ᓲᓗᒨᓂᐅᑉ ᐅᖃᓪᓚᖕᓂᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᓱᓕ ᓲᓗᒨᓂᐅᑉ ᐅᖃᓪᓚᖕᓂᖏᑦ

¹ ᐅᑯᐊᑦᑕᐅᖅ ᑕᕝᕙ ᓲᓗᒨᓂᐅᑉ ᐅᖃᐅᓯᕆᓚᐅᕐᑕᖏᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᕼᐃᓯᑬᐊᐅᑉ ᐱᔨᖏᓐᓂᑦ ᐊᑦᔨᓕᐅᕐᑕᐅᓚᐅᕐᑐᑦ:

² ᒎᑎᐅᑉ ᐱᓐᓇᕐᓇᕐᓂᕐᔪᐊᕆᕚ ᓱᓇᑐᐃᓐᓇᖅ ᐃᔨᕐᓯᒪᓗᒍ, ᐊᖓᔪᖅᑳᕐᔪᐊᓪᓕ ᐱᓐᓇᕐᓇᕐᓂᕆᕚ ᓱᓇᑐᐃᓐᓇᖅ ᕿᓂᕐᓗᒍ ᓇᓂᓗᒍᓗ.

³ ᕿᓚᒃ ᐳᕐᑐᓂᕆᓗᒍ ᓄᓇᓗ ᐃᑎᓂᕆᓗᒍ, ᑍᒫᒃ ᐊᖓᔪᖅᑳᕐᔪᐊᑉ ᐃᓱᒪᖓ ᓇᓂᔭᒃᓴᐅᓐᖏᓚᖅ,

⁴ ᓯᐅᓪᕕᕆᐅᑉ ᐊᑐᕐᑐᒃᓴᐅᖏᓐᓂᖓ ᐲᕐᓗᒍ, ᑕᕝᕙ ᓯᐅᓪᕕᕆᓕᕆᔨᐅᑉ ᐱᐅᓴᐅᑎᓕᐊᕆᓗᒍ ᓴᓇᓂᐊᓕᕐᐹ.

⁵ ᐱᐅᖏᑦᑐᓕᔪᑦ ᐲᕐᓗᒋᑦ ᐊᖓᔪᖅᑳᕐᔪᐊᑉ ᓇᔪᒐᖓᓂᑦ, ᐃᒃᓯᕙᐅᑕᕐᔪᐊᖓ ᑕᕝᕙ ᐃᓂᖃᕐᓂᐊᕐᐳᖅ ᐃᓱᐊᕐᑐᓕᓂᕐᒥᒃ.

⁶ ᐃᓕᖕᓂᒃ ᐊᖏᔪᕈᕐᑎᓐᓂᐊᕐᓇᒃ ᐊᖓᔪᖅᑳᕐᔪᐊᑉ ᓇᔪᒐᖓᓂ, ᐅᐱᒋᔭᐅᔪᑦ ᐃᓂᖏᓐᓂ ᓇᖏᕐᓂᐊᕐᓇᒃ;

⁷ ᐱᐅᓂᕐᓴᐅᖕᒪᑦ ᐃᓕᖕᓄᑦ ᐅᖃᕐᐸᑦ, “ᒪᐅᖓ ᕾᓚᐅᕆᑦ,” ᐊᒃᐸᓯᖕᓂᕐᓴᒨᖁᔭᐅᒐᔭᕐᓂᕐᓂᑦ ᐊᖓᔪᖅᑳᕐᔪᐊᑉ ᑐᖏᓕᖏᑕ ᓇᔪᕐᓂᖓᓂᑦ, ᐃᔨᖕᓄᑦ ᑕᒪᓐᓇ ᑕᑯᓚᐅᕐᑍᑦ.

⁸ ᐃᖅᑲᕐᑐᐃᕕᖕᒧᑦ ᑐᐊᕕᕐᓂᐊᕐᓇᒃ; ᐱᔭᕇᕐᐸᑦ ᖃᓄᐃᓕᐅᕐᓂᐊᕋᕕᑦ, ᐃᓅᖃᑎᕕᑦ ᑲᓐᖑᓇᕐᑐᒦᑎᑉᐸᑎᑦ?

⁹ ᐸᓯᒃᓕᕈᑎᒋᔧᑦ ᐃᓅᖃᑎᖕᓄᑦ ᐂᕙᑦᔪᑎᒋᒍᕕᐅᒃ, ᓴᖅᑭᑎᑦᓯᓂᐊᕐᓇᒃ ᐊᓯᕕᑦ ᐃᔨᕐᓯᒪᔭᖓᓂᒃ,

¹⁰ ᐃᓕᖕᓂᒃ ᑐᓵᔪᒥᑦ ᑲᓐᖑᓱᒃᑎᑕᐅᖁᓇᒃ, ᐅᖃᐅᓯᐅᓃᓪᓗ ᐱᐅᖏᑦᑐᒥᒃ ᐃᓱᓕᓐᓂᐊᓐᖏᓚᖅ.

