ᓲᓗᒨᓂᐅᑉ ᐅᖃᓪᓚᖕᓂᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓚᑐᓂᐅᑉ ᐱᕙᓪᓕᕈᑎᒃᓴᖃᕐᓂᖓ

¹ ᕿᑐᕐᖓᒃᑳ, ᐊᑖᑕᑦᓯ ᐊᔪᕆᕐᑐᐃᑦᔪᑎᒋᔭᖏᑦ ᓈᓚᒃᓯᐅᒃ, ᑐᓵᓇᓱᐊᑦᓯᐊᕐᓗᒋᓪᓗ ᖃᐅᔨᓂᐊᕋᕕᑦ ᑐᑭᓯᑎᑕᐅᓂᕐᒥᒃ.

² ᐱᐅᔪᓂᒃ ᐊᑐᒐᒃᓴᓂᒃ ᐊᔪᕆᕐᑐᕋᒃᑭᑦ, ᑍᒤᒻᒪᑦ ᐊᔪᕆᕐᑐᐃᑦᔪᑎᒋᔭᒃᑲ ᐳᐃᒍᕐᑍᓕᒃᑭᑦ.

³ ᐊᑖᑕᒪ ᐃᒡᓗᖓᓂ ᓄᑲᑉᐱᐊᖑᑎᓪᓗᖓ, ᓇᒡᓕᒋᔭᐅᓚᐅᕐᐳᖓ ᐊᓈᓇᒪ ᕿᑐᕐᖓᑐᐊᕆᑎᓪᓗᓂᖓ.

⁴ ᐊᔪᕆᕐᑐᐊᕆᓪᓗᓂᖓ ᐅᖃᐅᑦᔪᕐᐸᓚᐅᕐᐹᖓ, “ᐅᖃᐅᓯᕆᔭᒃᑲ ᐆᒻᒪᑎᖕᓂ ᐱᓯᒪᑦᓯᐊᒃᑭᑦ, ᐱᖁᔭᒃᑲ ᐱᓯᒪᑦᓯᐊᕈᕕᒋᑦ ᑕᕝᕙ ᐃᓅᓂᐊᕐᐳᑎᑦ.

⁵ ᓯᓚᑐᓂᖅ ᐱᒋᒍᒃ, ᑐᑭᓯᑎᑕᐅᓂᕐᓗ, ᐅᖃᐅᓯᕆᔭᒃᑲ ᐳᐃᒍᕐᑍᓕᓗᒋᑦ ᑐᓄᐃᓐᓇᕐᑍᓕᒃᑭᑦ.

⁶ ᖁᔭᓈᕐᑍᓕᒍᒃ, ᑕᕝᕙ ᐱᓯᒪᔭᐅᑦᓯᐊᕐᓂᐊᕐᐳᑎᑦ ᑖᑦᓱᒧᖓ, ᓇᒡᓕᒋᓗᒍ ᐱᒋᑦ ᑕᕝᕙ ᓴᐳᑎᓯᒪᓂᐊᕐᐹᑎᑦ.

⁷ ᓯᓚᑦᑐᕐᐸᓪᓕᐊᓂᖅ ᐱᒋᐊᕐᕕᖃᕐᐳᖅ ᓯᓚᑐᓂᕐᒥᒃ ᑎᒍᓯᓂᕐᒥᒃ; ᖃᓄᐃᑦᑐᑐᐃᓐᓇᓂᒃ ᐱᒐᓗᐊᕈᕕᑦ, ᑐᑭᓯᑎᑕᐅᓂᖅ ᑎᒍᒥᐊᕈᒃ.

⁸ ᓯᓚᑐᓂᖅ ᐊᖏᒡᓕᑎᕈᕕᐅᒃ ᑕᕝᕙ ᖁᕙᕐᑎᓐᓂᐊᕐᐹᑎᑦ, ᐅᐱᒋᓂᐊᕐᐹᑎᑦ ᐃᕿᒻᒥᓂᐊᕈᕕᐅᒃ.

