ᐃᓐᖏᕈᑎᑦ 105 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᐅᑉ ᓱᖁᓯᔪᐃᓐᓂᖓ ᐃᓱᖃᖏᑦᑑᕗᖅ 1 ᐊᑕᓂᖅ ᖁᔭᒋᓯᐅᒃ! ᐊᑎᖓ ᑐᒃᓯᐊᕐᕕᒋᓗᒍ; ᐱᓂᐊᕐᓂᕆᓯᒪᔭᖏᑦ ᐅᖃᐅᓯᐅᓕᑦ ᐃᓄᖕᓄᑦ! 2 ᑖᓐᓇ ᐃᓐᖏᕐᕕᒋᓯᐅᒃ, ᓂᕐᑐᕐᓗᒍ ᐃᓐᖏᕐᕕᒋᓯᐅᒃ; ᑖᑦᓱᒪ ᑲᒪᓇᕐᑐᓕᓂᓕᒫᖏᑦ ᐅᖃᐅᓯᕆᓯᒋᒃ! 3 ᐊᑎᖓ ᐃᑦᔪᕐᓁᑦᑐᖅ ᓂᕐᑐᕐᓇᕐᓯᑎᑕᐅᓕ; ᐆᒻᒪᑎᒥᒍᑦ ᐊᑕᓂᕐᒥᒃ ᕿᓂᕐᑐᑦ ᖁᕕᐊᓱᒡᓕᑦ! 4 ᐊᑕᓂᖅ ᓲᖑᓂᖓᓗ ᕿᓂᕐᓯᐅᒃ, ᑖᑦᓱᒪ ᓇᔫᑎᓂᖓ ᑍᒪᓐᖓᑦ ᕿᓃᓐᓇᕐᓯᐅᒃ! 5 ᑲᒪᓇᕐᑐᓕᓃᑦ ᐱᓂᐊᕐᓂᕆᖃᑦᑕᓚᐅᕐᑕᖏᑦ ᐃᖅᑲᐅᒪᓯᒋᒃ, ᓇᓗᓁᒃᑯᑕᖏᑦ ᐋᖅᑭᒃᓱᐃᓂᕆᖃᑦᑕᓚᐅᕐᑕᖏᓪᓗ ᐅᖃᐅᓯᕐᒥᒍᑦ, 6 ᐃᓕᑦᓯ ᐱᔨᖓᑕ ᐂᑉᕋᕼᐋᒻ ᑭᖑᕚᖏᑦ, ᔧᑰᓪᓗ ᕿᑐᕐᖓᖏᑦ, ᑖᑦᓱᒧᖓ ᓂᕈᐊᕐᑕᐅᓯᒪᔪᑦ! 7 ᑖᓐᓇ ᐊᑕᓂᐅᕗᖅ ᒎᑎᒋᔭᕗᑦ; ᑖᑦᓱᒪ ᑕᒤᓐᓂ ᐋᖅᑭᒃᓱᐃᓂᖓ ᓄᓇᕐᔪᐊᒦᑉᐳᖅ. 8 ᑖᑦᓱᒪ ᐊᖏᖃᑎᖃᕐᓯᒪᓂᓂ ᐃᖅᑲᐅᒪᕚ ᐃᓱᖃᖏᑦᑐᒧᑦ, ᐅᖃᐅᓰᑦ ᐊᖏᕈᑎᒋᓚᐅᕐᑕᓂ ᑭᖑᕚᕆᓄᑦ ᐃᓱᖃᖏᑦᑐᒧᑦ, 9 ᐊᖏᕈᑎᒋᓚᐅᕐᑕᓂ ᐂᑉᕋᕼᐋᒧᑦ, ᓱᓕᓂᐊᕐᓂᕋᕐᓗᓂ ᐊᖏᕈᑎᒋᓚᐅᕐᐹ ᐂᓴᑭᒧᑦ, 10 