ᓲᓗᒨᓂᐅᑉ ᐅᖃᓪᓚᖕᓂᖏᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᒡᒍᕆᐅᑉ ᓯᓚᑐᓂᖓ

¹ ᐊᒍᕆᐅᑉ ᐅᖃᐅᓯᖏᑦ ᔮᑭᐅᑉ ᒫᓴᒥᐅᑕᐅᑉ ᐃᕐᓂᖓᑕ, ᐊᖑᑦ ᐃᒫᒃ ᐅᖃᕐᐳᖅ: “ᑕᖃᕗᖓ ᒎᑏ, ᑕᖃᕗᖓ ᒎᑏ, ᖃᓄᖅ ᓵᓚᖃᕈᓐᓇᕐᐳᖓ?”

² ᓇᓗᖏᓐᓇᒪ ᓯᓔᓗᐊᒧᑦ ᐃᓅᔪᒃᓴᐅᖏᓐᓇᒪ. ᐃᓅᓪᓗ ᖃᐅᔨᒪᓂᖓᑐᑦ ᖃᐅᔨᒪᓇᖓ.

³ ᓯᓚᑐᓂᕐᒥᒃ ᐃᓕᑦᓯᓚᐅᖏᓐᓇᒪ, ᖃᐅᔨᒪᓇᖓᓗ ᑖᑦᓱᒥᖓ ᐃᑦᔪᕐᓁᑦᑐᒥᒃ.

⁴ ᑭᓇ ᕿᓚᓕᐊᓚᐅᕐᓯᒪᕚ ᐊᒻᒪ ᐅᑎᕐᒥᓗᓂ ᓄᓇᒧᑦ? ᑭᓇ ᐊᓄᕆᒥᒃ ᐊᒡᒐᖕᒥᓄᑦ ᑎᒎᖅᑬᔪᓐᓇᕐᐹ? ᑭᓇ ᐃᒥᕐᒥᒃ ᐊᓐᓄᕌᒥᓄᑦ ᕿᓚᒃᓱᐃᓯᒪᕚ? ᑭᓇ ᑲᑎᑦᓯᓯᒪᕙ ᐃᒪᕐᔪᐊᕐᒥᒃ ᐊᓐᓄᕌᒥᓄᑦ? ᑭᓇ ᐋᖅᑭᒃᓯᓯᒪᕙ ᓄᓇᕐᔪᐊᑉ ᑭᒡᓕᖏᓐᓂᒃ? ᑭᓇᒥᒃ ᐊᑎᖃᕐᐸ, ᐃᕐᓂᖓᓗ ᑭᓇᐅᕙ?

⁵ ᒎᑎᐅᑉ ᐅᖃᐅᓯᖏᑦ ᓇᓗᓁᕐᓗᑎᒃ ᑕᒪᕐᒥᒃ ᓱᓕᕗᑦ; ᓴᐴᓗᑕᒃᓴᐅᕗᓪᓗ ᑖᑦᓱᒥᖓ ᑕᑎᖃᕐᑐᓄᑦ ᑕᒤᓐᓄᑦ.

⁶ ᐅᖃᐅᓯᖏᓐᓂ ᐅᖃᕐᓯᒪᖏᑦᑐᒥᒃ ᐃᓚᓯᓂᐊᕐᓇᒃ, ᑖᑦᓱᒧᖓ ᓱᐊᒃᑕᐅᖁᓇᒃ, ᓴᒡᓗᓲᒥᒡᓗ ᑍᔭᐅᓕᖁᓇᒃ.

ᓱᓕ ᐅᖃᓪᓚᖕᓃᑦ

⁷ ᒪᕐᕉᖕᓂᒃ ᕿᓄᕕᒋᕙᒋᑦ; ᕿᐱᓗᒃᑍᓕᓐᖓ ᑖᒃᑯᓂᖓ ᑐᖁᖅᑳᕐᑎᓐᓇᖓ:

⁸ ᓱᓕᖏᓐᓂᖅ ᓴᒡᓗᓂᕐᓗ ᐅᕙᓐᓂᑦ ᐲᕐᓗᒋᑦ ᐅᖓᓯᒃᑎᒃᑭᑦ; ᐊᔪᕐᓴᓕᕐᑎᓐᓂᐊᕐᓇᖓ ᐊᒃᓱᐃᓕᑎᓐᓂᐊᕐᓇᖓᓗ; ᓂᕆᑎᓐᖓᓕ ᓂᕿᒥᒃ ᐱᔭᕆᐊᖃᕐᑕᓐᓂᒃ,

