ᐃᓐᖏᕈᑎᑦ 102 - ᐊᒡᓔᑦ ᐃᑦᔪᕐᖕᓁᑦᑐᑦᑐᒃᓯᐊᕐᓂᖅ ᐋᓐᓂᐊᓇᕐᑐᖃᓕᕐᑎᓪᓗᒍ ᓇᓗᓕᕐᓂᕐᒧᑦ ᐊᑕᓂᕐᒧᑦ ᐅᖃᐅᓯᖃᕐᓂᖅ 1 ᐊᑕᓃᖅ, ᑐᒃᓯᐊᕐᓂᕋ ᑐᓴᓚᐅᕈᒃ, ᓂᓪᓕᐊᓂᕋ ᐃᓕᖕᓄᑦ ᑎᑭᐅᑎᓚᐅᕐᓕ! 2 ᑮᓁᑦ ᑕᓕᑎᓐᓂᐊᕐᓇᒍ ᐅᕙᓐᓂᑦ ᐊᑲᐅᓐᖏᓕᐅᕈᑎᖃᓕᕐᑎᓪᓗᖓ! ᓯᐅᑏᑦ ᒪᓂᓚᐅᕈᒃ ᐅᕙᓐᓄᑦ; ᑐᓴᑲᐅᕐᑐᕐᓗᖓᓗ ᑐᒃᓯᐊᓕᕐᑎᓪᓗᖓ! 3 ᐅᓪᓗᒃᑲ ᓄᖑᑉᐸᓪᓕᐊᕗᑦ ᐳᔪᕐᑎᑐᑦ, ᓴᐅᓂᒃᑲᓗ ᐆᓇᕐᓯᕗᑦ ᐃᑯᐊᓚᔪᑎᑐᑦ. 4 ᐆᒻᒪᑎᒐ ᐊᓇᐅᓕᕐᑕᐅᓂᑰᕗᖅ ᐃᕕᒃᓱᒃᑲᑎᑐᑦ ᐸᓂᕐᑐᑎᑐᑦ; ᐊᒡᓛᑦ ᓂᕆᔭᒃᓴᒃᑲ ᓂᕆᔭᕆᐊᖏᑦ ᐳᐃᒍᕐᓯᒪᕙᒃᑲ. 5 ᐋᓐᓂᐊᓂᕐᒧᑦ ᓂᐹᓂᕐᒧᓪᓗ ᓴᐅᓃᓐᓇᕈᕐᐳᖓ. 6 ᑎᖕᒥᐊᑎᑐᑦ ᐱᕈᕐᑐᖃᖏᑦᑐᒦᑦᑐᑎᑐᑦ ᑍᒤᓕᕐᐳᖓ, ᐅᒃᐱᒃᔪᐊᑎᑐᑦ ᐃᓄᖃᖏᑦᑐᒦᑦᑐᑎᑐᑦ. 7 ᓇᓪᓚᖓᓪᓗᖓ ᓯᓂᒍᓐᓇᓐᖏᓚᖓ, ᖁᐸᓄᐊᑎᑐᑦ ᐃᒡᓘᑉ ᖄᖓᓂ ᐃᓄᑑᔪᑎᑐᑦ ᑍᒤᑉᐳᖓ. 8 ᐅᓪᓗᓕᒫᖅ ᐊᑭᕋᕐᑐᕐᑎᒪ ᐅᖃᕐᓂᕐᓘᑎᒋᕚᖓ; ᐅᕙᓐᓂᒃ ᒥᑕᐅᑎᒃᓴᕐᑐᑦ ᐊᑎᓐᓂᒃ ᐅᖃᕐᓂᕐᓘᑦᔨᖃᑦᑕᕐᐳᑦ. 9 ᐊᕐᔭᓕᓃᑦ ᓂᕆᕙᒃᑲ ᓂᐊᖂᔭᑎᑐᑦ, ᐃᒥᕐᓂᐊᕐᑕᕋᓗ ᖁᕝᕕᐅᕐᓂᓐᓂᒃ ᐅᐊᕈᓯᕐᓯᒪᓕᕐᐳᖅ. 10 ᓂᓐᖓᐅᒪᔪᐊᓘᓂᕐᓄᑦ ᓮᒪᖏᓐᓂᐊᓗᖕᓄᓪᓗ; ᑭᕕᒃᓗᖓ ᐃᒋᓚᐅᕐᐸᕐᒪ ᒪᓂᖅᑲᒧᑦ. 