ᓇᓗᓁᒃᑲᓐᓂᓚᐅᕐᐹ ᔧᑯᒧᑦ ᐊᑐᕐᑕᐅᖁᓯᒪᔭᓂ, ᐃᓴᕆᐊᓕᒧᑦ ᐊᖏᖃᑎᒌᖕᓂᓐᖑᕐᑎᓚᐅᕐᐹ ᐃᓱᖃᖏᑦᑐᒧᑦ, 11 ᐅᖃᐅᑎᓪᓗᒍ, “ᐃᓕᖕᓄᑦ ᓄᓇ ᑬᓇᓂ ᑐᓂᓂᐊᕐᐸᕋ ᑭᖑᕐᖑᑎᔭᒃᓴᕐᓄᑦ ᐱᑖᕆᔭᕆᐊᖃᕐᓯᒪᒐᕕᐅᒃ.” 12 ᐃᓄᒋᐊᒃᑐᕐᔪᐊᖑᓚᐅᕐᑎᓐᓇᒋᑦ ᓱᓕ, ᖃᑦᓰᓐᓇᐅᓚᐅᕐᒪᑕ ᑍᑦᓱᒪᓂ, ᓄᓇᓕᑐᖃᐅᖏᑦᑐᑦ ᓱᓕ ᑕᒫᓂ ᓄᓇᖃᕐᑎᓪᓗᒋᑦ. 13 ᓅᖃᑦᑕᓚᐅᕐᒪᑕ ᐃᓅᖃᑎᒌᒡᔪᐊᓂᑦ ᐃᓅᖃᑎᒌᒡᔪᐊᓄᑦ, ᐊᖓᔪᖅᑳᕐᔪᐊᖃᕐᕕᖕᒥᑦ ᐊᓯᖏᓐᓄᑦ ᐃᓅᖃᑎᒌᒡᔪᐊᑦ ᐊᓯᖏᓐᓄᑦ, 14 ᑖᑦᓱᒪᓕ ᓇᓪᓕᐊᓐᓄᓪᓘᓐᓃᑦ ᐱᑦᓯᐊᓐᖏᑕᐅᖁᓚᐅᓐᖏᓔᑦ; ᐊᖓᔪᖅᑳᕐᔪᐊᑦ ᓱᐊᓚᐅᕐᐰᑦ ᐃᓄᖁᑎᓂ ᐱᓪᓗᒋᑦ, 15 ᐅᖃᕐᓗᓂ, “ᐅᕐᓱᕐᑎᕐᓯᒪᔭᒃᑲ ᐊᒃᑐᕐᓂᐊᕋᓯᒋᒃ, ᐅᖃᕐᑎᒃᑲᓗ ᐋᓐᓂᕐᑕᐅᑦᑍᓕᓕᑦ!” 16 ᐊᒻᒪ ᓄᓇᒧᑦ ᑳᖕᓇᕐᑐᕐᔪᐊᒥᒃ ᑎᑭᑎᑦᓯᓚᐅᕆᕗᖅ, ᓂᐊᖂᔭᒃᓴᓕᒫᑦ ᓄᖑᑎᓚᐅᕐᐰᑦ. 17 ᑖᒃᑯᐊ ᓯᕗᓂᖓᒍᑦ ᐊᖑᑦ ᑎᓕᓚᐅᕐᐹ, ᔫᓯᐱ, ᑖᓐᓇ ᓂᐅᕐᕈᑎᒋᔭᐅᓚᐅᕐᐳᖅ ᓂᐅᕕᐊᒃᓴᐅᖁᓪᓗᒍ. 18 ᐃᑎᒐᖏᑦ ᐊᕐᓵᕐᑑᔭᓄᑦ ᐊᑦᓱᖏᕐᑐᓚᐅᕐᐰᑦ, ᖁᖓᓯᖓᒍᓪᓗ ᐃᐱᕐᓯᒪᕝᕕᖕᒥᒃ ᓴᕕᕋᔭᖕᒥᒃ ᖁᖓᓯᕐᒥᐅᑦᓯᕐᓗᒍ; 19 ᔫᓯᐱᐅᑉ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᓚᐅᖅᑳᕐᑎᓐᓇᒋᑦ, ᐊᑕᓂᐅᑉ ᐆᒃᑐᕋᓚᐅᕐᐹ ᓱᓕᓂᖓ ᓇᓗᓁᕐᑕᐅᖁᓪᓗᒍ. 