ᐃᓐᖏᕈᑎᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦᖁᓚᕋᓂ ᑐᒃᓯᐊᕐᓂᖅ ᐱᐅᓕᔭᐅᓂᕐᒥ ᑭᖑᓪᓕᕐᐹᒥᒃ ᑍᕕᑎᐅᑉ ᑐᒃᓯᐊᕐᓂᖓ 1 ᑐᓵᓚᐅᕆᑦ ᐱᑦᔪᑎᒃᓴᓪᓚᕆᓐᓂᒃ, ᐊᑕᓃᖅ, ᑐᒃᓯᐊᕐᓂᕋ ᓈᓚᓚᐅᕈᒃ ᖃᓂᕐᒥᑦ ᐅᐃᕕᕆᒃᓯᖏᑐᒥᑦ ᐱᔪᖅ. 2 ᐃᓕᖕᓂᑦ ᓴᐳᑎᔭᐅᓂᕋ ᓇᔪᒐᕐᓂᑦ ᐱᓚᐅᕐᓕ; ᐃᔨᖕᓄᑦ ᑕᑯᓐᓇᓚᐅᕆᑦ ᓇᓛᒎᕐᑐᒥᒃ. 3 ᐆᒻᒪᑎᒐ ᐆᒃᑐᕐᓯᒪᒐᕕᐅᒃ; ᐅᓐᓄᐊᒃᑯᓪᓗ ᑕᑯᔭᕐᑐᖃᑦᑕᕐᓯᒪᒐᕕᖓ; ᐆᒃᑐᕐᓯᒪᒐᕕᖓ, ᓱᓇᒥᒡᓗ ᐱᐅᖏᑦᑐᒥᒃ ᓇᓂᓯᓯᒪᓐᖏᓚᑎᑦ; ᑲᔪᓯᒪᓚᐅᕐᐳᖓ ᖃᓂᕋ ᐱᐅᖏᑦᑐᓕᖁᓇᒍ. 4 ᐃᓄᐃᑦ ᐱᓂᐊᕐᓂᖏᑦ ᐱᑦᔪᑎᒋᓪᓗᒋᑦ, ᖃᓂᕐᐱᑦ ᐅᖃᐅᓯᖏᑦ ᒪᓕᒡᓗᒋᑦ, ᓵᓚᖃᕈᒪᔪᑦ ᐱᐅᖏᑦᑐᒧᑦ ᐊᖅᑯᑎᖏᓐᓂᒃ ᓂᒍᕋᓚᐅᕐᐳᖓ. 5 ᐱᓱᒃᓗᖓ ᑍᒪᓐᖓᑦ ᐊᖅᑯᑎᖕᓃᑎᓚᐅᓐᖓ, ᐊᓪᓗᕐᓂᒃᑲ ᐅᓂᐅᕐᓯᖁᓇᒋᑦ. 6 ᓂᓪᓕᐊᕕᒋᕙᒋᑦ, ᑭᐅᓂᐊᕐᐸᕐᒪᓗ, ᒎᑏ; ᓯᐅᑏᒃᑭᒃ ᒪᓂᓚᐅᒃᑭᒃ ᐅᕙᓐᓄᑦ, ᐅᖃᐅᓯᒃᑲᓗ ᓈᓚᒡᓗᒋᑦ. 7 ᓇᒡᓕᖕᓂᕐᒧᑦ ᓱᖁᓯᔪᐃᑦᑐᒧᑦ ᑲᒪᑦᓯᐊᕐᓃᑦ ᓴᖅᑭᑎᓚᐅᕈᒃ ᑲᒪᓇᕐᑐᖅ ᐊᒡᒐᖕᓄᑦ ᑕᓕᕐᐱᖕᓄᑦ, ᐃᕝᕕᑦ ᓴᐳᑦᔨᒐᕕᑦ ᐃᓕᖕᓂᒃ ᑕᑎᖃᕐᑐᓂᒃ. 