ᐃᓐᖏᕈᑎᑦ 148 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᖅ ᓂᕐᑐᕐᑕᐅᓕ ᐱᓐᖑᕐᑎᓯᒪᔭᖏᓐᓂᑦ 1 ᐊᑕᓂᖅ ᓂᕐᑐᕐᑕᐅᓕ! ᐊᑕᓂᖅ ᓂᕐᑐᕐᑕᐅᓕ ᕿᓚᖕᒥᐅᓂᑦ, ᓂᕐᑐᕐᑕᐅᓕ ᖁᑦᓯᖕᓂᕐᒦᑦᑐᓂᑦ! 2 ᐂᓐᖏᓕᖁᑎᖏᑕ, ᓂᕐᑐᕐᓕᑦᔪᒃ, ᓇᔪᕐᑎᒋᔭᓕᒫᖏᑕ, ᓂᕐᑐᕐᓕᑦᔪᒃ! 3 ᓯᕿᓃᖅ ᑕᖅᑮᕐᓗ, ᑖᓐᓇ ᓂᕐᑐᕐᓯᐅᒃ! ᐅᓪᓗᕆᐊᖑᔪᓯ ᖃᐅᒻᒪᕆᒃᑐᓯ, ᓂᕐᑐᕐᓯᐅᒃ! 4 ᕿᓔᑦ ᕿᓚᖏᑦ, ᑖᓐᓇ ᓂᕐᑐᕐᓯᐅᒃ, ᐃᓕᑦᓯᓗ ᐃᒪᐅᔪᓯ ᕿᓚᐅᑉ ᖁᓛᓃᑦᑐᓯ! 5 ᑖᒃᑯᐊ ᐊᑕᓂᐅᑉ ᐊᑎᖓ ᓂᕐᑐᕋᒃᓴᕆᕚᑦ! ᑖᓐᓇ ᐱᖁᔨᖕᒪᑦ, ᑖᒃᑯᐊ ᐱᓐᖑᕐᑎᑕᐅᓚᐅᕐᐳᑦ. 6 ᑖᑦᓱᒪ ᐋᖅᑭᓚᐅᕐᐰᑦ ᓱᖁᓯᔪᐃᑦᑑᖁᓪᓗᒋᑦ ᐃᓱᖃᖏᑦᑐᒧᑦ; ᑖᒃᑯᓄᖓ ᐃᓱᒋᔭᐅᑎᑕᑎᑦ ᓱᕐᕋᒃᑕᐅᔪᓐᓇᓐᖏᓚᑦ. 7 ᐊᑕᓂᖅ ᓂᕐᑐᕐᑕᐅᓕ ᓄᓇᕐᔪᐊᒥᑦ, ᐃᓕᑦᓯ ᐃᒪᕐᐱᖕᒥ ᐆᒪᔪᕐᔪᐊᖑᔪᓯ ᐃᑎᔪᕐᔪᐊᒥᐅᑕᔪᓯᓗ ᑕᒪᑦᓯ; 8 ᐃᑯᒪᐅᑉ ᓇᑕᖅᑯᕐᓁᓪᓗ, ᐊᐳᑎᐅᑉ ᓂᓔᓪᓗ; ᐊᓄᕆᐅᑉ ᐊᖅᑯᓇᕐᔪᐊᑉ, ᑖᑦᓱᒪ ᐱᖁᔨᓂᖓᓂᒃ ᒪᓕᒃᑐᑦ! 9 ᖃᖅᑬᑦ ᐱᖑᓕᒫᓪᓗ, ᓇᐹᕐᑐᐃᑦ ᐱᕈᕐᑐᓖᑦ ᓇᐹᕐᑐᐃᓪᓗ ᓰᑕᕇᑦ ᓯᑕᒃᑍᑦ! 10 ᐆᒪᔪᐃᑦ ᐃᒻᒧᒃᓯᐅᒐᓕᒫᓪᓗ, ᓄᓇᒥ ᐹᕐᖑᕐᑏᑦ ᑎᖕᒥᐊᓪᓗ ᖃᖓᑕᕙᒃᑐᑦ! 11 ᓄᓇᕐᔪᐊᕐᒥ ᐊᖓᔪᖅᑳᕐᔪᐊᑦ ᐃᓄᓕᒫᓪᓗ, ᐊᖓᔪᖅᑳᕐᔪᐊᒃᑯᕕᖕᒥᐅᑍᑦ ᐊᐅᓚᑦᓯᔨᐅᔪᓪᓗ ᓄᓇᕐᔪᐊᕐᒥ! 12 ᐊᖑᑏᑦ ᐊᕐᓁᓪᓗ ᐃᓅᓱᒃᑑᔪᓯ ᐊᑕᐅᑦᓯᒃᑯᑦ, ᐃᓄᑐᕾᑦ ᓱᕈᓰᓪᓗ! 13 ᑖᒃᑯᐊ ᐊᑕᓂᐅᑉ ᐊᑎᖓ ᓂᕐᑐᕐᓕᑦᔪᒃ, ᑖᑦᓱᒪ ᐊᑎᖓ ᑕᒤᓐᓂᑦ ᐊᖏᓂᕐᐸᐅᖕᒪᑦ; ᓂᕐᑐᕐᓇᕐᓂᖓᓗ ᖁᑦᓯᖕᓂᕐᓴᐅᕗᖅ ᓄᓇᕐᔪᐊᕐᒥᑦ ᕿᓚᖕᒥᓪᓗ. 14 ᑖᑦᓱᒪ ᐃᓄᖁᑎᖏᑕ ᓇᒡᔪᖏᑦ ᐊᖏᔪᕈᕐᑎᑉᐰᑦ, ᐃᑦᔪᕐᓁᑦᑐᖁᑎᓕᒫᖏᑕ ᓂᕐᑐᕐᓕᑦᔪᒃ, ᐃᓴᕆᐊᓕᒥᐅᑦ ᐃᓄᖏᑕ ᑖᑦᓱᒥᖓ ᖃᓂᒃᓴᕐᑐᑦ. ᐊᑕᓂᖅ ᓂᕐᑐᕐᑕᐅᓕ! |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society