ᐃᓐᖏᕈᑎᑦ 143 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ ᑍᕕᑎᐅᑉ ᐃᓐᖏᕈᑖ 1 ᐊᑕᓃᖅ, ᑐᒃᓯᐊᕐᓂᕋ ᑐᓴᓚᐅᕈᒃ; ᕿᓄᓂᕋ ᓈᓚᓚᐅᕈᒃ! ᓱᖁᓯᔪᐃᑦᑑᓂᕐᓄᑦ ᐃᓱᐊᕐᑑᓂᕐᓄᓪᓗ ᑭᐅᓚᐅᓐᖓ! 2 ᐱᔩᑦ ᐃᖅᑲᕐᑐᕐᓂᐊᕐᓇᒍ; ᓵᖕᓂ ᐃᓄᐃᑦ ᐃᓅᔪᑦ ᐸᓯᔭᒃᓴᐅᖏᑦᑐᖃᖏᒻᒪᑕ. 3 ᐊᑭᕋᕐᑐᕐᑎᒪ ᑕᕐᓂᕋ ᓵᓚᒋᓇᓱᐊᕐᒪᒍ; ᐃᓅᓯᕋ ᓯᖁᒥᓪᓗᒍ ᓄᓇᒧᑦ ᐅᕐᕈᑎᑉᐹ; ᑖᕐᑐᒥᐅᖑᑎᓕᕐᐹᖓ, ᓲᕐᓗ ᑐᖁᖓᔪᑐᖃᕐᑎᑐᑦ. 4 ᑍᒤᒻᒪᑦ ᐊᓂᕐᓂᕋ ᐃᓗᓐᓂ ᓄᑮᕈᑎᓕᕐᐳᖅ; ᐆᒻᒪᑎᒐ ᐃᓗᓐᓂ ᓂᕆᐅᒋᔭᒃᓴᖃᕈᓐᓃᕐᐳᖅ. 5 ᐅᓪᓗᐃᑦ ᐊᓂᒍᕐᓯᒪᔪᑦ ᐃᖅᑲᐅᒪᕙᒃᑲ; ᐱᓂᐊᕐᓂᕆᓯᒪᔭᓕᒫᑎᑦ ᐃᓱᒪᒃᓴᕐᓯᐅᕈᑎᒋᕙᒃᑲ, ᐱᓂᐊᕐᓂᕆᓯᒪᔭᓕᒫᑎᑦ ᐃᖅᑲᐅᒪᕙᒃᑲ. 6 ᐊᒡᒐᒃᑲ ᖁᒻᒧᑦ ᐃᓕᖕᓄᑦ ᐃᓴᒻᒥᕙᒃᑲ; ᑕᕐᓂᕐᒪ ᐃᒥᕈᒃᕕᒋᕚᑎᑦ ᓄᓇᑐᑦ ᐸᓂᕐᑐᑐᑦ. ᓰᓚ 7 ᐊᑕᓃᖅ, ᒫᓐᓇ ᑐᐊᕕᕐᓗᑎᑦ ᑐᓴᓚᐅᓐᖓ! ᓂᕆᐅᒋᔭᒃᓴᖃᕈᓐᓃᕋᒪ ᑕᒤᑎᒍᑦ. ᑮᓁᑦ ᐃᔨᕐᓯᒪᓂᐊᕐᓇᒍ ᐅᕙᓐᓄᑦ, ᐃᓚᓕᐅᑎᖁᓇᖓ ᑐᖁᖓᔪᑦ ᐃᓂᖓᓄᑦ ᐊᒻᒧᐊᒃᓯᒪᔪᓄᑦ. 8 ᐅᓪᓛᒃᑯᑦ ᖃᐅᑕᒫᑦ ᑐᓵᑎᖃᑦᑕᓚᐅᓐᖓ ᓇᒡᓕᒍᓱᖕᓂᕐᓂᒃ, ᐃᓕᖕᓂᒃ ᑕᑎᖃᕋᒪ; ᑐᒃᓯᐊᕐᓂᒃᑲ ᐃᓕᖕᓄᑦ ᖁᒻᒧᐊᒃᐳᑦ; ᐊᔪᕆᕐᑐᓚᐅᓐᖓ ᐊᖅᑯᑎᒃᓴᒥᒃ ᐊᑐᒐᒃᓴᕆᔭᓐᓂᒃ. 9 ᐊᑕᓃᖅ, ᓴᐳᑎᓚᐅᓐᖓ ᐊᑭᕋᕐᑐᕐᑎᓐᓂᑦ! ᐃᓕᖕᓄᑦ ᕿᒫᒐᒪ ᐃᔨᕐᓯᒪᑎᑕᐅᔪᒪᓪᓗᖓ. 10 ᐊᔪᕆᕐᑐᓚᐅᓐᖓ ᐱᔪᒪᔭᕐᓂᒃ ᐊᑐᕈᓐᓇᖁᓪᓗᖓ, ᒎᑎᒋᒐᒃᑭᑦ! ᐊᓂᕐᓂᕐᓄᑦ ᐱᐅᔪᒧᑦ ᑕᓯᐅᓚᐅᓐᖓ ᐊᖅᑯᑎᒧᑦ ᓇᖏᐊᕐᓇᖏᑦᑐᒧᑦ. 11 ᐊᑕᓃᖅ, ᐊᑏᑦ ᐱᑦᔪᑎᒋᓗᒍ, ᐃᓅᓯᕋ ᓴᐳᑎᓚᐅᕈᒃ! ᐃᓱᐊᕐᓂᕐᓄᑦ ᑕᕐᓂᕋ ᐊᑲᐅᖏᑦᔪᑎᖃᕐᓂᕐᒥᑦ ᐊᓂᑎᓚᐅᕈᒃ! 12 ᓇᒡᓕᒍᓱᖕᓂᕐᓄᑦ ᓱᖁᓯᔪᐃᑦᑐᒧᑦ ᐊᑭᕋᕐᑐᕐᑎᒃᑲ ᑐᖁᑎᓚᐅᒃᑭᑦ, ᐊᑕᖏᕐᓗᒋᑦ ᓄᖑᓚᐅᒃᑭᑦ ᑕᕐᓂᓐᓂᒃ ᐋᓐᓂᐊᑎᑦᓯᔪᑦ, ᐱᔨᒋᒐᕕᖓ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society