ᐃᓐᖏᕈᑎᑦ 145 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓐᖏᕐᓂᖅ ᓂᕐᑐᐃᓂᕐᒧᑦ

ᐃᓐᖏᕈᓯᖅ ᓂᕐᑐᐃᓂᕐᒧᑦ   ᑍᕕᑎᐅᑉ ᐃᓐᖏᕈᑖ

¹ ᐊᖏᔪᕈᕐᑎᑦᓱᒪᕙᒋᑦ ᒎᑎᒐ, ᐊᖓᔪᖅᑳᕐᔪᐊᖑᔪᑎᑦ; ᐊᑏᓪᓗ ᓂᕐᑐᕐᓇᕐᓯᑎᓐᓂᐊᕐᐸᕋ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.

² ᖃᐅᑕᒫᑦ ᓂᕐᑐᕐᓂᐊᕐᐸᒋᑦ, ᐊᑏᓪᓗ ᓂᕐᑐᕐᓂᐊᕐᐸᕋ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.

³ ᐊᑕᓂᖅ ᐊᖏᔪᕐᔪᐊᖑᕗᖅ, ᐊᖏᔪᒥᒡᓗ ᓂᕐᑐᕐᑕᐅᔪᒃᓴᐅᕗᖅ, ᑖᑦᓱᒪᓗ ᐊᖏᓂᖓ ᑐᑭᓯᔭᐅᔪᓐᓇᓐᖏᓚᖅ.

⁴ ᑭᖑᕚᕇᑦ ᐱᓂᐊᕐᓂᑎᑦ ᓂᕐᑐᕈᒫᕐᐰᑦ ᑭᖑᕚᕇᖑᔪᑦ ᑭᖑᓪᓕᖏᓐᓄᑦ ᑎᑭᓪᓗᒋᑦ, ᓇᓗᓁᕐᓯᔪᒫᕐᐳᓪᓗ ᐱᓂᐊᕐᓂᕐᐱᑦ ᑲᒪᓇᕐᑐᕐᔪᐊᖑᓂᖏᓐᓂᒃ.

⁵ ᐃᓱᒪᒃᓴᕐᓯᐅᕈᑎᖃᕐᓂᐊᕐᐳᖓ ᓂᕐᑐᕐᓇᕐᑐᕐᔪᐊᖑᓂᕐᓂᒃ ᐊᖓᔪᖅᑳᕐᔪᐊᖑᓂᕐᐱᓪᓗ ᑕᑯᒥᓇᕐᑐᕐᔪᐊᖑᓂᖓᓂᒃ, ᐱᓂᐊᕐᓂᕐᐱᓪᓗ ᑲᒪᓇᕐᑐᐊᓘᓂᖏᓐᓂᒃ.

⁶ ᐃᓄᐃᑦ ᐅᖃᐅᓯᖃᕐᓂᐊᕐᐳᑦ ᐱᓂᐊᕐᓯᒪᔭᕐᐱᑦ ᑲᒪᓇᕐᑐᕐᔪᐊᖑᓂᖏᓐᓂᒃ ᐊᖏᔪᕐᔪᐊᖑᓂᖏᓐᓂᒡᓗ, ᐅᕙᖓᓕ ᐊᖏᔪᕐᔪᐊᖑᓃᑦ ᐅᓂᒃᑲᐅᑎᒋᔪᒪᕙᕋ.

⁷ ᐃᖅᑲᐅᒪᔭᐅᓗᑎᑦ ᐅᖃᐅᓯᕆᔭᐅᔪᒫᕐᐳᑎᑦ ᑍᒪᓐᖓᑦ ᐊᖏᔪᕐᔪᐊᒥᒃ ᐱᑦᓯᐊᖏᓐᓇᕐᓃᑦ, ᓇᓛᒎᕐᓃᓪᓗ ᓂᐱᖅᑯᕐᑐᓗᑎᒃ ᐃᓐᖏᕈᑎᒋᔭᐅᔪᒫᕐᐳᖅ.

⁸ ᐊᑕᓂᖅ ᐱᑦᓯᐊᕐᓂᖃᕐᒪᑦ ᐊᖏᔪᒥᒃ ᓂᑲᒍᓱᖕᓂᖃᕐᓗᓂᓗ, ᓂᓐᖓᒃᓴᕅᖏᑦᑐᖅ ᓇᒡᓕᖕᓂᕐᔪᐊᖃᕐᓗᓂᓗ.

⁹ ᐊᑕᓂᖅ ᐱᑦᓯᐊᕐᕕᖃᕐᐳᖅ ᑕᒤᓐᓄᑦ, ᓂᑲᒍᓱᒃᓗᓂᓗ ᓴᓇᓯᒪᔭᓕᒫᒥᓂᒃ.

¹⁰ ᐊᑕᓃᖅ, ᓴᓇᓯᒪᔭᓕᒫᕕᑦ ᓂᕐᑐᒐᒃᓴᕆᕚᑎᑦ, ᐃᑦᔪᕐᓁᑦᑐᖁᑎᕕᓪᓗ ᓂᕐᑐᒐᒃᓴᕆᕚᑎᑦ.

