ᓲᓗᒨᓂᐅᑉ ᐅᖃᓪᓚᖕᓂᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐱᐅᖏᑦᑐᓕᔪᑦ ᕿᒫᕗᑦ ᒪᓕᒃᑕᐅᒐᑎᒃ, ᐃᓱᐊᕐᑐᓕᔪᑦ ᓯᕘᕋᓐᖏᓚᑦ ᓛᔭᑎᑐᑦ.

² ᓄᓇᖃᕐᑐᑦ ᐱᐅᖏᑦᑐᓕᓂᖏᓐᓄᑦ ᐊᖓᔪᖅᑲᕐᔪᐊᑦ ᐅᓄᕐᑑᓕᕐᐳᑦ; ᐊᖑᑎᐅᓪᓕ ᑐᑭᓯᒪᓂᖓᓄᑦ ᖃᐅᔨᒪᓂᖓᓄᓪᓗ ᐋᖅᑭᒃᓯᒪᑦᓯᐊᕐᓂᖅ ᐊᑯᓂ ᑍᒤᓕᖓᓂᐊᕐᐳᖅ.

³ ᐊᐅᓚᑦᓯᔨ ᐅᖁᒤᒃᓴᕐᑎᑦᓯᑎᓪᓗᒍ ᐊᔪᕐᓴᕐᑐᓂᒃ ᐊᑦᔨᖃᕐᐳᖅ ᓯᓚᓗᒃᑎᑐᑦ ᓂᕿᒃᓴᖃᕈᓐᓃᕐᑎᑦᓯᔪᑎᑐᑦ.

⁴ ᐱᖁᔭᓂᒃ ᒪᓕᖏᑦᑐᑦ ᐱᐅᖏᑦᑐᓕᔪᓂᒃ ᓂᕐᑐᐃᕗᑦ, ᐱᖁᔭᓂᒡᓕ ᒪᓕᑦᓯᐊᕐᑐᑦ ᐅᓇᑕᖃᑎᒋᕚᑦ.

⁵ ᐊᖑᑏᑦ ᐱᐅᖏᑦᑐᓕᔪᑦ ᑐᑭᓯᒪᓐᖏᓚᑦ ᐊᑦᔨᒌᒃᑎᑦᓯᓂᕐᒥᒃ, ᐊᑕᓂᕐᒥᒡᓕ ᕿᓂᕐᑐᑦ ᑕᒪᑐᒥᖓ ᑐᑭᓯᐅᒪᑦᓯᐊᕐᐳᑦ.

⁶ ᐱᐅᓂᕐᓴᐅᕗᖅ ᐊᔪᕐᓴᕐᑐᖅ ᐅᒃᐱᕐᓇᕐᓗᓂ ᐃᓅᒃᐸᑦ ᐊᔪᕐᓴᖏᑦᑐᒥᑦ ᐱᓂᐊᕐᓂᖃᕐᓗᓂ ᐱᐅᖏᑦᑐᐊᓗᖕᒥᒃ.

⁷ ᓇᓪᓕᐊᑦ ᐱᖁᔭᒥᒃ ᒪᓕᑦᓯᐊᕐᑐᖅ ᕿᑐᕐᖓᐅᕗᖅ ᓯᓚᑐᔪᖅ, ᓂᕆᑐᔪᒥᒡᓕ ᐃᓅᖃᑎᓕᒃ ᐊᑖᑕᓂ ᑲᓐᖑᓱᒃᑎᑉᐹ.

⁸ ᑮᓇᐅᔭᓂᒃ ᐊᑐᕐᑐᐊᕐᑕᐅᔪᓂᒃ ᐃᓚᓯᖃᑦᑕᕐᓂᕐᒧᑦ ᐅᓄᕐᓯᕙᓪᓕᐊᑎᑦᓯᔪᖅ ᑲᑎᕐᓱᐃᕗᖅ ᑖᑦᓱᒧᖓ ᐊᔪᕐᓴᕐᑐᓂᒃ ᐃᓚᑦᓱᒍᓱᒃᑐᓄᑦ.

⁹ ᓯᐅᑎᒥᓂᒃ ᒪᑐᓯᔫᑉ ᐱᖁᔭᓂᒃ ᓈᓚᒍᒪᖏᓪᓗᓂ, ᑖᑦᓱᒪ ᑐᒃᓯᐊᕐᓂᖓᑦᑕᐅᖅ ᐆᒥᒋᔭᐅᔪᒫᕐᐳᖅ.

