ᐃᓐᖏᕈᑎᑦ 118 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᒥᒃ ᓂᕐᑐᐃᓂᖅ ᓂᑲᒍᓱᖕᓂᖓ ᐃᓱᖃᖏᑦᑐᖅ ᐱᓪᓗᒍ 1 ᐊᑕᓂᖅ ᖁᔭᒋᓯᐅᒃ, ᐱᐅᔫᖕᒪᑦ; ᑖᑦᓱᒪᓗ ᓇᒡᓕᒍᓱᖕᓂᖓ ᓱᖁᓯᔪᐃᑦᑑᓪᓗᓂ ᐃᓱᖃᖏᑦᑐᒧᑦ. 2 ᐃᓴᕆᐊᓕᑎᒃᑯᑦ ᒫᓐᓇ ᐅᖃᕐᓕᑦ, “ᑖᑦᓱᒪ ᓇᒡᓕᒍᓱᖕᓂᖓ ᓱᖁᓯᔪᐃᑦᑑᓪᓗᓂ ᐃᓱᖃᖏᑦᑐᒧᑦ.” 3 ᐂᕉᓂᒃᑯᑦ ᑭᖑᕚᖏᑦ ᒫᓐᓇ ᐅᖃᕐᓕᑦ, “ᑖᑦᓱᒪ ᓇᒡᓕᒍᓱᖕᓂᖓ ᓱᖁᓯᔪᐃᑦᑑᓪᓗᓂ ᐃᓱᖃᖏᑦᑐᒧᑦ.” 4 ᐊᑕᓂᕐᒥᒃ ᓯᕘᕋᔪᑦ ᒫᓐᓇ ᐅᖃᕐᓕᑦ, “ᑖᑦᓱᒪ ᓇᒡᓕᒍᓱᖕᓂᖓ ᓱᖁᓯᔪᐃᑦᑑᓪᓗᓂ ᐃᓱᖃᖏᑦᑐᒧᑦ.” 5 ᐊᒃᓱᕈᕕᒃᔪᐊᓕᕐᑎᓪᓗᖓ ᐊᑕᓂᖅ ᓂᓪᓕᐊᕕᒋᓚᐅᕐᐸᕋ: ᑕᕝᕙ ᐊᑕᓂᐅᑉ ᑭᐅᓚᐅᕐᐹᖓ ᕿᓚᕈᑦᔮᕐᓗᓂᖓᓗ. 6 ᐊᑕᓂᖅ ᓴᓂᓐᓃᒻᒪᑦ ᐃᕐᓯᓂᐊᓐᖏᓚᖓ; ᖃᓄᖅ ᐃᓄᖕᓄᑦ ᐱᓂᐊᕐᕕᐅᔪᓐᓇᕐᐳᖔ? 7 ᐊᑕᓂᐅᑉ ᐱᓇᓱᐊᖃᑎᒋᕚᖓ ᐃᑲᔪᕐᓱᓂᖓ; ᑍᒤᒻᒪᑦ ᑕᑯᓂᐊᕐᐳᖓ ᐆᒥᒋᔨᒪ ᓵᓚᐅᓂᖏᓐᓂᒃ. 8 ᐱᐅᓂᕐᓴᐅᕗᖅ ᐊᑕᓂᖅ ᑕᑎᒋᓗᒍ ᐃᓄᖕᒥᒃ ᐃᑲᔪᕐᑎᖃᕋᓱᖕᓂᕐᒥᑦ. 9 ᐱᐅᓂᕐᓴᐅᕗᖅ ᐊᑕᓂᖅ ᑕᑎᒋᓗᒍ ᐊᖓᔪᖅᑳᕐᔪᐊᓂᒃ ᐃᑲᔪᕐᑎᖃᕋᓱᖕᓂᕐᒥᑦ. 