ᐃᓐᖏᕈᑎᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓐᖏᕈᑦ ᖃᐅᔨᒪᓂᕐᒧᑦ ᒎᑎᐅᑉ ᓵᓚᖃᕐᓂᖓᓂᒃ ᐱᐅᖏᑦᑐᒥᒃ

¹ ᐊᑕᓃᖅ, ᓱᖕᒪᑦ ᓇᖏᕐᐱᑦ ᐅᖓᓯᒃᑐᒥ? ᓱᖕᒪᓪᓗ ᐊᔪᕐᓇᕐᑐᖃᓕᕌᖓᑦ ᐃᔨᕐᓯᒪᖃᑦᑕᕐᐲᑦ?

² ᐱᐅᖏᑦᑐᓕᔪᑦ ᐱᐅᔪᕆᓂᕐᒥᖕᓄᑦ ᐊᔪᕐᓴᕐᑐᑦ ᓵᓚᒋᓇᓱᐊᕐᐰᑦ; ᓵᓚᖃᕈᒪᓂᕐᒧᑦ ᐃᓱᒪᖃᑎᒌᒍᑎᒋᓯᒪᔭᒥᖕᓄᑦ ᓇᖕᒥᓂᖅ ᓵᓚᐅᓚᐅᕐᓕᑦ.

³ ᐱᐅᖏᑦᑐᓕᔪᑦ ᐆᒻᒪᑎᒥ ᐱᔪᒪᔭᖏᓐᓂᒃ ᐱᐅᔪᕆᑦᔪᑎᖃᕐᐳᑦ; ᐱᔪᒪᑐᓛᕐᑐᑦ ᐱᔪᒪᔭᖏᓐᓂᒃ ᑐᓂᓯᕕᒋᕔᑦ, ᐊᑕᓂᕐᒥᒡᓗ ᓇᕐᕈᒋᔭᖃᕐᓗᑎᒃ.

⁴ ᐱᐅᖏᑦᑐᓕᔪᑦ ᐱᐅᔪᕆᓂᕐᒥᖕᓄᑦ ᐊᑕᓂᐅᑉ ᑮᓇᖓᓂᒃ ᕿᓂᓐᖏᓚᑦ; ᒎᑎᓗ ᐃᓱᒪᖏᓐᓂ ᐃᓂᖃᓐᖏᓚᖅ.

⁵ ᐱᓂᐊᕐᓂᖏᑦ ᑍᒪᓐᖓᑦ ᑲᔪᓯᕙᒃᐳᑦ: ᐃᖅᑲᕐᑐᐃᓂᕐᐱᑦ ᐳᕐᑐᓂᖏᑦ, ᑖᑦᓱᒪ ᑎᑭᑦᓱᓐᓇᓐᖏᓔᑦ; ᐊᑭᕋᕐᑐᕐᑎᓂᓕ, ᒥᑕᐅᑎᒋᕔᑦ.

⁶ ᐆᒻᒪᑎᒥᒍᑦ ᐃᓱᒪᕗᖅ, “ᐊᓯᓐᓂᑦ ᐊᐅᓚᑕᐅᓂᐊᓐᖏᓚᖓ, ᐊᑲᐅᖏᑦᑐᒧᓪᓗ ᖃᖓᓕᒫᖅ ᑎᑭᑕᐅᓂᐊᕐᓇᖓ.”

⁷ ᖃᓂᖓᓕ ᑕᑕᑉᐳᖅ ᐅᖃᐅᓯᕐᓗᖕᒥᒃ ᓴᒡᓗᓂᕐᓂᒡᓗ ᑲᑉᐱᐊᓱᒃᑎᑦᓯᓂᕐᒥᒡᓗ: ᐊᑲᐅᖏᑦᑐᑦ ᐱᐅᖏᑦᑐᓕᓃᓪᓗ ᐅᖃᖓᑕ ᐊᑖᓃᑉᐳᑦ.

⁸ ᐃᒃᓯᕙᕗᕐᓗ ᓄᓇᓕᖕᓂ ᑎᕐᓕᐊᕐᓯᕕᖕᓂ; ᐅᐸᓗᐃᓪᓗᒋᓪᓗ ᐸᓯᔭᒃᓴᐅᖏᑦᑐᑦ ᑐᖁᓴᕐᐰᑦ, ᐃᔨᕋᕐᑐᕐᓗᓂᓗ ᐃᑲᔪᕐᑎᖃᖏᑦᑐᑦ ᐅᓇᖕᒥᕔᑦ.

⁹ ᖃᐅᔨᔭᐅᓇᓂᓗ ᐅᑕᖅᑭᕗᖅ ᓛᔭᑎᑐᑦ ᓯᑎᒥᓂ ᐅᑕᖅᑭᔪᑎᑐᑦ, ᐅᑕᖅᑭᕗᕐᓗ ᐊᔪᕐᓴᕐᑐᖅ ᓵᓚᒋᔪᒪᓪᓗᒍ; ᐊᔪᕐᓴᑐᓪᓗ ᓵᓚᒋᕔᑦ, ᐅᓂᐊᕐᓗᒋᓪᓗ ᓄᓗᐊᒥᓄᑦ.

