ᓲᓗᒨᓂᐅᑉ ᐅᖃᓪᓚᖕᓂᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᓇᓪᓕᐊᑦ ᐋᖅᑭᒋᐊᕐᑕᐅᖃᑦᑕᕐᑐᖅ, ᓯᑎᓇᓱᐊᕈᓂ, ᑕᕝᕔᓐᓇᖅ ᐊᓯᕈᕐᑕᐅᔪᒫᕐᐳᖅ ᐋᖅᑭᒋᐊᕐᑕᐅᕕᖃᕈᓐᓃᕐᓗᓂ.

² ᐃᓱᐊᕐᑐᑦ ᐱᔪᓐᓇᕐᓂᖃᕐᓗᑎᒃ ᐊᐅᓚᑦᓯᓕᑐᐊᕐᒪᑕ, ᐃᓄᐃᑦ ᖁᕕᐊᓱᒃᐸᒃᐳᑦ; ᐱᐅᖏᑦᑐᓕᔪᑦ ᐊᖓᔪᖅᑲᐅᓕᑐᐊᕐᒪᑕ, ᐃᓄᐃᑦ ᐊᓂᕐᓴᐅᒥᕙᒃᐳᑦ.

³ ᓯᓚᑐᓂᕐᒥᒃ ᐃᓪᓕᕆᔭᓕᐅᑉ ᐊᑖᑕᓂ ᖁᕕᐊᓱᒃᑎᑉᐹ, ᐊᕐᓇᓂᒡᓕ ᐊᑐᒐᕐᓂᒃ ᐃᓅᖃᑎᓕᐅᑉ ᐊᔪᕐᓴᖏᓐᓂᓂ ᑐᓂᐅᖅᑲᐅᑎᒋᕔᑦ.

⁴ ᐊᖓᔪᖅᑳᕐᔪᐊᖅ ᐊᑦᔨᒌᒃᑎᑦᓯᓂᒃᑯᑦ ᓄᓇᓕᖕᒥᒃ ᐋᖅᑭᒃᓱᐃᕗᖅ, ᐊᑭᓕᕐᑕᐅᓂᑐᐃᓐᓇᒃᑯᓪᓕ ᐱᓇᓱᐊᑐᖅ ᓄᓇᓕᖕᒥᒃ ᐊᓯᕈᐃᕗᖅ.

⁵ ᓯᓚᖅᑲᑎᒥᓂᒃ ᓂᕐᑐᐃᓐᖑᐊᕐᑐᖅ ᐱᐅᒋᔭᐅᔪᒪᒧᑦ ᓄᓗᐊᓂᒃ ᓂᖏᑎᑦᓯᕗᖅ ᐃᑎᒐᖕᒥᓄᑦ.

⁶ ᐱᐅᖏᑦᑐᓕᔪᖅ ᐊᔪᕐᓂᕐᒥᓄᑦ ᒥᑭᒋᐊᕐᑎᑉᐳᖅ, ᐃᓱᐊᕐᑐᓕᔪᕐᓕ ᐃᓐᖏᕐᐳᖅ ᖁᕕᐊᓱᒡᓗᓂᓗ.

⁷ ᐃᓱᐊᕐᑑᑉ ᐊᔪᕐᓴᕐᑐᑦ ᖃᓄᐃᓕᐅᕐᑕᐅᔭᕆᐊᖃᕐᓂᖏᑦ ᖃᐅᔨᒪᑦᓯᐊᕐᐰᑦ, ᐱᐅᖏᑦᑐᕐᓕ ᑕᒪᑐᒥᖓ ᖃᐅᔨᒪᓂᕐᒥᒃ ᑐᑭᓯᐅᒪᓐᖏᓚᖅ.

⁸ ᒥᑕᐅᑎᒃᓴᕐᑏᑦ ᐃᒡᓗᒐᓴᖕᓂᒃ ᐊᑲᐅᓐᖏᓕᐅᕐᑎᑦᓯᕗᑦ, ᓯᓚᑐᔪᓪᓕ ᓂᓐᖓᐅᒪᓂᕐᒥᒃ ᕿᒫᑎᑦᓯᕗᑦ.

