ᓲᓗᒨᓂᐅᑉ ᐅᖃᓪᓚᖕᓂᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦᐊᓯᓐᓂᐊᕐᓂᐅᑉ ᐅᓗᕆᐊᓇᕐᓂᖓ 1 ᐃᕐᓃᒃ, ᑐᓵᑦᓯᐊᕋᓱᐊᕈᒃ ᓯᓚᑐᓂᒃᑯᑦ ᐅᖃᓪᓚᖕᓂᕋ, ᓯᐅᑏᒃᑭᒃ ᒪᓂᓕᒃᑭᒃ ᑐᑭᓯᑎᑕᐅᓯᒪᓂᕆᔭᓐᓄᑦ. 2 ᓂᕈᐊᕈᓐᓇᕐᓂᖅ ᐱᓯᒪᑦᓯᐊᕐᓂᐊᕋᕕᐅᒃ, ᐅᖃᐅᓯᕐᑎᓪᓗ ᓴᐳᑎᔭᐅᓯᒪᓂᐊᕐᒪᑕ ᖃᐅᔨᒪᓂᕐᒧᑦ. 3 ᐊᕐᓇᐅᑉ ᐊᖑᓐᓂᐊᕐᑑᑉ ᐅᖃᐅᓯᖏᑦ ᐃᒍᑦᑕᐅᑉ ᓰᕐᓇᐅᑎᖓᑐᑦ ᒪᒪᕐᑎᒋᒐᓗᐊᕐᐸᑕ, ᐅᖃᐅᓯᖏᑦ ᐅᕐᓱᕐᑎᕐᓯᒪᔪᑎᑐᑦ ᐱᐊᒃᑎᒋᒐᓗᐊᕐᐸᑕ. 4 ᐱᔭᕇᕐᓂᖓᓕ ᓱᖓᕐᑎᑐᑦ ᖃᒃᑭᓐᓇᕐᑎᒋᕗᖅ, ᓴᕕᒡᔪᐊᑎᑐᑦ ᐃᒡᓗᒃᑐᑦ ᑮᓇᓕᒃᑐᑦ ᐃᐱᒃᑎᒋᓪᓗᓂ. 5 ᐊᑐᕐᑕᖓ ᑐᖁᖓᔪᑦ ᐃᓂᖓᓄᑦ ᑐᕌᕐᑎᑦᓯᕗᖅ, ᐱᓱᒡᕕᒋᔭᖓᓗ ᐃᓗᕕᕐᒧᑦ ᑐᕌᖓᓪᓗᓂ. 6 ᐃᓅᓯᖓ ᐃᓅᓯᖃᕐᓇᕐᑐᒧᑦ ᑐᕌᖓᓐᖏᓚᖅ, ᐱᐅᓯᖃᕐᐳᖅ ᓴᖑᐃᕐᑐᒥᒃ, ᐊᑐᕐᓂᐊᕐᑕᒥᓂᒡᓗ ᖃᐅᔨᒪᓇᓂ. 7 ᒫᓐᓇᓗ ᓈᓚᒃᓯᓐᖓ, ᐃᕐᓂᒃᑲ, ᐅᖃᐅᓯᕆᔭᒃᑲᓗ ᐳᐃᒍᕐᑍᓕᓯᐅᒃ. 8 ᐃᓅᓯᓯ ᐅᖓᓯᒃᑎᓯᐅᒃ ᐊᕐᓇᒥᑦ ᑍᒤᑦᑐᒥᑦ, ᐃᒡᓗᖓᑕᓗ ᐅᒃᑯᐊᖓ ᖃᒡᓕᑦᑍᓕᓗᒍ. 9 ᐅᐱᒋᔭᐅᓂᖅ ᐱᓯᒪᔧᑦ ᐊᓯᖕᓄᑦ ᑐᓂᔭᐅᖁᓇᒍ, ᐊᕐᕌᒍᐃᓪᓗ ᐃᓅᕕᒋᓂᐊᕐᑕᑎᑦ ᓇᒡᓕᖕᓂᖃᖏᑦᑐᓄᑦ ᐊᑐᕐᑕᐅᓕᖁᓇᒋᑦ. 10 ᐃᓅᖃᑎᒋᓐᖏᑕᕐᓄᑦ ᐊᔪᕐᓴᖏᑦᔪᑎᒃᓴᑎᑦ ᐊᑐᕐᑕᐅᓕᖁᓇᒋᑦ, ᐊᒃᓱᕈᕐᓗᑎᑦ ᐱᓇᓱᐊᓚᐅᕐᑕᑎᑦ ᐊᓯᖕᓄᑦ ᐱᔭᐅᑐᐃᓐᓇᖁᓇᒋᑦ. 11 ᐊᔪᓕᕈᕕᑦ ᑕᕝᕙ ᕿᒃᓵᓕᕈᒫᕐᐳᑎᑦ, ᑎᒦᑦ ᒪᑭᑕᔪᓐᓁᓪᓕᓗᓂ ᓇᓔᓐᓇᓕᕈᕕᑦ. 12 ᐅᖃᓕᕈᒫᕐᐳᑎᑦ, “ᓱᖕᒪᒃᑭᐊᖅ ᐋᖅᑭᒋᐊᕐᑕᐅᑦᔪᑎᒋᓇᓱᒃᑕᓐᓂᒃ ᐆᒥᓱᒃᐸᖕᓂᕐᐳᖓ? ᐃᓂᕐᑎᕐᑕᐅᑦᔪᑎᓐᓂᒡᓗ ᐆᒻᒪᑎᒃᑯᑦ ᓇᕐᕈᕙᒃᓗᖓ. 