11 ᐅᓪᓗᒃᑲ ᐅᓐᓄᒃᐸᓪᓕᐊᔫᑉ ᑕᕐᕋᖓᑐᑦ ᐳᒃᑭᒡᓕᕙᓪᓕᐊᓕᕐᐳᑦ; ᐃᕕᒃᓱᒃᑲᑎᑐᑦ ᐸᓂᓕᕐᑐᑎᑐᑦ ᑍᒤᓕᕐᐳᖓ. 12 ᐃᕝᕕᓪᓕ ᐊᑕᓃᖅ, ᑍᒤᓕᖎᓐᓇᕐᓂᐊᕐᐳᑎᑦ ᐃᓱᖃᖏᑦᑐᒧᑦ; ᐃᖅᑲᐅᒪᔭᐅᖏᓐᓇᕐᓂᐊᕐᓗᑎᓪᓗ ᑭᖑᕚᕇᒃᐸᓪᓕᐊᔪᓕᒫᓄᑦ. 13 ᒪᑭᓪᓗᑎᑦ ᓮᐅᓂ ᓂᑲᒋᓕᕈᒫᕐᐸᑦ; ᖁᕕᐊᒋᔭᐅᓕᕐᓂᒃᓴᖓ ᐃᓕᖕᓄᑦ ᓈᒻᒪᒃᓯᕗᖅ, ᐄᓛᒃ, ᐱᕕᒃᓴᖓ ᑎᑭᓯᒪᓕᕐᐳᖅ. 14 ᐱᔨᑎᑦ ᐱᓪᓚᕆᐊᓘᑎᑦᓯᕗᑦ ᔨᕉᓴᓕᐅᑉ ᐅᔭᕋᖏᓐᓂᒃ, ᓯᖁᑦᑎᕐᑕᐅᓯᒪᒐᓗᐊᕐᑎᓪᓗᒋᑦ ᓇᒡᓕᒍᓱᒻᒪᕆᒃᐳᑦ. 15 ᑕᕝᕙ ᐃᓅᖃᑎᒌᒡᔪᐊᑦ ᐊᑕᓂᐅᑉ ᐊᑎᖓᓂᒃ ᓯᕘᕋᔪᒫᕐᐳᑦ, ᐊᖓᔪᖅᑳᕐᔪᐊᓪᓗ ᓄᓇᒦᑦᑐᓕᒫᑦ ᐃᓕᖕᓂᒃ ᓂᕐᑐᕐᓇᕐᑎᑦᓯᔪᒫᕐᐳᑦ; 16 ᐊᑕᓂᐅᑉ ᓮᐅᓂ ᐋᖅᑭᒃᓱᕐᓂᐊᕐᒪᒍ, ᓂᕐᑐᕐᓇᕐᓂᖓ ᑕᕝᕙᓂ ᓴᖅᑭᑎᑕᐅᓂᐊᕐᐳᖅ. 17 ᐊᖏᕐᕋᖃᕈᓐᓃᕐᓯᒪᔪᑦ ᑐᒃᓯᐊᕐᓂᖏᑦ ᓵᕝᕕᒋᓂᐊᕐᐰᑦ, ᕿᓄᐊᕆᔭᖏᓪᓗ ᓇᕐᕈᒋᓂᐊᓐᖏᓔᑦ. 18 ᑕᒪᓐᓇ ᑎᑎᕋᕐᑕᐅᓯᒪᔪᒃᓴᐅᕗᖅ ᑭᖑᕚᕇᖑᔪᒫᕐᑐᑦ ᐱᓪᓗᒋᑦ, ᑖᒃᑯᐊ ᓱᓕ ᐃᓅᓚᐅᖏᑦᑐᑦ ᓂᕐᑐᐃᔪᓐᓇᓛᖁᓪᓗᒋᑦ ᐊᑕᓂᕐᒥᒃ. 