ ᐊᑕᓂᖅ ᓄᑖᒥᒃ ᐃᓐᖏᕐᕕᒋᓯᐅᒃ; ᐊᔪᖏᑦᓯᐊᕐᓗᓯ ᓂᑦᔭᐅᓯᔭᕆᑦᓯ ᕾᒐᓛᕐᓗᓯ ᖁᕕᐊᓱᖕᓂᕐᒧᑦ.

⁴ ᐊᑕᓂᐅᑉ ᐅᖃᐅᓯᖓ ᓇᓛᒎᑦᓯᐊᕐᒪᑦ, ᐱᓂᐊᕐᓂᓕᒫᖏᓪᓗ ᓱᓕᑦᓯᐊᕐᓂᒃᑯᑦ ᐱᓂᐊᕐᓯᒪᕗᑦ.

⁵ ᖁᕕᐊᒋᔭᖃᕐᒪᑦ ᐃᓱᐊᕐᑐᓕᓂᕐᒥᒃ ᐃᖅᑲᕐᑐᐃᑦᓯᐊᕐᓂᕐᒥᒡᓗ; ᓄᓇᕐᔪᐊᕐᓗ ᓈᓯᒪᕗᖅ ᐊᑕᓂᐅᑉ ᓇᒡᓕᕐᓂᕐᔪᐊᖓᓂᒃ ᓄᖑᓱᐃᑦᑐᒥᒃ.

⁶ ᐊᑕᓂᐅᑉ ᐅᖃᐅᓯᖓᒍᑦ ᕿᓔᑦ ᓴᓇᔭᐅᓚᐅᕐᐳᑦ, ᑕᒪᕐᒥᒡᓗ ᕿᓚᖕᒥ ᑕᑯᒃᓴᐅᔪᑦ ᐅᓪᓗᕆᐊᑦ ᖃᓂᖓᑕ ᐊᓂᕐᓂᖓᓄᑦ ᓴᖅᑭᓚᐅᕐᐳᑦ.

⁷ ᐃᒪᕐᔪᐃᑦ ᐃᒪᖏᑦ ᑲᑎᕐᓱᕐᐰᑦ ᐊᑕᐅᓯᕐᒧᑦ; ᐃᑎᔪᕐᔪᐊᓪᓗ ᐱᖁᑎᖃᕐᕕᖕᓄᑦ ᐃᓕᕔᑦ.

⁸ ᓄᓇᕐᔪᐊᕐᒥᐅᑦ ᐊᑕᓂᖅ ᓯᕘᕋᒋᓕᑦᔪᒃ; ᓯᓚᕐᔪᐊᕐᒥ ᐃᓂᖃᕐᑐᑦ ᑕᒪᕐᒥᒃ ᓇᖏᕐᓕᑦ ᑲᒪᓂᐊᕐᓗᑎᒡᓗ.

⁹ ᐅᖃᕐᒪᑦ, ᓱᓇᑐᐃᓐᓁᑦ ᐱᔭᕇᓚᐅᕐᐳᑦ; ᐱᖁᔨᖕᒪᓪᓗ, ᐱᑕᖃᓕᓚᐅᕐᐳᑦ.

¹⁰ ᐊᑕᓂᐅᑉ ᐃᓅᖃᑎᒌᒡᔪᐊᑦ ᐃᓱᒪᓕᐅᖃᑎᒌᖕᓂᖏᑦ ᐊᓯᐅᑎᑉᐰᑦ; ᐃᓄᐃᓪᓗ ᓯᕗᓂᕐᒧᑦ ᐃᓱᒪᓕᐅᕈᑎᒋᔭᖏᑦ ᐊᑐᕈᓐᓃᕐᑎᑉᐰᑦ.

¹¹ ᐊᑕᓂᐅᓪᓕ ᓯᕗᓂᕐᒧᑦ ᐋᖅᑭᒃᓯᒪᔭᖏᑦ ᐃᓱᖃᖏᑦᑐᒧᑦ ᑲᔪᓯᕗᑦ, ᐆᒻᒪᑎᒥᒍᑦ ᓯᕗᒧᑦ ᐋᖅᑭᒃᓱᕐᓯᒪᔭᖏᑦ ᑭᖑᕚᖑᖃᑎᒌᓄᑦ ᑕᒤᓐᓄᑦ.

