ᓲᓗᒨᓂᐅᑉ ᐅᖃᓪᓚᖕᓂᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᓱᓕ ᐅᓗᕆᐊᒋᔭᒃᓮᑦ

¹ ᐃᕐᓃᒃ, ᐃᓅᖃᑎᖕᓄᑦ ᐱᑦᔪᑦᔨᓕᕈᕕᑦ, ᓇᓪᓕᐊᑐᐃᓐᓇᒧᓪᓗ ᐊᖏᖃᑎᒌᒍᑎᓕᐅᕈᕕᑦ ᐊᑭᓕᕐᑐᐃᓂᒃᓴᕐᓄᑦ.

² ᐅᖃᕐᑕᕕᓂᑎᑦ ᐊᑐᕐᓗᒋᑦ ᑭᓯᐊᓂᐅᓕᕋᔭᕐᐳᑎᑦ, ᐅᖃᐅᓯᕆᔭᕐᓄᑦ ᕿᓚᒃᑕᐅᓯᒪᓕᕐᓂᐊᕋᕕᑦ.

³ ᐃᕐᓃᒃ, ᑕᒪᑐᒪᓐᖓᑦ ᐲᕈᒪᒍᕕᑦ ᐃᒫᒃ ᐱᓇᓱᐊᓕᕆᑦ, ᐃᓅᖃᑏᑦ ᐅᐸᒡᓗᒍ ᐃᓗᖏᕐᑐᕐᓗᑎᑦ ᕿᓄᕕᒋᓕᕈᒃ, ᐃᓅᖃᑎᕕᑦ ᐱᔪᓐᓇᕐᓂᖓᓄᑦ ᑎᒍᔭᐅᓯᒪᓕᕋᕕᑦ: ᑐᐊᕕᕐᓗᑎᑦ ᐂᓗᑎᑦ, ᐃᓅᖃᑏᑦ ᕿᓄᕕᒋᓕᕈᒃ.

⁴ ᑕᒪᑐᒧᖓ ᓯᓂᓕᕐᑍᓕᒋᑦ, ᐃᔩᒃᑭᒡᓗ ᓇᔭᖓᕐᑍᓕᓗᑎᒃ;

⁵ ᑐᒃᑐᖓᔪᑐᑦ ᓱᒃᑲᔪᑎᑐᑦ ᐊᓐᓇᒋᐊᓕᕆᑦ ᐆᒪᔪᕐᓯᐅᕐᑑᑉ ᐱᓇᓱᐊᕐᓂᖓᓂᑦ, ᑎᖕᒥᐊᑎᑐᑦ ᑎᖏᑲᐅᕐᑐᕆᐊᓕᕆᑦ ᕿᒫᓗᑎᑦ ᑎᖕᒥᐊᕐᓂᐊᕐᑎᒥᑦ.

⁶ ᖁᐱᕐᕈᒧᑦ ᐋᓐᑎᒧᑦ ᐃᓕᓴᕐᑎᑕᐅᓕᕆᑦ ᐃᕿᐊᓱᒃᑎᐅᔪᑎᑦ; ᐱᐅᓯᖏᑦ ᐃᓱᒪᒃᓴᕐᓯᐅᕈᑎᒋᓗᒋᑦ, ᓯᓚᑦᑐᓕᕆᑦ,

⁷ ᑖᒃᑯᐊ ᐊᖓᔪᖅᑳᖃᓐᖏᓚᑦ, ᑲᒪᔨᖃᕋᑎᒡᓗ, ᐊᐅᓚᑦᓯᔨᖃᓐᖏᓚᑦ.

⁸ ᐊᐅᔭᒃᑯᑦ ᓂᕿᒃᓴᒥᖕᓂᒃ ᑲᑎᕐᓱᐃᕙᒃᐳᑦ, ᑲᑎᕐᓱᕐᑕᐅᓂᑯᓂᑦ ᓂᕆᔭᒃᓴᒥᖕᓂᒃ ᑲᑎᑦᓯᕙᒃᓗᑎᒃ.