⁹ ᓯᓚᑐᔪᖅ ᐂᕙᖃᑎᖃᕐᐸᑦ ᓯᓔᑦᑐᒥᒃ, ᓯᓔᑦᑐᖅ ᓂᓐᖓᒃᐳᖅ ᐃᔪᕐᓗᓂᓗ, ᑖᑦᓱᒪᓂ ᓮᓕᓂᕐᑕᖃᓐᖏᓚᖅ.

¹⁰ ᐊᖑᑏᑦ ᑐᖁᑦᓯᔪᒪᔪᑦ ᐆᒥᓱᒃᐳᑦ ᐸᓯᔭᒃᓴᐅᖏᑦᑐᓂᒃ, ᐊᔪᕐᑐᓕᔪᑦ ᐃᓱᐊᕐᑑᑉ ᐃᓅᓯᖓᓂᒃ ᐃᓱᓕᑎᑦᓯᔪᒪᕗᑦ.

¹¹ ᓯᓔᑦᑐᖅ ᓴᖅᑭᑎᑦᓯᕗᖅ ᐃᒃᐱᒋᔭᒥᓂᒃ ᓂᓐᖓᐅᒪᓂᕐᒥᒃ, ᓯᓚᑐᔫᓪᓕ ᓂᐱᖃᕋᓂ ᓄᖅᑲᕐᑎᑉᐹ.

¹² ᐊᐅᓚᑦᓯᔨ ᓱᓕᖏᑦᑐᓂᒃ ᓈᓚᓕᕐᐸᑦ, ᐱᔨᖏᑦ ᐃᓘᓐᓇᑎᒃ ᐱᐅᔪᓐᓃᕐᐳᑦ.

¹³ ᐊᔪᕐᓴᕐᑐᖅ ᐅᖁᒤᒃᓴᕐᑎᑦᓯᔪᕐᓗ ᐃᒫᒃ ᐊᑦᔨᒌᓐᓂᖃᕐᐴᒃ: ᑕᒪᕐᒥᒃ ᐊᑕᓂᐅᑉ ᐃᔨᖏᒃ ᑕᑯᓐᓇᕐᓂᕐᒥᒃ ᑐᓂᓯᕕᒋᓯᒪᖕᒪᒋᒃ.

¹⁴ ᐊᖓᔪᖅᑳᕐᔪᐊᖅ ᐊᑦᔨᒌᒃᑐᒥᒃ ᐊᔪᕐᓴᕐᑐᓂᒃ ᐃᖅᑲᕐᑐᐃᒃᐸᑦ, ᑖᑦᓱᒪ ᐃᒃᓯᕙᐅᑕᕐᔪᐊᖓ ᐃᓱᖃᖏᑦᑐᒧᑦ ᐃᓕᖓᔪᒫᕐᐳᖅ.

¹⁵ ᐊᓇᐅᑕᐅᑉ ᐋᖅᑭᒃᓯᒋᐊᕐᓂᖓ ᓯᓚᑐᓂᕐᒥᒃ ᑐᓂᓯᕗᖅ, ᓄᑕᕋᕐᓕ ᑲᒪᒋᔭᐅᖏᑦᑐᖅ ᐊᓈᓇᒥᓂᒃ ᑲᓐᖑᓱᒃᑎᑦᓯᕗᖅ.

¹⁶ ᐱᐅᖏᑦᑐᓕᔪᑦ ᐊᐅᓚᑦᓯᓕᑐᐊᕐᒪᑕ, ᐱᕋᔭᖕᓂᖅ ᐊᖏᒡᓕᒋᐊᕐᐸᒃᐳᖅ, ᐃᓱᐊᕐᑐᓪᓕ ᑕᑯᔪᒫᕐᐳᑦ ᑖᒃᑯᐊ ᑲᑕᖕᓂᖏᓐᓂᒃ.

¹⁷ ᐃᕐᓃᑦ ᐋᖅᑭᒋᐊᕈᒃ, ᑕᕝᕙ ᑕᕾᕐᓯᕐᑎᑦᓱᒫᕐᐹᑎᑦ; ᑕᕝᕙ ᐆᒻᒪᑏᑦ ᑖᑦᓱᒪ ᖁᕕᐊᓱᒃᑎᑦᓱᒫᕐᐹ.

