ᐃᓐᖏᕈᑎᑦ 135 - ᐊᒡᓔᑦ ᐃᑦᔪᕐᖕᓁᑦᑐᑦᓂᕐᑐᐃᓂᕐᒧᑦ ᐃᓐᖏᕐᓂᖅ 1 ᐊᑕᓂᖅ ᓂᕐᑐᕐᑕᐅᓕ! ᐊᑕᓂᐅᑉ ᐊᑎᖓ ᓂᕐᑐᕐᑕᐅᓕ, ᐊᑕᓂᕐᒧᑦ ᐱᔨᐅᔪᓯ, ᑖᓐᓇ ᓂᕐᑐᕐᓯᐅᒃ. 2 ᐃᓕᑦᓯ ᐊᑕᓂᐅᑉ ᐃᒡᓗᖓᓂ ᓂᑯᕕᖓᔪᓯ, ᒎᑎᑦᑕ ᐃᒡᓗᖓᑕ ᐊᓃᕐᕕᖓᓂ! 3 ᐊᑕᓂᖅ ᓂᕐᑐᕐᑕᐅᓕ, ᐊᑕᓂᖅ ᐱᐅᔫᖕᒪᑦ: ᐊᑎᖓ ᓂᕐᑐᕐᓗᒍ ᐃᓐᖏᕐᕕᒋᓯᐅᒃ; ᐃᓛᒃ ᑖᓐᓇ ᐱᑦᓯᐊᕐᑐᐊᓘᖕᒪᑦ. 4 ᐊᑕᓂᐅᑉ ᔧᑯ ᓂᕈᐊᓚᐅᕐᒪᒍ ᓇᖕᒥᓂᕆᔪᒪᓪᓗᒍ, ᐃᓴᕆᐊᓕᓗ ᓇᖕᒥᓂᖅ ᐱᖁᑎᒋᔪᒪᓪᓗᓂᐅᒃ. 5 ᖃᐅᔨᒪᕗᖓ ᐊᑕᓂᖅ ᐊᔪᖏᑦᑐᕐᔪᐊᖑᖕᒪᑦ, ᐊᑕᓂᕗᓪᓗ ᒎᑎᒋᔭᐅᔪᓕᒫᓂᑦ ᐊᖏᓂᕐᓴᐅᓪᓗᓂ. 6 ᐊᑕᓂᐅᑉ ᖁᕕᐊᒋᔭᓂ ᐱᓇᓱᐊᕐᐰᑦ, ᕿᓚᖕᒥ ᓄᓇᒥᓗ, ᐃᒪᕐᐱᖕᓂ, ᐃᑎᔪᕐᔪᐊᓂᓗ ᑕᒤᓐᓂ. 7 ᑖᑦᓱᒪ ᓄᕗᔧᑦ ᐊᓄᕆᑕᓖᑦ ᖁᒻᒧᐊᒃᑎᑉᐰᑦ ᓄᓇᐅᑉ ᐃᓱᖏᓐᓂᑦ, ᖃᐅᒻᒪᓪᓚᒃᑎᑦᓯᖃᑦᑕᕐᑐᖅ ᓯᓚᓗᒃᑎᓪᓗᒍ; ᐊᓄᕌᓕᕐᑎᑦᓯᖃᑦᑕᕐᑐᕐᓗ ᓯᕐᓗᐊᖁᑎᒥᓂᑦ ᐱᔪᓂᒃ. 8 ᑖᑦᓱᒪ ᐃᕐᓂᐊᖑᖅᑳᕐᓯᒪᔪᑦ ᑐᖁᑎᓚᐅᕐᐰᑦ ᐄᑦᔨᑉᑎᒥ, ᑕᒪᕐᒥᒃ ᐃᓄᐃᓪᓗ ᓂᕐᔪᑎᓪᓗ; 9 ᑖᓐᓇ ᑎᓕᓯᓚᐅᕐᐳᖅ ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒡᓗ ᐃᓕᑦᓯᓐᓄᑦ ᐄᑦᔨᑉᑎᒥᐅᓄᑦ, ᐰᕉᒧᑦ ᐱᔨᒋᔭᓕᒫᖏᓐᓄᓪᓗ. 