ᐃᓐᖏᕈᑎᑦ 104 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᕐᑐᐃᓂᖅ ᐱᓐᖑᕐᑎᑦᓯᔨᒥᒃ

¹ ᑕᕐᓃᒃ, ᐊᑕᓂᖅ ᓂᕐᑐᕈᒃ! ᐊᑕᓃᖅ ᒎᑎᒐ ᐊᖏᔪᕐᔪᐊᖑᕗᑎᑦ; ᐊᓐᓄᕌᕐᓯᒪᕗᑎᑦ ᐅᐱᓐᓇᕐᓂᕐᒥᒃ ᐊᖓᔪᖅᑳᕐᔪᐊᖑᓂᕐᒥᒡᓗ,

² ᐃᓕᖕᓂᒃ ᐅᓕᒃᓯᒪᕗᑎᑦ ᖃᐅᒪᔪᒥᒃ ᐊᓐᓄᕌᕆᓪᓗᒍ, ᕿᓚᒃ ᐃᓯᕕᑉᐸᑦ ᑐᐱᕐᑎᑐᑦ ᑖᓗᑕᕐᑎᑐᓪᓗ.

³ ᐃᒪᐅᑉ ᖄᖓᓂ ᐃᑳᖓᔪᓂᒃ ᑐᓐᖓᕕᓕᐅᕐᓯᒪᕗᖅ ᐃᓂᒃᓴᕆᔭᒥᓂᒃ, ᓄᕗᔧᑦ ᓴᓇᓚᐅᕐᐰᑦ ᐊᒃᓴᓗᐊᖃᕐᑎᓪᓗᒋᑦ ᕿᒧᒃᓯᐅᑎᒋᔪᒪᓪᓗᒋᑦ, ᐃᑭᒪᖃᑦᑕᕐᐳᖅ ᐊᓄᕆᐅᑉ ᐃᓴᕈᖏᓐᓂ,

⁴ ᐂᖏᓕᖁᑎᓂ ᐊᓂᕐᓂᓐᖑᕐᑎᓚᐅᕐᐰᑦ, ᐱᓇᓱᐊᕐᑎᖁᑎᓂᓗ ᐃᑯᒪᐅᓪᓗᑎᒃ ᐃᑯᐊᓚᔪᓐᖑᕐᑎᓪᓗᒋᑦ.

⁵ ᓄᓇᕐᔪᐊᖅ ᐃᓕᓚᐅᕐᐸᑦ ᑐᓐᖓᕕᒃᓴᖏᓐᓄᑦ, ᐊᐅᓚᑦᔭᒃᑕᐅᖁᓇᒍ ᐃᓱᖃᖏᑦᑐᒧᑦ.

⁶ ᐅᓕᓚᕐᐸᑦ ᐃᒪᕕᖕᒧᑦ ᐃᑎᔪᒧᑦ ᐊᓐᓄᕌᓕᐅᕐᓗᒍ; ᐃᒪᕐᔪᐊᑦ ᖃᖅᑬᑦ ᖄᖓᒎᓕᕐᑎᓪᓗᒋᑦ.

⁷ ᓱᐊᒃᑲᕕᒋᑦ ᑕᕝᕙ ᕿᒫᕗᑦ; ᑲᓪᓗᖁᑎᕕᑦ ᓂᐱᖓᓄᑦ ᐅᐃᒪᔮᕐᓗᑎᒃ ᕿᒪᒃᓯᕗᑦ.

⁸ ᒪᔪᕋᕐᓗᑎᒃ ᖃᖅᑲᓄᑦ, ᖃᖅᑲᓂᑦ ᑰᓕᕐᐳᑦ ᓇᕐᓴᓄᑦ, ᑕᒪᐅᖓ ᐃᒥᕐᒧᑦ ᐃᓂᒃᓴᓕᐊᕆᓯᒪᔭᕐᓄᑦ.

⁹ ᑭᒡᓕᓕᐅᕆᓯᒪᕗᑎᑦ ᐃᒥᕐᒧᑦ ᖄᖏᕐᑕᐅᖁᓐᖏᑕᕐᓂᒃ, ᐃᒪᕐᔪᐊᑦ ᐅᓕᒃᓯᒋᐊᓪᓚᖁᓇᒋᑦ ᓄᓇᕐᔪᐊᕐᒥᒃ.