¹¹ ᐅᖃᐅᓯᖅ ᓇᓛᒎᕐᑐᒥᒃ ᐅᖃᐅᓯᐅᔪᖅ ᐊᑦᔨᖃᕐᐳᖅ ᐋᐳᓂᒃ ᒎᓗᓂᒃ ᓯᐅᓪᕕᕆᒥᒃ ᐊᓪᓕᕋᖃᕐᑐᓂᒃ.

¹² ᓲᕐᓗ ᓯᐅᑎᒥᐅᑕᖅ ᒎᓗ ᐅᕝᕙᓗ ᐱᐅᓴᐅᑎ ᒎᓗᑦᓯᐊᖅ, ᓯᓚᑐᔫᑉ ᐃᓂᕐᑎᕆᓂᖓ ᓯᐅᑎᒧᑦ ᓈᓚᑦᓯᐊᕐᑐᒧᑦ.

¹³ ᓲᕐᓗ ᐊᐳᑎᐅᑉ ᓂᒡᓕᓇᕐᓂᖓ ᐱᕈᕐᑐᓂᒃ ᑲᑎᕐᓱᐃᕕᖕᒥ, ᑎᓕᔭᐅᔫᑉ ᑲᔪᓯᑦᓯᐊᕐᓂᖓ ᑎᓕᔨᒥᓄᑦ, ᐊᖓᔪᖅᑳᒥ ᑕᕐᓂᖓ ᓲᖑᓯᑎᑉᐹ.

¹⁴ ᓄᕗᔭᒥᒃ ᐊᓄᕆᒥᒡᓗ ᓯᓚᓗᒃᑎᑦᓯᖏᑦᑐᒥᒃ ᐊᑦᔨᖃᕐᐳᖅ ᓇᓪᓕᐊᑦ ᐱᐅᔪᕆᔪᖅ ᑐᓂᓯᓂᕋᕐᑐᖅ ᑐᓂᓯᓇᓂᓗ.

¹⁵ ᕿᓄᐃᓵᕐᓂᒃᑯᑦ ᐊᖓᔪᖅᑳᕐᔪᐊᖅ ᐃᓱᒪᓕᐅᕐᑕᐅᔪᓐᓇᕐᒪᑦ, ᐅᖃᕐᒧᓪᓗ ᓂᑲᒍᓱᒃᑐᒧᑦ ᓴᐅᓂᖅ ᓇᑲᑕᐅᔪᓐᓇᕐᐳᖅ.

¹⁶ ᕼᐊᓂᒥᒃ ᓇᓂᓯᒍᕕᑦ, ᐃᓕᖕᓄᑦ ᓈᒻᒪᒃᑐᒥᒃ ᑭᓯᐊᓂ ᓂᕆᒋᑦ, ᐊᖏᓗᐊᕐᑐᒥᒃ ᓂᕆᒍᕕᑦ ᒥᕆᐊᑐᐃᓐᓇᕆᐊᖃᕋᕕᑦ.

¹⁷ ᐊᑯᓔᓗᐊᕐᑐᒥᒃ ᐃᓅᖃᑎᕕᑦ ᐃᒡᓗᖓᓄᑦ ᐃᑎᖃᑦᑕᕐᓇᒃ, ᐃᕿᐊᓐᖑᕈᓂᑎᑦ ᐆᒥᒋᔪᓐᓇᕐᒪᑎᑦ.

¹⁸ ᐊᖑᑦ ᓴᒡᓗᑎᖃᕐᑐᖅ ᐃᓅᖃᑎᒥᓂᖅ, ᐊᑦᔨᖃᕐᐳᖅ ᐊᓇᐅᑕᕐᒥᒃ, ᓴᕕᒡᔪᐊᒥᒡᓘᓐᓃᑦ, ᖃᕐᔪᒥᒡᓘᓐᓃᑦ ᐃᐱᒃᑐᒥᒃ.

¹⁹ ᓱᓕᔪᕐᓴᕐᑐᖅ ᐊᖑᒻᒥᒃ ᑲᔪᓯᔪᓐᓇᖏᑦᑐᒥᒃ ᐃᓱᐊᖏᑦᑐᖃᕐᑎᓪᓗᒍ, ᐊᑦᔨᖃᕐᐳᖅ ᑭᒍᓯᕆᓂᕐᒥᒃ, ᐃᑎᒐᖕᓂᒡᓗ ᐱᒡᓗᐃᓯᒪᔪᓂᒃ.

