ᐃᓐᖏᕈᑎᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᐅᑉ ᓂᐱᖓ ᓯᓚᓗᒃᑐᒥ ᑍᕕᑎᐅᑉ ᐃᓐᖏᕈᑖ 1 ᐊᑕᓂᕐᒧᑦ ᑐᓂᓯᓕᕆᑦᓯ, ᕿᓚᖕᒥᐅᑕᐅᔪᓯ, ᐊᑕᓂᕐᒧᑦ ᑐᓂᓯᓕᕆᑦᓯ ᓂᕐᑐᕐᓇᕐᓂᖓᓂᒃ ᓴᓐᖏᓂᖓᓂᒡᓗ. 2 ᐊᑕᓂᕐᒧᑦ ᑐᓂᓯᓕᕆᑦᓯ ᐊᑎᖓᑕ ᓂᕐᑐᕐᓇᕐᓂᖓᓂᒃ; ᐊᑕᓂᖅ ᑐᒃᓯᐊᕐᕕᒋᓯᐅᒃ ᐃᑦᔪᕐᓁᑦᑐᒥᒃ ᐊᓐᓄᕌᕐᓗᓯ. 3 ᐊᑕᓂᐅᑉ ᓂᐱᖓ ᐃᒪᕐᔪᐊᑦ ᖁᓛᓃᑉᐳᖅ; ᒎᑎᐅᑉ ᓂᕐᑐᕐᓇᕐᓂᖓ ᐃᒃᑐᑑᕐᐳᖅ; ᐊᑕᓂᖅ ᐃᒪᕐᔪᐊᑦ ᐅᓄᕐᑐᑦ ᖁᓛᓃᑉᐳᖅ. 4 ᐊᑕᓂᐅᑉ ᓂᐱᖓ ᐱᔪᓐᓇᕐᓂᕐᔪᐊᖃᕐᐳᖅ; ᐊᑕᓂᐅᑉ ᓂᐱᖓ ᑕᑕᑉᐳᖅ ᐊᖓᔪᖅᑳᕐᔪᐊᖑᓂᖓᑕ ᐅᐱᓐᓇᕐᓂᖓᓂᒃ. 5 ᐊᑕᓂᐅᑉ ᓂᐱᖓᑕ ᓇᐹᕐᑐᑦ ᓰᑕᕇᑦ ᓇᐱᕔᑦ, ᐃᓛᒃ ᐊᑕᓂᐅᑉ ᓕᐸᓇᓂᒥ ᓇᐹᕐᑐᑦ ᓰᑕᕆᑦ ᓯᖁᒥᑉᐰᑦ. 6 ᑖᑦᓱᒪ ᓕᐸᓇᓂ ᒥᓯᒃᑕᕐᑎᑉᐹ ᓄᕐᕋᕐᑎᑐᑦ; ᓯᕅᐊᓂᐅᓪᓗ ᐃᒻᒧᒃᓯᐅᒐᐅᑉ ᓄᔪᐊᕐᑑᑉ ᓄᕐᕋᖓᑐᑦ. 7 ᐊᑕᓂᐅᑉ ᓂᐱᖓ ᓱᐴᕐᓯᕗᖅ ᐃᑯᐊᓚᔪᓂᒃ. 8 ᐊᑕᓂᐅᑉ ᓂᐱᖓᑕ ᐃᓄᖃᔪᐃᑦᑐᖅ ᓴᔪᒃᑎᑉᐹ; ᐊᑕᓂᐅᑉ ᐃᓄᖃᔪᐃᑦᑐᖅ ᑲᑎᓯ ᓴᔪᒃᑎᑉᐹ. 9 ᐊᑕᓂᐅᑉ ᓂᐱᖓᑕ ᓇᐹᕐᑐᑦ ᓯᑕᒃᑍᑦ ᕿᐱᑎᑉᐰᑦ, ᓇᐹᕐᑐᒐᓮᓪᓗ ᑲᑎᓐᖓᔪᑦ ᓱᓁᕈᑎᓪᓗᒋᑦ; ᑐᒃᓯᐊᕐᕕᒡᔪᐊᖁᑎᖓᓂᓗ ᑕᒪᕐᒥᒃ ᓂᓪᓕᕐᐳᑦ, “ᓂᕐᑐᕐᓇᕐᐳᖅ!” 10 ᐊᑕᓂᖅ ᐃᒃᓯᕙᐅᑕᕐᔪᐊᒥᓂ ᐃᒃᓯᕙᕗᖅ ᐃᒪᕐᔪᐊᑦ ᖄᒥᓯᒪᔪᑦ ᖁᓛᓂ, ᐊᑕᓂᕐᓗ ᐃᒃᓯᕙᓂᐊᕐᐳᖅ ᐊᖓᔪᖅᑳᕐᔪᐊᖑᓗᓂ ᐃᓱᖃᖏᑦᑐᒧᑦ. 11 ᐊᑕᓂᐅᑉ ᐃᓄᖁᑎᓂ ᑐᓂᓯᕕᒋᓂᐊᕐᐰᑦ ᓴᓐᖏᓂᕐᒥᒃ; ᐊᑕᓂᐅᓪᓗ ᐃᓄᖁᑎᓂ ᓮᒻᒪᕐᑎᓐᓂᐊᕐᐰᑦ ᓮᓕᓇᕐᑐᒥᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society