ᓲᓗᒨᓂᐅᑉ ᐅᖃᓪᓚᖕᓂᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖃᐅᑦᔪᐃᓂᖅ ᐊᖑᑎᓂᒃ ᐅᕕᒃᑲᓂᒃ

¹ ᐃᕐᓃᒃ ᐊᔪᕆᕐᑐᐃᑦᔪᑎᒋᔭᒃᑲ ᐳᐃᒍᕐᑍᓕᒃᑭᑦ, ᐱᓇᓱᐊᕐᑕᐅᖁᔭᒃᑲ ᐆᒻᒪᑎᒃᑯᑦ ᐃᖅᑲᐅᒪᓂᐊᕐᐸᑎᑦ.

² ᐅᓪᓗᐃᑦ ᐊᕐᕌᒍᑦ ᐃᓅᓯᕐᓂᒃ ᑕᑭᒡᓕᑎᑕᐅᓂᐊᕐᐳᑦ ᐊᒥᒐᕐᓯᖏᓐᓂᕐᒥᒡᓗ ᑐᓂᓯᕕᐅᑦᔪᑎᒋᓂᐊᕐᐸᑎᑦ.

³ ᑲᒪᑦᓯᐊᕐᓂᐅᑉ ᓱᕐᕋᔪᐃᑦᑑᓂᐅᓪᓗ ᕿᒪᒃᑍᓕᓛᑎᑦ; ᖁᖓᓯᕐᓄᑦ ᕿᓚᒃᓯᒪᒃᑭᑦ, ᐆᒻᒪᑎᖕᓄᓪᓗ ᑎᑎᕋᕐᓗᒋᑦ.

⁴ ᑍᒤᓕᐅᕈᕕᑦ ᖁᕕᐊᒋᔭᐅᓂᐊᕐᐳᑎᑦ ᐅᖃᐅᓯᐅᑦᓯᐊᕐᐸᒡᓗᑎᓪᓗ ᒎᑎᐅᑉ ᓵᖓᓂ ᐃᓄᖕᓄᓪᓗ.

⁵ ᐊᑕᓂᖅ ᑕᑎᒋᒍᒃ ᐆᒻᒪᑎᖕᓄᑦ ᑕᒤᓐᓄᑦ, ᖃᐅᔨᒪᔭᑎᓪᓗ ᑕᑎᒋᓂᐊᕐᓇᒋᑦ.

⁶ ᐱᓂᐊᕐᓂᕐᓄᑦ ᑕᒤᓐᓄᑦ ᓇᓗᓁᔭᕈᒃ, ᑕᕝᕙ ᐊᖅᑯᑎᒋᔭᑎᑦ ᑐᑭᓕᐊᕐᑎᓐᓂᐊᕐᐰᑦ.

⁷ ᐃᒻᒥᓂᒃ ᓯᓚᑐᓇᓱᒋᑦᑍᓕᒋᑦ; ᐊᑕᓂᕐᓕ ᐃᓕᕋᒋᒍᒃ, ᐱᐅᖏᑦᑐᒥᒡᓗ ᕿᒤᓗᑎᑦ.

⁸ ᑕᕝᕙ ᑎᒥᖕᓄᑦ ᐃᓅᓕᓴᐅᑕᐅᓂᐊᕐᐳᖅ, ᑎᒥᖕᓄᓪᓗ ᐃᓗᐊᕐᓯᑦᔪᑎᒃᓴᐅᓗᓂ.

⁹ ᐊᑕᓂᖅ ᐅᐱᒋᒍᒃ ᑐᓂᕐᕈᓯᕐᓂᒃᑯᑦ ᐃᓕᖕᓂᑦ ᐱᔪᓄᑦ ᓱᓇᓕᒫᑎᒍᑦ ᐱᕈᕐᑎᑕᕕᑦ ᓯᕗᓪᓕᕐᐹᖏᓐᓂᑦ.

¹⁰ ᑍᒤᓕᐅᕈᕕᑦ ᓯᕐᓗᐊᑎᑦ ᓂᐊᖂᔭᒃᓴᓂᒃ ᑕᑕᓐᓂᐊᕐᐳᑦ, ᕔᓂᖃᐅᑎᑎᓪᓗ ᐅᓯᕋᕐᑕᓕᕐᓂᐊᕐᐳᑦ ᑕᑕᓗᐊᕐᓂᕐᒧᑦ.

¹¹ ᐃᕐᓃᒃ ᐊᑕᓂᐅᑉ ᐋᖅᑭᒋᐊᕐᐸᑎᑦ ᓇᕐᕈᒋᓂᐊᕐᓇᒍ, ᐃᓂᕐᑎᕆᓂᖏᓪᓗ ᑕᖃᒋᓕᕐᓂᐊᕐᓇᒋᑦ.