8 ᓴᐳᑎᓯᒪᓚᐅᓐᖓ ᓲᕐᓗ ᐃᔨᕕᑦ ᑕᑯᓐᓇᑎᖓᑐᑦ ᐱᓐᓇᕆᔭᕐᑐᑦ; ᐃᔨᕐᓯᒪᑎᓪᓗᖓ ᐃᓴᕈᕐᐱᑦ ᑕᕐᕋᓕᓂᖏᑕ ᐊᑖᓂ, 9 ᐱᐅᖏᑦᑐᓕᔪᓂᑦ ᐅᕙᓐᓂᒃ ᓵᓚᖃᕈᒪᔪᓂᑦ, ᐊᑭᕋᕐᑐᕐᑎᓐᓂᑦ ᑐᖁᑦᓯᔪᒪᔪᓂᑦ ᐊᕙᑎᓐᓃᑦᑐᓂᑦ. 10 ᐆᒻᒪᑎᑎᒃ ᓯᑎᔪᑦ ᒪᑐᕔᑦ ᓇᒡᓕᒍᓱᒍᒪᓇᑎᒃ, ᖃᓂᖏᓪᓗ ᓂᓪᓕᐊᕗᑦ ᐱᐅᔪᕆᓂᕐᒥᒃ. 11 ᑐᑦᔭᕐᐹᖓ ᐊᕙᑎᓐᓃᓕᕐᓗᑎᒡᓗ, ᐃᔨᒋᕗᓪᓗ ᐅᑯᖓᓪᓗᑎᒃ ᓄᓇᒧᑦ ᐅᕐᕈᑎᑦᓱᒪᓪᓗᖓ, 12 ᓛᔭᑎᑐᑦ ᓂᕆᔭᒥᖕᓂᒃ ᐊᓕᒃᑐᐃᔪᒪᔪᑎᑐᑦ, ᓛᔭᑎᑐᑦ ᐃᓐᓇᐅᖏᑦᑐᑎᑐᑦ ᐃᔨᕐᓯᒪᓪᓗᓂ ᐅᑕᖅᑭᔪᑎᑐᑦ. 13 ᐊᑕᓃᖅ, ᒪᑭᓕᕆᑦ, ᐅᐸᒃᑐᕐᓗᒋᓪᓗ, ᐅᕐᕈᑎᓕᒃᑭᑦ. ᐃᓅᓯᕋ ᓴᐳᑎᓚᐅᕈᒃ, ᓴᕕᒡᔪᐊᕐᓄᑦ, ᐱᐅᖏᑦᑐᓕᔪᓂᑦ. 14 ᐊᒡᒐᖕᓄᑦ ᓴᐳᑎᓚᐅᓐᖓ, ᐊᑕᓃᖅ, ᐃᓄᖕᓂᑦ ᓯᓚᕐᔪᐊᕐᒥᑦ ᐃᓅᓯᕐᒥᒃ ᐱᓯᒪᔭᒥᖕᓂᒃ ᐊᑐᕐᑐᓂᑦ, ᐊᕿᐊᑦᑐᕐᓕᑦ ᐊᑐᐃᓐᓇᕈᕐᓯᒪᔭᓐᓂᒃ ᑖᒃᑯᓄᖓ; ᕿᑐᕐᖓᖏᑦ ᐱᔭᕆᐊᖃᕐᑕᒥ ᐅᖓᑖᓄᑦ ᐱᓕᑦ, ᕿᑐᕐᖓᖏᓪᓗ ᐊᒥᐊᒃᑯᖏᓐᓂᒃ ᐱᒃᑲᓐᓂᕐᓕᑦ. 15 ᐅᕙᖓᓕ ᑮᓁᑦ ᑕᑯᓐᓇᕈᒫᕐᐸᕋ ᐃᓱᐊᕐᓂᕐᒥ, ᑐᐸᒍᒪᓗ ᓈᒻᒪᒃᓯᑦᓯᐊᕈᒫᕐᐳᖓ, ᑕᑯᓐᓇᕐᓗᖓ ᐊᑦᔨᖕᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society