ᐃᓐᖏᕈᑎᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐊᐅᓚᑦᓯᓂᖓ ᐱᐅᓕᔨᐅᓂᖓᓗ

ᐊᑕᓂᐅᑉ ᐱᔨᖓᑕ ᑍᕕᑎᐅᑉ ᐃᓐᖏᕈᑖ, ᑕᕝᕙᓂ ᐅᖃᓪᓚᓚᐅᕐᒪᑦ ᐊᑕᓂᕐᒧᑦ ᓴᐳᑎᓚᐅᕐᒪᒍ ᐊᑭᕋᕐᑐᕐᑎᓕᒫᖏᓐᓂᑦ ᓴᐅᓕᐅᓪᓗ ᐱᔪᓐᓇᕐᓂᖓᓂᑦ.

¹ ᐊᑕᓃᖅ, ᓇᒡᓕᒋᕙᒋᑦ ᐱᔪᓐᓇᐅᑎᒋᒐᒃᑭᑦ.

² ᐊᑕᓂᖅ ᕾᕐᑐᕆᕙᕋ, ᓴᐳᑦᔨᔨᒋᓪᓗᒍᓗ; ᒎᑎᒐ ᓴᓐᖏᔫᑦᔪᑎᒐ, ᑖᑦᓱᒥᖓ ᑕᑎᖃᕐᓂᐊᕐᐳᖓ; ᓴᐴᓗᑕᕆᒐᒃᑯ; ᐱᐅᓕᔭᐅᕕᒃᓴᒪᓗ ᓴᒃᑯᒋᖕᒪᒍ, ᕿᒫᕕᒃᓴᕆᒐᒃᑯ ᓵᓚᐅᓂᐊᖏᑦᑐᖅ.

³ ᐊᑕᓂᖅ ᓂᓪᓕᐊᕕᒋᔪᒪᕙᕋ, ᑖᓐᓇ ᓂᕐᑐᕐᑕᐅᔪᒃᓴᑐᐊᖅ; ᓴᐳᑎᔭᐅᓂᐊᕐᐳᖓ ᐊᑭᕋᕐᑐᕐᑎᓐᓂᑦ.

⁴ ᑐᖂᑉ ᕿᓚᕈᑎᖏᑦ ᐊᕙᑎᓐᓃᑉᐳᑦ, ᒎᑎᖃᖏᑦᑐᓪᓗ ᐅᓄᕐᑐᕐᔪᐊᑦ ᐅᕙᓐᓄᑦ ᕾᔪᑦ, ᑲᑉᐱᐊᓱᒃᑎᑉᐹᖓ.

⁵ ᑐᖁᖓᔪᑦ ᐃᓂᖓᑕ ᕿᒃᓵᖕᓇᕐᓂᖓ ᐊᕙᑎᓐᓃᒻᒪᑦ; ᑐᖂᓪᓗ ᓂᒐᖓᑕ ᓵᓐᖓᖕᒪᖓ.

⁶ ᐃᓗᖏᕐᑐᕐᓂᓐᓂ ᐊᑕᓂᖅ ᓂᓪᓕᐊᕕᒋᕙᕋ, ᓂᐱᖅᑯᕐᑐᕗᖓᓗ ᒎᑎᓐᓄᑦ; ᑐᒃᓯᐊᕐᕕᒡᔪᐊᖁᑎᒥᓂᑦ ᓂᐱᒐ ᑐᓴᕐᐹ, ᓂᐱᖅᑯᕐᑐᓪᓗᖓ ᓂᓪᓕᐊᓂᕋ ᓯᐅᑎᖏᖕᓄᑦ ᑎᑭᑉᐳᑦ.

⁷ ᓄᓇᓗ ᓴᔪᒃᐱᓗᒃᐳᖅ, ᖃᖅᑬᓪᓗ ᑐᓐᖓᕕᖏᑦ ᓴᔪᒡᓗᑎᒃ, ᐊᐅᓚᕗᑦ, ᓂᓐᖓᐅᒪᑎᓪᓗᒍ.