¹² ᓮᒪᓇᕐᑐᒦᑉᐳᑦ ᐃᓅᖃᑎᒌᒡᔪᐊᑦ ᐊᑕᓂᕐᒥᒃ ᒎᑎᖃᕐᑐᑦ, ᐃᓄᐃᑦ ᓂᕈᐊᕐᓯᒪᔭᖏᑦ ᓇᖕᒥᓂᖅ ᐱᒃᓴᕆᔪᒪᓪᓗᒋᑦ.

¹³ ᐊᑕᓂᖅ ᑕᑯᓐᓇᕐᐳᖅ ᕿᓚᖕᒥᑦ; ᐃᓄᐃᓪᓗ ᑕᐅᑐᒃᐰᑦ ᑕᒪᕐᒥᑦᓯᐊᖅ.

¹⁴ ᐃᓂᒋᔭᒥᓂᑦ ᓇᔪᕐᑕᒥᓂᑦ ᑕᑯᓐᓇᕐᐳᖅ ᑕᒤᓐᓂᒃ ᓄᓇᕐᔪᐊᕐᒥ ᐃᓂᖃᕐᑐᓂᒃ.

¹⁵ ᐆᒻᒪᑎᖏᑦ ᐊᑐᓂᑦ ᐋᖅᑭᒃᓱᕐᐰᑦ; ᐱᓂᐊᕐᓂᓕᒫᖏᓪᓗ ᐃᓱᒪᒋᕔᑦ.

¹⁶ ᐊᖓᔪᖅᑳᕐᔪᐊᑦ ᓇᓪᓕᐊᓪᓘᓐᓃᑦ ᓴᐳᑎᔭᐅᓐᖏᓚᑦ ᐅᓇᑕᕐᑐᒃᓴᖁᑎᖏᑕ ᐅᓄᕐᓂᖏᓐᓄᑦ; ᐅᓇᑕᕐᑐᒃᓴᓪᓘᓐᓃᑦ ᓇᓪᓕᐊᑦ ᐊᔪᖏᑦᑐᑦ ᓴᐳᑎᔭᐅᓐᖏᓚᑦ ᓴᓐᖏᓂᕐᒥᖕᓄᑦ.

¹⁷ ᕿᒧᒃᓯᐅᑎ ᓴᐳᑎᔭᐅᑦᔪᑎᒋᓇᓱᐊᕐᓗᒍ ᓱᕙᓕᑭᐊᖑᕗᖅ; ᓴᐳᑦᔨᓂᐊᓐᖏᓚᕐᓗ ᑭᓇᒥᒡᓘᓐᓃᑦ ᓴᓐᖏᔪᕐᔪᐊᖑᓂᕐᒥᓄᑦ.

¹⁸ ᐊᑕᓂᐅᓪᓕ ᑕᑯᓐᓇᕐᐰᑦ ᑖᑦᓱᒥᖓ ᓯᕗᕋᔪᑦ, ᑍᒃᑯᐊ ᓂᑲᒋᔭᐅᓂᕐᒥᒃ ᑖᑦᓱᒪᓐᖓᑦ ᓂᕆᐅᒃᑐᑦ,

¹⁹ ᑕᕐᓂᕐᒥᖕᓂᒃ ᓴᐳᑎᔭᐅᖁᔨᔪᑦ ᑐᖁᒥᑦ, ᑖᑦᓱᒧᖓᓗ ᐃᓅᑎᑕᐅᔪᒪᓪᓗᑎᒃ ᑳᖕᓇᕐᑐᕐᔪᐊᒥ.

²⁰ ᑕᕐᓂᕗᑦ ᐅᑕᖅᑭᕗᑦ ᐊᑕᓂᕐᒥᒃ; ᐃᑲᔪᕐᑎᒋᒐᑦᑎᒍ ᓴᐴᓗᑕᕆᓪᓗᒍᓗ.

²¹ ᐃᓛᒃ, ᐆᒻᒪᑎᕗᑦ ᖁᕕᐊᓲᑎᖃᕐᐳᑦ ᑖᑦᓱᒥᖓ, ᐊᑎᖓ ᐃᑦᔪᕐᓁᑦᑐᖅ ᑕᑎᒋᓚᐅᕋᑦᑎᒍ.

²² ᐊᑕᓃᖅ, ᓇᒡᓕᖕᓂᕕᑦ ᓱᖁᓯᔪᐃᑦᑐᑉ ᓇᔪᕐᓕᑎᒍᑦ, ᐃᓕᖕᓂᒃ ᓂᕆᐅᒃᕕᖃᕐᓂᕗᑦ ᒪᓕᒡᓗᒍ.