¹⁰ ᓇᓪᓕᐊᑦ ᐃᓱᐊᕐᑐᓕᔪᒥᒃ ᑕᒻᒪᕐᑎᑦᓯᔪᖅ ᐱᐅᖏᑦᑐᒧᑦ, ᐃᒻᒥᓂᒃ ᐃᑎᕐᓴᓕᐊᒥᓄᑦ ᑲᑕᒍᒫᕐᐳᖅ; ᐸᓯᔭᒃᓴᐅᖏᑦᑐᓪᓕ ᑭᖑᕐᖑᑦᔨᔪᒫᕐᐳᖅ ᐱᐅᔪᒥᒃ.

¹¹ ᐊᒃᓱᐃᑦᑐᖅ ᓯᓚᑐᕗᖅ ᓇᖕᒥᓂᖅ ᑕᑯᓐᓇᕐᑕᒥᒍᑦ, ᐊᒃᓱᔫᓪᓕ ᑐᑭᓯᐅᒪᓂᖃᕐᑑᑉ ᑖᓐᓇ ᖃᐅᔨᓂᐊᕐᐹ.

¹² ᐃᓱᐊᕐᑐᓕᔪᖅ ᓵᓚᖃᕐᐸᑦ, ᐱᓐᓇᕐᓇᕐᓂᕐᔪᐊᖃᕐᐳᖅ; ᐱᐅᖏᑦᑐᓕᔪᕐᓕ ᒪᑭᑉᐸᑦ, ᐃᓄᐃᑦ ᐃᔨᕐᐳᑦ.

¹³ ᐊᔪᕐᓂᕐᒥᓂᒃ ᐃᔨᕐᓯᔪᖅ ᐱᕙᓪᓕᐊᓂᐊᓐᖏᓚᖅ, ᓇᓪᓕᐊᓪᓕ ᖃᕿᐊᓕᕐᑐᖅ ᐊᔪᕐᓂᕐᒥᒡᓗ ᕿᒤᓗᓂ ᓂᑲᒋᔭᐅᔪᒫᕐᐳᖅ.

¹⁴ ᖁᕕᐊᓱᑦᓮᓐᓇᕐᐳᖅ ᐊᖑᑦ ᐊᑕᓂᕐᒥᒃ ᓯᕘᕋᔪᖅ, ᑖᓐᓇᓕ ᐆᒻᒪᑎᒥᓂᒃ ᓯᑎᑎᑦᓯᔪᖅ ᑲᑕᒍᒫᕐᐳᖅ ᐱᕐᕈᓗᐊᕿᓂᕐᒧᑦ.

¹⁵ ᓛᔭᑎᑐᑦ ᓂᓪᓕᐊᔪᑎᑐᑦ ᓇᓄᕐᑎᑐᓪᓗ ᐅᐸᒃᑐᕐᑐᑎᑐᑦ ᑍᒤᒃᑭᕗᖅ ᐱᐅᖏᓐᓂᕐᒥ ᐊᐅᓚᑦᓯᔪᖅ ᐃᓄᖕᓄᑦ ᐊᔪᕐᓴᕐᑐᓄᑦ.

¹⁶ ᐊᐅᓚᑦᓯᔨ ᑐᑭᓯᐅᒪᓂᖃᖏᑦᑐᖅ ᐅᖁᒤᒃᓴᕐᑎᑦᓯᔨᐅᕗᖅ, ᑖᓐᓇᓕ ᐱᔪᒪᑐᓛᕐᓂᕐᒥᒃ ᐆᒥᓱᒃᑐᖅ ᐃᓅᑯᑖᒍᒫᕐᐳᖅ.

¹⁷ ᐊᖑᑦ ᐊᓯᒥᓂᒃ ᑐᖁᑦᓯᒃᐸᑦ, ᑐᖁᑦᓯᔪᖅ ᕿᒫᓕᕐᓕ ᑐᖁᓂᕐᒥᓄᑦ ᑎᑭᓪᓗᓂ; ᓇᓪᓕᐊᓐᓄᓪᓗ ᐃᑲᔪᕐᑕᐅᔪᒃᓴᐅᓐᖏᓚᖅ.

¹⁸ ᐸᓯᔭᒃᓴᐅᖏᓪᓗᓂ ᐃᓅᔪᖅ ᓴᐳᑎᔭᐅᔪᒫᕐᐳᖅ, ᐱᐅᖏᓐᓂᕐᒥᒡᓕ ᐃᓅᔪᖅ ᑲᑕᒃᑎᑕᐅᔪᒫᕐᐳᖅ ᐃᑎᕐᓴᒧᑦ.

¹⁹ ᓇᓪᓕᐊᑦ ᓄᓇᖁᑎᒥᓂ ᓂᕿᒃᓴᓕᐅᕐᑐᖅ ᓂᕿᒃᓴᖃᑦᓯᐊᕈᒫᕐᐳᖅ, ᓇᓪᓕᐊᓪᓕ ᓱᓇᒃᓴᐅᖏᑦᑐᒥᒃ ᐱᓇᓱᐊᕐᑐᖅ ᐊᔪᕐᓴᓕᕈᒫᕐᐳᖅ.