⁹ ᖃᓄᑎᒋ ᓇᓚᕈᑐᐃᓐᓇᕐᓂᐊᕐᐲᑦ, ᐃᕿᐊᓱᒃᑏ? ᖃᖓᓖᓐᓈ ᒪᑭᓪᓗᑎᑦ ᓯᓂᑐᐃᓐᓇᕈᓐᓃᕐᓂᐊᕐᐱᑦ?

¹⁰ ᕿᑦᑍᕈᓯᕋᓱᑐᐃᓐᓇᕐᓂᕋᕐᓗᓂ ᓯᓂᒐᓛᑐᐃᓐᓇᕐᓂᕋᕐᐳᖅ, ᑕᕾᕐᓯᓚᐅᑲᒡᓗᓂ ᕿᑲᓚᐅᑲᖕᓂᐊᕐᓂᕋᕐᐳᖅ.

¹¹ ᐊᔪᕐᓴᕐᓇᕐᑐᒧᑦ ᑎᑭᑕᐅᑲᓪᓚᒍᒫᕐᐳᑎᑦ ᑎᒡᓕᒃᑎᑎᑐᑦ, ᑳᓕᕐᓗᑎᑦ ᐅᓇᑕᕐᑐᒃᓴᑎᑐᑦ ᐅᓇᑕᐅᑎᓕᔭᕐᑐᑎᑐᑦ.

¹² ᐃᓅᖃᑎᒃᓴᐅᖏᑦᑐᖅ, ᐱᐅᖏᑦᑑᓪᓗᓂᓗ, ᐅᖃᐅᓯᕐᓘᑎᓂᒃ ᑭᓯᐊᓂ ᓂᓪᓕᐊᑦᔪᑎᒃᓴᑐᐊᖃᕐᐳᖅ.

¹³ ᐃᔨᒥ ᐃᒡᓗᐃᓐᓇᖓᓄᑦ ᓯᑯᓐᖏᕐᑕᕐᐸᒃᑐᖅ, ᐃᑎᒐᓂᓗ ᑐᓐᖓᑎᓪᓗᒋᑦ ᐱᓱᒃᐸᒃᑐᖅ, ᑎᑭᕐᒥᓄᑦ ᑎᒃᑯᐊᕐᑐᕐᐸᒃᓗᓂ.

¹⁴ ᐆᒻᒪᑎᒥᒍᑦ ᐱᓕᕆᕗᖅ ᐅᐃᕕᕆᒃᓯᑦᔪᑎᒃᓴᒥᓂᒃ, ᓈᒻᒪᖏᑦᑐᓂᒃ ᓇᓂᑐᐃᓐᓇᖅ ᐱᓂᐊᕐᓂᖃᕐᑎᑦᓯᕗᖅ.

¹⁵ ᐊᓯᕈᕐᑕᐅᓇᕐᑐᒧᑦ ᑎᑭᐅᑎᑲᓪᓚᒍᒫᕐᐳᖅ ᓂᕆᐅᕕᒋᓐᖏᑕᒥᒍᑦ, ᐋᓐᓂᕐᓇᕐᑐᒧᑦ ᓯᖁᑦᑎᕈᒫᕐᐳᖅ ᐋᖅᑭᒃᑕᐅᕕᒃᓴᖃᖏᑦᑐᒧᑦ.

¹⁶ ᐅᑯᐊ ᐱᖓᓲᔪᕐᑐᑦ ᐊᑕᓂᐅᑉ ᐆᒥᒋᕔᑦ, 7ᖓᓪᓗ ᓇᕐᕈᓇᕐᓂᕋᕐᑕᖓᓃᑉᐳᖅ.

¹⁷ ᐱᐅᔪᕆᓂᒃᑯᑦ ᑕᑯᓐᓇᕐᑐᖅ, ᓴᒡᓗᑐᔪᖅ, ᐊᒡᒊᓪᓗ ᐸᓯᔭᒃᓴᐅᖏᑦᑐᒥᒃ ᐃᓄᐊᕐᑐᑦ.