⁹ ᑖᑦᓱᒪ ᓂᐊᖂᓯᕐᓂᐊᕐᐹᑎᑦ ᑕᑯᒥᓇᕐᑐᕐᔪᐊᕐᒥᒃ, ᐊᖓᔪᖅᑳᕐᔪᐊᕐᓯᐅᑎᒥᒡᓗ ᓂᐊᖁᕐᒥᐅᑦᓯᕐᓂᐊᕐᐹᑎᑦ.”

¹⁰ ᐃᕐᓃᒃ, ᓈᓚᒋᑦ, ᐅᖃᓯᕆᔭᒃᑲᓗ ᐃᓚᓕᐅᕐᓗᒋᑦ, ᐊᕐᕌᒍᓂᒃ ᐅᓄᕐᑐᓂᒃ ᐃᓅᓂᐊᕋᕕᑦ.

¹¹ ᐊᔪᕆᕐᑐᓚᐅᕐᐸᒋᑦ ᓯᓚᑦᑐᕐᐸᓪᓕᐊᓇᕐᑐᓂᒃ, ᑕᓯᐅᓚᐅᕐᐸᒋᑦ ᓈᒻᒪᓈᑦᓯᐊᕐᑐᒃᑯᑦ ᐊᖅᑯᑎᒃᓴᒥᒃ.

¹² ᐱᓱᓕᕈᕕᑦ ᐊᖅᑯᑎᒋᔭᒃᑯᑦ ᐊᒡᕕᐊᕐᑕᐅᓂᐊᓐᖏᓚᑎᑦ, ᐅᓪᓚᒃᓯᒍᕕᓪᓗ ᐹᓪᓚᖕᓂᐊᓐᖏᓚᑎᑦ.

¹³ ᐊᔪᕆᕐᑐᕐᑕᐅᑦᔪᑎᒋᔭᑎᑦ ᐱᓯᒪᑦᓯᐊᒃᑭᑦ, ᓴᒃᑯᑦᑍᓕᓗᒋᑦ; ᑎᒍᒥᐊᕈᒃ ᐃᓅᓯᖃᕈᑎᒋᒐᕕᐅᒃ.

¹⁴ ᐱᐅᖏᑦᑐᑦ ᐊᖅᑯᓯᓂᖓᓄᑦ ᐃᑎᕐᑍᓕᒋᑦ, ᐱᐅᖏᑦᑐᓪᓗ ᐊᑐᕐᑕᖓᑦᑎᒍᑦ ᐃᓅᑦᑍᓕᓗᑎᑦ.

¹⁵ ᐃᓕᖅᑯᓯᖏᑦ ᐊᑐᕐᑍᓕᓗᒋᑦ, ᐊᖅᑯᑎᒋᔭᖓᒎᕐᑍᓕᒋᑦ, ᐊᑐᕐᑕᖓᑦ ᑐᓄᓪᓗᒍ, ᑲᔪᓯᑐᐃᓐᓇᕆᑦ.

¹⁶ ᓯᓂᓕᕐᓂᐊᖏᒻᒪᑕ ᐱᐅᖏᑦᑐᒥᒃ ᐊᑑᑎᓚᐅᖅᑳᕋᑎᒃ; ᓯᓂᒍᒪᓕᕐᓂᐊᓐᖏᓚᓪᓗ ᐃᓄᖕᒥᒃ ᐹᓪᓚᒃᑎᑦᓯᓚᐅᖅᑳᕋᑎᒃ.

¹⁷ ᓂᕿᖃᕐᒪᑕ ᓂᐊᖂᔭᒥᒃ ᐱᐅᖏᑦᑐᓕᓐᓇᕐᑐᒥᒃ; ᐸᐅᕐᖎᓪᓗ ᐃᑦᑎᖓᓂᒃ ᐃᒥᕐᐸᒃᓗᑎᒃ ᑲᑉᐱᐊᓱᒃᑎᑦᓯᓂᕐᒥᒃ.