⁹ ᐊᕿᐊᑦᑐᓗᐊᕈᒪ ᐃᓕᖕᓂᒃ ᐃᒃᐱᒍᓱᒍᓐᓃᖁᓇᖓ, ᐅᖃᓕᖁᓇᖓᓗ, “ᑭᓇ ᐊᑕᓂᐅᕙ?” ᐅᕝᕙᓗ ᐊᔪᕐᓴᓗᐊᓕᕈᒪ ᑎᒡᓕᖃᑦᑕᓕᖁᓇᖓ, ᒎᑎᒪᓗ ᐊᑎᖓᓂᒃ ᐊᑐᕐᓂᕐᓗᓕᖁᓇᖓ.

¹⁰ ᐱᔨ ᓴᒡᓗᑦᔪᑎᒋᑦᑍᓕᒍᒃ ᐊᖓᔪᖅᑳᖓᓄᑦ, ᑖᑦᓱᒧᖓ ᐅᖃᕐᓂᕐᓘᑦᔭᐅᓕᕈᕕᑦ, ᐸᓯᔭᒃᓴᓐᖑᕐᑎᑕᐅᖁᓇᒃ.

¹¹ ᐃᓄᒃᑕᖃᕐᐳᖅ ᐊᑖᑕᒥᖕᓂᒃ ᐃᓱᒪᓂᕐᓗᒡᕕᖃᕐᑐᓂᒃ, ᐊᓈᓇᒥᖕᓂᒡᓗ ᓮᒻᒪᕐᑎᑦᓯᖏᑦᑐᓂᒃ.

¹² ᐃᓄᖃᕆᕗᖅ ᐃᒻᒥᖕᓂᒃ ᐸᓯᔭᒃᓴᐅᓂᖃᕋᓱᒋᖏᑦᑐᓂᒃ, ᓴᓗᒤᓐᓂᕐᒥᖕᓂᑦ ᓴᓗᒻᒪᕐᑕᐅᓚᐅᕐᓯᒪᖏᑦᑐᓂᒃ.

¹³ ᐃᓄᖃᕆᕗᖅ ᐃᒻᒥᖕᓂᒃ ᐱᐅᓇᓱᒋᔪᓂᒃ! ᖁᓚᐅᑦᓯᖓᓪᓗᑎᒃ ᐊᓯᒥᖕᓂᒃ ᑕᑯᓐᓇᒻᒪᕆᒃᐸᒃᑐᓂᒃ!

¹⁴ ᐃᓄᖃᕆᕗᖅ ᑭᒍᑎᖃᕐᑐᓂᒃ ᓴᕕᒡᔪᐊᑎᑐᑦ, ᑭᒍᑎᖏᑦ ᓴᕕᒃᑎᑑᕐᑐᓂᒃ, ᐊᔪᕐᓴᕐᑐᓂᒃ ᐄᖅᑲᕐᑐᑎᑐᑦ ᓄᖒᑦᓯᓇᓱᐊᕐᐸᒃᑐᓂᒃ ᓄᓇᒥ ᐃᓅᔪᓂᒃ, ᐱᖃᖏᑦᑐᓂᒃ ᐃᓄᐃᑦ ᐊᑯᕐᖓᓐᓂᑦ.

¹⁵ ᐊᐅᖕᒥᒃ ᒥᓪᓗᐊᓲᖅ ᓖᑦᓰ ᐸᓂᖃᕐᐳᖅ ᒪᕐᕉᖕᓂᒃ: “ᕾᑦᓯᒋᑦ, ᕾᑦᓯᒋᑦ.” ᑖᒃᑯᐊᒃ ᓂᓪᓕᐊᕘᒃ. ᐱᖓᓲᕗᑦ ᓈᒻᒪᒃᓯᓚᐅᕐᓯᒪᖏᑦᑐᑦ; ᓯᑕᒪᖓᓪᓗ ᐅᖃᓚᐅᕐᓯᒪᖏᑦᑐᖅ, “ᓈᒻᒪᒃᓯᕗᖅ”;

¹⁶ ᑐᖁᖓᔪᑦ ᐃᓂᖓ, ᐊᕐᓇᖅ ᕿᑐᕐᖏᓱᐃᑦᑐᖅ, ᓄᓇ ᐸᓂᕐᑐᖅ ᐃᒥᕈᒃᑐᖅ, ᐃᑯᒪᓗ ᐅᖃᓚᐅᕐᓯᒪᓇᓂ, “ᓈᒻᒪᒃᓯᕗᖅ.”

