ᓲᓗᒨᓂᐅᑉ ᐅᖃᓪᓚᖕᓂᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᕐᓃᒃ, ᐅᖃᐅᓯᒃᑲ ᐳᐃᒍᕐᑍᓕᒃᑭᑦ, ᐱᖁᔭᒃᑲᓗ ᐊᓐᓂᕆᓗᒋᑦ ᐃᓗᒥᐅᑕᕆᒃᑭᑦ.

² ᐱᖁᔭᒃᑲ ᐱᓯᒪᒍᕕᒋᑦ ᑕᕝᕙ ᐃᓅᓂᐊᕐᐳᑎᑦ, ᐃᓕᓮᑦᔪᑎᒋᔭᒃᑲ ᐱᓯᒪᑦᓯᐊᒃᑭᑦ ᐱᓐᓇᕆᓂᕐᐹᕆᓗᒋᑦ.

³ ᕿᑎᕐᓯᕐᒥᐅᑕᑎᑐᑦ ᐊᑎᓯᒪᒃᑭᑦ ᐊᒡᒐᖕᓂ, ᐆᒻᒪᑎᒃᑯᑦ ᑎᑎᕋᕐᓗᒋᑦ ᐅᔭᖅᑲᒧᑦ ᐃᑎᕐᓴᓕᐅᕈᑎᓯᒪᔪᑎᑐᑦ.

⁴ ᓯᓚᑐᓂᖅ ᐅᖃᐅᑎᒍᒃ, “ᓇᔭᒋᕙᒋᑦ,” ᑐᑭᓯᑎᑕᐅᓂᕐᓗ ᑍᓗᒍ ᐃᓚᓐᓇᕆᔭᕐᓂᒃ.

⁵ ᓴᐳᑦᔨᔨᒋᓂᐊᕋᕕᒋᑦ ᐊᕐᓇᓂᑦ ᐅᐃᓕᖕᓂᑦ, ᓴᐳᑦᔨᔨᒋᓗᒋᑦ ᐊᕐᓇᐅᑉ ᐅᖃᐅᓯᕐᒥᒍᑦ ᐱᔪᒥᓇᕐᓴᕋᓲᑎᖏᓐᓂᑦ.

ᐊᕐᓇᖅ ᐊᓯᓐᓂᐊᕐᑎ

⁶ ᐃᒡᓗᒪ ᐃᒐᓛᖓᒍᑦ ᐃᑦᓱᐊᕋᒪ ᐳᑐᒐᓛᖏᑎᒍᑦ ᑕᑯᓐᓈᕐᑎᓪᓗᖓ,

⁷ ᑕᑯᓚᐅᕐᐳᖓ ᐊᖑᒻᒥᒃ ᐃᓅᓱᒃᑐᑦ ᐃᓚᖓᓐᓂᒃ, ᑖᑦᓱᒥᖓ ᐃᓅᓱᒃᑐᒥᒃ ᐅᑦᔨᕈᓱᓕᕐᐳᖓ ᓯᓔᑦᑐᒥᒃ.

⁸ ᑖᓐᓇ ᐱᓱᓚᐅᕐᐳᖅ ᐊᖅᑯᑎᒃᑯᑦ ᐊᕐᓇᐅᑉ ᐃᒡᓗᖓᑕ ᓴᓂᐊᒍᑦ, ᐊᖅᑯᑎᒃᑯᑦ ᐊᕐᓇᐅᑉ ᐃᒡᓗᖓᓄᑦ ᑐᕌᕐᑐᒃᑯᑦ

⁹ ᐅᓐᓄᒃᑯᑦ ᑖᕐᓯᓕᕐᑎᓪᓗᒍ, ᑍᑦᓱᒪᓂ ᐅᓐᓄᒃᑲᒥ ᑖᕐᑑᓕᓚᐅᕐᐳᖅ.

¹⁰ ᑕᑯᒋᓪᓗ, ᐊᕐᓇᐅᑉ ᐅᐸᒃᐹ, ᐊᖑᓐᓂᐊᕐᑎᑎᑐᑦ ᐊᓐᓄᕌᕐᓯᒪᓪᓗᓂ ᐊᑐᕈᒪᔭᒥᓂᒡᓗ ᐋᖅᑭᒃᓯᔭᕇᕐᓯᒪᓪᓗᓂ.

¹¹ ᓂᐱᖅᑯᕐᑐᓪᓗᓂ ᐅᐃᒪᔮᕐᓗᓂᓗ ᐃᑎᒐᖏᑦ ᐊᖏᕐᕋᕐᓯᒪᔪᒪᖏᑦᑐᑦ;

¹² ᐊᖅᑯᑎᒦᓕᕐᑐᖅ, ᓂᐅᕕᕐᕕᖕᓂᓗ, ᐊᖅᑯᑏᓪᓗ ᑎᕆᖅᑯᖏᓐᓂ ᐅᑕᖅᑭᐅᕐᐸᒃᑐᖅ.

¹³ ᐊᕐᓇᐅᑉ ᐊᖑᑦ ᐃᕿᓪᓗᒍ ᑯᓂᒃᐹ, ᑕᑯᓴᓪᓗᐊᕐᓗᒍᓗ ᐅᖃᐅᑎᕚ:

¹⁴ “ᑐᓂᕐᕈᓯᕆᐊᖃᖅᑲᐅᒐᒪ, ᐅᓪᓗᒥ ᐊᖏᕈᑎᒃᑲ ᐊᑭᓕᖅᑲᐅᕙᒃᑲ.

