ᓲᓗᒨᓂᐅᑉ ᐅᖃᓪᓚᖕᓂᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓚᑐᓂᕐᒥᒃ ᓂᕐᑐᐃᓂᖅ

¹ ᓯᓚᑐᓂᖅ ᕾᖁᔨᓐᖏᓛᖅ? ᑐᑭᓯᓂᕐᓗ ᑐᓴᕐᓴᐅᑎᓐᖏᓛᖅ ᓂᐱᖅᑯᕐᑐᓗᓂ?

² ᐳᕐᑐᓂᕐᓂ ᐊᖅᑯᑏᑦ ᖃᓂᒋᔭᖏᓐᓂ, ᐊᖅᑯᑏᓪᓗ ᑲᑎᓐᓂᖏᓐᓂ ᓇᖏᕐᐳᖅ.

³ ᐃᑎᕐᑕᕐᕖᑦ ᓴᓂᖏᓐᓂ ᐃᒡᓗᒐᓴᒡᔪᐊᑦ ᓯᕗᖏᓐᓂ, ᐅᒃᑯᐊᖏᑕ ᓴᓂᐊᓂ ᓂᐱᖅᑯᕐᑐᓪᓗᓂ ᕾᖁᔨᕗᖅ:

⁴ “ᐊᖑᑕᐅᔪᓯ ᐃᓕᑦᓯ ᕾᖁᕙᑦᓯ; ᐃᓄᓕᒫᓪᓗ ᕾᖁᒋᕙᒃᑲ.

⁵ ᓯᓔᑦᑐᓯ, ᐃᓕᓐᓂᐊᓕᕆᑦᓯ ᐅᑦᔨᕐᑐᑦᓯᐊᕈᓐᓇᕐᓯᖁᓪᓗᓯ; ᓯᓔᑦᑐᓯᓗ, ᓈᓚᑦᓯᐊᓕᕆᑦᓯ.

⁶ ᑐᓴᕆᑦᓯ, ᐅᖃᐅᓯᖃᕐᓂᐊᕋᒪ ᐊᑐᕆᐊᖃᒻᒪᕆᒃᑐᓂᒃ; ᐅᖃᐅᓯᒃᑲᓗ ᓴᖅᑭᑎᑦᓯᓂᐊᕐᒪᑕ ᓇᓛᒎᕐᑐᒥᒃ.

⁷ ᐅᖃᐅᓯᕆᔭᒃᑲ ᓴᖅᑭᑎᑦᓯᓂᐊᕐᐳᑦ ᓱᓕᔪᒥᒃ; ᐱᐅᖏᑦᑐᓂᒃ ᐅᖃᐅᓯᖃᕐᓂᖅ ᖃᓂᓐᓄᑦ ᓇᕐᕈᓇᕐᒪᑦ.

⁸ ᖃᓂᒃᑯᑦ ᐅᖃᐅᓯᕆᔭᓕᒫᒃᑲ ᓇᓛᒎᕐᓂᐅᕗᑦ; ᓴᒡᓗᓂᕐᑕᖃᓐᖏᓚᑦ ᑕᒻᒪᕐᑎᑦᓯᓂᕐᑕᖃᕋᑎᒡᓗ.

⁹ ᑐᑭᓯᓯᒪᔪᒧᑦ ᑐᑭᓯᓇᑦᓯᐊᕐᐳᑦ; ᖃᐅᔨᒪᔪᒧᓪᓗ ᓱᓕᑦᓯᐊᕐᓗᑎᒃ.

¹⁰ ᐅᖃᐅᑦᔪᐃᓂᒃᑲ ᐃᓚᓕᐅᖔᒃᑭᑦ ᓯᐅᓪᕕᕆ ᐱᓐᖏᖔᕐᓗᒍ; ᖃᐅᔨᒪᓂᖅ ᐱᓯᒪᖔᕈᒃ ᒎᓗ ᐱᔪᒥᓇᕐᑐᖅ ᐱᓐᖏᖔᕐᓗᒍ.