¹² ᐊᑕᓂᐅᑉ ᓇᒡᓕᒋᔭᓂ ᐃᓂᕐᑎᕐᐸᖕᒪᒋᑦ, ᑍᒫᒃᑕᐅᖅ ᐊᑖᑕᐅᑉ ᐃᕐᓂᓐᓇᕆᔭᓂ ᐃᓂᕐᑎᓲᕆᖕᒪᒍ.

¹³ ᖁᕕᐊᓱᒍᑎᒃᓴᖃᕐᐳᖅ ᐃᓄᒃ ᓯᓚᑐᓂᕐᒥᒃ ᓇᓂᓯᔪᖅ, ᐃᓄᒡᓗ ᑐᑭᓯᔪᓐᓇᕐᓯᔪᖅ.

¹⁴ ᑕᒪᑐᒪ ᐱᕙᓪᓕᕐᓇᕐᓂᖓ ᐊᖏᓂᕐᓴᐅᖕᒪᑦ ᓯᐅᓪᕕᕆᒧᑦ ᐱᕙᓪᓕᕐᑎᑕᐅᓂᕐᒥᑦ ᐊᑭᑐᓂᕐᓴᐅᓪᓗᓂᓗ ᒎᓗᒥᑦ.

¹⁵ ᓯᓚᑐᓂᖅ ᐱᖁᑎᓂᑦ ᐊᑭᑐᔪᓂᑦ ᐱᒋᔪᒥᓇᕐᓂᕐᓴᐅᕗᖅ; ᑐᓱᒋᔭᕐᓄᓪᓗ ᑕᒤᓐᓄᑦ ᐊᑦᔨᒋᑎᑕᒃᓴᐅᓐᖏᓚᖅ.

¹⁶ ᐃᓅᑯᑖᒃᑎᑕᐅᓂᖅ ᑕᓕᕐᐱᖕᒥᓄᑦ ᑎᒍᒥᐊᕐᐹ, ᓴᐅᒥᖕᒥᓂᓗ ᐊᒃᓗᐃᓂᕐᒥᒃ ᐅᐱᒋᔭᐅᓂᕐᒥᒡᓗ ᑎᒍᒥᐊᕐᓗᓂ.

¹⁷ ᐱᓂᐊᕐᓂᖏᑦ ᓮᒪᓇᕐᑐᒥᒃ ᐱᓂᐊᕐᓂᐅᕗᑦ, ᐊᖅᑯᓯᓂᖏᓪᓗ ᓮᓕᓇᕐᑑᓪᓗᑎᒃ.

¹⁸ ᓇᐹᕐᑑᕗᖅ ᐃᓅᓯᖃᕐᓇᕐᑐᖅ ᑖᒃᑯᓄᖓ ᑖᑦᓱᒥᖓ ᑎᒍᓯᔪᓄᑦ; ᑖᑦᓱᒥᖓ ᑎᒍᒥᐊᕐᑐᑦ ᑍᔭᐅᓕᕐᐳᑦ ᖁᕕᐊᓱᒃᑐᒥᒃ.

¹⁹ ᐊᑕᓂᐅᑉ ᓄᓇᕐᔪᐊᖅ ᓯᓚᑐᓂᕐᒥᓄᑦ ᐱᒋᐊᕐᑎᓯᒪᕚ; ᖃᐅᔨᒪᓂᕐᒥᓄᓪᓗ ᕿᓚᒃ ᐃᓂᑖᕐᑎᓯᒪᕚ;

²⁰ ᖃᐅᔨᒪᓂᖓᑕ ᐃᑎᓂᕐᒦᑦᑐᑦ ᖄᒥᑎᑉᐰᑦ, ᓄᕗᔭᓪᓗ ᓯᓚᓗᒍᓐᓇᕐᑎᓪᓗᒋᑦ ᓄᓇᒧᑦ.

²¹ ᐃᕐᓃᒃ, ᓯᓚᑐᓂᖅ ᓈᒻᒪᒃᑐᖅ ᓂᕈᐊᑦᓯᐊᕈᓐᓇᕐᓂᕐᓗ ᐱᓯᒪᒃᑭᑦ; ᐃᓕᖕᓂᑦ ᕿᒪᕉᑎᑎᑦᑍᓕᓗᒋᑦ.

²² ᑕᕐᓂᕐᓂᒃ ᐃᓅᑎᑦᓯᓂᐊᕐᒪᑕ ᖁᖓᓯᕐᓂᓗ ᑕᑯᒥᓇᐅᑎᒋᓗᒍ.

²³ ᑕᕝᕙ ᐊᑦᑕᕐᓇᖏᑦᑐᒃᑯᑦ ᐱᓱᖕᓂᐊᕐᐳᑎᑦ ᐃᑎᒐᑎᓪᓗ ᖁᐂᔭᕿᓐᓂᐊᕋᑎᒃ.

