ᐃᓐᖏᕈᑎᑦ 132 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᑉ ᓂᕐᑐᕐᓇᕐᑎᑕᐅᓂᖓ

ᐃᓐᖏᕈᓯᖅ ᖁᒻᒧᑦ ᑕᑯᓴᕐᓂᕐᒧᑦ

¹ ᐊᑕᓃᖅ, ᑍᕕᑎ ᐃᖅᑲᐅᒪᒍᒃ, ᐅᖁᒤᑦᑐᒃᑰᕐᓂᕆᓚᐅᕐᑕᓕᒫᖏᓪᓗ;

² ᐊᑕᓂᕐᒧᑦ ᐊᖏᓚᐅᕐᒪᑦ, ᐅᖃᕐᓗᓂᓗ ᐊᔪᒐᖃᖏᑦᑐᕐᔪᐊᒧᑦ ᔧᑰᑉ ᒎᑎᖓᓄᑦ:

³ “ᐊᖏᕐᕋᓐᓄᑦ ᐃᑎᕐᓂᐊᓐᖏᓚᖓ, ᐃᒡᓕᓐᓄᓪᓘᓐᓃᑦ ᓇᓪᓚᕆᐊᕐᑐᕐᓂᐊᓐᖏᓚᖓ;

⁴ ᓯᓂᖕᓂᐊᓐᖏᓚᖓ, ᓯᑯᓐᖏᕐᓂᐊᕐᓇᖓᓘᓐᓃᑦ,

⁵ ᐊᑕᓂᐅᑉ ᐃᓂᒃᓴᖓᓂᒃ ᓇᓂᓯᓚᐅᖅᑳᕐᓇᖓ, ᐊᖏᕐᕋᒃᓴᐅᓂᐊᕐᑐᒥᒃ ᐊᔪᒐᖃᖏᑦᑐᕐᔪᐊᒧᑦ ᔧᑰᑉ ᒎᑎᖓᓄᑦ.”

⁶ ᑕᑯᒋᑦ, ᑐᓴᓚᐅᕐᐸᕗᑦ ᐃᐸᕋᑕᒦᑦᑐᖅ; ᓇᒡᕚᓚᐅᕐᐸᕗᓪᓗ ᓇᐹᕐᑐᓂ ᔮᕆᒥᒥ.

⁷ ᑕᕝᕙ ᐅᖃᓚᐅᕐᐳᒍᑦ, “ᐊᖏᕐᕋᖓᓄᐊᓚᐅᕐᑕ; ᑐᒃᓯᐊᓚᐅᕐᑕ ᑖᑦᓱᒪ ᐃᑎᒐᖏᑕ ᐃᑯᕐᕋᖓᓂ.”

⁸ ᐊᑕᓃᖅ ᒪᑭᓪᓗᑎᑦ, ᑕᕾᕐᓯᕐᕕᖕᓄᐊᓕᕆᑦ, ᐃᕝᕕᑦ ᐱᔪᓐᓇᕐᓂᕕᓪᓗ ᓇᓗᓁᒃᑯᑕᖓᑕ ᐃᒃᓯᕐᕕᖁᑎᖓ.

⁹ ᑐᓂᕐᕈᓯᕐᑎᑦᓯᔨᖁᑎᑎᑦ ᐊᓐᓄᕌᕐᓯᒪᓚᐅᕐᓕ ᓇᓛᒎᕐᓂᕐᒥᒃ, ᐃᑦᔪᕐᓁᑦᑐᖁᑎᑎᓪᓗ ᖁᕕᐊᓱᖕᓂᕐᒧᑦ ᕾᒐᓛᓗᑎᒃ.

¹⁰ ᐱᔩᑦ ᑍᕕᑎ ᐱᑦᔪᑎᒋᓗᒍ, ᐅᕐᓱᕐᑎᕐᓯᒪᔭᕕᑦ ᑮᓇᖓ ᐊᓚᕐᓂᐊᕐᓇᒍ.

