ᓲᓗᒨᓂᐅᑉ ᐅᖃᓪᓚᖕᓂᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

-6-

¹ ᐊᖓᔪᖅᑳᒥᒃ ᐃᒃᓯᕙᖃᑎᖃᕈᕕᑦ ᓂᕆᖃᑎᒋᓂᐊᕐᓗᒍ, ᐅᑦᔨᕐᓱᑦᓯᐊᕆᑦ ᖃᐅᔨᒪᑦᓯᐊᕋᓱᐊᕐᓗᑎᑦ ᓱᓇᒥᒃ ᐱᑎᑕᐅᖕᒪᖔᕐᐱᑦ;

² ᓂᕆᓗᐊᕈᒪᓂᐊᓗᐃᑦ ᓄᖅᑲᕐᑎᑦᔪᒃ ᐊᖏᓗᐊᕐᑐᒥᒃ ᓂᕆᓂᐅᓴᓗᐊᕈᕕᑦ.

³ ᒪᒪᕆᔭᖏᓐᓂᒃ ᐱᔪᒪᓂᐊᕐᓇᒃ, ᑍᒤᑦᑐᑦ ᐅᐃᕕᕆᒃᓯᕐᒪᑕ.

-7-

⁴ ᐱᓇᓱᐊᕐᓂᕐᒧᑦ ᑕᖃᑐᐃᓐᓇᕐᓂᐊᕐᓇᒃ ᐊᒃᓱᐃᓕᔪᒪᓂᕐᒧᑦ; ᓯᓚᑐᓂᖃᕆᓪᓕ, ᓄᖅᑲᖓᔪᓐᓇᕐᓗᑎᑦ.

⁵ ᐊᒃᓱᐃᓕᕐᓂᖅ ᐃᔨᖕᓄᑦ ᑕᑯᒐᕕᐅᒃ, ᑕᕝᕔᓐᓇᖅ ᐊᓯᐅᕗᖅ; ᐊᒃᓱᐃᓐᓂᖅ ᐃᓴᕈᖃᕐᑐᑎᑐᑦ ᑎᖏᔪᑐᑦ ᑍᒤᒻᒪᑦ; ᓇᒃᑐᕋᓕᒃᑐᑦ ᕿᓚᖕᒧᑦ ᑎᖏᔪᑐᑦ.

-8-

⁶ ᒥᖕᓂᑐᔫᑉ ᓂᐊᖂᔭᖓᓂᒃ ᓂᕆᓂᐊᕐᓇᒃ, ᒪᒪᕆᔭᖏᓐᓂᒡᓘᓐᓃᑦ ᐱᔪᒪᓂᐊᕐᓇᒃ;

⁷ ᐆᒻᒪᑎᒥᒍᑦ ᐃᓱᒪᒋᔭᓂ, ᐃᓕᖅᑯᓯᕆᖕᒪᒋᑦ, “ᓂᕆᒋᑦ ᐃᒥᕐᓗᑎᓪᓗ” ᐃᓕᖕᓄᑦ ᐅᖃᕐᐳᖅ; ᐆᒻᒪᑎᖓᑕᓕ ᐃᓚᒋᓐᖏᓛᑎᑦ.

⁸ ᓂᕿ ᑕᒧᐊᔧᑦ, ᒥᕆᐊᕆᓂᐊᕐᐸᑦ, ᐅᖃᐅᓯᕐᑎᓪᓗ ᐱᐅᔪᑦ ᑕᒪᐅᖓᑐᐃᓐᓈᕐᓂᐊᕐᐳᑦ.

-9-

⁹ ᐅᖃᕐᓂᐊᕐᓇᒃ ᓯᓔᑦᑐᖅ ᑐᓵᑎᓪᓗᒍ, ᐅᖃᐅᓯᕐᑎᑦ ᓯᓚᑐᔪᑦ ᓇᕐᕈᒋᓂᐊᕐᒪᒋᑦ.

-10-

¹⁰ ᓄᓇᒥ ᓇᓗᓁᒃᑯᑕᑐᖃᕐᒥᒃ ᐲᕐᓯᓂᐊᕐᓇᒃ, ᐊᑖᑕᖃᖏᑦᑐᓪᓗ ᓄᓇᖁᑎᖓᓂ ᐃᓂᖃᕐᓂᐊᕐᓇᒃ;

¹¹ ᑍᒤᑦᑐᑦ ᓴᐳᑦᔨᔨᖓᑦ ᐊᔪᒐᖃᖏᑦᑑᖕᒪᑦ; ᐃᖅᑲᕐᑐᕐᑕᐅᑦᔪᑎᒃᓴᕐᓂᒃ ᐱᓇᓱᐊᕈᓐᓇᕐᒪᑦ.

-11-

¹² ᐃᓱᒤᑦ ᐊᑐᕈᒃ ᐃᓕᓐᓂᐊᕐᑎᑕᐅᔪᒪᓂᕐᒧᑦ, ᓯᐅᑏᒃᑭᒡᓗ ᐅᖃᐅᓯᕐᓄᑦ ᖃᐅᔨᑎᑦᓯᔪᓄᑦ.