13 ᐃᓕᓮᔨᒪ ᓂᐱᖏᓐᓂᒃ ᓈᓚᖃᑦᑕᓚᐅᖏᓐᓇᒪ ᐊᔪᕆᕐᑐᕐᑎᒋᔭᒃᑲᓗ ᓈᓚᒃᐸᓚᐅᖏᓐᓇᒃᑭᑦ. 14 ᓯᖁᒥᓯᒪᓂᓪᓚᕆᖕᒧᑦ ᑎᑭᓚᐅᕐᐳᖓ, ᐃᓄᖃᑎᒌᓂ ᑲᑎᒪᔪᕐᔪᐊᓂ.” 15 ᐃᒥᕐᑕᕐᕕᖁᑎᕕᑦ ᓄᓕᐊᕕᑦ ᐊᓯᐊᓂᒃ ᑲᒪᖃᑦᑕᖏᓪᓗᑎᑦ, ᓇᖕᒥᓂᖅ ᐃᒥᕐᑕᕐᕕᓕᐊᕆᓯᒪᔧᑦ ᑖᓐᓇᑐᐊᖅ ᐃᒥᕐᑕᕐᕕᒋᖃᑦᑕᕐᓗᒍ. 16 ᐃᒥᕐᑕᕐᕕᖁᑏᑦ ᑕᒪᐅᖓᑐᐃᓐᓇᖅ ᑯᕕᔪᑐᑦ ᑍᒤᑎᓐᓂᐊᕐᓇᒍ, ᐊᖅᑯᑎᓄᓪᓗ ᑕᒪᐅᖓᑐᐃᓐᓇᖅ ᑰᓕᕐᑐᑎᑐᑦ. 17 ᓇᖕᒥᓂᖅ ᐃᓕᖕᓂᑦ ᐱᔪᑦ ᐃᓕᖕᓄᑦ ᐃᑲᔪᓕᕐᑐᒃᓴᐅᕗᑦ, ᐃᓅᖃᑎᒋᓐᖏᑕᑦᓯᓐᓄᑦ ᑐᕌᖓᑐᐃᓐᓇᓕᖏᓪᓗᑎᒃ. 18 ᐃᒥᕐᑕᕐᕖᑦ ᓄᓕᐊᑦ ᖁᕕᐊᒋᓗᒍ ᓮᒻᒪᕐᑎᑕᐅᓯᒪᒋᑦ, ᓄᓕᐊᓪᓗ ᐅᕕᒃᑲᐅᓂᕐᓂᑦ ᓄᓕᐊᕐᑖᕆᓯᒪᔧᑦ ᖁᕕᐊᒋᓗᒍ. 19 ᓄᕐᕋᓕᐅᑉ ᓄᕐᕋᕐᒥᓂᒃ ᖁᕕᐊᓲᑎᖃᕐᓂᖓᑐᑦ, ᑍᒪᓐᖓᓕᒫᖅ ᑐᓐᖓᓇᕐᓂᖓ ᓈᒻᒪᒃᓯᑦᔪᑎᒋᖃᑦᑕᕈᒃ, ᓇᒡᓕᒍᓱᖕᓂᖓᓄᑦ ᐃᕿᑕᐅᓯᒪᓗᑎᑦ. 20 ᓱᖕᒪᑦ ᐃᕐᓃᒃ, ᐊᖑᓐᓂᐊᕐᑎᒥᒃ ᐃᕿᑦᑎᔪᒃᓴᐅᕖᑦ? ᓱᖕᒪᓪᓗ ᐊᓯᕕᑦ ᓄᓕᐊᖓᑕ ᑐᓐᖓᓇᕐᓂᖓᓂᒃ ᐱᔪᒥᒋᔭᖃᕐᓂᕐᓴᐅᔪᒃᓴᐅᕖᑦ? 21 ᐊᖑᑎᐅᑉ ᐱᓂᐊᕐᓂᖏᑦ ᐊᑕᓂᐅᑉ ᐃᔨᖏᒃᑕ ᓵᖓᓃᑉᐳᑦ, ᐊᖅᑯᑎᒋᔭᓕᒫᖏᓪᓗ ᑕᑯᓐᓇᕐᐰᑦ. 22 ᐱᐅᖏᑦᑐᖅ ᓇᖕᒥᓂᖅ ᐊᔪᕐᑐᓕᓂᕐᒥᓄᑦ ᑎᒍᔭᐅᑎᑉᐳᖅ, ᓇᖕᒥᓂᖅ ᓄᓗᐊᓕᐊᕆᓯᒪᔭᒥᓄᑦ ᐊᔪᕐᓂᕐᒧᑦ ᐃᐱᕐᑕᐅᕗᖅ. 23 ᐊᔪᕆᕐᑐᕐᑕᐅᓯᒪᖏᓐᓂᕐᒧᑦ ᑐᖁᒧᑦ ᑎᑭᓚᕿᕗᖅ, ᓯᓔᑦᑑᓗᐊᕐᓂᖓᑕᓗ ᓇᖕᒥᓂᖅ ᑐᖁᑎᑉᐹ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society