10 ᐃᓅᖃᑎᒌᒡᔪᐊᓕᒫᓄᑦ ᐊᕙᓗᔭᐅᓯᒪᕗᖓ; ᐊᑕᓂᐅᓪᓕ ᐊᑎᖓᓂ ᓇᑲᑎᕐᓗᒋᑦ ᐲᔭᕐᓂᐊᕐᐸᒃᑲ! 11 ᑖᒃᑯᓄᖓ ᐊᕙᓗᔭᐅᓯᒪᕗᖓ, ᐄᓛᒃ ᐊᕙᑎᓕᒫᓐᓂᑦ ᐊᕙᓗᔭᐅᓯᒪᕗᖓ; ᐊᑕᓂᐅᓪᓕ ᐊᑎᖓᓂ ᓇᑲᑎᕐᓗᒋᑦ ᐲᔭᕐᓂᐊᕐᐸᒃᑲ! 12 ᑖᒃᑯᓄᖓ ᐊᕙᓗᔭᐅᓯᒪᕗᖓ ᓲᕐᓗ ᐃᒍᑦᓴᑎᑐᑦ; ᐃᑯᐊᓪᓚᕆᒃᐳᑦ ᐅᕐᐱᒐᕐᑎᑐᑦ ᐃᑯᐊᓚᔪᑎᑐᑦ; ᐊᑕᓂᐅᓪᓕ ᐊᑎᖓᓂ ᓇᑲᑎᕐᓗᒋᑦ ᐲᔭᕐᓂᐊᕐᐸᒃᑲ! 13 ᓂᑲᒋᔭᐅᓇᖓ ᐊᔭᒃᑕᐅᓚᐅᕐᐳᖓ, ᐅᕐᕈᑎᑕᐅᓪᓗᖓ, ᐊᑕᓂᐅᓪᓕ ᐃᑲᔪᓚᐅᕐᐹᖓ. 14 ᐊᑕᓂᖅ ᐱᔪᓐᓇᐅᑎᒋᕙᕋ ᐃᓐᖏᕈᑎᒋᓪᓗᒍᓗ, ᐱᐅᓕᔨᑖᕆᓚᐅᕐᐸᕋᓗ. 15 ᖁᕕᐊᓱᒡᓗᑎᒃ ᐃᓐᖏᕐᓃᑦ ᓵᓚᖃᕐᑐᕐᓯᐅᑎᓂᒃ ᓇᓛᒎᕐᑐᑦ ᑐᐱᖓᓃᑉᐳᑦ ᑐᒃᓯᐊᕐᕕᖓᓐᓂ; “ᐊᑕᓂᐅᑉ ᑕᓕᕐᐱᐊᑕ ᐱᔪᓐᓇᕐᓂᖓ ᓵᓚᖃᑦᓮᓐᓇᕐᐳᖅ, 16 ᐊᑕᓂᐅᑉ ᑕᓕᕐᐱᐊᑕ ᐱᔪᓐᓇᕐᓂᖓ ᐊᖏᔪᕈᕐᑎᑕᐅᓕ, ᐊᑕᓂᐅᑉ ᑕᓕᕐᐱᐊᑕ ᐱᔪᓐᓇᕐᓂᖓ ᓵᓚᖃᑦᓮᓐᓇᕐᐳᖅ!” 17 ᑐᖁᓂᐊᓐᖏᓚᖓ, ᐃᓅᓂᐊᕐᐳᖓᓕ, ᐊᑕᓂᐅᓪᓗ ᐱᓇᓱᐊᕐᓂᖓ ᐅᖃᐅᓯᕆᓂᐊᕐᐸᕋ. 18 ᐊᑕᓂᐅᑉ ᐋᖅᑭᓱᓚᐅᕐᐹᖓ ᓂᑲᒋᓇᓂᖓ, ᑭᓯᐊᓂᓕ ᑐᖁᒧᑦ ᑐᓂᓚᐅᓐᖏᓛᖓ. 19 ᓇᓛᒎᕐᑐᑦ ᐅᑯᐊᕐᔪᐊᖓᓂᒃ ᐅᒃᑯᐃᕈᑎᓚᐅᓐᖓ, ᑕᕝᕗᖓ ᐃᑎᕐᓗᖓ, ᐊᑕᓂᖅ ᓂᕐᑐᕐᓂᐊᕋᒃᑯ. 