ᓲᓗᒨᓂᐅᑉ ᐅᖃᓪᓚᖕᓂᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᓕᑕᕆᔭᐅᓂᖃᑦᓯᐊᕐᓂᖅ ᓂᕈᐊᕆᔭᒃᓴᐅᓂᕐᓴᐅᕗᖅ ᐊᒃᓱᐃᑦᑐᐊᓘᓂᕐᒥᑦ, ᖁᕕᐊᒋᔭᐅᓂᖅ ᐱᐅᓂᕐᓴᐅᕗᖅ ᓯᐅᓪᕕᕆᒥᑦ ᒎᓗᒥᓪᓗ.

² ᐊᒃᓗᐃᑦᑐᖅ ᐊᒃᓗᔪᕐᓗ ᐊᑕᐅᓯᕐᒥᒃ ᐊᑦᔨᒌᒍᑎᖃᕐᐴᒃ, ᐊᑕᓂᐅᑉ ᐱᓐᖑᕐᑎᓯᒪᔧᓐᓇᕆᖕᒪᒋᒃ.

³ ᐅᑦᔨᕐᓱᑦᓯᐊᕐᑐᖅ ᖃᐅᔨᒪᔭᕇᓲᖑᕗᖅ ᐱᐅᖏᑦᑐᖅ ᑎᑭᓚᐅᕐᑎᓐᓇᒍ ᓴᐳᑎᓯᒪᓇᓱᐊᕈᑎᒃᓴᒥᓂᒃ ᐱᓇᓱᐊᕐᓯᒪᔪᓐᓇᕐᐳᖅ, ᐅᑦᔨᕐᓱᑦᓯᐊᖏᑦᑐᕐᓕ ᖃᐅᔨᓚᐅᕋᓂ ᐱᐅᖏᑦᑐᒧᑦ ᑎᑭᐅᑎᑐᐃᓐᓇᓲᖑᕗᖅ.

⁴ ᒥᑭᒡᓕᑎᕐᓯᒪᓂᖅ ᐊᑕᓂᕐᒥᒡᓗ ᓯᕘᕋᒋᔭᖃᕐᓂᖅ ᐊᑭᓕᕐᑕᐅᕘᒃ ᐊᒃᓱᐃᓐᓂᕐᒥᒃ ᐅᐱᒋᔭᐅᓂᕐᒥᒃ ᐃᓅᓯᕐᒥᒡᓗ.

⁵ ᐅᕐᐲᑦ ᑲᑭᓐᓇᕐᑐᓖᑦ ᓂᒊᓪᓗ ᐱᑦᓯᐊᕈᓐᓇᖏᑦᑐᑦ ᐊᖅᑯᑎᖓᓃᑉᐳᑦ, ᐃᒻᒥᓂᒃ ᓴᐳᑎᓯᒪᔫᑉ ᑕᒪᒃᑯᐊ ᐅᖓᓯᒋᓂᐊᕐᐰᑦ.

⁶ ᓄᑕᖅᑲᑦ ᐱᒋᐅᕐᓴᕐᑕᐅᑦᓯᐊᕆᐊᖃᕐᐳᑦ ᐊᑐᕐᓂᐊᕐᑕᖏᓐᓂᒃ ᓈᒻᒪᒃᑐᒃᑯᑦ, ᐃᓐᓇᐅᓕᕈᓂᓗ ᐳᐃᒍᕐᓂᐊᓐᖏᓛ.

⁷ ᐊᒃᓱᐃᑦᑐᑦ ᐊᐅᓚᑦᓯᕗᑦ ᐊᒃᓱᔪᓂᒃ, ᐊᑦᑕᑐᕐᑎᓗ ᑭᒡᒐᕆᔭᐅᕗᖅ ᐊᑦᑕᑐᕐᑎᑦᓯᔨᒧᑦ.

⁸ ᐊᑦᔨᒌᒃᑎᑦᓯᖏᓐᓂᕐᒥᒃ ᑲᓐᖓᕐᓱᐃᔪᖅ ᕿᒃᓵᖕᓇᕐᑐᒥᒃ ᑲᑎᕐᓱᐃᓂᐊᕐᐳᖅ, ᓂᓐᖓᐅᒪᓂᖓᑕᓗ ᑲᑉᐱᐊᓇᕐᓂᖓ ᓵᓚᖃᕐᓂᐊᓐᖏᓚᖅ.

⁹ ᐃᖅᑲᓱᒃᐸᒃᑐᖅ ᐊᓯᒥᓂᒃ ᓮᒻᒪᕐᑎᑕᐅᓂᐊᕐᐳᖅ, ᐊᒃᓱᔪᓄᑦ ᑐᓂᓯᖃᑦᑕᕋᒥ ᓂᕿᖁᑎᒥᓂᒃ.