-12-

¹³ ᓄᑕᕋᐅᑉ ᐋᖅᑭᒋᐊᕆᐊᖃᕐᓂᖓ ᖄᖏᕐᑎᓐᓂᐊᕐᓇᒍ, ᐊᓇᐅᑕᕐᒧᑦ ᐊᓇᐅᒐᓗᐊᕈᕕᐅᑉ ᑐᖁᓂᐊᖏᒻᒪᑦ.

¹⁴ ᐊᓇᐅᑕᕐᒧᑦ ᐊᓇᐅᓕᕈᕕᐅᒃ, ᑕᕐᓂᖓ ᓴᐳᑎᓂᐊᕐᐸᑦ ᑐᖁᒥᑦ.

-13-

¹⁵ ᐃᕐᓃᒃ, ᐆᒻᒪᑏᑦ ᓯᓚᑐᒃᐸᑦ, ᐆᒻᒪᑎᒐᑦᑕᐅᖅ ᖁᕕᐊᓱᖃᑕᐅᓂᐊᕐᐳᖅ;

¹⁶ ᑕᕐᓂᕋ ᐊᓕᐊᓁᒍᓱᖕᓂᐊᕐᐳᖅ ᖃᓃᑦ ᓇᓛᒎᕐᑐᓂᒃ ᐅᖃᓕᕐᐸᑦ.

-14-

¹⁷ ᐆᒻᒪᑏᑦ ᑐᓱᓂᐊᕋᓂ ᐊᔪᕐᑐᓕᔪᓂᒃ, ᐊᔪᐃᓐᓇᓕᕆᑦ ᐊᑕᓂᕐᒥᒃ ᓯᕘᕋᓂᕐᒥᒃ ᐅᓪᓗᖅ ᓈᓗᒍ.

¹⁸ ᓇᓗᓇᖏᑦᑐᒥᒃ, ᓯᕗᓂᒃᓴᕐᑕᖃᕐᒪᑦ, ᓂᕆᐅᒋᔧᑦ ᑭᐱᔭᐅᓂᐊᓐᖏᓚᖅ.

-15-

¹⁹ ᐃᕐᓃᒃ, ᑐᓵᒋᑦ, ᓯᓚᑐᓕᕐᓗᑎᓪᓗ, ᐃᓱᒤᑦ ᑕᓯᐅᕈᒃ ᐊᖅᑯᑎᒃᑯᑦ,

²⁰ ᕔᓂᒧᑦ ᐋᖓᔮᕐᑎᑦ ᐃᓚᒋᓂᐊᕐᓇᒋᑦ, ᓂᕿᒥᒡᓗ ᓂᕆᓗᐊᕐᐸᒃᑐᑦ;

²¹ ᐋᖓᔮᕐᑏᑦ ᓂᕆᓗᐊᕐᐸᒃᑐᓪᓗ ᐊᔪᕐᓴᓕᕈᒫᕐᒪᑕ, ᑐᑭᖃᖏᑦᑐᒥᒃ ᐃᓅᓯᖃᕐᓂᕐᒧᑦ ᐊᓐᓄᕌᕐᓗᓕᕐᓂᐊᕐᐳᑎᑦ.

-16-

²² ᐊᑖᑍᑦ ᓈᓚᒍᒃ ᐃᓕᖕᓂᒃ ᕿᑐᕐᖓᕐᑖᓚᐅᕐᑐᖅ, ᐊᓈᓁᓪᓗ ᓇᕐᕈᒋᓂᐊᕐᓇᒍ ᐃᓄᑐᖃᐅᓕᕐᐸᑦ.

²³ ᓱᓕᔪᖅ ᓂᐅᕕᐊᕆᒍᒃ, ᓂᐅᕐᕈᑎᒋᓂᐊᕐᓇᒍᓗ; ᓯᓚᑐᓂᕐᓗ ᓂᐅᕕᐊᕆᒍᒃ, ᐃᓕᓐᓂᐊᕐᑎᑕᐅᓂᕐᓗ, ᑐᑭᓯᑦᓯᐊᕐᓂᕐᓗ.

²⁴ ᐃᓱᐊᕐᑑᑉ ᐊᑖᑕᖓ ᐊᖏᔪᒥᒃ ᖁᕕᐊᓱᖕᓂᐊᕐᐳᖅ; ᓯᓚᑐᔪᒥᒡᓗ ᕿᑐᕐᖓᕐᑖᕐᑑᑉ ᕿᑐᕐᖓᓂ ᖁᕕᐊᓲᑎᒋᓂᐊᕐᐹ.

²⁵ ᐊᑖᑍᑦ ᐊᓈᓁᓪᓗ ᖁᕕᐊᓱᒃᑎᒃᑭᒃ, ᐃᓕᖕᓂᒃ ᐃᕐᓂᐊᖃᓚᐅᕐᑑᑉ ᖁᕕᐊᓲᑎᒋᓛᑎᑦ.