¹⁸ ᓇᓚᐅᑦᑍᓂᖃᖏᑉᐸᑦ ᐃᓄᐃᑦ ᓄᖅᑲᖓᓂᖃᓐᖏᓚᑦ, ᖁᕕᐊᓱᒃᐳᕐᓕ ᑖᓐᓇ ᐱᖁᔭᓂᒃ ᓈᓚᒃᑐᖅ.

¹⁹ ᐱᔨ ᐋᖅᑭᒋᐊᕐᑕᐅᔪᓐᓇᓐᖏᓚᖅ ᐅᖃᐅᓯᑐᐃᓐᓇᒃᑯᑦ; ᑐᑭᓯᒐᓗᐊᕈᓂ, ᐱᖁᔭᐅᓂᕐᒥᓂᒃ ᒪᓕᓐᖏᓚᖅ.

²⁰ ᐊᖑᒻᒥᒃ ᑕᑯᕖᑦ ᐅᖃᕐᓴᕅᑦᑐᒥᒃ? ᓯᓔᑦᑐᖅ ᓂᕆᐅᖕᓂᖃᕐᓂᕐᓴᐅᕗᖅ ᑖᑦᓱᒪᓐᖓᑦ.

²¹ ᐱᔨᒥᓂᒃ ᓱᕈᓯᐅᓂᖓᓂᑦ ᐱᑦᓯᐊᖃᑦᑕᕐᑐᖅ ᑭᖑᓂᖓᒍᑦ ᑭᖑᕐᖑᑦᔨᔨᑖᕆᔪᒫᕐᐹ ᑖᑦᓱᒪ.

²² ᐊᖑᑦ ᓂᓐᖓᐅᒪᔪᖅ ᐊᑭᕋᕐᑐᓕᕐᑎᑦᓯᕗᖅ, ᐊᖑᓪᓗ ᓂᓐᖓᐅᒪᓂᒃᑯᑦ ᐱᒋᐊᕐᑐᖅ ᐊᔪᕐᑐᓕᑎᑦᓯᕗᖅ.

²³ ᐊᖑᑦ ᐱᐅᔪᕆᓂᕐᒥᖕᓄᑦ ᑲᓐᖑᓱᒃᑎᑕᐅᔪᒫᕐᐳᖅ, ᐱᐅᔪᕆᖏᑦᑐᕐᓕ ᐊᓂᕐᓂᕐᒥᒍᑦ ᐅᐱᒋᔭᐅᓕᕈᒫᕐᐳᖅ.

²⁴ ᑎᒡᓕᒃᑎᒥᒃ ᐱᖃᑎᓕᒃ ᐃᓅᓯᕐᒥᓂᒃ ᐆᒥᓱᒃᐳᖅ; ᓱᓕᔪᒥᒃ ᐅᖃᕈᒪᒐᓗᐊᕐᓗᓂ, ᓴᖅᑭᑦᓯᔪᓐᓇᓐᖏᓚᖅ.

²⁵ ᐃᓄᖕᒥᒃ ᓯᕘᕋᔪᖅ ᐊᑦᓱᖏᕐᑕᐅᑎᑉᐳᖅ ᐃᒻᒥᓂᒃ, ᐊᑕᓂᕐᒥᒡᓕ ᑕᑎᖃᕐᑐᖅ ᓴᐳᑎᔭᐅᕗᖅ.

²⁶ ᐅᓄᕐᑐᑦ ᐊᐅᓚᑦᓯᔨᒧᑦ ᐱᐅᒋᔭᐅᔪᒪᓂᕐᒥᒃ ᕿᓂᕐᐳᑦ, ᐊᖑᑎᐅᓪᓕ ᐱᑦᓯᐊᕐᑕᐅᓂᖓ ᐊᑕᓂᕐᒥᑦ ᐱᕗᖅ.

²⁷ ᐃᓱᐃᑦᑐᓕᔪᖅ ᐱᐅᒋᔭᐅᓐᖏᓚᖅ ᐃᓱᐊᕐᑐᒧᑦ, ᐃᓱᐊᕐᑐᕐᓗ ᐱᐅᒋᔭᐅᓐᖏᓚᖅ ᐃᓱᐃᑦᑐᒧᑦ.