ᐃᓐᖏᕈᑎᑦ 106 - ᐊᒡᓔᑦ ᐃᑦᔪᕐᖕᓁᑦᑐᑦᐃᓴᕆᐊᓕᒥᐅᑦ ᐊᔪᕐᓂᕐᒥᓂᒃ ᐃᓱᒪᒋᔪᓐᓁᕐᕕᐅᓂᖓᑕ ᖁᕕᐊᓇᕐᓂᖓ 1 ᐊᑕᓂᖅ ᓂᕐᑐᕐᓯᐅᒃ! ᐊᑕᓂᖅ ᖁᔭᒋᓯᐅᒃ, ᐱᐅᔫᖕᒪᑦ; ᓇᒡᓕᖕᓂᖓ ᓱᕐᕋᔪᐃᑦᑑᖕᒪᑦ ᐃᓱᖃᖏᑦᑐᒧᑦ. 2 ᑭᐊ ᐊᑕᓂᐅᑉ ᐱᓂᐊᕐᓂᕐᔪᐊᖏᑦ ᐊᑕᖏᕐᓗᒋᑦ ᐅᖃᐅᑎᒋᔪᓐᓇᕐᐰᑦ? ᑖᑦᓱᒪᓗ ᓂᕐᑐᕐᑕᐅᔪᒃᓴᐅᓂᖓ ᐊᑕᖏᕐᓗᒍ ᑭᐊ ᓴᖅᑭᑎᑦᓱᓐᓇᕐᐸᐅᒃ? 3 ᖁᕕᐊᓱᒍᑎᒃᓴᖃᕐᐳᑦ ᐊᑦᔨᒌᒃᑎᑦᓯᔪᑦ, ᓈᒻᒪᓈᕐᑐᒥᒃᓗ ᑍᒪᓐᖓᑦ ᐱᓇᓱᐊᖃᑦᑕᕐᑐᖅ! 4 ᐊᑕᓃᖅ ᐃᖅᑲᐅᒪᓐᖓ ᐃᓄᖁᑎᖕᓄᑦ ᓮᒻᒪᕐᕕᖃᕐᓃᑦ ᒪᓕᒡᓗᒍ: ᓴᐳᑎᓕᕈᕕᒋᑦ ᐱᖃᓯᐅᑎᓂᐊᕐᐸᕐᒪ; 5 ᑕᑯᔪᓐᓇᖁᓪᓗᖓ ᓂᕈᐊᕐᓯᒪᔭᕐᐱᑦ ᖃᑭᕙᓪᓕᐊᓂᖏᓐᓂᒃ, ᐃᓅᖃᑎᒌᒡᔪᐊᖁᑎᕕᑦ ᖁᕕᐊᓱᓕᕐᓂᖏᓐᓄᑦ ᖁᕕᐊᓱᖃᑕᐅᔪᓐᓇᖁᓪᓗᖓ, ᓂᕐᑐᐃᖃᑕᐅᔪᓐᓇᖁᓪᓗᖓ ᑭᖑᕐᖑᔨᔪᖁᑎᑎᑦ ᐃᓚᒋᓗᒋᑦ. 6 ᐊᔪᕐᑐᓕᓚᐅᕐᐳᒍᑦ ᓯᕗᓕᕆᓚᐅᕐᑕᕗᑦ ᐃᓚᒋᓪᓗᒋᑦ; ᓈᒻᒪᖏᑦᑐᓕᒻᒪᕆᒃᓯᒪᕗᒍᑦ, ᐱᐅᖏᑦᑐᓕᓯᒪᓪᓗᑕᓗ. 7 ᓯᕗᓕᕆᓚᐅᕐᑕᕗᑦ ᑐᑭᓯᓚᐅᓐᖏᓚᑦ ᐄᑦᔨᑉᑎᒥ ᑲᒪᓇᕐᑐᓕᓂᕆᓚᐅᕐᑕᕐᓂᒃ; ᐃᖅᑲᐅᒪᓚᐅᓐᖏᓚᑦ ᓇᒡᓕᒍᓱᖕᓂᕐᓄᑦ ᐱᓂᐊᕐᓂᕆᖃᑦᑕᓚᐅᕐᑕᕐᓂᒃ; ᐊᑭᕋᕐᑐᓚᐅᕐᐳᓪᓕ ᖁᑦᓯᖕᓂᕐᐹᖑᔪᒥᒃ ᐃᒪᕐᒥ ᐊᐅᐸᓗᒃᑕᒥ. 8 ᓱᓕᓕ ᐱᐅᓕᓚᐅᕐᐰᑦ ᐊᑎᓂ ᐱᑦᔪᑎᒋᓪᓗᒍ, ᐱᔪᓐᓇᕐᓂᕐᔪᐊᓂ ᖃᐅᔨᔭᐅᑎᑦᓱᒪᓪᓗᒍ. 