¹⁰ ᓄᓇᐅᑉ ᐃᓗᐊᓂᑦ ᑰᖕᓂᐊᕐᑐᓂᒃ ᓇᕐᓴᓄᑦ ᑎᓕᓯᓯᒪᕗᑎᑦ; ᖃᖅᑬᑦ ᐊᑯᓐᓂᖏᓐᓂ ᑰᒍᓐᓇᖁᓪᓗᒋᑦ.

¹¹ ᐃᒥᕐᑎᑦᓯᖁᓪᓗᒋᑦ ᐆᒪᔪᓕᒫᓂᒃ ᓇᑎᕐᓇᒦᑦᑐᓂᒃ; ᓯᐅᑎᖅᑯᕐᑐᔪᑦ ᓄᔪᐊᕐᑐᑦ ᐃᒻᒥᖕᓂᒃ ᐃᒥᕈᐃᖁᓪᓗᒋᑦ.

¹² ᑕᒫᓂ ᓇᐹᕐᑐᓂ ᕿᓚᐅᑉ ᑎᖕᒥᐊᖏᑦ ᐊᖏᕐᕋᖃᕆᕗᑦ; ᓂᑦᔮᖃᑦᑕᕐᐳᑦ ᓇᐹᕐᑐᐃᑦ ᐊᕙᓚᖓᔪᖏᓐᓂ.

¹³ ᖃᖅᑬᑦ ᐃᒥᕐᑖᕐᑎᖃᑦᑕᕐᐸᑎᑦ ᖁᑦᓯᒃᑐᒥᑦ ᐃᓂᒋᔭᕐᓂᑦ; ᓄᓇᕐᔪᐊᖅ ᓈᒻᒪᒃᓯᑎᑕᐅᕗᖅ ᐱᓇᓱᐊᕐᓂᕐᐱᑦ ᐱᕈᕐᑎᑕᖏᓐᓄᑦ.

¹⁴ ᐃᕕᒃᓱᒃᑲᓂᒃ ᐱᕈᕐᑎᑦᓯᕗᑎᑦ ᐃᒻᒧᒃᓯᐅᒐᕐᓄᑦ, ᐱᕈᕐᑐᓂᒃ ᐱᕈᕐᑎᑦᓯᒋᕗᑎᑦ ᐃᓄᐃᑦ ᐊᑐᒐᒃᓴᖏᓐᓂᒃ, ᓂᕿᒃᓴᓂᒃ ᓴᖅᑭᑎᑦᓯᖁᓪᓗᒋᑦ ᓄᓇᕐᔪᐊᕐᒥᑦ ᐱᔪᓂᒃ,

¹⁵ ᕔᓂ ᐃᓅᑉ ᐆᒻᒪᑎᖓᓂᒃ ᖁᕕᐊᓱᒃᑎᑦᓯᖁᓪᓗᒍ, ᓇᐹᕐᑑᓪᓗ ᐅᕐᓱᖓ ᑮᓇᖓᓂᒃ ᓴᓗᒪᑎᑦᓯᖁᓪᓗᒍ, ᓂᐊᖂᔭᕐᓗ ᐃᓅᑉ ᐆᒻᒪᑎᖓᓂᒃ ᓲᖑᓂᖅᑳᕐᑎᑦᓯᖁᓪᓗᒍ.

¹⁶ ᐊᑕᓂᐅᑉ ᓇᐹᕐᑐᖁᑎᖏᑦ ᐃᒪᕾᓐᓇᑯᓪᓗᒋᑦ, ᓕᐸᓇᓂᐅᑉ ᓇᐹᕐᑐᖏᑦ ᓰᑕᕆᒥᒃ ᐊᑎᓖᑦ ᐃᓕᓚᐅᕐᐰᑦ,

¹⁷ ᑕᕝᕙᓂ ᑎᖕᒥᐊᑦ ᐅᓪᓗᓕᐅᕐᐳᑦ; ᑎᖕᒥᐊᑦ ᓂᐅᑯᑖᓕᑦ ᓯᑐᐊᕆᒃᓂᒃ ᐊᑎᓖᑦ ᑕᕝᕙᓂ ᐊᖏᕐᕋᖃᕐᐳᑦ ᓇᐹᕐᑐᓂ ᑐᖑᔪᐃᓐᓇᕐᑐᓂ.