¹¹ ᓯᓚᑐᓂᖅ ᐱᐅᓂᕐᓴᐅᕗᖅ ᐱᖁᑎᓂᑦ ᐱᐅᓴᐅᑎᓂᑦ; ᐱᔪᒪᔭᓕᒫᕐᓂᒡᓗ ᐊᑦᔨᖃᕈᓐᓇᕋᓂ.

¹² ᐅᕙᖓ, ᓯᓚᑐᓂᐅᕗᖓ ᐃᓂᖃᕐᐳᖓ ᑲᒪᑦᓯᐊᕐᓂᕐᒥᒃ; ᖃᐅᔨᒪᓂᕐᓗ ᓈᒻᒪᓈᑦᓯᐊᕐᓂᕐᓗ ᐱᓯᒪᕙᒃᑲ.

¹³ ᐊᑕᓂᕐᒥᒃ ᓯᕘᕋᓂᖅ ᐱᐅᖏᑦᑐᒥᒃ ᐆᒥᓱᒃᐳᖅ; ᐱᐅᔪᕆᔪᑦ ᐱᔪᓐᓇᕋᓱᒋᓗᐊᕐᑐᓪᓗ ᐱᐅᖏᑦᑐᓕᔪᓪᓗ ᓱᓕᖏᑦᑐᓂᒡᓗ ᐅᖃᓚᒃᐸᒃᑐᑦ ᐆᒥᒋᕙᒃᑲ.

¹⁴ ᐊᔪᕆᕐᑐᐃᓂᖅ ᓯᓚᑐᑦᓯᐊᕐᓂᕐᓗ, ᑐᑭᓯᓯᒪᓂᕐᓗ ᐱᔪᓐᓇᕐᓂᕐᓗ ᐱᓯᒪᕙᒃᑲ.

¹⁵ ᐅᕙᒃᑯᑦ ᐊᖓᔪᖅᑳᕐᔪᐊᑦ ᐊᐅᓚᑦᓯᕙᒃᐳᑦ, ᐱᖁᔭᓕᐅᕈᓐᓇᕐᐸᒃᓗᑎᒡᓗ ᓈᒻᒪᓈᑦᓯᐊᕐᑐᓂᒃ.

¹⁶ ᐅᕙᒃᑯᑦ ᐊᖓᔪᖅᑳᑦ ᐊᖓᔪᖅᑳᖑᕙᒃᐳᑦ, ᐊᖓᔪᖅᑳᓪᓗ ᓄᓇᓕᖕᓂᒃ ᐊᐅᓚᑦᓯᕙᒃᓗᑎᒃ.

¹⁷ ᐅᕙᓐᓂᒃ ᐱᓐᓈᕈᓱᒃᑐᑦ ᐱᓐᓈᕆᒋᒋᕙᒃᑲ; ᐅᕙᓐᓂᒡᓗ ᕿᓂᓪᓚᕆᒃᑐᑦ ᓇᓂᓂᐊᕐᐹᖓ.

¹⁸ ᐊᒃᓗᐃᓐᓂᖅ ᐅᐱᒋᔭᐅᑦᓯᐊᕐᓂᕐᓗ ᐅᕙᓐᓃᑉᐳᑦ, ᐊᔪᕐᓴᖏᓐᓂᖅ ᐱᔪᓐᓇᑦᓯᐊᕐᓂᕐᓗ ᐅᕙᓐᓃᒃᑭᕗᑦ.

¹⁹ ᕾᑕᒃᑲ ᒎᓗᒥᑦ ᐱᐅᓂᕐᓴᐅᕗᑦ, ᐊᒡᓛᑦ ᒎᓗᒥᑦ ᐃᓚᖃᖏᑦᑐᒥᑦ, ᐱᐅᓂᕐᓴᐅᓪᓗᑎᒡᓗ ᓯᐅᓪᕕᕇᑦ ᐱᐅᓂᕐᐹᖓᓐᓂᑦ.