¹¹ ᐊᑕᓂᐅᕕᒃᐱᑦ ᓂᕐᑐᕐᓇᕐᓂᖓ ᐅᖃᐅᓯᕆᔪᒫᕐᐹᑦ, ᐱᔪᓐᓇᕐᓃᓪᓗ ᐅᖃᐅᑎᒋᓗᒍ,

¹² ᐃᓄᐃᑦ ᕿᑐᕐᖓᖏᑦ ᐱᔪᓐᓇᕐᓂᕐᓄᑦ ᐱᓇᓱᐊᕐᓂᕐᓂᒃ ᖃᐅᔨᑎᑕᐅᖁᓪᓗᒋᑦ, ᐊᑕᓂᐅᕕᒃᐱᓪᓗ ᐃᓂᖁᓇᕐᑐᕐᔪᐊᖑᓂᖓᑕ ᓂᕐᑐᕐᓇᕐᓂᖓᓂᒃ.

¹³ ᐊᑕᓂᐅᕖᑦ ᐃᓱᖃᖏᑦᑐᒧᑦ ᐊᑕᓂᐅᕕᐅᖕᒪᑦ, ᐊᖓᔪᖅᑲᐅᕖᓪᓗ ᓱᖁᓯᔪᐃᑦᑑᓪᓗᓂ ᑭᖑᕚᕇᒃᐸᓪᓕᐊᔪᓕᒫᓂ. ᐊᑕᓂᖅ ᐅᖃᐅᓯᕆᔭᓕᒫᒥᓂᒃ ᑲᔪᓯᑎᑦᓯᓲᖑᕗᖅ, ᓂᑲᒍᓱᓲᖑᓪᓗᓂᓗ ᐱᓇᓱᐊᕐᑕᓕᒫᒥᓂᒃ.

¹⁴ ᐊᑕᓂᐅᑉ ᐹᓪᓚᒃᑐᓕᒫᑦ ᓇᔪᒻᒥᕔᑦ, ᒥᑭᒡᓕᑎᕐᑐᓕᒫᓪᓗ ᒪᑭᑎᑉᐰᑦ.

¹⁵ ᐃᔩᑦ ᐃᓕᖕᓄᑦ ᑕᑯᓴᕐᑐᓕᒫᑦ, ᓂᕿᒃᓴᕐᑖᕐᑎᑉᐸᑎᑦ ᓇᓪᓕᐅᓐᓂᖏᑦ ᓈᒻᒪᓈᕐᑎᓪᓗᒋᑦ.

¹⁶ ᐊᒡᒐᑎᑦ ᐃᓴᒃᓗᒋᑦ, ᐃᓅᔪᓕᒫᑦ ᐱᔪᒪᔭᖏᓐᓂᒃ ᓈᒻᒪᒃᓯᑎᑉᐸᑎᑦ.

¹⁷ ᐊᑕᓂᖅ ᓈᒻᒪᓈᑦᓯᐊᕐᐳᖅ ᑕᒤᑎᒍᑦ ᐱᓇᓱᐊᕐᓂᕐᒥᒍᑦ, ᐱᑦᓯᐊᕐᓂᖃᕐᓗᓂᓗ ᑕᒤᑎᒍᑦ ᐱᓂᐊᕐᓂᕐᒥᒍᑦ.

¹⁸ ᐊᑕᓂᖅ ᖃᓂᑉᐳᖅ ᑕᒤᓐᓄᑦ ᓂᓪᓕᐊᕕᒋᔨᒥᓄᑦ, ᐃᓗᖏᕐᑐᕐᓗᑎᒃ ᓱᓕᔪᒥᒃ ᓂᓪᓕᐊᔪᓄᑦ ᑖᑦᓱᒧᖓ.

¹⁹ ᑖᑦᓱᒥᖓ ᓯᕘᕋᔪᑦ ᐱᔪᒪᓂᓕᒫᖏᑦ ᓈᒻᒪᒃᓯᑎᑉᐰᑦ, ᑐᒃᓯᐊᕐᓂᖏᓪᓗ ᑐᓴᕐᐰᑦ, ᐱᐅᓕᓪᓗᒋᓪᓗ.

²⁰ ᐊᑕᓂᐅᑉ ᓇᒡᓕᒋᔨᓕᒫᓂ ᓴᐳᑎᓯᒪᕔᑦ; ᐱᐅᖏᑦᑐᓕᒫᓪᓕ ᓄᖑᑎᓐᓂᐊᕐᐰᑦ.

²¹ ᖃᓂᕋ ᐅᖃᓪᓚᖕᓂᐊᕐᐳᖅ ᐊᑕᓂᖅ ᓂᕐᑐᕐᓗᒍ, ᑎᒥᖃᕐᑐᓕᒫᓪᓗ ᐊᑎᖓ ᐃᑦᔪᕐᓁᑦᑐᖅ ᓂᕐᑐᕐᓕᑦᔪᒃ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.