-17-

²⁶ ᐃᕐᓃᒃ, ᐆᒻᒪᑏᑦ ᐅᕙᓐᓄᑦ ᑐᓂᒍᒃ, ᐃᔨᖕᓄᓪᓗ ᐱᓂᐊᕐᓂᒃᑲ ᐅᑦᔨᕆᓗᒋᑦ.

²⁷ ᐊᕐᓇᖅ ᑮᓇᐅᔭᒧᑦ ᓄᓕᐊᒐᖅ ᐃᑎᔪᑐᑦ ᐃᑎᕐᓵᓗᒃᑐ ᑍᒤᒻᒪᑦ, ᐊᖑᓐᓂᐊᕐᑎᓗ ᐃᒥᕐᑕᕐᕕᒃᑐᑦ ᓂᕈᑭᑦᑐᑐᑦ ᑍᒤᑉᐳᖅ.

²⁸ ᐱᕋᔭᒃᑎᑐᑦ ᓇᓚᕗᖅ ᐅᑕᖅᑭᓪᓗᓂ ᓵᓚᒋᓂᐊᕐᑕᒥᓂᒃ, ᐅᒃᐱᕆᔭᒃᓴᐅᔪᓐᓃᕐᑎᑦᓯᓪᓗᓂ ᐊᖑᑎᓂᒃ.

-18-

²⁹ ᑭᓇ ᑲᑉᐱᓇᕐᑐᒦᑉᐸ? ᑭᓇ ᕿᒃᓵᖕᓇᕐᑐᒦᑉᐸ? ᑭᓇ ᐂᕙᓂᕐᒦᑉᐸ? ᑭᓇ ᐃᓱᐊᕆᓐᖏᑕᒥᓂᒃ ᐅᖃᐅᓯᖃᕐᐹ? ᑭᓇ ᐃᑭᓕᕐᑕᐅᓯᒪᕙ ᐱᑦᔪᑎᖃᖏᑦᑐᒧᑦ? ᑭᓇᐅᑉ ᐃᔨᖏᒃ ᐊᐅᐸᕐᓯᓯᒪᕚᒃ?

³⁰ ᑖᒃᑯᐊᖑᕗᑦ ᐊᑯᓂ ᕔᓂᒥᒃ ᐃᒥᕐᑐᑦ, ᑖᒃᑯᐊᖑᕗᑦ ᕿᓂᕐᑐᑦ ᕔᓂᒥᒃ ᐃᓚᓯᒪᔪᒥᒃ.

³¹ ᕔᓂᒥᒃ ᑕᑯᓐᓇᕐᓂᐊᕐᓇᒃ ᐊᐅᐸᕐᑑᑎᓪᓗᒍ, ᑕᑯᒥᓇᕐᑑᓗᓂ ᐃᒥᐅᑎᒥ, ᐄᓗᒍ ᐃᓱᐊᕐᑑᑎᓪᓗᒍ;

³² ᑭᖑᓂᖓᒍᑦ ᑮᓯᓂᐊᕐᐳᖅ ᖁᒡᓗᒋᐊᑎᑐᑦ, ᖃᓯᓕᓇᕐᓗᓂᓗ ᖁᒡᓗᒋᐊᑐᑦ ᑐᖁᓐᓇᕐᑐᑐᑦ.

³³ ᐃᔩᒃᑭᒃ ᑕᑯᓐᓇᓕᕐᓂᐊᕐᐴᒃ ᑕᑯᓕᒪᓇᖏᑦᑐᓂᒃ, ᐃᓱᒤᓪᓗ ᓂᓪᓕᐊᓕᕐᓗᓂ ᐱᐅᖏᑦᑐᐊᓗᖕᓂᒃ.

³⁴ ᐃᓛᒃ, ᐊᑦᔨᖃᓕᕐᓂᐊᕐᐳᑎᑦ ᐃᒪᕐᕕᐅᑉ ᕿᑎᖓᓂ ᓇᓚᔪᒥᒃ, ᐅᕝᕙᓘᓐᓃᑦ ᓇᐸᕈᑕᐅᑉ ᓄᕗᐊᓂ ᓇᓚᔪᒥᒃ, ᐅᖃᕐᓗᓂ:

³⁵ “ᑎᒡᓗᒃᑕᐅᒐᓗᐊᕋᒪ, ᐋᓐᓂᓚᐅᓐᖏᓚᖓ; ᐊᓇᐅᓕᕋᓗᐊᕐᒪᖓ ᐃᒃᐱᖕᓂᓚᐅᓐᖏᓚᖓ. ᖃᖓᓕ ᑐᐸᖕᓂᐊᕐᐳᖓ? ᐃᒥᕐᓂᐊᕐᑕᓐᓂᒃ ᕿᓂᒃᑲᓐᓂᕐᓂᐊᕋᒪ.”