ᐃᓐᖏᕈᑎᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᐅᑉ ᑭᐅᔭᐅᓂᖓᑕ ᓮᒻᒪᕐᑎᑕᐅᓇᕐᓂᖓ ᑍᕕᑎᐅᑉ ᐃᓐᖏᕈᑖ ᑐᒃᓯᐊᕐᕕᒡᔪᐊᕐᒥᒃ ᐃᑦᔪᕐᓁᑎᑦᓯᓂᕐᒧᑦ 1 ᐊᖏᔪᕈᕐᑎᑦᓱᒪᕙᒋᑦ, ᐊᑕᓃᖅ, ᐅᓇᓐᖓᑦ ᖃᑭᑎᓯᒪᒐᕕᖓ, ᐆᒥᒋᔨᒃᑲᓗ ᐅᕙᓐᓂᒃ ᖁᕕᐊᓱᒍᑎᖃᕐᑎᖏᓐᓇᕕᒋᑦ. 2 ᐊᑕᓃᖅ, ᒎᑎᒐ, ᐃᑲᔪᕐᑕᐅᔪᒪᓂᕐᒧᑦ ᓂᓪᓕᐊᒐᒪ, ᑕᕝᕙ ᑎᒥᒃᑯᑦ ᐋᖅᑭᓚᐅᕐᐸᕐᒪ. 3 ᐊᑕᓃᖅ, ᑕᕐᓂᕋ ᐃᓗᕕᕐᒥᑦ ᒪᑭᑎᓚᐅᕐᐸᑦ; ᐃᕝᕕᑦ ᐃᓅᑎᑉᐸᕐᒪ ᐃᑎᕐᓵᓗᖕᒧᑦ ᑲᑕᖁᓇᖓ. 4 ᐊᑕᓂᖅ ᓂᕐᑐᕈᑎᓂᒃ ᐃᓐᖏᕐᕕᒋᓯᐅᒃ, ᐃᓕᑦᓯ ᐃᑦᔪᕐᓁᑦᑐᖁᑕᐅᔪᓯ, ᐊᑎᖓᓗ ᐃᑦᔪᕐᓁᑦᑐᖅ ᐃᖅᑲᐅᒪᓂᕐᒧᑦ ᖁᔭᒋᓯᐅᒃ. 5 ᓂᓐᖓᐅᒪᓂᖓ ᕿᓚᒥᒻᒪᕆᑯᓗᒃ ᐊᓂᒍᕐᒪᑦ, ᐱᑦᓯᐊᕐᓂᖓᓕ ᐃᓅᓯᐅᑉ ᓈᓂᖓᓄᑦ ᑎᑭᑉᐳᖅ; ᐅᓐᓄᐊᖅ ᓈᓗᒍ ᖁᕝᕕᐅᕐᓂᖃᕐᐳᖅ, ᐅᓪᓛᖑᓕᕐᐸᓪᓕ ᖁᕕᐊᓱᖕᓂᖅ ᑎᑭᑉᐳᖅ. 6 ᐊᔪᕈᓐᓃᑦᓯᐊᕋᒪ, ᐅᖃᓚᐅᕐᐳᖓ, “ᐊᐅᓚᑕᐅᓂᐊᓐᖏᓚᖓ.” 7 ᐊᑕᓃᖅ, ᖁᕕᐊᒋᒐᕕᖓ, ᖃᖅᑲᖁᑎᒐ ᓇᐸᑎᑉᐸᑦ ᓴᓐᖏᔫᓪᓗᓂ; ᑮᓇᕐᐱᓪᓕ ᐊᓚᕐᒪᖓ ᐃᓱᒪᔮᓚᐅᕐᐳᖓ. 8 ᐊᑕᓃᖅ ᐃᓕᖕᓄᑦ ᓂᓪᓕᐊᓚᐅᕐᐳᖓ; ᐊᑕᓂᕐᒧᓪᓗ ᕿᓄᓚᐅᕐᐳᖓ. 9 “ᓱᓇᒥᒃ ᐱᕚᓪᓕᕋᔭᕐᐸᑦ ᑐᖁᑕᐅᒍᒪ? ᐃᑎᕐᓴᒧᓪᓘᓐᓃᑦ ᑲᑕᒃᑎᑕᐅᒍᒪ? ᓄᓇᒥ ᓴᓂᖅ ᓂᕐᑐᐃᒐᔭᕐᐹ ᐃᓕᖕᓂᒃ? ᓱᖁᓯᔪᐃᑦᑑᓂᕐᓂᒃ ᐅᖃᐅᓯᖃᕋᔭᕐᐹ? 10 ᐊᑕᓃᖅ, ᑐᓴᓚᐅᕆᑦ, ᓂᑲᒋᓗᖓᓗ; ᐊᑕᓃᖅ, ᐃᑲᔪᕐᑎᒋᓚᒋᑦ!” 11 ᕿᒃᓵᖕᓂᕋ ᒧᒥᒃᐸᑦ ᑖᓂᓯᕐᓂᕐᒧᑦ; ᐊᓐᓄᕌᒃᑲ ᖃᕿᐊᓕᕐᑐᕐᓯᐅᑎᑦ ᐲᕐᐸᑎᑦ, ᐊᓐᓄᕌᕐᑎᓪᓗᖓᓗ ᖁᕕᐊᓱᖕᓂᕐᒥᒃ, 12 ᓂᕐᑐᕈᒪᓪᓗᖓ ᐃᓕᖕᓂᒃ ᓂᐰᑦᑑᖏᓪᓗᖓ. ᐊᑕᓃᖅ ᒎᑎᒐ, ᐃᓱᖃᖏᑦᑐᒧᑦ ᖁᔭᒋᓂᐊᕐᐸᒋᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society