¹⁸ ᐆᒻᒪᑎᒥᒍᑦ ᐱᐅᖏᑦᑐᓕᓂᕐᒥᒃ ᐃᓱᒪᒃᓴᕐᓯᐅᕐᑐᖅ, ᐱᓱᖃᑦᑕᕐᑐᖅ ᐱᐅᖏᑦᑐᓂᒃ ᐱᓇᓱᐊᑲᐅᕐᑐᕈᒪᓪᓗᓂ.

¹⁹ ᖃᐅᔨᓯᒪᓐᖑᐊᕐᓗᓂ ᓱᓕᖏᑦᑐᓂᒃ ᐅᖃᐅᓯᖃᕐᑐᖅ, ᐃᓅᖃᑎᒥᓂᒃ ᐃᓅᖃᑎᒌᑦᓯᐊᕈᓐᓃᕐᓇᕐᑐᓂᒃ ᐱᒋᐊᕐᑎᑦᓯᖃᑦᑕᕐᑐᖅ.

ᐊᓯᓐᓂᐊᕐᑍᓕᖁᔨᓂᖅ

²⁰ ᐃᕐᓃᒃ, ᐊᑖᑕᕕᑦ ᐱᖁᔭᖏᑦ ᒪᓕᑦᓯᐊᒃᑭᑦ, ᐊᓈᓇᕕᓪᓗ ᐊᔪᕆᕐᑐᐃᑦᔪᑎᖏᑦ ᓴᒃᑯᑦᑍᓕᓗᒋᑦ.

²¹ ᐆᒻᒪᑎᖕᓄᑦ ᕿᓚᒃᓱᕐᓯᒪᑦᓮᓐᓇᒃᑭᑦ, ᖁᖓᓯᕐᓂᓗ ᐅᔭᒥᒋᓗᒋᑦ.

²² ᐱᓱᓕᕈᕕᑦ ᑕᓯᐅᕐᑎᒋᓂᐊᕋᕕᒋᑦ; ᓯᓂᓕᕈᕕᓪᓗ ᑲᒪᒋᔨᒋᓂᐊᕋᕕᒋᑦ, ᑐᐸᒃᑯᕕᓪᓗ ᐃᓕᖕᓄᑦ ᐅᖃᓪᓚᖃᑦᑕᕐᓂᐊᕐᒪᑕ.

²³ ᐱᖁᔧᑦ ᓇᓂᕈᐊᖑᕗᑦ, ᐊᔪᕆᕐᑑᓰᓪᓗ ᖃᐅᒻᒪᖅᑯᑎᐅᓪᓗᑎᒃ, ᐃᓂᕐᑎᕐᑕᐅᓃᓪᓗ ᐋᖅᑭᒋᐊᕐᓯᓃᑦ ᐃᓅᑦᔪᑎᒃᓴᐅᓪᓗᑎᒃ.

²⁴ ᐊᕐᓇᒥᑦ ᐊᖑᓐᓂᐊᕈᒪᔪᒥᑦ ᓴᐳᑦᔨᔨᒋᓂᐊᕋᕕᒋᑦ, ᐊᖑᓐᓂᐊᕐᑎᐅᓪᓗ ᐅᖃᓪᓚᖕᓂᒃᑯᑦ ᐃᒃᓯᓵᕆᓂᖓᓂᑦ.

²⁵ ᐃᓂᖁᓇᕐᓂᖓ ᐆᒻᒪᑎᒃᑯᑦ ᐃᒃᓯᒋᓕᕐᑍᓕᒍᒃ, ᖃᓪᓗᕐᓱᕐᓂᖓᓄᓪᓗ ᐅᐃᕕᕆᔭᐅᑦᑍᓕᒋᑦ ᑖᑦᓱᒧᖓ.