¹⁷ ᐃᔨ ᐊᑖᑕᒥᓂᒃ ᒥᑕᐅᑎᖃᕐᐸᒃᑐᖅ, ᐊᓈᓇᒥᓂᒡᓗ ᓈᓚᒍᒪᓇᓂ ᓱᐊᖓᕙᒃᑐᖅ, ᑐᓗᒐᕐᓄᑦ ᓇᕐᓴᒦᑦᑐᓄᑦ ᐃᔩᕐᑕᐅᔪᒫᕐᐳᖅ, ᑎᖕᒥᐊᓄᓪᓗ ᑎᒥᕕᓂᕐᑐᕐᑎᓄᑦ ᓂᕆᔭᐅᔪᒫᕐᐳᖅ.

¹⁸ ᐱᖓᓲᒋᕗᑦ ᐅᕙᓐᓄᑦ ᑲᒪᓇᓗᐊᕐᑐᑦ, ᓯᑕᒪᖓᓪᓗ ᑐᑭᓯᔪᓐᓇᓐᖏᑕᕋ;

¹⁹ ᓇᒃᑐᕋᓖᑦ ᓯᓚᒃᑯᑦ ᖃᖓᑕᖃᑦᑕᕐᓂᖏᑦ, ᖁᒡᓗᒋᐊᑦ ᕾᕐᑐᓂ ᐃᓂᖃᓲᖑᓂᖏᑦ, ᐅᒥᐊᕐᔪᐊᑦ ᐃᒪᕕᒃᑯᑦ ᐃᖏᕐᕋᓲᖑᓂᖏᑦ, ᐊᖑᑎᐅᓪᓗ ᐊᕐᓇᒥ ᐱᖃᑎᖃᓚᐅᕐᓯᒪᖏᑦᑐᒦᓐᓂᖓ.

²⁰ ᐃᒫᒃ ᐱᐅᓯᖃᕐᐳᖅ ᐊᕐᓇᖅ ᐊᓯᓐᓂᐊᕐᑐᖅ: ᓂᕆᓚᐅᕐᓗᓂ, ᖃᓂᓂ ᐊᓪᓚᕐᑎᕇᕋᒥᐅᒃ, ᐅᖃᕐᐳᖅ, “ᑕᒻᒪᓚᐅᖏᑦᑐᖓ.”

²¹ ᓄᓇ ᐱᖓᓲᓕᖅᑲᖓᔪᒥᒃ ᓴᔪᒃᐱᓗᓲᖑᕗᖅ; ᓯᑕᒪᖓᓐᓄᓪᓕ ᐊᓂᒡᒎᑎᔪᓐᓇᓐᖏᓚᖅ:

²² ᓯᐊᓛᕆᔭᐅᔪᖅ ᐊᖓᔪᖅᑳᕐᔪᐊᖑᕐᐸᑦ, ᓯᓔᑦᑐᖅ ᓂᕆᔪᒪᔭᓕᒫᒥᓄᑦ ᐊᕿᐊᑦᑐᕐᐸᑦ;

²³ ᐊᕐᓇᖅ ᓇᒡᓕᒋᔭᐅᖏᑦᑐᖅ ᐂᑉᐸᕐᑖᕐᐸᑦ, ᐊᕐᓇᖅ ᐱᔨᒋᔭᐅᓚᐅᕐᑐᖅ ᐊᖓᔪᖅᑳᒥᓂᒃ ᐃᓇᖐᒃᐸᑦ.