20 ᐊᖓᔪᖅᑳᕐᔪᐊᖅ ᑎᓕᓯᓪᓗᓂ ᑎᒍᔭᐅᓯᒪᕕᖕᒥᑦ ᐊᓂᑎᑕᐅᖁᕚ, ᐃᓄᐃᑦ ᐊᐅᓚᑦᓯᔨᖓᑕ ᑎᒍᔭᐅᓯᒪᔪᓐᓃᕐᑎᓪᓗᓂᐅᒃ. 21 ᐊᖓᔪᖅᑳᕐᔪᐊᑉ ᐃᒡᓗᕐᔪᐊᒥᓄᑦ ᐊᖓᔪᖅᑳᕈᕐᑎᓚᐅᕐᐹ, ᑲᒪᔨᓐᖑᕐᑎᓪᓗᓂᐅᒡᓗ ᐱᖁᑎᓕᒫᒥᓄᑦ, 22 ᐊᖓᔪᖅᑳᕐᔪᐊᑉ ᐃᓚᖏᓐᓂᒃ ᐊᔪᕆᕐᑐᐃᖁᓪᓗᒍ ᐃᓱᒪᕐᓱᕐᓗᓂ, ᐃᓕᓮᖁᓪᓗᒍᓗ ᓯᓚᑐᓂᕐᒥᒃ ᐊᖓᔪᖅᑳᖁᑎᖏᓐᓂᒃ. 23 ᑕᕝᕙ ᔧᑯ ᐄᑦᔨᑉᑎᒧᐊᓚᐅᕆᕗᖅ; ᓄᓇᑖᕐᓗᓂᓗ ᕼᐋᒥᐅᑉ ᓄᓇᖓᓂ. 24 ᐊᑕᓂᐅᓪᓗ ᐃᓄᖁᑎᓂ ᐃᓄᒋᐊᒃᓯᕙᓪᓕᐊᑎᓚᐅᕐᐰᑦ ᓱᑲᑦᑐᒥᒃ, ᓲᖑᓂᕐᓴᕈᕐᑎᓪᓗᒋᓪᓗ ᐊᑭᕋᕐᑐᕐᑎᖏᓐᓂᑦ. 25 ᐄᑦᔨᑉᑎᒥᐅᑦ ᐆᒥᓱᓕᕐᑎᓚᐅᕐᐰᑦ ᐃᓄᖁᑎᖏᓐᓂᒃ, ᓈᒻᒪᖏᑦᑐᒥᒃ ᐱᓇᓱᐊᕐᕕᐅᖁᓪᓗᒋᑦ ᐱᔨᒋᔭᖏᑦ. 26 ᑖᑦᓱᒪ ᐱᔨᓂ ᒨᓯᓯ ᑎᓕᓚᐅᕐᐹ, ᐂᕉᓂᓗ ᓂᕈᐊᕐᓯᒪᔭᓂ. 27 ᑖᒃᑯᐊᒃ ᐱᓇᓱᐊᓚᐅᕐᐳᒃ ᑖᑦᓱᒪ ᓇᓗᓁᒃᑯᑕᖏᓐᓂᒃ ᐃᓄᖕᓂ ᑕᕝᕙᓂ, ᑲᒪᓇᕐᑐᓕᓂᕐᓂᒡᓗ ᐱᓇᓱᐊᕐᓗᑎᒃ ᕼᐋᒥᐅᑉ ᓄᓇᖓᓂ. 28 ᑖᕐᑐᕐᔪᐊᒥᒃ ᑎᓕᓯᓚᐅᕐᐳᖅ, ᓄᓇᓗ ᑖᕐᓯᑎᓪᓗᒍ; ᐄᑦᔨᑉᑎᒥᐅᓪᓕ ᑖᑦᓱᒪ ᐅᖃᐅᓯᖏᓐᓂᒃ ᓈᓚᓚᐅᓐᖏᓚᑦ. 