¹⁵ ᐊᓂᖅᑲᐅᕗᖓ ᕿᓂᕆᐊᕐᓗᑎᑦ, ᑕᑯᔪᒪᓪᓚᕆᒃᓗᑎᑦ ᐊᓱᐃᓛᒃ ᓇᓂᕙᒋᑦ.

¹⁶ ᓯᓂᒡᕕᒐᓗ ᕿᐱᓕᖅᑲᐅᕙᕋ, ᑕᕐᓴᖃᐅᑦᓯᐊᕐᑐᒥᒃ ᓯᓂᒡᕕᐅᑉ ᐅᓕᖓᓂᒃ ᐄᑦᔨᑉᑎᒥᑦ ᐱᓯᒪᔪᒥᒃ;

¹⁷ ᒪᒪᕐᓴᐅᑖᖅᑲᐅᕙᕋᓗ ᐱᖓᓱᐃᓄᑦ ᒫᕐᒧᑦ, ᐋᓘᒧᑦ ᓯᓂᒪᓐᒧᓪᓗ.

¹⁸ ᕾᓕᕆᑦ, ᐃᓐᓇᖓᖃᑎᒌᖕᓂᐊᕋᓐᓄᒃ ᐅᓪᓛᒧᑦ ᑎᑭᓪᓗᒍ; ᖁᕕᐊᓱᖕᓂᐊᕋᓐᓄᒃ ᐃᕿᒻᒥᖃᑦᑕᐅᑎᓗᓄᒃ ᓇᒡᓕᖕᓂᒃᑯᑦ.

¹⁹ ᐅᐃᒐ ᐊᖏᕐᕋᕐᓯᒪᖏᒻᒪᑦ, ᐊᐅᓪᓚᕐᓯᒪᖕᒪᑦ ᐅᖓᓯᒃᑐᒧᑦ.

²⁰ ᑮᓇᐅᔭᓂᒃ ᐅᓄᕐᑐᓂᒃ ᓇᒃᓴᓚᐅᕋᒥ; ᑕᖅᑭᖅ ᐃᓗᐃᑦᑑᓕᕐᐸᑦ ᑭᓯᐊᓂ ᐅᑎᕈᒫᕐᐳᖅ.”

²¹ ᐱᔪᒥᓇᕐᓴᕐᓂᕐᒥᓄᑦ ᐅᐃᕕᕐᕆᕚ ᐅᖃᐅᓯᖏᓐᓄᓪᓗ ᓵᓚᐅᕗᖅ; ᐅᖃᐅᓯᑦᓯᐊᕙᖕᒥᓄᑦ ᐊᖏᕐᑎᑉᐹ.

²² ᐊᕐᓇᖅ ᑕᕝᕔᓐᓇᖅ ᒪᓕᒃᓴᕐᐹ, ᐊᖑᓴᓪᓗᕐᑐᑦ ᑐᖁᑕᐅᕕᒃᓴᒥᓄᑦ ᐋᑕᐅᔪᑎᑐᑦ, ᑐᒃᑑᔭᕐᑐᑎᑐᓪᓗ ᑎᒍᔭᐅᕕᒃᓴᒥᓄᓐᖓᐅᔪᑎᑐᑦ.

²³ ᐃᕐᕋᕕᖕᒥᒍᑦ ᐱᓯᒃᑕᐅᔪᑐᑦ ᑍᒤᑉᐳᖅ; ᑎᖕᒥᐊᑐᓪᓗ ᑲᑦᓱᖎᑦᑐᒥᒃ ᓄᓗᐊᓄᑦ ᐂᔪᑐᑦ; ᖃᐅᔨᒪᓇᓂ ᑐᖁᑕᐅᓂᐊᓕᕐᓂᕐᒥᓂᒃ.

²⁴ ᒫᓐᓇ, ᐃᕐᓃᒃᑲᒃ ᓈᓚᒃᓯᓐᖓ, ᐅᖃᐅᓯᕆᔭᒃᑲᓗ ᑐᓵᑦᓯᐊᕐᓗᒋᑦ,

²⁵ ᐆᒻᒪᑏᑦ ᐊᕐᓇᒧᑦ ᑍᒤᑦᑑᑉ ᐱᓂᐊᕐᓂᖏᓐᓄᑦ ᓴᖑᑎᑕᐅᑦᑍᓕᓕ; ᑕᒻᒪᕐᑍᓕᒋᑦ ᐊᖅᑯᑎᖏᓐᓄᑦ;

²⁶ ᑍᒤᑦᑐᑦ ᐅᓄᕐᑐᓄᑦ ᐊᓯᕈᕐᑕᐅᑦᔪᑕᐅᓯᒪᕗᑦ; ᐃᓛᒃ, ᑐᖁᑎᑕᐅᓯᒪᔪᑦ ᑍᒤᑦᑐᓄᑦ ᐊᔪᖏᑦᑐᐊᓗᐃᑦ ᐅᓄᕐᐳᑦ.

²⁷ ᐊᕐᓇᐅᑉ ᑍᒤᑦᑑᑉ ᐃᒡᓗᖓ ᐃᓗᕕᕐᑕᐅᕕᖕᒧᑦ ᑐᕌᕐᐳᖅ, ᑐᖁᖓᔪᓪᓗ ᐃᓂᖓᓄᐊᕐᓂᕐᒧᑦ ᑐᕅᓐᓇᕈᑕᐅᓪᓗᓂ.