⁸ ᐳᔪᖅ ᐊᓂᕗᖅ ᓱᕐᓗᖏᖕᓂᑦ, ᐃᑯᒪᓗ ᓄᖒᑦᓯᔪᖅ ᖃᓂᖓᓂᑦ ᐊᓂᕗᖅ; ᐊᐅᒤᓪᓗ ᐃᑯᒪᔪᑦ ᑕᕝᕙᓐᖓᑦ ᐱᕗᑦ.

⁹ ᕿᓔᓪᓗ ᐊᒻᒧᒃᑎᓚᐅᕆᕔᑦ, ᐊᖅᑲᕐᓗᓂᓗ, ᑖᕐᑐᕐᔪᐊᖅ ᐃᑎᒐᖏᑕ ᐊᑖᓃᓪᓗᓂ.

¹⁰ ᐱᓐᖑᕐᑎᓯᒪᔪᒥᓗ ᐃᓴᕈᓕᖕᒥ ᐃᑭᒪᕗᖅ, ᑎᖏᓪᓗᓂᓗ; ᐊᓄᕆᐅᑉ ᐃᓴᕈᖏᖕᓂᒃ ᖃᖓᑕᒍᑎᖃᕐᐳᖅ.

¹¹ ᑖᕐᑐᖅ ᐃᔨᕐᓯᒪᕝᕕᒋᕚ; ᐅᓕᒃᓯᒪᓪᓗᓂ ᐃᒪᕐᔪᐊᓂᒃ ᑖᕐᑐᓂᒃ, ᓄᕗᔧᓪᓗ ᑖᕐᑐᕐᔪᐊᑦ ᐃᔨᕐᓯᒪᕝᕕᒋᕔᑦ.

¹² ᖃᐅᒪᔪᕐᔪᐊᒧᓪᓗ ᓵᖓᓃᑦᑐᒧᑦ, ᓄᕗᔧᑦ ᐊᖕᒪᕐᐳᑦ ᓇᑕᖅᑯᕐᓇᓕᕐᓗᑎᒡᓗ, ᐊᐅᒪᓂᒃ ᐃᑯᒪᓕᖕᓂᒃ.

¹³ ᑕᕝᕙ ᐊᑕᓂᖅ ᐃᒃᑐᓚᐅᕐᑎᑦᓯᕗᖅ ᕿᓚᖕᒥ, ᖁᑦᓯᖕᓂᕐᐹᖑᔫᓪᓗ ᓂᐱᖓ ᑐᓴᕐᓴᐅᓪᓗᓂ, ᓇᑕᖅᑯᕐᓇᕐᑎᒍᑦ ᐊᐅᒫᓗᒃᑎᒍᓪᓗ ᐃᑯᐊᓚᔪᑎᒍᑦ.

¹⁴ ᖃᕐᔪᒥᓄᓪᓗ ᐱᑎᒃᓴᓚᐅᕐᐳᖅ ᐊᑭᕋᕐᑐᕐᑐᑦ ᐊᕕᑎᓪᓗᒋᑦ, ᖃᐅᒻᒫᓪᓚᒃᑐᓄᑦ ᐅᓄᕐᑐᓄᑦ ᓵᓚᒋᕔᑦ.

¹⁵ ᐃᒪᕐᔪᐊᓪᓗ ᐃᖏᕐᕋᓂᖏᑕ ᐊᖅᑯᑎᖏᑦ ᑕᑯᒃᓴᐅᓚᐅᕐᐳᑦ, ᓄᓇᕐᔪᐊᓪᓗ ᑐᓐᖓᕕᖏᑦ ᓴᖅᑭᑎᓚᐅᕐᐰᑦ, ᐊᑕᓃᖅ ᓱᐊᖕᓂᕐᓄᑦ, ᓱᕐᓗᒃᐱᓪᓗ ᐊᓂᕐᓂᖓᑕ ᓱᐱᓂᖏᖕᓄᑦ.