¹⁰ ᒥᑕᐅᑎᒃᓴᕐᑐᖅ ᐊᓂᑎᑕᐅᒃᐸᑦ ᐊᒃᓱᕈᕐᑎᑕᐅᓂᖅ ᐊᓂᓂᐊᕆᕗᖅ, ᐂᕙᓂᖅ ᓵᓚᓯᐊᖃᕐᓂᕐᓗ ᓄᖅᑲᕐᓂᐊᕆᕗᑦ.

¹¹ ᐆᒻᒪᑎᒃᑯᑦ ᐱᐅᖏᓐᓂᕐᑕᖃᖏᑦᑐᒥᒃ ᐱᔪᒪᓂᕐᐹᖃᕐᑐᖅ ᐅᖃᐅᓯᕐᒥᒍᓪᓗ ᓇᒡᓕᖕᓂᖃᑦᓯᐊᕐᑐᖅ ᐃᓚᓐᓈᖃᓕᕐᓂᐊᕐᐳᖅ ᐊᖓᔪᖅᑳᕐᔪᐊᕐᒥᒃ.

¹² ᐊᑕᓂᐅᑉ ᐃᔨᖏᒃ ᑕᑯᓐᓈᕐᐳᒃ ᖃᐅᔨᑎᑕᐅᔪᒥᒃ, ᐅᒃᐱᕐᓂᖃᖏᑦᑐᓪᓕ ᐅᖃᐅᓯᖏᑦ ᐊᑐᕐᑎᓐᖏᓔᑦ.

¹³ ᓱᓇᓕᕆᔪᒪᖏᑦᑐᖅ ᐅᖃᕐᐳᖅ, “ᓯᓚᒥ ᓛᔭᑕᓕᐊᓘᖕᒪᑦ ᐊᓂᒐᓗᐊᕈᒪ ᐅᒋᐊᕐᑕᐅᑐᐃᓐᓇᕐᓂᐊᕐᐳᖓ!”

¹⁴ ᐊᕐᓇᐅᑉ ᐊᖑᓐᓂᐊᕐᑎᐅᑉ ᖃᓂᖓ ᐃᑎᕐᓴᕐᔪᐊᑎᑐᑦ ᑍᒤᑉᐳᖅ, ᐊᑕᓂᐅᑉ ᓈᒻᒪᒋᓐᖏᑕᖓ ᑕᕝᕗᖓ ᐃᔪᒃᑲᕐᓂᐊᕐᐳᖅ.

¹⁵ ᓯᓔᓐᓂᖅ ᓄᑕᖅᑲᑦ ᐆᒻᒪᑎᖏᓐᓃᑉᐳᖅ, ᐊᓇᐅᑕᐅᓪᓕ ᐋᖅᑭᒋᐊᕐᓯᓂᐅᑉ ᓯᓔᓐᓂᖅ ᐊᓂᑎᓐᓂᐊᕐᐹ ᑖᑦᓱᒪᓐᖓᑦ.

¹⁶ ᐊᒃᓱᔪᓂᒃ ᐅᖁᒤᑦᑐᒦᑎᑦᓯᔪᖅ ᐊᒃᓱᐃᓕᕈᒪᓗᓂ, ᐊᒃᓱᐃᑦᑐᓄᓪᓗ ᑐᓂᓯᖃᑦᑕᕐᑐᖅ, ᐊᔪᕐᓴᕐᓇᕐᑐᒧᑦ ᑎᑭᓐᓂᐊᕐᐴᒃ.

ᓯᓚᑐᔪᑦ ᐅᖃᐅᓰᑦ ᐅᖃᕐᓯᒪᔭᖏᑦ 30ᐅᔪᑦ

¹⁷ ᓯᐅᑏᒃᑭᒃ ᓈᓚᒃᓕᒃ, ᑐᓵᒋᑦ ᓯᓚᑐᔫᑉ ᐅᖃᐅᓯᖏᓐᓂᒃ, ᐃᓱᒤᑦ ᐊᑐᓕᕈᒃ ᖃᐅᔨᒪᓂᓐᓄᑦ;

¹⁸ ᖁᕕᐊᓇᕐᓂᐊᕐᒪᑦ ᐃᓗᖕᓂ ᐱᓯᒪᒍᕕᒋᑦ, ᖃᐅᔨᒪᓂᒃᑲ ᐅᖃᐅᓯᕆᖃᑦᑕᕐᓗᒋᑦ.

¹⁹ ᐊᑕᓂᕐᒥᒃ ᑕᑎᖃᓕᖁᓪᓗᑎᑦ, ᐅᓪᓗᒥ ᐃᓕᖕᓄᑦ ᖃᐅᔨᔭᐅᑎᑉᐸᒃᑲ, ᐃᓛᒃ ᐃᓕᖕᓄᑦ.