²⁰ ᐃᓐᖏᕐᕕᖃᕐᑐᖅ ᐆᒻᒪᑎᒥᒍᑦ ᐅᖁᒤᒃᓴᕐᑐᒧᑦ ᐊᑦᔨᖃᕐᐳᖅ ᐊᓐᓄᕌᒥᓂᒃ ᐲᕐᓯᔪᒥᒃ ᓯᓚ ᓂᒡᓚᓱᒃᑎᓪᓗᒍ, ᐊᒻᒪᓗ ᕕᓂᒐᒥᒃ ᐃᑭᒧᑦ ᑯᕕᔭᐅᔪᒥᒃ.

²¹ ᐊᑭᕋᕐᑐᕐᑏᑦ ᑳᒃᐸᑦ ᓂᐊᖂᔭᒥᒃ ᓂᕆᑎᒍᒃ; ᐃᒥᕈᒃᐸᓪᓗ ᐃᒪᕐᒥᒃ ᐃᒥᕐᑎᒍᒃ;

²² ᑍᒤᓕᐅᕈᕕᑦ ᐊᐅᒪᓂᒃ ᐃᑯᒪᓕᖕᓂᑦ ᓂᐊᖁᖓᓄᑦ ᐃᓕᐅᖅᑬᓂᐊᕐᐳᑎᑦ, ᐊᑕᓂᐅᓪᓗ ᐊᑭᓕᕈᒫᕐᐹᑎᑦ.

²³ ᐊᓄᕆ ᐅᓐᓄᐊᓪᓗᐊᒥᑦ ᐱᔪᖅ ᓯᓚᓗᖕᒥᒃ ᓇᒃᓴᕐᒪᑦ, ᐅᖃᕐᓗ ᐊᑭᓂᐊᕐᑐᖅ, ᓂᓐᖓᐅᒪᓂᕐᒥ ᑕᑯᒃᓴᐅᑎᑦᓯᕗᖅ.

²⁴ ᐱᐅᓂᕐᓴᐅᕗᖅ ᐃᓂᖃᕐᓗᓂ ᐃᒡᓘᑉ ᖁᓚᑕ ᑎᕆᖅᑯᐊᓂ, ᐃᒡᓗᒥᐅᖃᑎᖃᕆᐊᒥᑦ ᐊᕐᓇᒥᒃ ᐂᕙᔪᒪᔪᒥᒃ.

²⁵ ᐃᒥᖅ ᓂᒡᓕᓇᕐᑐᖅ ᑕᕐᓂᕐᒧᑦ ᐃᒥᕈᒃᑐᒧᑦ ᐊᑦᔨᖃᕐᐳᖅ, ᑐᓴᕈᒥᓇᕐᑐᒥᒃ ᑐᓴᕐᑎᑕᐅᓂᖅ ᓄᓇᒥᑦ ᐅᖓᓯᒃᑐᒥᑦ.

²⁶ ᐊᖑᑦ ᐃᓱᐊᕐᑐᖅ ᐃᓱᒪᓕᐅᕐᑕᐅᒃᐸᑦ ᐱᐅᖏᑦᑐᓕᔪᒧᑦ ᐊᑦᔨᖃᕐᐳᖅ ᐳᐊᓚᕕᖕᒥᒃ ᒪᕐᕋᕐᒥᒃ ᐃᒥᕐᑕᕐᕕᖕᒥᒡᓗ ᓱᕈᕐᓯᒪᔪᒥᒃ.

²⁷ ᐱᐅᓐᖏᓚᖅ ᐊᖏᓗᐊᕐᑐᒥᒃ ᕼᐊᓂᒥᒃ ᓂᕆᒋᐊᖅ, ᑍᒤᒃᑭᕗᖅ ᓇᖕᒥᓂᖅ ᓂᕐᑐᕐᑕᐅᒍᑎᒃᓴᒥᒃ ᕿᓂᕆᐊᖅ ᓂᕐᑐᕐᑕᐅᓂᒻᒪᕆᐅᓐᖏᓚᖅ.

²⁸ ᓇᓪᓕᐊᑦ ᓇᖕᒥᓂᕐᒥᓂᒃ ᐊᐅᓚᑦᓯᔪᓐᓇᖏᑦᑐᖅ ᐊᑦᔨᖃᕐᐳᖅ ᐃᒡᓗᒐᓴᒡᔪᐊᓂᒃ ᓯᖁᒥᓯᒪᔪᓂᒃ, ᐊᕙᓗᕐᔪᐊᖃᖏᑦᑐᓂᒃ.