²⁰ ᐊᖑᑦ ᐅᒃᐱᕐᓇᑦᓯᐊᕐᑐᖅ ᐊᒥᒐᕐᓯᔪᒫᓐᖏᓚᖅ ᓮᒻᒪᕐᑎᑕᐅᓂᕐᒥᒃ, ᓇᓪᓕᐊᓪᓕ ᑐᐊᕕᕐᓗᓂ ᐊᒃᓱᐃᓕᓇᓱᐊᕐᑐᖅ ᓱᒋᐊᕐᑕᐅᖏᑦᑑᔪᒫᓐᖏᓚᖅ.

²¹ ᐃᓔᓐᓈᕐᑎᑦᓯᓂᕐᒥᒃ ᓴᖅᑭᔮᕐᑎᑦᓯᔪᖅ ᐱᐅᓐᖏᓚᖅ; ᓂᐊᖂᔭᕐᓕ ᐱᑦᔪᑎᒋᓗᒍ ᐃᓄᒃ ᑕᒻᒪᕈᓐᓇᕐᐳᖅ.

²² ᐊᖑᑦ ᑮᓇᐅᔭᒥᒃ ᒥᖕᓂᔪᖅ ᑐᐊᕕᕐᓗᓂ ᐊᒃᓱᐃᓕᓇᓱᐊᕐᐳᖅ, ᖃᐅᔨᒪᓐᖏᓚᕐᓗ ᐊᔪᕐᓴᕐᓂᕐᒧᑦ ᑎᑭᑕᐅᔪᒫᕐᓂᕐᒥᓂᒃ.

²³ ᐊᖑᑦ ᐃᓂᕐᑎᕆᔪᖅ ᑭᖑᕐᖓᒍᑦ ᖁᕕᐊᒋᔭᐅᓕᕈᓐᓇᕐᓂᕐᓴᐅᕗᖅ ᑖᑦᓱᒪᓐᖓᑦ ᖃᓂᑐᐃᓐᓇᕐᒥᒍᖅ ᓂᕐᑐᕐᓇᕐᓯᑎᑦᓯᔪᒥᑦ.

²⁴ ᓇᓪᓕᐊᑦ ᐊᑖᑕᒥᓂᑦ ᐊᓈᓇᒥᓂᓪᓘᓐᓃᑦ ᑎᒡᓕᒃᑐᖅ ᐅᖃᕐᓗᓂᓗ, “ᑕᒪᓐᓇ ᑕᒻᒪᕐᓂᐅᓐᖏᓚᖅ,” ᑖᓐᓇ ᐃᓚᖃᕐᐳᖅ ᐊᖑᒻᒥᒃ ᓱᒃᑯᑎᕆᔨᒥᒃ.

²⁵ ᐱᔪᒪᑐᓛᕐᑐᖅ ᐊᑭᕋᕐᑐᓕᕐᑎᑦᓯᕗᖅ, ᐊᑕᓂᕐᒥᒡᓕ ᑕᑎᖃᕐᑐᖅ ᐱᕙᓪᓕᐊᑦᓯᐊᕈᒫᕐᐳᖅ.

²⁶ ᓇᖕᒥᓂᖅ ᐃᓱᒪᒥᓂᒃ ᑕᑎᖃᕐᑐᖅ ᓯᓔᑦᑑᕗᖅ; ᓯᓚᑐᓂᕐᒥᓕ ᐃᓅᔪᖅ ᓴᐳᑎᔭᐅᔪᒫᕐᐳᖅ.

²⁷ ᓇᓪᓕᐊᑦ ᐊᔪᕐᓴᕐᑐᒧᑦ ᑐᓂᓯᔪᖅ ᐊᒥᒐᕐᓯᓕᕐᓂᐊᓐᖏᓚᖅ, ᓇᓪᓕᐊᓪᓕ ᐃᔨᒥᓂᒃ ᒪᑐᓯᔪᖅ ᐅᓄᕐᑐᓂᒃ ᐃᓱᒪᓂᕐᓗᒡᕕᐅᔪᒫᕐᐳᖅ.

²⁸ ᐱᐅᖏᑦᑐᖅ ᒪᑭᑐᐊᕐᒪᑦ, ᐊᖑᑏᑦ ᐃᔨᕐᐳᑦ, ᑐᖁᑐᐊᕐᒪᑕᓕ, ᐃᓱᐊᕐᑐᑦ ᐅᓄᕐᓯᕗᑦ.