ᐃᓐᖏᕈᑎᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᐱᓂᐊᕐᓂᖏᑦ ᐅᖃᐅᓯᖏᓪᓗ ᐃᓐᖏᕐᑏᑦ ᑲᒪᔨᖓᓐᓄᑦ ᑍᕕᑎᐅᑉ ᐃᓐᖏᕈᑖ 1 ᕿᓔᑦ ᓇᓗᓁᕐᓯᕗᑦ ᒎᑎᐅᑉ ᐱᓐᓇᕐᓇᕐᓂᖓᓂᒃ; ᕿᓚᖕᒥᓗ ᑕᑯᒃᓴᐅᔪᑦ ᐊᒡᒐᖏᑕ ᓴᓇᓯᒪᔭᖏᑦ ᑕᑯᒃᓴᐅᕗᑦ. 2 ᐅᓪᓗᑕᒫᑦ ᓂᐱᒥᒃ ᓂᓪᓕᐊᕗᑦ, ᐅᓐᓄᑕᒫᓪᓗ ᓴᖅᑭᑎᑦᓯᕗᑦ ᐃᓕᓯᒪᓂᕐᒥᒃ. 3 ᓂᓪᓕᐊᓂᖃᓐᖏᓚᖅ ᐅᖃᐅᓯᕐᑕᖃᕋᓂᓗ ᓂᐱᒥᒃ ᑐᓴᕐᑕᐅᖏᑦᑐᒥᒃ. 4 ᓂᐱᖏᑦ ᐂᕗᑦ ᓄᓇᕐᔪᐊᒧᑦ ᑕᒤᓐᓄᑦ, ᐅᖃᐅᓯᖏᓪᓗ ᓯᓚᕐᔪᐊᑉ ᐃᓱᐊᓄᑦ. ᑕᕝᕙᓂ ᑕᑯᒃᓴᐅᔪᓂ ᓯᕿᓂᖅ ᑐᐱᓕᐅᕐᐹ, 5 ᐊᑦᔨᖃᕐᐳᕐᓗ ᐅᐃᒃᓴᑐᑦ ᐃᒡᓗᕈᓯᕐᒥᓂᑦ ᐊᓂᓕᕐᑐᑐᑦ. ᖁᕕᐊᓱᒃᑐᑐᓪᓗ ᐊᖑᑎᑐᒃ ᓴᓐᖏᔪᑐᑦ ᐅᓪᓚᐅᑎᓂᐊᕐᑐᑐᑦ. 6 ᓄᐃᓕᕐᐳᖅ ᕿᓚᐅᑉ ᐃᓱᐊᓂᑦ, ᑬᕙᓪᓔᓪᓗᓂᓗ ᐃᓱᐊᓄᑦ ᑎᑭᓪᓗᓂ; ᓱᓇᒥᒡᓘᓐᓃᑦ ᐃᔨᕐᓯᒪᔪᖃᓐᖏᓚᒃ ᐆᓇᕐᓂᖓᓂᑦ. 7 ᐊᑕᓂᐅᑉ ᐱᖁᔭᖅ ᒪᓕᒐᒃᓴᐅᖁᔭᖓ ᓈᒻᒪᑦᓯᐊᕐᐳᖅ, ᑕᕐᓂᕐᒥᒃ ᐆᒻᒪᕈᕐᑎᑦᓯᔪᖅ; ᐊᑕᓂᐅᓪᓗ ᒪᓕᒐᒃᓴᐅᖁᔭᖏᑦ ᓇᓛᒍᕐᐳᑦ, ᓯᓚᑐᔪᓂᒃ ᓯᓔᑦᑑᑎᑦᓯᔪᑦ. 8 ᐊᑕᓂᐅᑉ ᒪᓕᒐᒃᓴᐅᖁᔭᖏᑦ ᑕᒻᒪᓐᖏᓚᑦ, ᐆᒻᒪᑎᒥᒃ ᖁᕕᐊᓱᒃᑎᑦᓯᔪᑦ; ᐊᑕᓂᐅᓪᓗ ᐱᖁᔭᖏᑦ ᐃᓚᒃᑲᓐᓂᖃᓐᖏᓚᑦ, ᐃᔩᖕᓂᒃ ᖃᐅᒻᒪᒃᑎᑦᓯᔪᑦ; 9 ᐊᑕᓂᕐᒥᒃ ᓯᕘᕋᓂᖅ ᓴᓗᒪᑦᓯᐊᕐᐳᖅ, ᐃᓱᖃᖏᑦᑐᒧᑦ ᑲᔪᓯᔪᖅ. ᐊᑕᓂᐅᓪᓗ ᐃᖅᑲᕐᑐᐃᓂᖏᑦ ᓱᓕᑦᓯᐊᕐᐳᑦ ᑕᒪᕐᒥᒡᓗ ᐃᓱᐊᕐᑑᓪᓗᑎᒃ. 10 ᐱᔪᒥᓇᕐᓂᕐᓴᐅᕗᑦ ᒎᓗᒥᑦ, ᐊᒡᓛᑦ, ᒎᓗᒥᑦ ᐱᐅᓂᕐᐹᒥᑦ; ᕼᐊᓂᒥᑦ ᓰᕐᓇᕐᓂᕐᓴᐅᔪᖅ, ᐃᒍᑦᓴᐅᓪᓗ ᐃᕙᕕᐊᓂᑦ ᐱᓯᒪᔪᒥᑦ ᕼᐊᓂᒥᑦ. 11 ᑖᒃᑯᓄᖓ ᐱᔩᑦ ᐃᓂᕐᑎᕐᑕᐅᕗᖅ, ᑖᒃᑯᓂᖓᓗ ᒪᓕᑦᓯᐊᕐᑐᖅ ᐊᖏᔪᒥᒃ ᐊᑭᓕᕐᑕᐅᓪᓗᓂ. 12 ᑭᓇᓕ ᑕᒻᒪᕐᓂᖏᓐᓂᒃ ᖃᐅᔨᒪᕚ? ᓴᓗᒻᒪᕐᓴᓚᐅᓐᖓ ᑕᒻᒪᕐᓂᕐᓂᑦ ᐃᔨᕐᓯᒪᔪᓂᑦ. 13 ᐱᔩᑦ ᓴᐳᑎᓯᒪᓚᐅᕈᒃ ᐱᔮᕆᓂᕐᒧᑦ ᐊᔪᕐᓂᕐᓂᑦ; ᑕᒪᒃᑯᐊ ᐊᐅᓚᑦᓯᓕᖁᓇᒋᑦ ᐅᕙᓐᓂᒃ. ᑕᕝᕙ ᓵᑕᒃᓴᐅᓂᐊᓐᖏᓚᖓ, ᐸᓯᔭᒃᓴᐅᓂᐊᓐᖏᓚᖓᓗ ᐊᔪᕐᓂᕐᓂᑦ ᐊᖏᔪᓂᑦ. 14 ᖃᓂᕐᒪ ᐅᖃᐅᓯᖏᑦ ᐆᒻᒪᑎᒪᓗ ᐃᓱᒪᒃᓴᕐᓯᐅᕈᑎᖏᑦ ᖁᕕᐊᒋᓚᐅᒃᑭᑦ ᓵᖕᓂ, ᐊᑕᓂᖅ, ᐱᔪᓐᓇᐅᑎᒋᓪᓗᒍ ᕾᕐᑐᕆᔭᕋ ᓴᐳᑦᔨᔨᒋᓪᓗᒍᓗ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society