ᐃᓐᖏᕈᑎᑦ 141 - ᐊᒡᓔᑦ ᐃᑦᔪᕐᖕᓁᑦᑐᑦᐅᓐᓄᒃᑯᑦ ᑐᒃᓯᐊᕐᓂᖅ ᑍᕕᑎᐅᑉ ᐃᓐᖏᕈᑖ 1 ᐊᑕᓃᖅ, ᐃᓕᖕᓄᑦ ᑐᒃᓯᐊᕐᐳᖓ; ᕾᓵᓚᐅᕆᑦ ᐅᕙᓐᓄᑦ! ᓂᐱᒐ ᑐᓴᓚᐅᕈᒃ, ᑐᒃᓯᐊᕐᕕᒋᓕᑐᐊᕈᒃᑭᑦ. 2 ᑐᒃᓯᐊᕐᓂᕋ ᐃᓕᖕᓄᑦ ᑐᓂᕐᕈᑎᑐᑦ ᑎᐱᑦᓯᐊᕆᒃᑐᑎᑐᑦ ᑍᒤᓚᐅᕐᓕ, ᐊᒡᒐᖕᒪᓗ ᖁᒻᒧᑦ ᐃᓵᖓᓂᖏᑦ ᐅᓐᓄᒃᑯᑦ ᑐᓂᕐᕈᓯᕈᑕᐅᔪᑎᑐᑦ ᑍᒤᓪᓗᑎᒃ. 3 ᐊᑕᓃᖅ, ᖃᓂᕋ ᖃᐅᔨᓴᕐᑎᑖᕐᑎᓚᐅᕈᒃ, ᖃᓂᕐᒪ ᓯᓈᖓᑕ ᐅᒃᑯᐊᖓ ᖃᐅᔨᓴᕐᑕᐅᖏᓐᓇᖁᓪᓗᒍ. 4 ᐆᒻᒪᑎᒐ ᑲᒪᒋᒍᒃ ᑲᔪᖏᕐᓂᖃᖁᓇᒍ ᐱᐅᖏᑦᑐᓄᑦ ᓱᓇᑐᐃᓐᓇᕐᓄᑦ, ᐱᐅᖏᑦᑐᓪᓗ ᐱᓇᓱᐊᕐᓂᖏᓐᓄᑦ ᐃᓄᖕᓄᑦ ᐃᓚᓕᐅᑎᖁᓇᖓ; ᓂᕆᖁᓇᖓᓗ ᑖᒃᑯᐊ ᒪᒪᕆᔭᖏᓐᓂᒃ. 5 ᐃᓱᐊᕐᑐᓕᔪᒧᑦ ᐊᓇᐅᔭᐅᑎᓚᐅᓐᖓ ᐱᑦᓯᐊᕐᓂᐅᒐᔭᕐᒪᑦ ᓱᐊᒃᑕᐅᓗᖓᓘᓐᓃᑦ ᑕᒪᓐᓇ ᐅᕐᓱᑦᓯᐊᕚᓘᖕᒪᑦ; ᐱᐅᖏᑦᑐᓄᓪᓕ ᓂᐊᖁᕋ ᐅᕐᓱᕐᑎᕐᑕᐅᑎᓚᐅᕐᓯᒪᓐᓂᐊᕐᓇᒍ; ᓱᓕ ᑐᒃᓯᐊᕐᐳᖓ ᐱᐅᖏᑦᑐᑦ ᐱᓂᐊᕐᓂᖏᑦ ᐊᑭᕋᕐᑐᕐᓗᒋᑦ. 6 ᐊᖓᔪᖅᑳᖏᑦ ᕾᕐᓱᒥ ᐃᔪᒃᑲᕐᑎᑕᐅᒃᐸᑕ ᐃᓐᓈᕈᒃᑯᑦ, ᑕᕝᕙ ᐊᑕᓂᐅᑉ ᐅᖃᐅᓯᖏᑦ ᖃᐅᔨᔭᐅᔪᒫᕐᐳᑦ ᓱᓕᓂᖏᓐᓂᒃ. 7 ᓲᕐᓗ ᓄᓇ ᒪᒃᐱᕐᑎᕐᑕᐅᓪᓗᓂ ᐅᔭᕅᑦ ᓯᐊᒻᒪᕐᑎᕐᑕᐅᕙᖕᒪᑕ, ᑍᒫᒃᑕᐅᖅ ᑖᒃᑯᐊ ᓴᐅᓂᖏᑦ ᓯᐊᒻᒪᕐᑎᑕᐅᓂᐊᕆᕗᑦ ᑕᒫᓃᕐᕆᓕᕐᓗᑎᒃ ᐃᓗᕕᖃᕐᕕᐅᑉ ᖃᓂᖓᑕ ᓴᓂᐊᓂ. 8 ᐃᓕᖕᓄᓪᓕ ᐊᑕᓃᖅ ᒎᑏ ᑕᑯᓐᓇᕐᐳᖓ; ᐃᓕᖕᓄᑦ ᕿᒫᕗᖓ ᓴᐳᑎᔭᐅᔪᒪᓪᓗᖓ; ᑕᕐᓂᕋ ᕿᒤᓐᓇᕐᓗᒍ ᑐᖁᑕᐅᑎᑦᑍᓕᒍᒃ! 9 ᓴᐳᑎᓚᐅᓐᖓ ᑖᒃᑯᐊ ᓂᒐᕐᑎᑦᓯᑦᔪᑎᒋᓇᓱᐊᕐᑕᖏᓐᓂᑦ, ᐱᐅᖏᑦᑐᓕᔪᓪᓗ ᒥᑭᒋᐊᕐᑎᑦᓯᑦᔪᑎᒋᓇᓱᐊᕐᑕᖏᓐᓂᑦ. 10 ᐱᐅᖏᑦᑐᓕᒫᑦ ᐊᑕᐅᑦᓯᒃᑯᑦ ᓄᓗᑦᔨᐊᕆᓯᒪᔭᒥᖕᓄᑦ ᓇᖕᒥᓂᖅ ᑲᑕᓚᐅᕐᓕᑦ, ᐅᕙᖓ ᑖᒃᑯᓇᓐᖓᑦ ᐊᓐᓇᒃᑎᓪᓗᖓ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society