¹⁶ ᑕᑉᐹᓐᖓᑦ ᑎᓕᓯᓚᐅᕐᐳᖅ, ᐂᓪᓗᖓᓗ, ᓄᓱᓚᐅᕐᐹᖓᓗ ᐃᒪᕐᔪᐊᓂᑦ.

¹⁷ ᓴᐳᑎᓚᐅᕐᐹᖓᓗ ᐊᑭᕋᕐᑐᕐᑎᓐᓂᑦ ᓴᓐᖏᔪᓂᑦ; ᐊᑭᕋᕐᑐᕐᑎᓐᓂᑦ ᐅᕙᓐᓂᑦ ᓴᓐᖏᓂᕐᓴᐅᓗᐊᕐᑐᓂᑦ.

¹⁸ ᑖᒃᑯᓄᖓ ᐅᐸᒃᑐᕐᑕᐅᓚᐅᕋᒪ ᐅᖁᒤᒃᓴᕐᑎᓪᓗᖓ, ᐊᑕᓂᕐᓕ ᐃᑲᔪᕐᑎᒋᓚᐅᕐᐸᕋ.

¹⁹ ᐂᑎᓚᐅᕐᐹᖓᓗ ᐃᓂᒃᓴᒧᑦ ᐱᕕᑐᔪᒧᑦ, ᓴᐳᑎᓪᓗᖓᓗ ᖁᕕᐊᒋᒐᒥᖓ.

²⁰ ᐊᑕᓂᐅᑉ ᐊᑭᓕᕐᐹᖓ ᐱᓇᓱᐊᑦᓯᐊᕐᓂᓐᓄᑦ; ᐸᓯᔭᒃᓴᐅᖏᓐᓂᓐᓄᓪᓗ; ᐊᒡᒐᖕᒪᓗ ᓴᓗᒪᑦᓯᐊᕐᓂᖏᓐᓄᑦ, ᑐᓂᓯᕕᒋᓚᐅᕐᐹᖓ ᑐᓂᔪᒪᔭᒥᓂᒃ.

²¹ ᐊᖅᑯᑎᖏᑦ ᐊᑐᐃᓐᓇᕋᒃᑭᑦ ᐱᐅᖏᑦᑐᓕᓂᕐᒧᓪᓗ ᒎᑎᒥᒃ ᕿᒤᓚᐅᖏᓐᓇᒪ.

²² ᐃᖅᑲᕐᑐᐃᓂᖏᑦ ᓵᓐᓃᑦᓮᓐᓇᕐᒪᑕ, ᒪᓕᒐᒃᓴᐅᖁᔭᖏᓪᓗ ᑐᓄᓚᐅᖏᓐᓇᒃᑭᑦ.

²³ ᐸᓯᔭᒃᓴᐅᓂᖃᓚᐅᓐᖏᓚᖓ ᓵᖓᓂ, ᐱᐅᖏᑦᑐᓕᓂᕐᒧᓪᓗ ᓵᓐᖓᓚᐅᖏᓐᓇᒪ.

²⁴ ᐊᑕᓂᐅᑉ ᐊᑭᓕᕐᕕᒋᓚᐅᕐᐹᖓ, ᐱᐅᔪᒥᒃ ᐱᓂᐊᕐᓂᕋ ᒪᓕᒡᓗᒍ, ᐊᒡᒐᒪᓗ ᓴᓗᒪᓂᖏᓐᓄᑦ ᑕᑯᓐᓇᕐᑕᖓᒍᑦ.