¹¹ ᐊᑕᓂᖅ ᓱᓕᒻᒪᕆᒃᓗᓂ ᐊᖏᒻᒪᕆᓚᐅᕐᐳᖅ ᑍᕕᑎᒧᑦ; ᑕᒪᓐᓇᓗ ᓴᖑᓂᐊᕈᓐᓃᕐᓗᓂᐅᒃ: “ᐃᒃᓯᕙᐅᑕᕐᔪᐊᕐᓄᑦ ᑎᒥᕕᑦ ᐱᕈᕐᑎᑕᖓᓂᒃ ᐃᖏᑎᑦᓯᔪᒫᕐᐳᖓ.

¹² ᕿᑐᕐᖓᕕᑦ ᐊᖏᖃᑎᒌᒍᑎᒋᓯᒪᔭᕋ ᓈᓚᖕᓂᐊᕐᐸᑦᔪᒃ ᐅᓐᓂᕐᓯᐅᕈᑎᒋᓯᒪᔭᒃᑲᓗ ᑖᒃᑯᓄᖓ ᐊᔪᕆᕐᑐᐃᑦᔪᑎᒋᓛᕐᑕᒃᑲ, ᕿᑐᕐᖓᖏᑦᑕᐅᖅ ᐃᒃᓯᕙᐅᑕᕐᔪᐊᕐᓂ ᐃᒃᓯᕙᔪᒫᕐᐳᑦ ᐃᓱᖃᖏᑦᑐᒧᑦ.”

¹³ ᐊᑕᓂᐅᑉ ᓮᐅᓂ ᓂᕈᐊᕐᓯᒪᖕᒪᒍ; ᑖᓐᓇᓗ ᐃᓂᒃᓴᕆᔪᒪᓯᒪᕚ:

¹⁴ “ᑕᕝᕙᓂ ᑕᕾᕐᓯᕐᕕᖃᕈᒪᕗᖓ ᐃᓱᖃᖏᑦᑐᒧᑦ; ᑕᕝᕙᓂ ᐃᓂᖃᕐᓂᐊᕐᐳᖓ, ᐱᔪᒪᓯᒪᒐᒃᑯ.

¹⁵ ᓮᒻᒪᕐᑎᑉᐸᓪᓕᐊᖏᓐᓇᕐᓂᐊᕐᐸᕋ ᓂᕿᒃᓴᖏᓐᓂᒃ ᑐᓂᓯᕕᒋᓗᒍ; ᐊᒃᓗᔪᖁᑎᖏᑦ ᓈᒻᒪᒃᓯᑎᓐᓂᐊᕐᐸᒃᑲ ᓂᕿᒃᓴᖃᕐᑎᓪᓗᒋᑦ.

¹⁶ ᑐᓂᕐᕈᓯᕐᑎᑦᓯᔨᖏᑦ ᐊᓐᓄᕌᕐᑎᓐᓂᐊᕐᐸᒃᑲ ᐱᐅᓕᔭᐅᓂᕐᒥᒃ, ᐃᑦᔪᕐᓁᑦᑐᖁᑎᖏᓪᓗ ᖁᕕᐊᓱᖕᓂᕐᒧᑦ ᕾᒐᓛᕐᓂᐊᕐᐳᑦ.

¹⁷ ᑕᕝᕙᓂ ᑍᕕᑎᐅᑉ ᓇᒡᔪᖓ ᒪᑭᑎᓐᓂᐊᕐᐸᕋ; ᐅᕐᓱᕐᑎᕐᓯᒪᔭᕋ ᐊᑐᐃᓐᓇᕈᐃᕕᒋᓯᒪᕙᕋ ᓇᓂᕈᐊᕐᒥᒃ.

¹⁸ ᑖᑦᓱᒪ ᐊᑭᕋᕐᑐᕐᑎᖏᑦ ᑲᓐᖑᓱᒃᑎᑕᐅᓂᕐᒥᒃ ᐊᓐᓄᕌᕐᑎᓐᓂᐊᕐᐸᒃᑲ, ᓂᐊᖂᑎᖓᓗ ᐊᖓᔪᖅᑳᕐᔪᐊᕐᓯᐅᑦ ᐊᖏᒡᓕᕙᓪᓕᐊᓂᐊᕐᐳᖅ.”