29 ᐃᒥᖏᑦ ᐊᐅᓐᖑᕐᑎᓚᐅᕐᐰᑦ, ᐃᖃᓗᖁᑎᖏᑦ ᑐᖁᑎᓪᓗᒋᑦ. 30 ᓄᓇᖓᑦ ᓈᕌᔨᓂᒃ ᖄᒥᑕᐅᑦᓯᐊᓚᐅᕐᐳᖅ, ᐊᒡᓛᑦ ᐊᖓᔪᖅᑳᕐᔪᐊᖃᕐᕕᐅᑉ ᐃᒡᓗᕐᔪᐊᖓ. 31 ᐅᖃᕐᒪᑦ, ᑕᕝᕙ ᒥᓗᒋᐊᑦ ᐅᓄᕐᑐᕐᔪᐊᑦ ᑎᑭᑉᐳᑦ, ᑯᒤᓪᓗ ᓄᓇᓕᒫᖓᓄᑦ ᑎᑭᓚᐅᕆᕗᑦ. 32 ᓇᑕᖅᑯᕐᓇᕐᕕᐅᑎᓚᐅᕐᐰᑦ ᓯᓚᓗᒃᓯᐅᕐᑐᑎᑐᑦ, ᐃᑯᒤᓪᓗ ᐃᑯᐊᓚᔪᑦ ᓄᓇᖏᓐᓄᑦ ᑲᑕᒐᓚᐅᕆᕗᑦ ᑲᓪᓕᕐᑐᑎᑐᑦ. 33 ᓇᐹᕐᑐᐃᑦ ᕔᓂᒃᓴᓖᑦ ᐱᒋᓕᖕᓂᒡᓗ ᐸᐅᕐᖓᓖᑦ ᓯᖁᒥᑕᐅᓚᐅᕐᐳᑦ, ᓇᐹᕐᑐᐃᓪᓗ ᓄᓇᐅᑉ ᑭᒡᓕᖓᒍᑦ ᓇᑲᑎᓚᐅᕐᐳᑦ ᓄᓇᓕᒫᖏᓐᓂ. 34 ᐅᖃᕐᒪᑦ, ᑕᕝᕙ ᐱᒡᓕᕐᑍᑦ ᑎᑭᑉᐳᑦ, ᐱᒡᓕᕐᑕᐅᔮᕐᑐᒃᓮᓪᓗ ᐱᕈᕐᐸᓪᓕᐊᔪᑦ ᓈᓴᒐᒃᓴᐅᖏᑦᑐᑦ, 35 ᑖᒃᑯᐊ ᓂᕿᒃᓴᓂᒃ ᐱᕈᕐᑐᓕᒫᓂᒃ ᓄᖒᑦᓯᓚᐅᕐᐳᑦ ᓄᓇᖏᓐᓂ, ᓂᕆᓪᓗᑎᒡᓗ ᐱᕈᕐᓰᕕᖁᑎᖏᑕ ᐱᕈᕐᑐᓕᒫᖏᓐᓂᒃ. 36 ᐃᕐᓂᐊᕆᔭᐅᖅᑳᕐᓯᒪᔪᓕᒫᑦ ᓄᓇᖏᓐᓂ ᓄᖑᑕᐅᓚᐅᕆᕗᑦ, ᓲᖑᑦᔪᑎᒃᓴᖏᑕ ᓯᕗᓪᓕᕐᐸᐅᔪᖁᑎᓕᒫᖏᑦ. 37 ᑕᕝᕙ ᐃᓴᕆᐊᓕᒥᐅᑦ ᑕᓯᐅᓕᓚᐅᕐᐰᑦ ᐊᐅᓪᓚᕐᑎᓪᓗᒋᑦ ᓯᐅᓪᕕᕆᓂᒃ ᒎᓗᓂᒡᓗ ᓇᒃᓴᕐᓗᑎᒃ, ᑭᖑᕚᕇᓕᒫᓂᓗ ᐋᓐᓂᐊᓕᒃᑕᖃᓚᐅᓐᖏᓚᖅ ᐊᑕᐅᓯᕐᒥᒡᓘᓐᓃᑦ. 