9 ᐃᒪᖅ ᐊᐅᐸᓗᒃᑕᖅ ᐅᖃᐅᑎᖕᒪᒍ, ᑕᕝᕙ ᐃᒤᕈᑎᕗᖅ; ᑕᓯᐅᓚᐅᕐᐰᑦ ᐃᑎᔪᕐᔪᐊᒃᑯᑦ, ᓲᕐᓗ ᓄᓇᒃᑯᑦ ᓴᓗᐊᒪᔪᒃᑯᑦ. 10 ᐱᐅᓕᓚᐅᕐᐰᑦ ᐆᒥᒋᔨᖏᑕ ᐱᓇᓱᐊᕐᓂᖏᓐᓂᑦ, ᓴᐳᑎᓪᓗᒋᓪᓗ ᐊᑭᕋᕐᑐᕐᑎᖏᑕ ᐱᔪᓐᓇᕐᓂᖏᓐᓂᑦ. 11 ᐃᒪᕐᔪᐊᓪᓗ ᐅᓕᓚᐅᕐᐰᑦ ᐊᑭᕋᕐᑐᕐᑎᖏᑦ: ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᑕᖃᓚᐅᓐᖏᓚᖅ. 12 ᑕᕝᕙ ᑖᑦᓱᒪ ᐅᖃᐅᓯᖏᑦ ᐅᒃᐱᕆᓕᕐᐰᑦ; ᐃᓐᖏᕐᓯᓚᐅᕐᐳᑦ ᑖᑦᓱᒥᖓ ᓂᕐᑐᐃᓕᕐᓗᑎᒃ. 13 ᑖᑦᓱᒪᓕ ᐱᓂᐊᕐᓂᖏᑦ ᐳᐃᒍᑦᓴᐅᑎᒋᓚᐅᕆᕔᑦ; ᐱᓇᓱᐊᓕᓚᐅᕆᕗᑦ ᑖᑦᓱᒥᖓ ᖃᐅᔨᒋᐊᕐᕕᖃᓚᐅᕋᑎᒃ. 14 ᐊᖏᔪᕐᔪᐊᒥᒡᓕ ᐃᒃᓯᒎᕐᓂᖃᓕᓚᐅᕐᐳᑦ ᐃᓄᖃᖏᑦᑐᒥ, ᒎᑎᓗ ᐆᒃᑐᓚᐅᕐᐹᑦ ᓱᓇᖃᔪᐃᑦᑐᒥ. 15 ᑖᑦᓱᒪᓗ ᑐᓂᓯᕕᒋᓚᐅᕐᐰᑦ ᐱᔪᒪᔭᖏᓐᓂᒃ; ᖃᓂᒻᒪᓯᕐᒥᒡᓗ ᓴᓗᒃᑎᓐᓇᕐᑐᒥᒃ ᑎᑭᑕᐅᑎᓪᓗᒋᑦ. 16 ᒨᓯᓯᒥᒃ ᓯᒡᒐᑦᔨᓚᐅᕐᐳᑦ ᐃᓄᖃᖏᑦᑐᒥ ᑕᖕᒫᕐᓯᒪᓪᓗᑎᒃ, ᐂᕉᓂᒥᒡᓗ ᐊᑕᓂᐅᑉ ᐃᑦᔪᕐᓁᑦᑐᖁᑎᖓᓂᒃ. 17 ᓄᓇ ᒪᒃᐱᕐᓗᓂ ᐄᓯᓚᐅᕐᐳᖅ ᑖᑕᓐᒥᒃ, ᓴᐅᔭᐅᓪᓗᑎᒡᓗ ᐃᐱᕋᒻ ᐃᓚᒋᔭᖏᓪᓗ. 18 ᐃᑯᒪᑦᑕᐅᖅ ᐃᑯᐊᓪᓔᓚᐅᕐᐳᖅ ᐃᓚᒋᔭᖏᓐᓂᒃ; ᐃᑯᒪᐅᑉ ᐆᓚᐅᕐᐰᑦ ᐱᐅᖏᑦᑐᑦ. 19 ᓄᕐᕋᓐᖑᐊᒥᒃ ᓴᓇᓚᐅᕐᐳᑦ ᓄᓇᒥ ᕼᐆᕆᑉᒥ, ᑐᒃᓯᐊᕐᕕᒋᓚᐅᕐᐹᓪᓗ ᐊᐅᒪᑎᓪᓗᒍ ᑯᕕᔭᐅᓯᒪᔪᖅ. 