²⁰ ᐱᓱᒃᐳᖓ ᐊᖅᑯᑎᒃᑯᑦ ᓇᓛᒎᕐᓂᒃᑯᑦ; ᐊᑦᔨᒌᒃᑎᑦᓯᓂᐅᓪᓗ ᐊᖅᑯᑎᖓᓂᒃ ᐊᑐᕐᓗᖓ.

²¹ ᐅᕙᓐᓂᒃ ᐱᓐᓈᕈᓱᒃᑐᑦ ᐊᔪᕐᓴᖏᑎᑉᐸᒃᑲ, ᓇᔪᕐᑕᖏᓪᓗ ᐃᓗᓪᓕᕐᑐᕐᓗᒋᑦ ᐱᕕᐊᕐᓇᕐᑐᖁᑎᒃᓴᖏᓐᓂᒃ.

²² ᐊᑕᓂᐅᑉ ᐱᓐᖑᕐᑎᓚᐅᕐᐹᖓ ᓯᕗᓪᓕᕐᐹᖑᓪᓗᖓ, ᐱᓐᖑᕐᑎᑦᓯᕙᓪᓕᐊᓕᕐᑎᓪᓗᒍ ᑍᑦᓱᒪᓂᐊᓗᒃ.

²³ ᐱᒋᐊᕐᑎᑕᐅᓚᐅᕐᓯᒪᕗᖓ ᐱᒋᐊᕐᓂᖓᓂᑦ, ᓯᕗᓪᓕᕐᐸᐅᓪᓗᖓ ᓄᓇᕐᔪᐊᖅ ᐱᒋᐊᓚᐅᖅᑳᕐᑎᓐᓇᒍ.

²⁴ ᐱᒋᐊᕐᑎᑕᐅᓚᐅᕐᐳᖓ ᐃᑎᔪᓂᒃ ᐃᒪᕐᔪᐊᖃᓚᐅᕐᑎᓐᓇᒍ, ᓄᓇᐅᓪᓗ ᐃᓗᐊᓂᑦ ᐱᔪᓂᒃ ᑰᒃᑐᖃᓕᓚᐅᕐᑎᓐᓇᒍ.

²⁵ ᖃᖅᑳᓗᐃᑦ ᐋᖅᑭᓚᐅᕐᑎᓐᓇᒋᑦ, ᐱᖑᐃᓪᓗ ᓴᖅᑭᓚᐅᕐᑎᓐᓇᒋᑦ, ᐱᒋᐊᓚᐅᕐᐳᖓ.

²⁶ ᒎᑎᐅᓪᓗ ᓄᓇᕐᔪᐊᑉ ᓇᑎᕐᓇᖏᑦ ᓴᖅᑭᑎᓚᐅᕐᑎᓐᓇᓂᒋᑦ ᓄᓇᑐᐃᓐᓇᕐᓘᓐᓃᑦ ᐱᕈᕐᓰᕕᒃᓴᖅ ᓴᖅᑭᑎᑕᐅᓚᐅᕐᑎᓐᓇᒍ.

²⁷ ᕿᓔᑦ ᐱᓐᖑᕐᑎᓕᕐᒪᒋᑦ, ᑕᕝᕙᓃᓚᐅᕐᐳᖓ, ᐃᒪᕐᔪᐊᓪᓗ ᐊᖕᒪᓗᕐᓂᖓ ᐋᖅᑭᓕᕐᑎᓪᓗᓂᐅᒃ,

²⁸ ᓄᕗᔭᓪᓗ ᐃᓂᒃᓴᖏᓐᓅᖅᑲᓕᕐᑎᓪᓗᓂᒋᑦ ᕿᓚᖕᒥ, ᐃᒪᕐᔪᐊᒥᓗ ᐃᑎᔪᒥ ᑯᕖᓐᓇᕐᑐᑦ ᓴᖅᑭᑎᓕᕐᑎᓪᓗᓂᒋᑦ.