38 ᐄᑦᔨᑉᑎᒥᐅᑦ ᖁᕕᐊᓱᓚᐅᕐᐳᑦ ᐃᓴᕆᐊᓕᒥᐅᑦ ᐊᐅᓪᓚᕐᒪᑕ, ᑲᑉᐱᐊᓱᒻᒪᕆᓕᓚᐅᕐᒪᑕ ᑖᒃᑯᓂᖓ. 39 ᑖᑦᓱᒪ ᓄᕗᔭ ᐃᓯᕕᓚᐅᕐᐹ ᐅᓕᒋᔭᐅᖁᓪᓗᒍ, ᐃᑯᒪᓗ ᖃᐅᒪᑎᑦᓯᖁᓪᓗᒍ ᐅᓐᓄᒃᑯᑦ. 40 ᐃᓄᐃᑦ ᑐᒃᓯᕋᕐᒪᑕ ᐊᕿᒡᒋᐅᔮᕐᑐᓄᑦ ᑎᑭᑕᐅᓚᐅᕐᐳᑦ, ᐱᔪᒪᓂᖏᑦ ᓈᒻᒪᒃᓯᑎᓚᐅᕐᐰᑦ ᕿᓚᐅᑉ ᓂᐊᖂᔭᖓᓂᒃ ᑐᓂᓯᕕᒋᓪᓗᒋᑦ. 41 ᕾᕐᑐᖅ ᐊᖕᒪᕐᒪᒍ, ᐃᒥᖅ ᑯᕕᓕᕐᐳᖅ ᑕᕝᕙᓐᖓᑦ; ᐃᓄᖃᖏᑦᑐᒥ ᑰᓕᓚᐅᕐᐳᖅ ᑰᓪᓚᕆᒃᑎᑐᑦ. 42 ᐃᖅᑲᐅᒪᒐᒥ ᐊᖏᕈᑎᒋᓚᐅᕐᑕᒥᓂᒃ ᐃᑦᔪᕐᓁᑦᑐᒥᒃ, ᐅᖃᐅᓯᕆᓚᐅᕐᑕᒥᓂᒃ ᐱᔨᒥᓄᑦ ᐂᑉᕋᕼᐋᒧᑦ. 43 ᖁᕕᐊᓱᒡᓗᓂ ᐃᓄᖁᑎᓂ ᐊᐅᓪᓚᕈᑎᓚᐅᕐᐰᑦ, ᓂᕈᐊᕐᓯᒪᔭᖏᓪᓗ ᐃᓐᖏᓚᐅᕐᐳᑦ ᖁᕕᐊᓱᒃᓗᑎᒃ. 44 ᑐᓂᓯᕕᒋᓚᐅᕐᐰᓪᓗ ᐃᓅᖃᑎᒌᒡᔪᐊᑦ ᔫᑎᐅᖏᑦᑐᑦ ᓄᓇᖓᓐᓂᒃ; ᑕᒫᓂ ᓄᓇᖃᓚᐅᕐᑐᑦ ᐱᖁᑎᖏᓐᓂᒃ ᐱᑖᖁᓪᓗᒋᑦ ᓇᖕᒥᓂᕐᑖᕆᓗᒋᑦ, 45 ᐃᓱᐊᓄᑦ ᓈᓚᑦᓯᐊᖁᓪᓗᒋᑦ ᐃᓕᖅᑯᓯᐅᖁᔭᖏᓐᓂᒃ, ᐱᖁᔭᖏᓐᓂᒡᓗ ᓈᓚᖁᓪᓗᒋᑦ. ᐊᑕᓂᖅ ᓂᕐᑐᕐᑕᐅᓕ! |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society