20 ᒎᑎᐅᓪᓗ ᓂᕐᑐᕐᓇᕐᓂᕐᔪᐊᖓ ᐃᓇᖏᕐᑕᐅᑎᓚᐅᕐᐹᑦ ᐃᒻᒧᒃᓯᐅᒐᐅᑉ ᐸᖕᓂᖓᑕ ᐊᑦᔨᓐᖑᐊᖓᓄᑦ ᐃᕕᒐᕐᓂᒃ ᓂᕆᖃᑦᑕᕐᑐᒧᑦ. 21 ᒎᑎ ᐱᐅᓕᔨᒋᓚᐅᕐᑕᑎᒃ ᐳᐃᒍᓚᐅᕐᐹᑦ, ᐊᖏᔪᕐᔪᐊᕌᓗᖕᒥᒃ ᐄᑦᔨᑉᑎᒥ ᐱᓇᓱᐊᓚᐅᕐᑐᖅ. 22 ᑲᒪᓇᕐᑐᐊᓗᖕᓂᒃ ᐱᓕᕆᓚᐅᕐᒪᑦ ᓄᓇᒥ ᕼᐋᒥᒥ, ᓯᕘᕋᓕᕐᓇᕐᑐᓂᒡᓗ ᐊᐅᓚᑦᓯᓚᐅᕐᐳᖅ ᐃᒪᕐᒥ ᐊᐅᐸᓗᒃᑕᒥ. 23 ᑍᒤᒻᒪᑦ ᐅᖃᓚᐅᕐᐳᖅ ᑖᒃᑯᓂᖓ ᓄᖒᑦᓯᔪᒪᓕᕐᓗᓂ, ᓂᕈᐊᕐᓯᒪᔭᖓᓕ ᒨᓯᓯ ᒎᑎᐅᑉ ᓵᖓᓂ ᓂᑯᕕᓚᐅᕐᐳᖅ, ᓂᓐᖓᐅᒪᓂᖓ ᓴᖑᑎᓪᓗᓂᐅᒃ, ᓄᖒᑦᓯᖁᓇᒍ ᑖᒃᑯᓂᖓ. 24 ᑕᕝᕙ ᓄᓇᑦᓯᐊᕚᓗᒃ ᓇᕐᕈᒋᓕᓚᐅᕆᕚᑦ, ᐊᖏᕈᑎᒋᓚᐅᕐᑕᖏᑦ ᐅᒃᐱᕆᓚᐅᓐᖏᓐᓇᒥᒋᑦ: 25 ᑐᐱᕐᒥᖕᓃᖏᓐᓇᓚᐅᕐᐳᑦ ᓈᒻᒪᒃᓴᖏᓐᓂᕐᒧᑦ ᐅᖃᓗᕿᓪᓗᑎᒃ, ᐊᑕᓂᐅᓪᓗ ᓂᐱᖓᓂᒃ ᓈᓚᓚᐅᓐᖏᓚᑦ. 26 ᑍᒤᒻᒪᑦ ᓵᕝᕕᒋᓚᐅᕐᐰᑦ ᐅᕐᓕᕐᑐᕐᓗᒋᑦ, ᑐᖁᑎᑦᓱᒪᓪᓗᒋᑦ ᐃᓄᖃᖏᑦᑐᒥ, 27 ᑭᖑᕚᖏᑦ ᓯᐊᒻᒪᕐᑎᑦᓱᒪᓪᓗᒋᑦ ᐃᓅᖃᑎᒌᒡᔪᐊᓄᑦ, ᓄᓇᓄᓪᓗ ᓇᒧᑐᐃᓐᓇᖅ ᓯᐊᒻᒪᕐᑎᑦᓱᒪᓪᓗᒋᑦ. 28 ᐃᒻᒥᖕᓂᒃᑕᐅᖅ ᐃᓚᓕᐅᑎᓚᐅᕐᐳᑦ ᐰᓕ-ᐱᐅᕆᒧᑦ, ᓂᕆᓪᓗᑎᒡᓗ ᑐᓂᕐᕈᑕᐅᓯᒪᔪᓂᒃ ᑐᖁᖓᔪᓄᑦ ᒎᑎᓐᖑᐊᓄᑦ. 29 ᑍᒤᓕᐅᕐᓂᕐᒥᖕᓄᑦ ᐊᑕᓂᖅ ᓂᓐᖓᒃᓴᓚᐅᕐᐹᑦ: ᐋᓐᓂᐊᓇᕐᑐᕐᔪᐊᓄᓪᓗ ᑲᑉᐱᐊᓇᕐᑐᓄᑦ ᑎᑭᑕᐅᓚᐅᕐᐳᑦ. 