²⁵ ᓂᑲᒍᓱᒃᑐᓄᑦ ᓴᖅᑭᓐᓂᐊᕐᐳᑎᑦ ᓂᑲᒍᓱᕐᑑᓗᑎᑦ, ᐸᓯᔭᒃᓴᐅᖏᑦᑐᓄᓪᓗ ᐸᓯᔭᒃᓴᐅᖏᓪᓗᑎᑦ ᓴᖅᑭᓐᓂᐊᕆᕗᑎᑦ.

²⁶ ᓴᓗᒪᑦᓯᐊᕐᑐᓄᑦ, ᓴᓗᒪᑦᓯᐊᕐᓗᑎᑦ ᓴᖅᑭᓐᓂᐊᕐᐳᑎᑦ, ᓯᓔᕐᕆᒃᓯᓇᓱᐊᕐᑐᓄᑦ, ᐃᓕᕋᓇᕐᓗᑎᑦ ᓴᖅᑭᓐᓂᐊᕐᐳᑎᑦ,

²⁷ ᐃᓄᐃᑦ ᒥᑭᒡᓕᑎᕐᓯᒪᔪᑦ ᐱᐅᓕᓂᐊᕐᐸᑎᑦ, ᐱᐅᔪᕆᔪᓂᒡᓗ ᑕᐅᑦᑐᖃᕐᑐᑦ ᑲᑕᒃᑎᓐᓂᐊᕐᐸᑎᑦ.

²⁸ ᖃᐅᒻᒪᖅᑯᑎᒐ ᐃᑭᑎᓐᓂᐊᕐᐸᑦ; ᐊᑕᓂᐅᑉ ᒎᑎᒪ ᑖᕐᑐᒦᓐᓂᕋ, ᖃᐅᒻᒪᒃᑎᓐᓂᐊᕐᐹ.

²⁹ ᐃᑲᔪᕐᑎᒌᒡᓗᑎᒃ ᐅᓇᑕᕐᑐᕐᓮᑦ ᐅᓄᕐᑐᑦ ᐅᐸᒃᑐᕈᓐᓇᕐᐹᖓ, ᒎᑎᒐᓕ ᐂᑉᐸᕆᓗᒍ ᐊᕙᓗᕐᔪᐊᑉ ᐅᖓᑖᓄᑦ ᒥᓯᒍᓐᓇᕐᐳᖓ.

³⁰ ᒎᑎᐅᓪᓕ ᐱᓂᐊᕐᓂᖏᑦ ᐋᖅᑭᑦᓯᐊᕐᓯᒪᕗᑦ; ᐊᑕᓂᐅᓪᓗ ᐅᖃᐅᓯᖏᑦ ᓇᓗᓁᕐᑕᐅᓯᒪᕗᑦ ᐆᒃᑐᕐᑕᐅᓂᒃᑯᑦ ᓴᐴᓗᑕᐅᓪᓗᑎᒃᓗ ᑕᑎᖃᑦᑐᓄᑦ ᑕᒤᓐᓄᑦ.

³¹ ᑭᓇ ᒎᑎᐅᕚ? ᐊᑕᓂᐅᑉ ᐊᓯᐊ. ᑭᓇᓘ ᕾᕐᑑᕙ, ᒎᑎᑦᑕ ᐊᓯᐊ?

³² ᒎᑎᑦᑕ ᐊᑎᑎᑉᐹᖓ ᓴᓐᖏᓂᕐᒥᒃ ᓄᑭᑖᕐᑎᓪᓗᓂᖓ, ᐊᖅᑯᑎᒐᓗ ᐊᑲᐅᓯᑦᓯᐊᕐᑎᑉᐹ.

³³ ᐃᑎᒐᒃᑲ ᑐᒃᑐᖓᔫᑉ ᐃᑎᒐᖏᑎᑐᑦ ᑍᒤᑎᑉᐰᑦ, ᐃᓂᖃᕐᑎᑉᐹᖓᓗ ᖁᑦᓯᒃᑐᓂ.