10 ᐃᓅᖃᑎᒌᒡᔪᐊᓂᒃ ᐅᓄᕐᑐᓂᒃ ᓵᓚᖃᓚᐅᕐᑐᖅ, ᑐᖁᑦᓯᓚᐅᕐᑐᕐᓗ ᐊᖓᔪᖅᑳᕐᔪᐊᓂᒃ ᐊᔪᖏᑦᑐᕐᔪᐊᓂᒃ, 11 ᓮᕼᐆᓂ, ᐊᒧᕅᑎᒃᑯᑦ ᐊᖓᔪᖅᑳᕐᔪᐊᖓᑦ, ᐋᒡᓗ, ᐹᓴᓂᒃᑯᑦ ᐊᖓᔪᖅᑳᕐᔪᐊᖓᑦ, ᑬᓇᓂᐅᓪᓗ ᐊᖓᔪᖅᑳᕐᔪᐊᖃᕐᕕᓕᒫᖏᓐᓂᒃ, 12 ᓄᓇᒋᔭᖓᓪᓗ ᑐᓂᓚᐅᕐᐹ ᑭᖑᕐᖑᑎᔭᐅᓕᖁᓪᓗᒍ, ᐃᓄᖁᑎᒥᓄᑦ ᐃᓴᕆᐊᓕᒃᑯᓐᓄᑦ ᑭᖑᕐᖑᑎᔭᐅᓕᖁᓪᓗᒍ. 13 ᐊᑕᓃᖅ, ᐊᑏᑦ ᐃᓱᖃᖏᑦᑐᒧᑦ ᑐᕌᕐᐳᖅ, ᐊᑕᓃᖅ, ᐃᖅᑲᐅᒪᔭᐅᓃᑦ ᐃᓱᖃᖏᑦᑐᒧᑦ ᑍᒤᖏᓐᓇᕐᓂᐊᕐᐳᖅ. 14 ᐊᑕᓂᐅᑉ ᐃᓄᖁᑎᓂ ᓴᐳᑎᔪᒫᕐᒪᒋᑦ, ᐱᔨᓂᓗ ᓈᒃᑭᒋᓕᕈᒫᕐᐰᑦ. 15 ᔫᑎᐅᖏᑦᑐᑦ ᒎᑎᓐᖑᐊᖏᑦ ᓯᐅᓪᕕᕆᐅᕗᑦ ᒎᓘᓪᓗᑎᒡᓗ, ᐃᓅᖃᑎᒌᒡᔪᐊᑦ ᐊᒡᒐᖏᓐᓄᑦ ᓴᓇᔭᐅᓯᒪᓪᓗᑎᒃ. 16 ᖃᓂᖃᕋᓗᐊᕐᐳᑦ, ᐅᖃᕈᓐᓇᕋᑎᒡᓕ, ᐃᔨᖃᕐᐳᑦ, ᑕᑯᔪᓐᓇᕋᑎᒡᓕ, 17 ᓯᐅᑎᖃᕐᐳᑦ, ᑐᓴᕈᓐᓇᕋᑎᒡᓕ, ᐊᓂᕐᓵᕐᑐᕈᓐᓇᕋᑎᒡᓗ ᖃᓂᕐᒥᒃᑎᒍᑦ. 18 ᑖᒃᑯᓂᖓ ᓴᓇᓚᐅᕐᑐᑦ ᐊᑦᔨᖃᓚᐅᕐᓕᑦ ᓴᓇᓯᒪᔭᒥᖕᓂᒃ! ᐄᓛᒃ, ᑖᒃᑯᓂᖓ ᑕᑎᖃᕐᑐᓕᒫᑦ ᑍᒤᓚᐅᕐᓕᑦ! 19 ᐃᓴᕆᐊᓕᒥᐅᑕᐅᔪᓯ, ᐊᑕᓂᖅ ᓂᕐᑐᕐᓯᐅᒃ! ᐂᕉᓂᒥᐅᑕᐅᔪᓯ, ᐊᑕᓂᖅ ᓂᕐᑐᕐᓯᐅᒃ! 20 ᓕᕔᒃᑯᒥᐅᑕᐅᔪᓯ, ᐊᑕᓂᖅ ᓂᕐᑐᕐᓯᐅᒃ! ᐊᑕᓂᕐᒥᒃ ᓯᕘᕋᔪᓯ, ᐊᑕᓂᖅ ᓂᕐᑐᕐᓯᐅᒃ! 21 ᐊᑕᓂᖅ ᓂᕐᑐᕐᑕᐅᓕ ᓮᐅᓂᒥᑦ, ᑖᓐᓇ ᔨᕉᓴᓕᒥ ᐃᓂᖃᕐᑐᖅ! ᐊᑕᓂᖅ ᓂᕐᑐᕐᓯᐅᒃ! |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society