²⁶ ᐊᑭᓕᕐᑕᐅᓪᓗᓂ ᓄᓕᐊᒐᖅ ᓂᐊᖁᔮᕐᑖᕈᑎᒃᓴᒥᒃ ᐊᑭᓕᕐᑕᐅᔪᓐᓇᕐᐳᖅ, ᐊᖑᓐᓂᐊᕐᑎᓕ ᐊᕐᓇᖅ ᑎᒡᓕᒃᐳᖅ ᐊᖑᑎᐅᑉ ᐃᓅᓯᖓᓂᒃ.

²⁷ ᐊᖑᑦ ᑭᓂᕐᒥᐊᕈᓐᓇᕐᐹ ᐃᑯᐊᓚᔪᒥᒃ ᐊᓐᓄᕌᖏᓪᓗ ᐃᑭᑕᐅᖏᓪᓗᑎᒃ?

²⁸ ᐊᐅᒪᑎᒍᑦ ᐱᓱᒃᑐᖃᕈᓐᓇᕐᐹ ᐊᓗᕐᒥᒍᓪᓗ ᐆᓐᓂᕐᑖᖏᓪᓗᓂ?

²⁹ ᑍᒤᒃᑭᕗᖅ ᐃᓅᖃᑎᒥ ᓄᓕᐊᖓᓂᒃ ᐃᓐᓇᖓᖃᑎᓕᒃ, ᑍᒤᑦᑐᒥᒃ ᐊᒃᑐᐃᔪᖅ ᓱᒋᐊᕐᑕᐅᑦᑍᓕᓂᐊᓐᖏᓚᖅ.

³⁰ ᑎᒡᓕᒃᑎ ᓇᕐᕈᒋᔭᐅᓕᕋᔭᓐᖏᓛᖅ ᑳᖕᓂᕐᒥᓄᑦ ᑎᒡᓕᒡᓗᓂ ᓂᕆᒃᐸᑦ?

³¹ ᖃᐅᔨᔭᐅᒍᓂᓗ ᐅᑎᕐᑎᑦᓯᖁᔭᐅᓂᐊᕐᐳᖅ ᐱᓚᐅᕐᑕᖏᑕ 7ᐃᕐᑐᓪᓗᐊᕐᑕᖏᓐᓂᒃ, ᐃᒡᓗᒥᐅᑕᓕᒫᒥᓂᒃ ᐊᑭᓕᐅᑎᖃᕋᓗᐊᕐᐸᑦ.

³² ᐃᓄᒃ ᐊᓯᓐᓂᐊᕐᑐᖅ ᓯᓔᑦᑐᕐᔪᐊᖑᕗᖅ, ᑍᒤᓕᐅᕐᑐᖅ ᐃᓅᓯᕐᒥᓂᒃ ᐊᓯᕈᐃᕗᖅ.

³³ ᐋᓐᓂᐊᕈᑎᒃᓴᕐᑖᕐᓂᐊᕐᐳᖅ ᐅᐱᒋᔭᐅᓂᖃᕈᓐᓃᕐᓗᓂᓗ, ᑲᓐᖑᓇᕐᑐᒦᓐᓂᖓᓗ ᐲᕐᑕᐅᔪᓐᓇᕐᓂᐊᓐᖏᓚᖅ.

³⁴ ᓯᖕᓇᓂᕐᒧᑦ ᐅᐃᖓ ᓂᓐᖓᐅᒪᕕᒃᔪᐊᓕᕈᓐᓇᕐᒪᑦ, ᐊᑭᓂᐊᕈᒪᓕᕈᓂᓗ ᐊᑦᑕᕆᔭᖃᕐᓂᐊᓐᖏᓚᖅ.

³⁵ ᐊᑭᓕᕐᑕᐅᓇᓱᒃᑲᓗᐊᕈᓂ ᐱᔪᒪᓂᐊᓐᖏᓛ, ᐃᓚᓐᓂᕐᓴᐅᑎᐅᓇᓱᒃᑐᖅ ᐊᖏᔫᒐᓗᐊᕐᐸᑦ ᓂᓐᖓᐅᒪᓂᖓ ᐃᑯᓪᓚᕐᑎᑕᐅᓂᐊᓐᖏᓚᖅ.