³⁴ ᐊᒡᒐᒃᑲ ᐃᓕᓐᓂᐊᕐᑎᑉᐰᑦ ᐅᓇᑕᕐᓂᕐᒥᒃ, ᑕᓖᒃᑲᒃ ᕿᓗᓯᔪᓐᓇᖁᓐᓗᒋᒃ ᐱᑎᒃᓯᒥᒃ ᑲᓐᓄᔭᒥᒃ.

³⁵ ᓴᐴᓗᑕᕐᒥᒃ ᑐᓂᓯᕕᒋᒋᕙᕐᒪ, ᐱᐅᓕᔭᐅᓂᐅᑉ ᓴᐴᓗᑕᖓᓂᒃ; ᐊᒡᒐᖕᓄᓪᓗ ᑕᓕᕐᐱᖕᓄᑦ, ᒪᑭᑕᑎᑉᐸᕐᒪ, ᐱᑦᓯᐊᕐᓂᕕᓪᓗ ᓂᑲᒍᓱᒃᑑᑉ ᐊᔪᖏᑦᑐᕐᔪᐊᓐᖑᕐᑎᑉᐹᖓ.

³⁶ ᐊᖅᑯᑎᒐ ᐃᓱᐊᕐᓯᑎᑉᐸᑦ; ᐃᑎᒐᒃᑲ ᖁᐊᔭᕿᖁᓇᒋᑦ.

³⁷ ᐊᑭᕋᕐᑐᕐᑎᒃᑲ ᕿᒫᔪᑦ ᒪᓕᓚᐅᕐᐸᒃᑲ, ᐊᖑᓪᓗᒋᓪᓗ; ᐅᑎᕆᐊᓚᐅᓐᖏᓚᖓᓗ ᑕᒪᕐᒥᒃ ᓄᖑᓚᐅᖏᓐᓂᖏᓐᓂ.

³⁸ ᐅᕐᕈᑎᓚᐅᕐᐸᒃᑲ ᒪᑭᒍᓐᓁᓪᓕᓪᓗᑎᒃ; ᐃᑎᒐᒪ ᐊᑖᓂ ᐅᕐᕈᕗᑦ.

³⁹ ᓴᓐᖏᓂᕐᒥᒃ ᑐᓂᒐᕕᖓ ᐅᓇᑕᕈᑎᒃᓴᓐᓂᒃ; ᐊᑭᕋᕐᑐᕐᑎᒃᑲ ᐹᒻᒪᒃᑎᕐᑎᑉᐸᑎᑦ ᐃᑎᒐᓐᓄᑦ.

⁴⁰ ᐊᑭᕋᕐᑐᕐᑎᒃᑲ ᕿᒫᑎᑉᐸᑎᑦ, ᓄᖒᑦᓯᖁᓪᓗᖓ ᐅᕙᓐᓂᒃ ᐆᒥᓱᒃᑐᓂᒃ.

⁴¹ ᑖᒃᑯᐊ ᓂᓪᓕᐊᕗᑦ ᐃᑲᔪᕐᑕᐅᔪᒪᓂᕐᒥᒃ, ᐃᑲᔪᕐᑎᒃᓴᕐᓯᐊᕋᑎᒡᓗ. ᐊᑕᓂᕐᒧᑦ ᐊᒡᓛᑦ ᓂᓪᓕᐊᕗᑦ, ᑖᒃᑯᓂᖓᓕ ᑭᐅᓐᖏᓚᖅ.

⁴² ᐊᓇᐅᓕᓚᕐᐸᒃᑲ ᐳᔪᕐᓗᒃᑐᑦ ᒥᑭᔫᑕᐅᓕᕐᓗᑎᖅ ᑎᒃᑕᐅᕗᓪᓗ ᐊᓄᕆᒧᑦ; ᐃᒋᓚᐅᕐᐸᒃᑲᓗ ᓴᓂᕐᑎᑐᑦ ᐊᖅᑯᒻᒧᑦ ᐃᒋᑕᐅᔪᑎᑐᑦ.