20 ᑖᓐᓇ ᐊᑕᓂᐅᑉ ᐃᑎᕐᑕᕐᕕᖁᑎᒋᖕᒪᒍ, ᓇᓛᒎᕐᑐᑦ ᑕᕝᕘᓇ ᐃᑎᕐᓂᐊᕐᐳᑦ. 21 ᖁᔭᒋᓂᐊᕐᐸᒋᑦ ᑭᐅᓚᐅᕋᕕᖓ, ᐱᐅᓕᔭᐅᕕᒃᓴᕆᓕᕐᓱᑎᓪᓗ. 22 ᐅᔭᕋᒃ ᐃᒡᓗᓕᐅᕐᑎᓂᑦ ᓇᕐᕈᒋᔭᐅᔪᖅ ᑖᓐᓇ ᐱᒋᐊᕐᕕᐅᓕᕐᐳᖅ ᑐᓐᖓᕕᒋᔭᐅᔪᒧᑦ. 23 ᑕᒪᓐᓇ ᐊᑕᓂᐅᑉ ᐱᓂᐊᕐᓂᕆᕚ; ᑲᒪᓇᕐᑐᐊᓘᕗᕐᓗ ᑕᑯᓐᓇᕐᑕᑦᑎᒍᑦ. 24 ᐅᓪᓗᖅ ᑖᓐᓇ ᐊᑕᓂᐅᑉ ᓴᓇᕚ; ᓂᕐᑐᐃᓗᑕ ᖁᕕᐊᓲᑎᒋᓕᕐᓚᕗᑦ. 25 ᐱᐅᓕᓚᐅᕐᑎᒍᑦ, ᕿᓄᕕᒋᕙᑦᑎᒋᑦ ᐊᑕᓃᖅ! ᐊᑕᓃᖅ, ᕿᓄᕕᒋᕙᑦᑎᒋᑦ, ᒫᓐᓇ ᐊᔪᕐᓴᕈᓐᓃᕐᑎᓕᕐᑎᒍᑦ! 26 ᓂᕐᑐᕐᑕᐅᓕ ᐊᑕᓂᐅᑉ ᐊᑎᖓᓂ ᐃᑎᕐᑐᖅ! ᐊᑕᓂᐅᑉ ᐃᒡᓗᖓᓂᑦ ᐱᓗᑕ ᓮᒻᒪᕐᑕᐅᖁᕙᑦᑎᒋᑦ. 27 ᐊᑕᓂᖅ ᒎᑎᐅᕗᖅ, ᑖᑦᓱᒪ ᖃᐅᒪᔪᒥᒃ ᑕᑯᑎᑉᐹᑎᒍᑦ: ᓇᓪᓕᐅᓐᓂᕐᓯᐅᕆᐊᕐᑐᕐᑐᑦ ᓇᐹᕐᑑᑉ ᐊᕙᓚᖓᔪᖏᓐᓂᒃ ᑎᒍᓯᓗᓯ ᐃᓚᒋᓕᕐᓯᐅᒃ, ᑐᓂᕐᕈᓯᕐᕕᐅᑉ ᓇᒡᔪᖏᑦ ᑎᑭᓪᓗᒋᑦ. 28 ᐃᕝᕕᑦ ᒎᑎᒋᕙᒋᑦ, ᖁᔭᒋᓂᐊᕐᐸᒋᓪᓗ; ᐃᕝᕕᑦ ᒎᑎᒋᕙᒋᑦ, ᐊᖏᔪᕈᕐᑎᓐᓂᐊᕐᐸᒋᓪᓗ. 29 ᐊᑕᓂᖅ ᖁᔭᒋᓯᐅᒃ, ᑖᓐᓇ ᐱᐅᔫᖕᒪᑦ; ᑖᑦᓱᒪᓗ ᓇᒡᓕᖕᓂᖓ ᓱᖁᓯᔪᐃᑦᑑᕗᖅ ᐃᓱᖃᖏᑦᑐᒧᑦ! |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society