19 ᑖᓐᓇ ᑕᑯᓐᓇᕐᒪᑦ ᖁᑦᓯᒃᑐᒥ ᐃᑦᔪᕐᓁᑦᑐᕕᖁᑎᒥᓂᑦ, ᕿᓚᖕᒥᑦ ᐊᑕᓂᖅ ᑕᑯᓐᓇᕐᒪᑦ ᓄᓇᕐᔪᐊᕐᒧᑦ, 20 ᑐᓵᕗᖅ ᑎᒍᔭᐅᓯᒪᔪᑦ ᓂᐹᕙᓗᖏᓐᓂᒃ, ᐊᓂᑎᑦᓯᓪᓗᓂᓗ ᑐᖁᑕᒃᓴᕈᕐᑎᑕᐅᓯᒪᔪᓂᒃ; 21 ᐊᑕᓂᐅᑉ ᐊᑎᖓᓂᒃ ᐅᖃᐅᓯᖃᖁᓪᓗᒋᑦ ᓮᐅᓂᒥ, ᓂᕐᑐᐃᔪᓐᓇᖁᓪᓗᒋᓪᓗ ᑖᑦᓱᒥᖓ ᔨᕉᓴᓕᒥ, 22 ᐃᓄᐃᑦ ᑲᑎᖃᑎᒌᒃᐸᑕ, ᐊᖓᔪᖅᑲᐅᕖᓪᓗ, ᑐᒃᓯᐊᕆᐊᕐᑐᕐᓗᑎᒃ ᐊᑕᓂᕐᒧᑦ. 23 ᑖᓐᓇ ᓲᖑᓂᓐᓂᒃ ᓯᖁᒥᑦᓯᓚᐅᕐᐳᖅ ᐃᓅᓱᒃᑑᑎᓪᓗᖓ ᓱᓕ; ᑖᑦᓱᒪ ᐅᓪᓗᒃᑲ ᓁᒡᓕᑎᓚᐅᕐᐰᑦ. 24 ᐅᖃᕐᐳᖓ, “ᒎᑏᒃ, ᐲᕐᓯᕕᒋᓂᐊᕐᓇᖓ ᐅᓪᓗᒪ ᕿᑎᖅᑲᖏᓐᓂᒃ; ᐊᕐᕌᒍᑎᓪᓕ ᓱᕐᕋᖕᓂᐊᓐᖏᓚᑦ ᑭᖑᕚᕇᓕᒫᓂ!” 25 ᑍᑦᓱᒪᓂᐊᓗᒃ ᓄᓇᕐᔪᐊᖅ ᑐᓐᖓᕕᓕᐅᓚᐅᕐᐸᑦ, ᐊᒡᒐᒃᐱᓪᓗ ᕿᓔᑦ ᓴᓇᓚᐅᕐᐰᑦ. 26 ᑖᒃᑯᐊ ᓄᖑᓐᓂᐊᕐᐳᑦ, ᐃᕝᕕᓪᓕ ᑍᒤᖏᓐᓇᕐᓂᐊᕐᐳᑎᑦ; ᐄᓛᒃ, ᓱᓇᓕᒫᑦ ᓄᑕᐅᔪᓐᓃᕐᐸᓪᓕᐊᓂᐊᕐᐳᑦ ᐊᓐᓄᕌᑎᑐᑦ; ᐅᓕᒡᔪᐊᑎᑐᑦ ᐊᓯᑦᔨᕈᕕᒋᑦ, ᑕᕝᕙ ᐊᓯᑦᔨᕐᓂᐊᕐᐳᑦ. 27 ᐃᕝᕕᓪᓕ ᑖᓐᓇᐅᑦᓮᓐᓇᕐᐳᑎᑦ, ᐊᕐᕌᒍᑎᓪᓗ ᐃᓱᓕᓐᓂᐊᕋᑎᒃ. 28 ᐱᔨᕕᑦ ᕿᑐᕐᖓᖏᑦ ᑲᔪᓯᑦᓮᓐᓇᕐᓂᐊᕐᐳᑦ; ᑭᖑᕚᖏᓪᓗ ᐊᐅᓚᖏᑦᑐᒦᓐᓂᐊᕐᐳᑦ ᐃᓕᖕᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society