¹⁸ ᓈᒻᒪᓈᑦᓯᐊᕐᑐᒥ ᐃᓅᔪᑦ ᐊᑐᕐᑕᖓᑦ ᓯᕿᓂᕐᒧᑦ ᓄᐃᕕᐅᓕᕐᑐᑎᑐᑦ ᑍᒤᑉᐳᖅ, ᖃᐅᒻᒪᒃᑎᑕᐅᕙᓪᓕᐊᕗᖅ ᐅᓪᓗᓪᓗᐊᕈᕐᐸᓪᓕᐊᔪᒧᑦ ᖃᐅᒻᒪᒌᑦᓯᐊᓕᕐᕕᐅᔪᑎᑐᑦ.

¹⁹ ᐱᐅᖏᑦᑐᓕᔪᓪᓕ ᐊᑐᕐᑕᖓᑦ ᐃᑎᔪᐊᓗᖕᒥᒃ ᑖᕐᑐᐊᓗᒃᑎᑐᑦ ᑍᒤᑉᐳᖅ, ᖃᐅᔨᒪᔪᓐᓇᓐᖏᓚᓪᓗ ᓱᓇᒧᑦ ᐹᓪᓚᖃᑦᑕᕐᒪᖔᕐᒥᒃ.

²⁰ ᐃᕐᓃᒃ, ᐅᖃᐅᓯᒃᑲ ᓈᓚᑦᓯᐊᒃᑭᑦ; ᓈᓚᑦᓯᐊᕐᓗᒋᓪᓗ ᐅᖃᕐᑕᒃᑲ.

²¹ ᐃᓕᖕᓂᑦ ᐅᖓᓯᒃᓯᑎᑦᑍᓕᒃᑭᑦ, ᐆᒻᒪᒻᒥᐅᑕᕆᑦᓯᐊᕐᓗᒋᑦ ᐱᓯᒪᒃᑭᑦ.

²² ᓇᓂᓯᔪᓄᑦ ᐃᓅᓯᒃᓴᐅᖕᒪᑕ, ᑎᒥᖏᓐᓄᓪᓗ ᐋᖅᑭᒃᑕᐅᑦᔪᑎᒃᓴᐅᓪᓗᑎᒃ.

²³ ᐆᒻᒪᒻᒥᐅᑕᑎᑦ ᐱᓯᒪᑦᓯᐊᒃᑭᑦ ᐊᔪᐃᓐᓇᕐᓗᑎᑦ, ᑕᕝᕙᓐᖓᑦ ᐃᓅᓯᖃᕐᓇᕐᑐᖅ ᑰᖕᒪᑦ.

²⁴ ᓱᓕᖏᑦᑐᓂᒃ ᐅᖃᐅᓯᖃᕐᑍᓕᒋᑦ, ᒥᑕᐅᑎᒃᓴᕐᓂᖅ ᐅᐃᕕᕆᒃᓯᓂᕐᓗ ᐃᓕᖕᓂᑦ ᐅᖓᓯᒃᑎᒃᑭᑦ.

²⁵ ᐃᔩᒃᑭᒃ ᑐᑭᒧᓪᓗᐊᖅ ᑕᑯᓐᓇᑦᓯᐊᕐᓗᑎᒃ ᐃᓅᒋᑦ, ᑕᑯᓐᓇᕐᓗᑎᓪᓗ ᑐᑭᒧᑦ ᓯᕗᒧᓪᓗᐊᖅ ᓯᕗᓂᕐᓄᑦ.

²⁶ ᐊᑐᕐᓂᐊᕐᑍᑦ ᐃᓱᒪᒃᓴᕐᓯᐅᕈᑎᒋᑦᓯᐊᕐᓗᒍ ᐱᖃᑦᑕᕆᑦ, ᑕᕝᕙ ᐊᑐᕐᑕᓕᒫᑎᑦ ᓇᖏᐊᕐᓇᕐᓂᐊᓐᖏᓚᑦ.

²⁷ ᓇᓪᓕᐊᓐᓄᑐᐃᓐᓇᖅ ᓴᐅᒥᒧᑦ ᑕᓕᕐᐱᒧᓪᓗ ᓴᖑᑦᑍᓕᓗᑎᑦ; ᐱᐅᖏᑦᑐᑦ ᐊᖅᑯᑎᖕᓃᑦᑐᑦ ᓴᓂᖅᑯᑉᐸᒡᓗᒋᑦ.