¹⁸ ᖃᖅᑬᑦ ᐳᕐᑐᔪᑦ ᓄᔪᐊᕐᑐᓄᑦ ᒎᑦᓯᓄᑦ ᐃᓂᒃᓴᕆᔭᐅᕗᑦ; ᐅᔭᕋᓱᒡᔪᐃᑦ ᕿᒫᕕᒃᓴᐅᕗᑦ ᐆᒪᔪᓄᑦ ᒥᑭᔫᑎᓄᑦ ᐹᑦᔭᓄᑦ.

¹⁹ ᑕᖅᑭᖅ ᓴᓇᓯᒪᕙᑦ ᓇᓗᓁᒃᑯᑕᐅᖁᓪᓗᒍ ᓇᓪᓕᐅᓐᓂᕐᓄᑦ; ᓯᕿᓂᖅ ᖃᐅᔨᒪᕗᖅ ᖃᖓᒃᑯᑦ ᓂᐱᕕᒃᓴᖃᕐᒪᖔᕐᒥ.

²⁰ ᑖᕐᑐᒥᒃ ᐋᖅᑭᒃᓯᓯᒪᕗᑎᑦ ᐅᓐᓄᐊᖑᖁᓪᓗᒍ, ᑕᕝᕙ ᓇᐹᕐᑐᓂ ᐃᓂᓕᓕᒫᑦ ᐊᓂᓕᕐᐳᑦ.

²¹ ᓛᔧᑦ ᐅᕕᒃᑲᖏᑦ ᖃᓕᖑᐊᖃᑦᑕᕐᐳᑦ ᐆᒪᔪᕋᓱᒃᓗᑎᒃ, ᓂᕿᒃᓴᕐᓯᐅᕐᓗᑎᒃ ᒎᑎᒥᓐᖔᕐᑐᓂᒃ.

²² ᓯᕿᓂᖅ ᓄᐃᖕᒪᑦ ᑲᑎᓕᕐᐳᑦ ᓯᑎᒥᖕᓄᑦ ᓯᓂᒋᐊᕐᑐᓕᕐᓗᑎᒃ,

²³ ᑕᕝᕙ ᐃᓄᒃ ᓴᓇᔭᕐᑐᓕᕐᐳᖅ ᐱᓇᓱᐊᕐᓂᐊᓕᕐᓗᓂ ᐅᓐᓄᒧᑦ ᑎᑭᓪᓗᒍ.

²⁴ ᐊᑕᓃᖅ, ᐱᓂᐊᕐᓂᑎᑦ ᐊᖏᔪᕐᔪᐊᖑᕗᑦ! ᑕᒪᕐᒥᒃ ᓯᓚᑐᓂᕐᓄᑦ ᐋᖅᑭᒃᓯᒪᕙᑎᑦ. ᓄᓇᕐᔪᐊᖅ ᑕᑕᑉᐳᖅ ᐆᒻᒪᕐᑎᓯᒪᔭᕐᓂᒃ.

²⁵ ᐃᒪᕕᒃ ᐊᖏᔪᕐᔪᐊᖑᕗᖅ ᓴᓂᒧᑐᔪᕐᔪᐊᖑᓪᓗᓂᓗ, ᑕᕝᕙᓂᓗ ᓈᓴᒐᒃᓴᐅᖏᑦᑐᓂᒃ ᐆᒪᔪᕐᑕᖃᕐᐳᖅ, ᐆᒪᔪᓂᒃ ᐊᑦᔨᒌᖏᑦᑐᓂᒃ ᒥᑭᔪᓂᒃ ᐊᖏᔪᓂᒡᓗ.

²⁶ ᑕᕝᕙᓂ ᐅᒥᐊᕐᔪᐊᑦ ᐃᖏᕐᕋᖃᑦᑕᕐᐳᑦ; ᓕᕔᐊᑖᓂᓗ ᑕᕝᕙᓂ ᐊᐅᓚᖃᑦᑕᕆᕗᖅ ᐆᒪᔪᕐᔪᐊᖅ ᓴᓇᓯᒪᔧᑦ.