²⁰ ᑎᑎᕋᕐᕕᒋᓚᐅᓐᖏᓚᒌᑦ ᐅᖃᐅᓯᕐᓂᒃ 30ᓂᒃ ᐃᑲᔪᕐᓯᒋᐊᕐᓂᕐᒥᒃ ᖃᐅᔨᑎᑕᐅᓂᕐᒥᒡᓗ?

²¹ ᖃᐅᔨᓕᖁᓪᓗᑎᑦ ᓱᓕᔪᓂᒃ ᓈᒻᒪᒃᑐᓂᒃᓗ ᐅᖃᐅᓯᕐᓂᒃ, ᑭᐅᑦᔪᑎᒃᓴᖃᖁᓪᓗᑎᓪᓗ ᐅᖃᐅᓯᕐᓂᒃ ᓱᓕᔪᓂᒃ ᐃᓕᖕᓂᒃ ᑎᓕᓯᔪᓄᑦ.

-1-

²² ᐊᒃᓱᔪᑦ ᑎᒡᓕᒐᕐᕕᒋᑦᑍᓕᒃᑭᑦ ᐊᒃᓱᓂᖓ ᐱᑦᔪᑎᒋᓗᒍ, ᐅᖁᒤᒃᓴᕐᑐᓂᒡᓗ ᐊᒃᓱᕈᕐᓇᕐᑐᒦᑎᑦᓯᖃᑦᑕᖏᓪᓗᑎᑦ;

²³ ᐊᑕᓂᐅᑉ ᓯᕐᓈᓕᑐᐃᓐᓇᕆᐊᖃᕐᒪᒋᑦ ᑍᒤᑦᑑᓂᖏᑦ ᐱᓪᓗᒋᑦ, ᑎᒡᓕᒐᕐᕕᒋᑐᐃᓐᓇᕆᐊᖃᕐᒪᒋᑦ ᐃᓅᓯᖏᓐᓂᒃ ᑖᒃᑯᓂᖓ ᑎᒡᓕᒐᕐᕕᖃᕐᑐᑦ.

-2-

²⁴ ᐃᓚᓐᓈᕐᑖᕋᓱᐊᕐᑍᓕᒋᑦ ᓂᓐᖓᒃᓴᕅᑦᑐᒥᒃ, ᓂᓐᖓᒃᑳᓗᖕᒥᒡᓗ ᐃᓅᖃᑎᑖᕋᓱᐊᕐᓂᐊᕐᓇᒃ.

²⁵ ᐃᓕᖅᑯᓯᕆᔭᖏᓐᓂᒃ ᐃᓕᖅᑯᓯᕐᑖᕈᓐᓇᕋᕕᑦ, ᓂᒐᕐᑎᑕᐅᔪᑎᑐᑦ ᐊᔪᓕᕐᑎᑕᐅᔪᓐᓇᕋᕕᑦ.

-3-

²⁶ ᐃᓚᒋᔭᐅᑦᑍᓕᒋᑦ ᑍᒃᑯᓄᖓ ᑎᒎᑎᓂᒃᑯᑦ ᐊᖏᖃᑎᒌᒍᑎᓕᐅᓲᓄᑦ, ᐊᑭᓖᑦᔪᑦᔨᔭᕆᐊᖃᓕᕐᓗᑎᑦ ᐊᓯᕕᑦ ᐊᑭᓕᒃᓴᖏᓐᓂᒃ.

²⁷ ᐊᑭᓕᐅᑎᒃᓴᖃᕈᓐᓃᕈᕕᑦ ᐊᑭᓕᕈᓐᓇᕐᓂᐊᕐᓯᒪᔭᕐᓂᒃ, ᐃᒡᓕᕐᓂᒃ ᓯᓂᒡᕕᒋᕙᒃᑕᕐᓂᒃ ᐊᕐᓵᕐᑕᐅᖁᓇᒃ.

-4-

²⁸ ᓄᓇᐅᑉ ᐊᕕᒃᑐᕐᓯᒪᓂᖓᓄᑦ ᓇᓗᓁᒃᑯᑕᕐᓂᒃ ᐃᓕᓯᒪᔪᑐᖃᕐᓂᒃ ᐲᔧᑦᑍᓕᒋᑦ, ᓯᕗᓕᕕᓂᕐᐱᑦ ᐋᖅᑭᒃᓱᓚᐅᕐᑕᕕᓂᖏᓐᓂᒃ.

-5-

²⁹ ᐱᓇᓱᐊᕐᓯᑎᐊᓗᖕᒥᒃ ᖃᐅᔨᒪᕖᑦ? ᑖᓐᓇ ᓇᖏᕈᒫᕐᐳᖅ ᐊᖓᔪᖅᑳᕐᔪᐊᑉ ᓵᖓᓂ; ᐃᓄᑐᐃᓐᓁᑦ ᓵᖓᓐᓂ ᓇᖏᕈᒫᓐᖏᓚᖅ.