30 ᑕᕝᕙ ᐱᓂᕼᐋᓯ ᑎᑭᓐᓇᒥ ᑕᒪᒃᑯᓂᖓ ᓱᒋᐊᕐᓯᕗᖅ: ᑕᕝᕙ ᐋᓐᓂᐊᓇᕐᑐᖅ ᓄᖅᑲᕐᑎᑕᐅᕗᖅ. 31 ᑕᒪᓐᓇᓗ ᐱᓂᕼᐊᓯᒧᑦ ᐱᓂᐊᑦᓯᐊᕐᓂᐅᓂᕋᕐᑕᐅᓚᐅᕐᐳᖅ ᑍᒪᓐᖓᓂᑦ ᑭᖑᕚᕇᒃᐸᓪᓕᐊᔪᓂᑦ ᐃᓱᖃᖏᑦᑐᒧᑦ. 32 ᐃᒪᕐᒥᒃ ᑯᕕᓕᕐᑎᑕᐅᔪᒥ ᒥᕆᐸᒥ ᐊᑕᓂᖅ ᓂᓐᖓᒃᓴᓚᐅᕆᕚᑦ, ᒨᓯᓯ ᐊᑲᐅᓐᖏᓕᐅᕈᑎᖃᓕᓚᐅᕐᐳᖅ ᑖᒃᑯᓄᖓ ᑍᒤᑎᑕᐅᔪᒥᒃ. 33 ᒨᓯᓯ ᓂᓐᖓᒃᑎᑕᐅᓚᐅᕐᒪᑦ ᑖᒃᑯᓄᖓ, ᐅᐸᓗᐃᓂᕐᒧᑦ ᐃᒃᐱᒍᓱᓪᓗᐊᕋᓂ ᐅᖃᑲᒻᒪᓚᐅᕐᐳᖅ. 34 ᐃᓅᖃᑎᒌᒡᔪᐊᑦ ᓄᖑᓚᐅᓐᖏᓔᑦ, ᐊᑕᓂᕐᒧᑦ ᓄᖑᑕᐅᖁᔭᐅᓚᐅᕋᓗᐊᕐᑎᓪᓗᒋᑦ: 35 ᐃᓅᖃᑎᒌᒡᔪᐊᓄᓪᓕ ᐃᓚᓕᐅᑎᓚᐅᕐᐳᑦ ᐂᑉᐸᕐᑖᖃᑦᑕᓕᕐᓗᑎᒃ, ᐃᓕᓐᓂᐊᕐᕕᒋᓗᒋᓪᓗ ᐱᓇᓱᐊᕐᓂᖏᓐᓂᒃ. 36 ᒎᑎᓐᖑᐊᖏᓐᓄᑦ ᑐᒃᓯᐊᖃᑕᐅᖃᑦᑕᓕᓚᐅᕐᐳᑦ: ᑕᒪᑐᒧᖓᓗ ᑕᕝᕙ ᓂᒐᕐᑎᑕᐅᑦᔪᑎᖃᓚᐅᕐᐳᑦ. 37 ᐃᕐᓂᑎᒃ ᐸᓂᑎᒡᓗ ᑐᓂᕐᕈᓯᕈᑎᒋᓚᐅᕐᐰᑦ ᐊᓂᕐᓂᕐᓗᖕᓄᑦ ᓵᑖᓇᓯᓄᑦ, 38 ᐸᓯᔭᒃᓴᐅᖏᑦᑐᒥᒃ ᐊᐅᖕᒥᒃ ᑯᕕᓯᓚᐅᕐᐳᑦ, ᐊᒡᓛᑦ ᐃᕐᓂᖏᑦᑕ ᐸᓂᖏᑦᑕᓗ ᐊᐅᖏᓐᓂᒃ, ᑐᓂᕐᕈᓯᖃᑦᑕᓕᓚᐅᕐᒪᑕ ᑬᓇᓂᒥᐅᑦ ᒎᑎᓐᖑᐊᖏᓐᓄᑦ: ᓄᓇᓗ ᓇᕐᕈᓇᕐᓯᑎᑕᐅᓚᐅᕐᐳᖅ ᐊᐅᖕᒧᑦ. 39 ᐃᒻᒥᖕᓂᒃ ᐱᓂᐊᕐᓂᕐᒥᖕᓄᑦ ᓴᓗᒪᔪᓐᓃᕐᑎᓚᐅᕐᐳᑦ, ᐊᓯᓐᓂᐊᓚᐅᕐᐳᓪᓗ ᓇᖕᒥᓂᖅ ᐱᓂᐊᕐᓂᕐᒥᒍᑦ. 40 ᑍᒤᒻᒪᑦ ᐊᑕᓂᐅᑉ ᓂᓐᖓᓂᖓ ᐱᒋᐊᓯᓚᐅᕐᐳᖅ ᐃᓄᖁᑎᒥᓄᑦ, ᓇᕐᕈᒋᓕᕐᓗᒋᓪᓗ ᓇᖕᒥᓂᖅ ᑭᖑᕐᖑᑦᔨᔨᖁᑎᒋᔭᓂ. 