²⁷ ᑕᒪᒃᑯᐊᓕᒫᑦ ᐃᓕᖕᓂᒃ ᑕᑎᖃᖃᑦᑕᕐᐳᑦ, ᓂᕿᒃᓴᕐᑖᕐᑎᑕᐅᔪᒪᓪᓗᑎᒃ ᓇᓪᓕᐅᓃᑦ ᓈᒻᒪᒃᓯᔭᕌᖓᑕ.

²⁸ ᑐᓂᓯᔭᕅᒐᕕᒋᑦ, ᑕᕝᕙ ᑲᑎᕐᓱᐃᓕᕐᐸᒃᐳᑦ; ᐊᒡᒐᑎᑦ ᐃᓯᕕᑎᒐᕕᒋᑦ, ᑕᕝᕙ ᓂᕆᔭᒃᓴᕐᑖᖃᑦᑕᕐᐳᑦ ᓈᒻᒪᒃᓯᑎᑕᐅᓪᓗᑎᒃ.

²⁹ ᑮᓁᑦ ᑕᓕᑎᑐᐊᕋᕕᐅᒃ, ᑕᕝᕙ ᑲᑉᐱᐊᓱᓕᕐᐳᑦ; ᐊᓂᕐᓂᖏᑦ ᑎᒍᑐᐊᕋᕕᒋᑦ, ᑕᕝᕙ ᑐᖁᕗᑦ ᐅᑎᕐᓗᑎᒡᓗ ᓄᓇᒧᑦ.

³⁰ ᐊᓂᕐᓃᑦ ᑎᓕᒐᕕᐅᒃ, ᑕᕝᕙ ᐱᓐᖑᕐᑎᑕᐅᕗᑦ; ᓄᓇᕐᔪᐊᓪᓗ ᓴᖅᑭᔮᕐᓂᖓ ᓄᑖᓐᖑᕐᑎᑉᐸᑦ.

³¹ ᐊᑕᓂᐅᑉ ᓂᕐᑐᕐᓇᕐᓂᖓ ᐃᓱᖃᖏᑦᑐᒧᑦ ᑍᒤᓕᖓᓕ, ᐊᑕᓂᐅᑉ ᐱᓂᐊᕐᓂᓂ ᖁᕕᐊᒋᓕᒋᑦ.

³² ᓄᓇᕐᔪᐊᖅ ᑕᑯᓴᕐᒪᒍ, ᑕᕝᕙ ᓴᔪᒃᐱᓗᓕᕐᐳᖅ, ᖃᖅᑬᑦ ᐊᒃᑐᕐᒪᒋᑦ ᑕᕝᕙ ᐳᔫᓕᕐᐳᑦ.

³³ ᐊᑕᓂᕐᒧᑦ ᐃᓐᖏᖃᑦᑕᕐᓂᐊᕐᐳᖓ ᐃᓅᓯᕋ ᓈᓗᒍ; ᐃᓐᖏᕐᓗᖓ ᒎᑎᒐ ᓂᕐᑐᖃᑦᑕᕐᓂᐊᕐᐸᕋ ᐃᓅᓂᓕᒫᓐᓂ.

³⁴ ᑖᑦᓱᒪ ᐃᓱᒪᒃᓴᕐᓯᐅᕈᑎᒋᔭᒃᑲ ᖁᕕᐊᒋᓕᒋᑦ, ᐊᑕᓂᕐᒥ ᖁᕕᐊᓲᑎᖃᖁᓪᓗᖓ.

³⁵ ᐊᔪᕐᑐᓕᔪᑦ ᓄᖑᑕᐅᓕᕐᓕᑦ ᓄᓇᕐᔪᐊᕐᒥ, ᐱᐅᖏᑦᑐᓪᓗ ᐱᑕᖃᕈᓐᓃᕐᓗᑎᒃ. ᑕᕐᓃᒃ ᐊᑕᓂᖅ ᓂᕐᑐᕈᒃ! ᐊᑕᓂᖅ ᓂᕐᑐᕐᑕᐅᓕ!