²⁴ ᐃᖏᒃᑯᕕᑦ ᑲᑉᐱᐊᓱᖕᓂᐊᓐᖏᓚᑎᑦ ᓇᓪᓚᕈᕕᓪᓗ, ᓯᓂᑦᓯᐊᕐᐸᒃᓗᑎᑦ.

²⁵ ᑲᑉᐱᐊᓱᖕᓂᐊᕐᓇᒃ ᑲᑉᐱᐊᓇᕐᑐᒧᑦ ᐅᐃᒻᒪᒃᑎᑕᐅᑲᓪᓚᖕᓂᕐᒥᒃ, ᐱᐅᖏᑦᑐᒥᒃᓗ ᐃᓅᓯᖃᕐᑐᑦ ᑎᑭᑕᐅᒐᓗᐊᕐᐸᑕ ᐊᓄᕆᕐᔪᐊᕐᒧᑦ.

²⁶ ᐊᑕᓂᖅ ᖁᓚᖏᑦᔪᑎᒋᓂᐊᕋᕕᐅᒃ, ᐃᑎᒐᑎᓪᓗ ᓈᑎᓐᓂᐊᓐᖏᓔᑦ.

²⁷ ᐃᑲᔪᕆᐊᓕᖕᓂᒃ ᐃᑲᔪᖃᑦᑕᕐᓂᖅ ᓄᖅᑲᖓᑎᑦᑍᓕᒍᒃ, ᐱᔪᓐᓇᑐᐊᕈᕕᑦ ᐊᔪᖏᓪᓗᑎᑦ.

²⁸ ᐃᓅᖃᑏᑦ ᐅᖃᐅᑎᑦᑍᓕᒍᒃ, “ᐊᖏᕐᕋᓕᕆᑦ ᖃᐅᒃᐸᑦ ᕾᓛᕆᕗᑎᑦ, ᖃᐅᒃᐸᑦ ᑐᓂᓯᕕᒋᓛᕐᐸᒋᑦ.” ᑐᓂᓯᑲᐅᑎᒋᔪᓐᓇᕐᑎᓪᓗᑎᑦ.

²⁹ ᐋᖅᑭᒃᓱᐃᕙᖕᓂᐊᓐᖏᓚᑎᑦ ᐃᓅᖃᑎᕕᑦ ᐱᓂᕐᓘᑎᒋᒐᔭᕐᑕᖓᓂᒃ; ᓴᓂᒥᐅᑕᕆᓪᓗᒍ ᐃᓅᖃᑎᒋᒐᕕᐅᒃ, ᐅᒃᐱᕆᓪᓗᓂᑎᓪᓗ.

³⁰ ᓇᓪᓕᐊᓐᓂᒃ ᖃᓄᐃᓕᐅᕐᑕᐅᖏᓪᓗᑎᑦ ᐂᕙᖃᑎᖃᕐᑍᓕᕙᒋᑦ, ᐃᓕᖕᓄᑦ ᐋᓐᓂᕐᓇᕐᑐᒥᒃ ᐱᓚᐅᕐᓯᒪᑎᓐᓇᒍ.

³¹ ᐃᓄᒃ ᑲᑉᐱᐊᓱᒃᑎᑦᓯᕙᒃᑐᖅ ᑐᓱᒋᓕᕐᑍᓕᒍᒃ ᐱᓂᐊᕐᓂᖏᓐᓂᒃ ᓇᓪᓕᐊᓐᓂᑐᐃᓐᓇᖅ ᐊᑐᕐᑍᓕᒋᑦ.

³² ᐊᑕᓂᐅᑉ ᐆᒥᒋᖕᒪᒋᑦ ᐊᔪᕐᑐᓕᔪᑦ, ᐃᓱᐊᕐᑐᓕᔪᓪᓕ ᖁᓚᕆᓐᖏᓔᑦ.

³³ ᐱᐅᖏᑦᑐᑦ ᐃᒡᓗᖏᑦ ᐊᑕᓂᐅᑉ ᓯᕗᓂᕐᓗᒃᑎᑉᐰᑦ, ᐃᓱᐊᕐᑑᓪᓕ ᐃᒡᓗᖏᑦ ᓮᒻᒪᕐᑎᓪᓗᒋᑦ.

³⁴ ᓇᕐᕈᔪᓂᒃ ᓇᕐᕈᒋᔭᖃᕐᐳᖅ, ᒥᑭᒡᓕᑎᕐᓯᒪᔪᓪᓕ ᖁᕕᐊᒋᕔᑦ.

³⁵ ᓯᓚᑐᔪᑦ ᐅᐱᒋᔭᐅᓂᕐᒥᒃ ᑭᖑᕐᖑᑦᔨᓂᐊᕐᐳᑦ, ᓯᓔᑦᑐᓪᓕ ᑲᓐᖑᓱᒃᑎᑕᐅᓂᕐᒥᒃ ᐱᑎᑕᐅᓗᑎᒃ.