⁴³ ᓴᐳᑎᓚᐅᕐᐸᕐᒪ ᐃᓄᖕᓂᑦ ᐅᓇᑕᕆᐊᕐᑐᕐᓂᖏᓐᓂᑦ; ᐃᓅᖃᑎᒌᒡᔪᐊᓄᓪᓗ ᐊᖓᔪᖅᑳᓐᖑᕐᑎᓚᐅᕐᐸᕐᒪ; ᐃᓄᐃᑦ ᑕᑯᓚᐅᕐᓯᒪᖏᑕᒃᑲ ᐱᔨᑦᓯᕐᓂᐊᕐᐳᑦ ᐅᕙᓐᓂᒃ.

⁴⁴ ᓂᐱᓐᓂᒃ ᑐᓴᑐᐊᕋᒥᒃ ᓈᓚᑦᓯᐊᕐᐳᑦ; ᓄᓇᑦᑕᓗ ᐊᓯᐊᓂᑦ ᐱᓯᒪᔪ ᐃᒻᒥᖕᓂᒃ ᒪᓂᕗᑦ ᐅᕙᓐᓄᑦ.

⁴⁵ ᓄᓇᐅᑉ ᐊᓯᐊᓂᑦ ᐱᓯᒪᔪᑦ ᓴᐱᓕᕐᐳᑦ, ᑲᑉᐱᐊᓱᒡᓗᑎᒃᓗ ᐃᔨᕐᓯᒪᕕᖕᒥᖕᓂᑦ ᐊᓂᓪᓗᑎᒃ.

⁴⁶ ᐊᑕᓂᖅ ᐃᓅᕗᖅ! ᕾᕐᑐᕋ ᓂᕐᑐᕐᑕᐅᓕ! ᐱᐅᓕᔭᐅᓂᕐᒪ ᒎᑎᖓ ᐊᖏᔪᕈᕐᑎᑕᐅᓕ.

⁴⁷ ᒎᑎᐅᑉ ᐊᑭᓂᐊᕈᑎᕚᖓ, ᐃᓄᐃᓪᓗ ᒪᓂᑎᑉᐰᑦ ᐃᑎᒐᒪ ᐊᑖᓄᑦ;

⁴⁸ ᓴᐳᑎᕚᖓᓗ ᐊᑭᕋᕐᑐᕐᑎᓐᓂᑦ. ᒪᑭᑎᑉᐸᕐᒪᓗ ᐃᓄᖕᓂᑦ ᐅᕙᓐᓄᑦ ᐊᑭᕋᕐᑐᕋᓱᐊᕐᑐᓂᑦ; ᓴᐳᑎᓚᐅᕐᐸᕐᒪ ᑲᑉᐱᐊᓇᕋᓱᐊᕐᑐᓂᑦ.

⁴⁹ ᑍᒤᒻᒪᑦ, ᖁᔭᒋᔪᒪᕙᒋᑦ, ᐃᓅᖃᑎᒌᒡᔪᐃᑦ ᓇᓗᔪᑦ ᐊᑯᓐᓂᖓᓂ, ᐊᑏᓪᓗ ᓂᕐᑐᕈᑎᓂᒃ ᐃᓐᖏᕐᕕᒋᔪᒪᕙᕋ.

⁵⁰ ᐊᖓᔪᖅᑳᔪᐊᖁᑎᒥᓂᒃ ᓴᐳᑦᔨᓂᖓ ᐊᖏᔪᐊᓘᕗᖅ, ᐅᕐᓱᕐᑎᕐᓯᒪᔭᒥᓄᑦ ᓇᒡᓕᒍᓱᖕᓂᓂ ᓴᖅᑭᑎᑉᐹ, ᑍᕕᑎᒧᑦ ᑭᖑᕚᖏᓐᓄᓪᓗ ᐃᓱᖃᖏᑦᑐᒧᑦ.