¹⁰ ᐅᑯᖓᕗᕐᓗ ᑕᑯᔭᐅᑦᑍᓕᓪᓗᓂ, ᖃᐅᔨᔭᐅᑦᑍᓕᕗᕐᓗ, ᐃᑲᔪᕐᑎᖃᖏᑦᑐᑦ ᐅᕐᕈᑎᑦᓱᒪᓪᓗᒋᑦ ᐱᔪᓐᓇᕐᓂᕐᒥᓄᓪᓗ ᓵᓚᒋᔪᒪᓪᓗᒋᑦ.

¹¹ ᐆᒻᒪᑎᒥᒍᑦ ᐃᒻᒥᓄᑦ ᐅᖃᕐᓯᒪᒐᒥ, “ᒎᑎ ᐳᐃᒍᕐᓯᒪᕗᖅ, ᑮᓇᓂ ᐃᔨᕐᓯᒪᕚ, ᑕᑯᓂᐊᓐᖏᓚᕐᓗ.”

¹² ᐊᑕᓃᖅ, ᒪᑭᓕᕆᑦ! ᒎᑏ, ᐊᒡᒊᑦ ᖁᒻᒧᐊᒃᑎᓚᐅᕈᒃ! ᒥᑭᒡᓕᑎᕐᓯᒪᔪᑦ ᐳᐃᒍᕐᓂᐊᕐᓇᒋᑦ.

¹³ ᓱᖕᒪᑦ ᐱᐅᖏᑦᑐᓕᔪᑦ ᒎᑎᒥᒃ ᓇᕐᕈᓇᕐᑎᑦᓯᕚᑦ? ᐃᓱᒪᒥᒍᑦ ᐅᖃᕐᓯᒪᖕᒪᑕ, “ᑕᒪᒃᑯᓂᖓ ᐸᓯᓴᐅᑦᔪᑎᖃᕐᓂᐊᓐᖏᓚᖓ.”

¹⁴ ᐃᕝᕕᓪᓕ ᑕᐅᑐᒃᐳᑎᑦ, ᑕᑯᓐᓇᕐᐳᑎᓪᓗ ᐊᑲᐅᖏᑦᑐᓂᒃ, ᕿᒃᓵᖕᓂᕐᓂᒡᓗ, ᐊᒡᒐᖕᓄᓪᓗ ᐊᑭᓂᐊᕈᒪᕙᑎᑦ. ᐃᑲᔪᕐᑎᖃᖏᑦᑐᑦ ᐃᓕᖕᓄᑦ ᒪᓂᕗᑦ; ᐃᑲᔪᕐᑎᐅᒐᕕᑦ ᐊᑖᑕᖃᖏᑦᑐᓄᑦ.

¹⁵ ᐱᐅᖏᑦᑐᓕᔫᑉ ᑕᓕᖓ ᐊᔪᕐᑐᓕᔫᓪᓗ ᑕᓕᖓ ᓇᐱᓚᐅᒃᑭᒃ; ᐱᐅᖏᑦᑐᓕᓂᖏᓪᓗ ᓴᖅᑭᑎᓚᐅᒃᑭᑦ ᐃᔨᕐᓯᒪᔪᖃᕈᓐᓃᕐᓗᑎᒃ.

¹⁶ ᐊᑕᓂᖅ ᐊᖓᔪᖅᑳᕐᔪᐊᖑᕗᖅ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ; ᐃᓅᖃᑎᒌᒡᔪᐊᑦ ᒎᑎᖃᖏᑦᑐᑦ ᓄᖑᑦᓱᒫᕐᐳᑦ ᓄᓇᖓᓂᑦ.

¹⁷ ᐊᑕᓃᖅ, ᐱᐅᔪᕆᖏᑦᑐᑦ ᐱᔪᒪᔭᖏᑦ ᑐᓴᓚᐅᕐᐸᑎᑦ; ᐆᒻᒪᑎᖏᓪᓗ ᑲᔪᖏᕐᓴᕐᐸᑎᑦ, ᓂᓪᓕᐊᓂᖏᓪᓗ ᓈᓚᒍᒪᕙᑎᑦ.

¹⁸ ᐊᑖᑕᖃᖏᑦᑐᑦ, ᓵᓚᓯᐊᖑᔪᓪᓗ ᓴᐳᑎᔪᒪᕙᑎᑦ, ᐃᓄᐃᑦ ᓄᓇᒦᑦᑐᑦ ᑲᑉᐱᐊᓱᒃᑎᑦᓯᔪᓐᓃᖁᓪᓗᒋᑦ.