41 ᐃᓅᖃᑎᒌᒡᔪᐊᑦ ᐱᔪᓐᓇᕐᓂᖏᓐᓄᑦ ᑐᓂᓚᐅᕐᐰᑦ; ᐆᒥᒋᔨᖏᑕᓗ ᐊᐅᓚᓕᕐᓗᒋᑦ. 42 ᐆᒥᒋᔨᖏᑕᓗ ᐅᖁᒤᒃᓴᕐᑎᓚᐅᕐᐰᑦ, ᐱᔪᓐᓇᕐᓂᖏᓐᓄᑦ ᑐᓂᔭᐅᓯᒪᓕᕐᒪᑕ. 43 ᐅᓄᕐᑐᐃᓱᕐᓗᒋᑦ ᓴᐳᑎᖃᑦᑕᓚᐅᕐᐰᑦ; ᑭᓯᐊᓂᓕ ᐱᓂᐊᕐᓂᕐᒥᒍᑦ ᐊᑭᕋᕐᑐᖃᑦᑕᓚᐅᕐᐳᑦ ᑖᑦᓱᒥᖓ, ᐱᐅᖏᑦᑐᓕᐅᕐᓂᕐᒥᖕᓄᑦ ᓴᓐᖐᓕᑎᑕᐅᖃᑦᑕᓚᐅᕐᐳᑦ. 44 ᑭᓯᐊᓂᓕ ᐅᖁᒤᒃᓴᕐᓂᖏᑦ ᐃᒃᐱᒋᕔᑦ, ᑐᒃᓯᐊᕐᓂᖏᑦ ᑐᓴᕋᒥᒋᑦ: 45 ᑖᒃᑯᐊ ᐱᑦᔪᑎᒋᓪᓗᒋᑦ ᐊᖏᖃᑎᖃᕐᓯᒪᓂᓂ ᐃᖅᑲᐅᒪᓚᐅᕐᐹ, ᓇᒡᓕᒍᓱᖕᓂᕐᔪᐊᓂ ᐱᑦᔪᑎᒋᓪᓗᒍ ᖃᕿᐊᓕᕐᕕᒋᓚᐅᕐᐰᑦ. 46 ᓂᑲᒋᔭᐅᓕᕐᑎᓚᐅᕐᐰᓪᓗ ᑕᒤᓐᓄᑦ ᓵᓚᐅᓪᓗᑎᒃ ᐊᐅᓪᓚᕈᑦᔨᔨᒋᓚᐅᕐᑕᖏᓐᓄᑦ. 47 ᐱᐅᓕᓚᐅᕐᑎᒍᑦ, ᐊᑕᓃᖅ ᒎᑎᕗᑦ, ᑲᑎᕐᓱᓚᐅᕐᑎᒍᓪᓗ ᐃᓅᖃᑎᒌᒡᔪᐊᑦ ᐊᑯᕐᖓᓐᓂᑦ, ᐊᑎᕐᓂᒃ ᐃᑦᔪᕐᓁᑦᑐᒥᒃ ᖁᔭᓕᑦᔪᑎᖃᓕᖁᓪᓗᑕ, ᓂᕐᑐᐃᓕᖁᓪᓗᑕᓗ ᓂᕐᑐᕐᑕᐅᔪᒃᓴᐅᓃᑦ ᒪᓕᒡᓗᒍ. 48 ᓂᕐᑐᕐᑕᐅᓕ ᐊᑕᓂᖅ ᐃᓴᕆᐊᓕᑎᒃᑯᑦ ᒎᑎᖓᑦ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ: ᐃᓄᓕᒫᓪᓗ ᐅᖃᕐᓕᑦ, “ᐋᒦᓐ!” ᐊᑕᓂᖅ ᓂᕐᑐᕐᑕᐅᓕ! |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society