ᐃᓐᖏᕈᑎᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦᐅᒃᐱᑦᓯᐊᕐᑐᑦ ᓂᕆᐅᒋᔭᖓᑦ ᑐᒃᓯᐊᕐᓂᖅ ᖁᓚᖏᑦᓯᐊᕐᓂᕐᒧᑦ ᑍᕕᑎᐅᑉ ᐃᓐᖏᕈᑖ 1 ᒎᑏ; ᓴᐳᑎᓚᐅᓐᖓ, ᐃᓕᖕᓂᒃ ᑕᑎᖃᕋᒪ. 2 ᑕᕐᓂᕋ ᐊᑕᓂᕐᒧᑦ ᐅᖃᕐᐳᖅ, “ᐊᑕᓂᕆᕙᒋᑦ; ᐃᓚᒋᓇᑎᑦ ᐱᐅᔪᒥᒃ ᐱᓂᐊᕈᓐᓇᓐᖏᓚᖓ.” 3 ᐃᑦᔪᕐᓁᑦᑐᓪᓕ ᓄᓇᒦᑦᑐᑦ, ᓈᒻᒪᒋᔭᐅᔪᓪᓗ, ᑖᒃᑯᐊ ᖁᕕᐊᒋᕙᒃᑲ. 4 ᒎᑎᓂᒡᓕ ᐊᓯᖏᓐᓂᒃ ᒎᑎᖃᕐᑐᑦ ᖁᕕᐊᓱᖏᑦᔪᑎᒃᓴᖃᕈᒫᕐᐳᑦ ᐅᓄᕐᑐᓂᒃ; ᑐᓂᕐᕈᑎᖏᓐᓂᒃ ᐊᐅᖑᔪᓂᒃ ᐃᒥᕐᐸᒃᑕᖏᓐᓂᒃ ᑐᓂᕐᕈᓯᕈᒪᓐᖏᓚᖓ, ᒎᑎᓐᖑᐊᖏᑕᓘᓐᓃᑦ ᐊᑎᖏᑦ ᑍᔪᒪᓐᖏᓚᒃᑲ. 5 ᐊᑕᓃᖅ ᑐᓂᕙᕐᒪ ᐱᔭᕆᐊᖃᕐᑕᓐᓂᒃ, ᐃᒥᐅᑎᒋᓂᐊᕐᑕᓐᓂᒡᓗ; ᓇᓚᐅᑦᑖᕈᓪᓗ ᐃᓂᒋᔭᕋ ᓴᐳᑎᓯᒪᕙᑦ. 6 ᐃᓂᒃᓴᒥᒃ ᐊᒃᓱᓈᒃᑯᑦ ᐱᐅᔪᒥᒃ ᐱᑎᑕᐅᕗᖓ; ᑭᖑᕐᖑᑎᔭᒃᓴᖃᕐᐳᖓ ᐱᐅᔪᒥᒃ. 7 ᐊᑕᓂᖅ ᓂᕐᑐᕐᐸᕋ, ᐋᖅᑭᒃᓲᑎᒥᒃ ᐅᖃᕐᕕᒋᖕᒪᖓ; ᐅᓐᓄᐊᒃᑯᓪᓘᓐᓃᑦ ᐆᒻᒪᑎᒪ ᐊᔪᕆᕐᑐᕐᐹᖓ. 8 ᐊᑕᓂᖅ ᓵᓐᓂ ᑍᒪᓐᖓᑦ ᐃᓂᖃᕐᑎᑉᐸᕋ, ᑕᓕᕐᐱᓐᓃᒻᒪᑦ ᓱᓇᒧᑦ ᐊᐅᓚᑕᐅᓂᐊᓐᖏᓚᖓ. 9 ᑍᒤᒻᒪᑦ ᐆᒻᒪᑎᒐ ᖁᕕᐊᓱᒃᐳᖅ, ᑕᕐᓂᕋᓗ ᐃᖀᕐᑐᕐᓗᓂ; ᑎᒥᒐᓗ ᐃᓂᓪᓚᖓᓂᐊᕐᐳᖅ ᓂᕆᐅᒋᔭᖃᑦᓯᐊᕐᓗᓂ. 10 ᑕᕐᓂᕋ ᑐᖁᖓᔪᑦ ᐃᓂᖓᓃᑦᓮᓐᓇᕐᓂᐊᓐᖏᓚᖅ, ᐃᑦᔪᕐᓁᑦᑐᖁᑎᕕᓪᓗ ᑎᒥᖓ ᓱᕈᕐᓂᕐᒥᒃ ᖃᐅᔨᑎᓐᓂᐊᓐᖏᓚᑦ. 11 ᖃᐅᔨᑎᓐᓂᐊᕐᐸᕐᒪ ᐊᖅᑯᒻᒥᒃ ᐃᓅᓯᕐᒧᑦ ᑕᓯᐅᕐᓯᔪᒥᒃ; ᓇᔪᕐᓂᕐᓂ ᖁᕕᐊᓱᖕᓂᕐᒥᒃ ᐃᓱᐊᕐᑐᒥᒃ ᐱᑕᖃᕐᒪᑦ, ᐊᒡᒐᖕᓂᓗ ᑕᓕᕐᐱᖕᓂ ᖁᕕᐊᓇᕐᑐᖃᕐᓗᓂ ᐃᓱᖃᖏᑦᑐᒧᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society