²⁹ ᐃᒪᕕᐅᓪᓗ ᐃᑎᓂᕆᔭᕆᐊᖃᕐᑕᖏᑦ ᓈᒻᒪᒃᓯᓕᕐᑎᓪᓗᓂᒋᑦ, ᐃᒪᕐᔪᐊᑉ ᐅᓕᖃᑦᑕᕐᓂᒃᓴᖓᑕ ᐃᓱᓕᑦᑕᕐᕕᒃᓴᖓ ᐅᖃᐅᓯᕆᑎᓪᓗᓂᐅᒃ, ᓄᓇᕐᔪᐊᑉ ᑐᓐᖓᕕᒃᓴᖓ ᐋᖅᑭᒃᓱᓕᕐᑎᓪᓗᓂᐅᒃ ᑕᕝᕙᓃᓚᐅᕐᐳᖓ.

³⁰ ᑖᑦᓱᒪ ᓴᓂᐊᓃᓚᐅᕐᐳᖓ, ᓴᓇᔭᐅᔪᓂᒃ ᑲᒪᔨᒻᒪᕆᒃᑎᑐᑦ, ᖃᐅᑕᒫᓪᓗ ᑖᑦᓱᒪ ᖁᕕᐊᓱᒍᓐᓇᐅᑎᒋᖃᑦᑕᓚᐅᕐᐹᖓ, ᑖᑦᓱᒪᓗ ᓇᔪᕐᑕᖓᓂ ᖁᕕᐊᓱᐃᓐᓇᖃᑦᑕᕐᓗᖓ.

³¹ ᖁᕕᐊᓲᑎᖃᕐᓗᖓ ᑖᑦᓱᒪ ᓄᓇᕐᔪᐊᖁᑎᖓᓂᒃ, ᓈᒻᒪᒋᓪᓗᒋᓪᓗ ᖁᕕᐊᓲᑎᖃᕐᐳᖓ ᐃᓄᓕᒫᓂᒃ.

³² ᒫᓐᓇᓕ, ᕿᑐᕐᖓᒃᑲ, ᐅᖃᐅᓯᒃᑲ ᓈᓚᒃᓯᒋᒃ; ᖁᕕᐊᓱᒍᑎᒃᓴᖃᕐᐳᑦ ᐊᖅᑯᓯᓂᓐᓂᒃ ᒪᓕᒃᑐᑦ.

³³ ᐊᔪᕆᕐᑐᕐᑕᐅᑦᔪᑎᑎᑦ ᓈᓚᑭᑦ ᓯᓚᑐᓗᑎᓪᓗ ᑲᒪᒋᔪᓐᓃᕐᑍᓕᒃᑭᑦ.

³⁴ ᐃᓄᒃ ᖁᕕᐊᓱᒍᑎᒃᓴᖃᕐᐳᖅ ᐅᕙᓐᓂᒃ ᓈᓚᒃᑐᖅ; ᐃᑎᕐᑕᕐᕕᖁᑎᓐᓂ ᖃᐅᑕᒫᑦ ᖃᐅᔨᓮᓐᓇᕐᑐᖅ, ᐃᑎᕐᑕᕐᕕᖁᑎᒪ ᐅᒃᑯᐊᖓᑕ ᓴᓂᐊᓂ ᐅᑕᖅᑭᓗᓂ.

³⁵ ᐅᕙᓐᓂᒃ ᓇᓂᓯᔪᖅ ᐃᓅᓯᕐᒥᒃ ᓇᓂᓯᕗᖅ, ᐊᑕᓂᒧᓪᓗ ᖁᕕᐊᒋᔭᐅᓂᕐᒥᒃ ᓇᓂᓯᓪᓗᓂ.

³⁶ ᐅᕙᓐᓂᒃ ᓇᓂᓯᖏᑦᑐᖅ ᓇᖕᒥᓂᖅ ᐋᓐᓂᐊᑎᑉᐳᖅ; ᐅᕙᓐᓂᒃ ᐆᒥᓱᒃᑐᑦ ᑐᖁᒥᒃ ᐅᖓᕗᑦ.”