²⁴ ᓯᑕᒪᐅᕗᑦ ᓄᓇᕐᔪᐊᕐᒥ ᒥᑭᓐᓂᕐᐸᐅᔪᑦ, ᑖᒃᑯᐊᓕ ᓯᓚᑐᔪᒻᒪᕆᐊᓘᕗᑦ:

²⁵ ᐋᓯᕙᐅᔮᕐᑐᑦ ᖁᐱᕐᕈᐃᑦ ᓴᓐᖏᔫᖏᑦᑐᑦ, ᑕᒪᒃᑯᐊ ᐊᐅᔭᐅᓂᖓᓂ ᓂᕿᒃᓴᒥᖕᓂᒃ ᑲᑎᕐᓱᐃᓲᖑᕗᑦ.

²⁶ ᕾᕐᑐᒥᐅᑍᑦ ᐹᑦᔪᕇᑦ ᓴᓐᖏᔫᖏᒻᒥᔪᑦ, ᐃᓂᒃᓴᓕᐅᓲᖑᕗᑦ ᐊᖏᕐᕋᒃᓴᒥᖕᓂᒃ ᕾᕐᑐᓂ;

²⁷ ᐱᒡᓕᕐᑕᐅᔮᕐᑐᑦ ᐊᖓᔪᖅᑳᕐᔪᐊᖃᓐᖏᓚᑦ, ᑲᑎᓐᖓᑦᓯᐊᕐᓗᑎᒡᓕ ᑕᒪᕐᒥᒃ ᐊᑕᐅᑦᓯᒃᑯᑦ ᐃᖏᕐᕋᓲᖑᕗᑦ;

²⁸ ᓕᓴᕐᑦᒥᒃ ᐊᑎᓖᑦ ᐊᒡᒐᖕᓄᑦ ᑎᒍᒥᐊᕈᓐᓇᕐᑕᑎᑦ, ᑖᒃᑯᐊ ᐊᖓᔪᖅᑳᕐᔪᐊᑦ ᐃᒡᓗᖏᓐᓃᓲᖑᒋᕗᑦ.

²⁹ ᐱᖓᓲᕗᑦ ᓈᖏᑦ ᐊᒃᑐᐊᓪᓗᑎᒃ ᐱᓱᒃᐸᒃᑐᑦ; ᓯᑕᒪᖓᓪᓕ ᓈᖓ ᐊᒃᑐᐊᓇᓂ ᐱᓱᓪᓚᕆᓲᖑᕗᖅ:

³⁰ ᓛᔧᑦ, ᐆᒪᔫᖃᑎᓕᒫᒥᖕᓂᑦ ᓴᓐᖏᓂᕐᐸᐅᕗᑦ ᓇᓪᓕᐊᓐᓂᒡᓘᓐᓃᑦ ᐃᕐᓯᒋᔭᖃᕋᑎᒃ;

³¹ ᐊᕿᒡᒋᐅᔧᑦ ᐊᖑᑎᕕᐊᖏᑦ, ᒎᑦᓰᓪᓗ ᐊᖑᓴᓪᓗᖏᑦ ᐊᖓᔪᖅᑳᕐᔪᐊᕐᓗ ᐱᓱᒃᑐᖅ ᐃᓄᖁᑎᒥ ᓵᖏᑎᒍᑦ.

³² ᓯᓔᕐᕈᕐᑐᕐᓯᒪᒍᕕᑦ, ᐃᓕᖕᓂᒃ ᐊᖏᒡᓕᑎᕐᓗᑎᑦ, ᐅᕝᕙᓗ ᐱᐅᖏᑦᑐᒥᒃ ᐃᓱᒪᓕᐅᕐᓯᒪᓚᐅᕐᓂᕈᕕᑦ, ᖃᓃᑦ ᐊᒡᒐᖕᓄᑦ ᒪᑐᒍᒃ.

³³ ᐃᒻᒧᒃ ᐊᐅᓚᑎᒻᒪᕆᒍᕕᐅᒃ ᑭᓂᕐᓯᓲᖑᖕᒪᑦ, ᕿᖎᑦ ᓇᕿᒃᑯᕕᐅᒃ ᐊᐅᓕᕈᓐᓇᕐᒪᑦ, ᓂᓐᖓᒃᓮᒍᕕᓪᓗ ᐊᑭᕋᕐᑑᑎᓂᕐᒧᑦ ᑎᑭᑕᐅᒐᔭᕐᐳᑎᑦ.